Ukulingana ne Marko
14 Nomba kwasyazilevye amanda yawili pakuti kuwe Icakupitililwa nu Kuzevya kwa Mukate uwasowa ukututumuka. Intunguluzi zya simapepo na wakasambilizya wa masundo, wavwambanga inzila yino walinji nu kulemelamo Yesu nu kumukoma; 2 lelo walandanga wakuti: “Tutiza tumuleme pa wanda wakuzevya, amuno awantu wangiza wakatusye ivyongo.”
3 Pano Yesu walinji ku Betani mu ng’anda ya kwe Simoni wino wapozizye amambombo,* umwanaci wumwi wizile kwe weliwe lyo asenzile ni botolo lya mafuta amanuncile nkaninye aye nardi, yalinji aya mutengo nkaninye. Wiyuzile ibotolo lya mafuta nu kwitila Yesu pa mutwe. 4 Wamwi pe wano walinjimo wativwile icete, acino watalisile ukulanzyanya wakuti: “Acani cino wononela amafuta amanuncile? 5 Amuno ya-a amafuta nga tewayakazya pa madenari* ukucila pe 300 nu kupa indalama ku wapina! Acino wafuzilwe nkaninye pe vino we-e umwanaci wacisile. 6 Lelo e Yesu wawanenile ati: “Mulekani. Nga cani cino mukumucuzizya? Ancitizile icintu icizima nkaninye. 7 Amuno awapina mulilanga mwawa nawo lyonsinye, swinya mungawacitila consinye cino mukulonda, lelo nene mutalitwalilila ukuwa nani. 8 Acisile vino azipizile ukucita; Ayitizile amafuta amanuncile pa muwili wane, pa kupekanizizya umuwili wane ukuzikwa. 9 Nkuminena nkuti, pano waliwawizya ilyasi ilizima mu nsi yonsinye, waliwalanda na pe vyonye vino we-e umwanaci acisile ku kumwizucila.”
10 E Yuda Skarioti wino walinji pa wasambi 12, wayile ku ntunguluzi zya simapepo mukuwanena vino walinji nu kuwavwa ukulema Yesu. 11 Nawo pano wivwile vyo-o, wakunzile nkaninye swinya wamulayile nu kuti walinji nu kumupa indalama zye silva. Acino e Yuda watalisile ukuvwambilizya inzila yino walinji nu kukazizyamo Yesu.
12 Pa wanda wakutalicilako uwa Kuzevya kwa Mukate Uwasowa Ukututumuka, pano wakomile inyama zya cakupitililwa, awasambi wakwe wamunenile ati: “Akwinye kuno ukulonda tukupekanizizye Icakulya CakupiIilwa?” 13 Apano Yesu atuma awasambi wakwe wawili awanena ati: “Yanji mu musumba, umonsi wino asenzile insembo ya minzi wandi akamisunkanye. Mumukonke, 14 mu ng’anda iyili yonsinye yino wandi akinjilemo mukanene umweni wa ng’anda muti, ‘Umusambilizya akuti: “Wulikwinye umuputule wuno ningalilamo Icakupitililwa na wasambi wane?”’ 15 Nawe wandi akamilanjizye umuputule wapapela uwukulu, wuno apekinye icete muno muli vyonsinye vino vikulondekwa. Mulyanye amuno mwandi muye mukapekanizizye Icakupitililwa.” 16 Acino awasambi wayile mu musumba, nu kuyazana vyonsinye vino Yesu wawanenile, swinya wapekinye Icakupitililwa.
17 Pano cafikanga amanguzi, Yesu wayile na wasambi wakwe 12. 18 Nomba pano wisile pi tebulo wakulya, wawanenile ati: “Nkuminena icisinkanyene nkuti wumwi pe mwemwe mwe wano mukulya na nene, wandi ankazye.” 19 Wonsinye wivwile uwulanda, acino cila muntu watalisile ukumukolowozya ukuti: “Uzye anene?” 20 Ne Yesu wawanenile ukuti: “E wenga pe mwemwe 12 wino akulya na nene mu mbale. 21 Umwana wa muntu wandi afwe wulyane vino Amawaliko yakalanda pe weliwe, lelo acawulanda kwe wino wandi akazye Umwana wa muntu! Nge cazifilevye atakwatwa.”
22 Pano walyanga, e Yesu wasenzile umukate apepa, nga awumontolanya apano apa awasambi wakwe awanena ati: “Lyani, wukwimililako umuwili wane.” 23 Wasenzile ne kapu apepa, awapa ukuti wamwe, swinya wonsinye wamwilemo. 24 Nga wanena ati: “Yo-o waini yikwimililako uwazi wane uwa cipangano wuno wuliyitululwa pa mulandu wa wantu awavule. 25 Nkuminena icisinkanye nkuti, Ntalitela mwepo naswinya yo-o waini, mpaka njize imwe iyipya mu Wufumu wa kwe Leza.” 26 Pansizi yakwimbila indwimbo zyakulumbanya Leza, wayile ku Mwamba wa Miolife.
27 Nga Yesu anena awasambi wakwe ati: “Mwensinye mwemwe mwandi munsamale, amuno amawaliko yakati: ‘Ndiyuma kacema, ni ng’onzi zilisata.’ 28 Nomba ndila nazyulupuka ndimikolelela ku Galili.” 29 Petro wanenile Yesu ati: “Nanti wonsinyene wa-a wakusamala nu kukusya, nene Ntakutela nkusye.” 30 Ne Yesu amunena ati: “Nkukunena nkuti, ilelonye lyo-o uwusiku, pano mukolwe atani alamule imiku yiwili, wandi unkane imiku yitatu.” 31 Lelo Petro wawomilepovye ukumunena ukuti: “Cazipa mfwile ponga na wewe, ukulusya ukuti nkukane.” Na wasambi wanji wano wasyala nawonye walanzile icili conganye.
32 Wafisile pa cifulo cino cikakwitwa ukuti Getisemani, nga Yesu anena awasambi wakwe ati: “Yikalani panye naya mukupepa.” 33 Walile walanda wo-o, wasenzile Petro, Jemusi ne Yohani apita nawo. Watalisile ukwivwa uwulanda swinya wasakamile nkaninye. 34 Nga wanena ukuti: “Indi nu wulanda nkaninye, cikangavye mfwe. Yikalani panye mutwalilile ukulola.” 35 Walile wayavye akatalamucila, wafukime akontama na pansi atalika ukupepa ukuti, nga cingacitika, yoyo impindi iyisyupe yitiza pe weliwe. 36 Watili: “Tata,* ivintu vyonsinye vyapepuka kwe wewe; fumya yo-o kapu pe nene. Lelo asa vino nkulonda ukuti vicitike, suka ukulonda kwako.” 37 Pano wanyocezile wazanile awasambi wakwe walazile, nga anena Petro ati: “Simoni ulazile? Uzye kweni mutanga mutwalililevye ukulola ponga na nene pi awalavye lyonga? 38 Lolanji swinya mutaleka ukupepa pakuti mutaponela mukwelezwa. Umwezo wukulondesya, lelo umuwili wutonsile.” 39 Wanyocezilemo mukupepa swinya walandanga ivili vyonganye. 40 Walile wanyoka, naswinya wazanile walazile, amuno utulo twawacimvizye, acino watamanyile ni vyakumwasuka. 41 Wanyocezile ku wasambi wakwe umuku waciti tatu nu kuwanena ati: “Acani cino mulalizile nu kupuza pa mpindi ya musango wo-o? Casila! Impindi yafika! Lolani Umwana wa muntu wakumupa mu makasa ya wawembu. 42 Katukani tupite! Lolani wino akunkazya wapalamila.”
43 Pano acili akulanda e Yuda wino walinji pa wasambi 12 wafisile ni wumba lya wantu wano wasenzile wa panga ni zya nsonzo, wano Intunguluzi zya simapepo, wakasambilizya wa masundo na wasongo watumile. 44 Nomba e Yuda wapile awantu wano wizile mukulema Yesu icimanyilo cakuti: “Wino nandi mfyompe pi tama, lyo awili weyonye mukamuleme nu kumusenda swinya mutaleka asamale.” 45 E Yuda wayile kwe Yesu, afika amunena ati, “Musambilizya! Nga amufyompa pi tama. 46 Acino walemile Yesu nu kumusenda. 47 Lelo wenga pe wano walinji ne Yesu wasenzile e panga nu kuputula ikutwi lya muwomvi wa kwe simapepo mukulu. 48 Nga pano Yesu anena wano wayile mukumulema ati: “Uzye ne cipondo uwakuti mwize mukundema na wapanga ni zya nsonzo? 49 Cila wanda nawanga na mwemwe mwi tempile nkusambilizya, mutizanga mukundema, lelo vyonsinye vyo-o vyacitika pakuti amawaliko yaficiliswe.”
50 Nga wasambi wakwe wonsinye awamusamala nu kumusya. 51 Umulumendo wumwi wino wazwite icizwalo icizima watalisile ukukonka Yesu akatalamucila nomba pano walondanga ukumulema, 52 wasile icizwalo cakwe icakunzi asamala tupu.*
53 Wano walemile Yesu wamutwazile kwe simapepo mukulu kuno intunguluzi zya simapepo, wasongo na wakasambilizya wa masundo wawungine ponga. 54 Lelo e Petro weni watwalilizile ukukonka Yesu akatalamucila icakuti wafisile na mu luwanza lwe simapepo mukulu. Walile winjila mukasi wisile na wawomvi wa pa ng’anda atalika nu kota umulilo. 55 Nomba intunguluzi zya simapepo na wa mucilye ca Sanihedrini wavwambilizyanga awantu awakuwipizya Yesu pakuti wamukome, lelo waposilwe. 56 Awavule wayanga mukuwipizya pakuti wamusinile, lelo watamuzanilepo nu mulandu. 57 Kwizile wakamboni na wanji awawufi wano walandanga ukuti: 58 “Twamwivwile akulanda ukuti, ‘ndimongola lyo-o itempile lino lyazengwa na makasa ya wantu, swinya mu mandavye yatatu njize nzenge linji lino litapangwa na makasa ya wantu.’” 59 Lelo asamulandu na vyonsinye vyo-o vino walanzile, waposilwe ukumusinila.
60 Apano simapepo mukulu akatuka nu kunena Yesu ati: “Uzye utakwasuka icili consinye? Utakwivwa vino wakukusinila?” 61 Lelo e Yesu atasusile nanti cimwi. Naswinyanye e simapepo wamukolowozizye ukuti: “Uzye we Klistu Umwana wa kwe Leza Umukulisye?” 62 Nga Yesu amwasuka ukuti: “Anenenye, mulilola Umwana wa muntu ayisile kwi kasa lya kwe ndilo ilya maka, swinya akwiza mu mawingo ya mupela.” 63 Nge simapepo mukulu alepula ivizwalo vyakwe, alanda ati: “Awacani wakamboni na wanji wano tukulonda? 64 Mwayivwila mwe weneco vino waponta. Mukutipo wuli pe wo-o umulandu?” Wonsinye watili, azipizilevye ukufwa. 65 Wamwi watalisile ukumuswilila amati, swinya wamuvwimvile pa minso nu kumuma amakofi nga wamunena ati: “Nga wekasesema tunene weni wakuma!” Nga wasongo wa mu cilye awamuma amapi nu kumusenda.
66 Pano Petro wacilinji mu luwanza, umukazyana wumwi pa wawomvi wa kwe simapepo mukulu, wizile. 67 Walile walola Petro akota umulilo, wamulolecesizye nga amunena ati: “Nawewenye walinji ponga ne Yesu umwina Nazareti.” 68 Lelo wakanile, alanda ati: “Ntamumanya swinya ntamanyile na cino ukulandapo,” afumapo aya na panzi pa mulyango. 69 Palyanye umuwomvi winji umukazyana amulola, nga atalika ukunena wano walinjipo ati: “Na wenye we-e amusambi wakwe.” 70 Naswinyanye wakanile. Papisilevye akampindi akatici, awantu wano wimilile mupipi wanenile Petro ati: “Nawewenye walinji ponga nawo, amuno we mwina Galili.” 71 Lelo watalisile ukuyitipa nu kulapa ukuti: “Ntamumanya weyo umuntu wino mukulandapo!” 72 Paponye e mukolwe alamula umuku waciti wili, nga Petro ayizuka amazwi yano Yesu wamunenile ayakuti: “Pano mukolwe atani alamule umuku waciti wili, wandi unkane imiku yitatu,” Swinya paponye atalika ukulila nkaninye.