Ukulingana ne Mateyo
10 Nga Yesu ayita awasambi wakwe 12 nu kuwapa amaka yakufumizya imizimu imiwipe na yakupozezya izya ndwala impusane-pusane.
2 Amazina ya wasambi 12 yalinji we: Simoni (wino witwanga ukuti Petro) nu muzuna wakwe, e Andreya; e Jemusi ne Yohani umunyina, wa mwana Zebedi; 3 E Filipu, e Bartolomeyo, e Tomasi, e Mateyo wino wasoncezyanga imisonko, e Tadeyu, e Jemusi umwana wa kwe Alifeyo; 4 e Simoni Umwina Kenani;* ne Yuda Skarioti wino mukupita kwa mpindi wizile akazya Yesu.
5 E Yesu watumile wa-a awasambi wakwe 12 nu kuwanena ukuti: “Mutaya mukuwizya ku wantu wano asa wa Yuda, swinya mutaya mukuwizya mu musumba uwuli wonsinye uwa wina Samariya; 6 Lelo muwaya lyonsinye ku ng’anda ya kwe Israeli wano wawa ngati ang’onzi insowe. 7 Pano mukuya, muwawizya ukuti: ‘Uwufumu wa mwi yulu wupalamizile.’ 8 Mwapozya awalwale, mwazyulupula awafwe, mwapozya na wa mambombo* swinya mwawinga ni mizimu imiwipe. Amuno Leza wamipile uwilanye namwenye mwapavye uwila. 9 Mutasenda indalama zye goldi nanti e silva nanti imisango zinji izya ndalama mutwa kusendelamo indalama, 10 nanti avyola pano mukuya pa wulendo, amuno umuwomvi wazipila ukupocelela ivyakulya. Swinya mutasenda ivizwalo viwili,* ivyakucinja, nanti andyatu ziwili nanti ansonzo ya pambali.
11 “Mu musumba wonsinye nanti akaya kano mwinjilamo, vwambani umuntu wino angakunda ukwivwa, swinya akuno mwikale mpaka mwize mufumemo. 12 Mu ng’anda iyili yonsinye yino mwinjilamo, mwalamuka wano mwazana. 13 Nga umweni wa ng’anda akulondesya ukwivwa lekani umutende winu wuwe pe weliwe, lelo nga asakulonda ukwivwa, lekani umutende wunyocele kwe mwemwe. 14 Konsinye kuno umuntu wakana ukumipocelela nanti ukwivwa ku mazwi yinu, pano mukufuma mwe yoyo ing’anda nanti mu musumba, mwasya amukunta itukumbu ku matamba yinu. 15 Nkuminena nkuti, ivintu vilipepuka ku musumba wa Sodomu ne Gomora pa wanda wa wupinguzi ukulusya kwe wowo umusumba.
16 “Lolani! Nkumituma ngati ang’onzi mwa mumbwe,* acino mwize muwe awacenjele ngati anzoka lelo awakayele ngati ankunda. 17 Muwacenjela ku wantu, amuno walimitwala ku ma koti swinya walimyuma mu masinagogi yawo. 18 Swinya walimitwala kwa kateka na ku zyamfumu pa mulandu wane pakuti mwize mukawalandile, nu kulandila awantu wa munsi pe vino mwazumilamo. 19 Lelo nga wamilema, mutize muwasakamala pa nzila yino mulilandilamo nanti vino mulilanda, amuno Leza aliminena ivyakulanda pe yilyanye impindi. 20 Asa mwe wano muliwalanda, lelo umuzimu wa Mukwasi winu awuno wuliwamilandilako. 21 Swinya umunyina alikomesya umunyina, ne yisi alikomesya umwana wakwe, ne awana walipilucila awakwasi wawo nu kuwakomesya 22 Awantu wonsinye walimipata pa mulandu ni zina lyane. Lelo wino alisipicizya* ukufika na ku nsilo awino alipusuka 23 Nga cakuti wamicuzya ku musumba wumwi, samalilani ku musumba wunji. Amuno nkuminena nkuti, mutalimala ukuzinguluka imisumba ya mu Israeli, lyo Umwana wa muntu wafika.
24 “Umusambi atanga acile umusambilizya wakwe, nanti umuzya ukulusya yisikulu. 25 Cawa icetenye umusambi ukuwa ngati amusambilizya wakwe, nu muzya ukuwa ngati we yisikulu. Amuno nga wakapunda umweneco wa ng’anda ukuti Belizebuli,* lyo awamung’anda yakwe waliwapunda icili conganye. 26 Acino mutati mwawatina, amuno vyonsinye vino vyavwama vilisokoloka, ni vyankama vyonsinye, vilimanyikwa. 27 Vyonsinye vino nkuminena mu nkama, mwavilanda pa wantu awavule, na vino nkamitokotezya, viwizizyani pa misonje. 28 Mutatina wano wangamikoma wano watawa na maka yakumilesya ukwizawa nu wumi wa muyayaya, lelo mwatina wino angamyonona umuyayaya.* 29 Awantu wakakazya utunyunyi ututici* mwe koinivye* wenga. Lelo nanti konganye kapona pansi, Umukwasi winu akamanya. 30 Lelo wapenda ni nyele zya ku mitwe yinu. 31 Acino mutatina, amuno mwacindama ukucila to-o utunyunyi.
32 “Wensinye wino walanda pa wantu awavule ukuti amusambi wane, naninye ndilanda pa nkolelo ya kwe Tata wino wawa mwi yulu ukuti amusambi wane. 33 Lelo wensinye wino wankanila pa wantu ukuti atamanya, naninye ndiya nkamukanile pe Tata wino wawa mwi yulu ukuti ntamumanya. 34 Mutalola ngati niza mukuleta umutende munsi; Lelo niza mukupusanya awantu. 35 Amuno niza mukupusanya e yisi nu mwana umonsi, umwana umwanaci ne mama wakwe, nu mukazyana umutwalwe ne nyinavyala. 36 Nkuminena nkuti, awantu waliwapata ku wa mung’anda yawonye. 37 Wensinye wino wakunda sana e yisi, nanti e mama wakwe nanti awana wakwe ukucila nene, atazipizile ukuwa umusambi wane. 38 Swinya wensinye wino asisenda icimuti cakwe ica kumucuzizyapo* nu kunkonka, atazipizile ukuwa amusambi wane. 39 Wensinye wino akakwelezya ukupususya uwumi wakwe, aliwusovya; lelo wino wawusovya pa mulandu wakuti amusambi wane, aliwuzana na swinya.
40 “Wino wapocelela mwemwe lyo wapocelela na nene, ne wino wampocelela lyo wapocelela na Wino wantumile. 41 Wensinye wino wapocelela kasesema pa mulandu wakuti we kasesema, alipocelela icilambu ca kwe kasesema, na wensinye wino wapocelela umuwomvi wa kwe Leza pa mulandu wa kuti amuwomvi wa kwe Leza, alipocelela icilambu ca muwomvi wa kwe Leza. 42 Swinya wensinye wino wapa wenga pe wa-a awayicefye e kapu mutupunye muno muli aminzi amatalale pa mulanduvye wakuti amusambi wane, nkuminena nkuti, alilambulwa.