Ukulingana ne Mateyo
1 Ibuku lino likalanda pe Yesu Klistu,* umwana Devedi, e mwana Abrahamu:
2 Mwe Abrahamu mwafumile Isaki;
Mwe Isaki mwafumile Yakobi;
Mwe Yakobi mwafumile Yuda na wanyina;
3 Mwe Yuda mwafumile Peresi ne Zera, wano wapapizile mwe Tamari;
Mwe Peresi mwafumile Hezroni;
Mwe Hezroni mwafumile Ramu;
4 Mwe Ramu mwafumile Aminadabu;
Mwe Aminadabu mwafumile Nashoni;
Mwe Nashoni mwafumile Salumoni;
5 Mwe Salumoni mwafumile Boasi, wino wapapizile mwe Rahabu;
Mwe Boasi mwafumile Obedi, wino wapapizile mwe Ruti;
Mwe Obedi mwafumile Jesi;
6 Mwe Jesi mwafumile Devedi imfumu.
Mwe Devedi mwafumile Solomoni, wino wapapizile mwe muka Uriya;
7 Mwe Solomoni mwafumile Rehoboamu;
Mwe Rehoboamu mwafumile Abiya;
Mwe Abiya mwafumile Asa;
8 Mwe Asa mwafumile Yehoshafati;
Mwe Yehoshafati mwafumile Yolamu;
Mwe Yolamu mwafumile Uziya;
9 Mwe Uziya mwafumile Yotamu;
Mwe Yotamu mwafumile Ahazi;
Mwe Ahazi mwafumile Hezekiya;
10 Mwe Hezekiya mwafumile Manase;
Mwe Manase mwafumile Amoni;
Mwe Amoni mwafumile Yoshiya;
11 Mwe Yoshiya mwafumile Yekoniya na wanyina pa mpindi yino walinji mupipi nu kuwatwala mu wuzya ku Babiloni.
12 Pano walinji mu wuzya ku Babiloni, Yekoniya wakwasile Salatyeli;
Mwe Salatyeli mwafumile Zerubabeli;
13 Mwe Zerubabeli mwafumile Abiudi;
Mwe Abiudi mwafumile Eliakimu;
Mwe Eliakimu mwafumile Azori;
14 Mwe Azori mwafumile Zadoki;
Mwe Zadoki mwafumile Akimu;
Mwe Akimu mwafumile Eliudi;
15 Mwe Eliudi mwafumile Eliazari;
Mwe Eliazari mwafumile Matani;
Mwe Matani mwafumile Yakobi;
16 Mwe Yakobi mwafumile Jozefu e muka Mariya. E Mariya awili e mama wa kwe Yesu wino akakwitwa ukuti Klistu.
17 Ukufumilila pe Abrahamu ukufika pe Devedi palinji inkulo 14. Ne ukufumilila pe Devedi ukufika pano wawasendezile mu wuzya ku Babiloni palinji inkulo 14. Apano ukufumilila pano wawasendezile mu wuzya ku Babiloni ukufika kwe Klistu, papisile inkulo 14.
18 Wo-o avino calinji pano e Yesu Klistu atani akwatwe. E Mariya wizile awa pa wukulu ku muzimu wa kwe Leza.* Pe yo-o impindi lyo wimalwa kwe Jozefu. 19 E Jozefu walinji amulungamane swinya atalondanga ukusewanya Mariya. Acino wasozilepovye ukuti visile* ukwasowa ukuti wumwi amanye. 20 Walile welenganya pe vyonsinyenye vyo-o, waponecile. Paponye umungeli wa kwe Yehova* walolecezile kwe weliwe mu ciloto. Amunena ati: “Jozefu, mwana wa kwe Devedi, utatina ukutwala Mariya, amuno uwuula wuno ali nawo wufumile ku muzimu wa kwe Leza. 21 Alikwata umwana umonsi. Uyize umupe izina lyakuti Yesu.* Amuno alipususya awantu wakwe. Awaluwule ku luwembu lwawo. 22 Vyonsinyene vyo-o vyacitisile, swinya vyaficilisizye cino Yehova* walanzile mwe kasesema wakwe ukuti: 23 “Lolani! E mwali* aliwa pa wukulu nu kukwata umwana umonsi. Swinya walimwinika ukuti Emmanueli, izina lino likapiliwula ukuti, “E Leza Ali Naswe.”
24 Walile Jozefu waziwuka, wayile atwala Mariya ndi wulyanye vino umungeli wa kwe Yehova* wamunenile. 25 Nomba asitela asunkane nawe ukuti wapange itwala. Mpaka pano Mariya wizile akwata umwana umonsi. Amupa izina lyakuti Yesu.