Ukulingana ne Luka
18 Nga Yesu awanena icilanjililo cino calandanga pe vino wazipizile ukuwapepa lyonsinye ukwasowa ukuleka, 2 watili: “Mu musumba wumwi mwalinji e kapingula wino atatinanga Leza swinya atacindikanga na wantu. 3 Kwalinji ne mukamfwilwa wumwi wino wayanga lyonsinye mukumunena ukuti, ‘Utize uleke wamfyenge kwe wino ndiwaluwulula nawe.’ 4 Pakutalika, atalondanga ukumwavwa, lelo pansizi welenginye ukuti, ‘Nanti acakuti nsitina Leza swinya ntacindika awantu, 5 we-e mukamfwilwa walusya ukwiza mukumpamvya, acino nandi mwavwe watize wamutiticizye pakuti atakwiza mukuntamya.’” 6 Apano e Tatakulu Yesu watili: “Mwivwa vino kapingula walanzile nanti acakuti atalinji amulungamane! 7 Wonye wo-o avino ne Leza alipingulilako awantu wakwe wano wasola pa mulandu wakuti wakalilila kwe weliwe umusanya nu wusiku swinya wa watekanizizya. 8 Nkuminena nkuti, alicita wowonye swinya aliwombelapo zuwa. Uzye nomba pano Umwana wa muntu aliyiza, alizana awantu wi suwilo munsi?”
9 Wanenile na wano wayisuwizile swinya wano walolanga wanji nge pasi vino wawa icilanjililo cakuti: 10 “Kwalinji awonsi wawili wano wayile mwi tempile mukupepa, wenga walinji Amufalisi ne winji walinji we kasoncesya wa misonko. 11 Umufalisi wakatusile nukutalika ukupepela mu mwezo akuti, ‘Nasalifya nkaninye we Leza wo-o vino ntawa ngati awantu wanji, ponga ngati awang’o, wano watawa ni cisinka, awacende nanti ngati awe-e e kasoncesya wa misonko. 12 Nkaleka ukulya imiku yiwili mwe sabata swinya nkapa Leza, ivyawila pe vyonsinye vino nakwata.’ 13 Lelo e kasoncesya wa misonko weni, wimililevye akatalamucila swinya atalondanga nu kulolecesya mupela. Wayumangavye pa cifuwa akuti, ‘We Leza njivwila uluse ne muwembu.’ 14 Nkuminena nkuti, we-e umuntu wayile ku ng’anda lyo amulungamane mu minso ya kwe Leza ukulusya Umufalisi. Amuno wensinye wino akayikuzya, walimucefya, na wino akayicefya, walimukuzya.”
15 Apano awantu watalisile ukumutwalila awana pa kuti awaleme,* lelo pano awasambi waweni wo-o, watalisile ukuwakalipila. 16 Lelo e Yesu wisile awana awatici ukuti waye kwe weliwe, nga alanda ati: “Lekani awana awacitici wize kwe nene; mutawalesya, amuno Uwufumu wa kwe Leza awe wano wawa ngati awa-a awana. 17 Nkuminena nkuti, wensinye wino atapocelezile Uwufumu wa kwe Leza ngati awana wa-a, ataliyinjilamo.”
18 Swinya e kateka wumwi wamukolowozizye ukuti: “Musambilizya muzima, avyani vino nzipizile ukucita pakuti njize mbe nu wumi wamuyayaya?” 19 Nga Yesu amwasuka ati: “Nga cani cino wanjitila ukuti umuzima? Amuno kutawa umuntu umuzima sukavye Leza. 20 Wamanya amasundo yakati: ‘Utakoma, utacita uwucende, utakwiwa, utawa we kamboni wa wufi, wacindika e baba wako ne mama wako.’” 21 Nawe watili: “Vyonsinye vyo-o nkavikonka ukufumilila ku wutici wane.” 22 Pano Yesu wivwile vyo-o, wamunenile ati: “Kuli icintu cimwi cino usowezizye: Kakazye vyonsinye vino wakwata nu kupa awapina impiya, apano uliwa ni vyuma mwi yulu nga uyize uwe we musambi wane.” 23 Walile wivwa vyo-o, wivwile uwulanda amuno walinji ni vyuma ivivule nkaninye.
24 E Yesu wamulolecesizye nga alanda ati: “Cilisyupa ku wa vyuma ukwinjila mu Wufumu wa kwe Leza! 25 Capepukapo pa ngamila ukwinjila pa kapongololo ka nsindano yakusumila ukucila uwa vyuma ukwinjila mu Wufumu wa kwe Leza.” 26 Wano wivwile vino walanzile watili: “Lyo weweni wino angapusuka?” 27 Nawe wawanenile ukuti: “Ku wantu asa cipepuke, lelo e Leza weni angacita vyonsinye.” 28 Nga pano Petro alanda ati: “Nga fwe vino sweswe twasya vyonsinye nu kukukonka.” 29 Nawe wawanenile ati: “Nkuminena icisinkanye nkuti, kusi wino wasya ing’anda yakwe, umuci, awanyina, awakwasi na wana pa mulandu wa Wufumu wa kwe Leza, 30 wino atalipocelela imiku imivule pe yo-o impindi na munsi mpya* ayize awe nu wumi wa muyayaya.”
31 Apano wasenzile awantumwa wakwe 12 pa mbali awanena ukuti: “Tukuya ku Yerusalemu swinya vyonsinye vino wakasesema walemvile pa Mwana wa muntu, vikuya mukuficiliswa. 32 Walimupa ku wantu wa mu nko zinji swinya waliwamutumfya, ukumutuka nu kumuswilila amati. 33 Walimuma ivikoti swinya walimukoma. Lelo pansizi ya manda yatatu, alizyulupuka.” 34 Nomba awatumwa wakwe wativwicisizye muno ya-a amazwi yasulanga amuno yalinji ankama swinya watamanyile na vino walandangapo.
35 Pano e Yesu wapalamizile ukufika mu Jeriko, kwalinji umonsi wino wisile mu mbali ya musewo akulenga. 36 Pa mulandu wakuti wivwile awantu awavule wakupita, watalisile ukukolowozya vino vyacitikanga. 37 Nawo wamunenile ati: “We Yesu umwina Nazareti akupita.” 38 Acino wapunzile ati: “We Yesu mwana wa kwe Devedi, njivwila uluse.” 39 Swinya wano walinji ku nkolelo watalisile ukumukalipila ukuti amyalale, lelo apano wacizilemo ukupunda ati: “Mwana wa kwe Devedi, njivwila uluse.” 40 E Yesu wimilile awanena ukuti wamutwale kwe weliwe. Pano wayile, Yesu wamukolowozizye ukuti: 41 “Ngu kulonda nkucitile cani?” Nawe watili: “Tatakulu mpozya ntalike ukulola.” 42 Apano Yesu amunena ukuti: “Talika ukulola isuwilo lyako lyakupozya.” 43 Paponye we-e umonsi wapozile atalika nu kumukonka, lyo kulumbanya ne Leza. Na wantu wonsinye pano waweni co-o, watalisile ukulumbanya Leza.