Ukulingana ne Marko
10 Walile Yesu wafuma koko, wayile mu mupaka wa Yudeya ukulamba uluzi lwa Yordani, swinya awantu wayile kwe weliwe. Nawe watalisile ukuwasambilizya ndi wulyanyene vino wacitanga. 2 Nga Wafalisi awaya kwe weliwe pakuti wamwelezye, awamukolowozya nga cakuti amasundo yazumilizya umonsi ukuleka umuci. 3 Nawe wawasusile ukuti: “Amasundo ci yano Mozesi wamipile?” 4 Nawo watili: “E Mozesi wazumilizizye ukuti tungalemba e kalata yakumulecelapo nu kumuleka.” 5 Lelo e Yesu wawanenile ukuti: “E Mozesi waminenile wo-o pa mulandu wakuwoma kwa myezo yinu. 6 Lelo ukufumililavye pakutalika, e Leza wapanzile umonsi nu mwanaci. 7 Awuli umulandu wuno umonsi alisila baba wakwe ne mama wakwe, 8 swinya wa-a wawili waliwa umuwili wonga, pakuti watawa na swinya wawili lelo wawe umuwili wonga. 9 Fwandi cino Leza wawika ponga, umuntu atacipawunkanya.” 10 Pano walinji mu ng’anda, awasambi wakwe watalisile ukumukolowozya na swinyanye pe lyo-o ilyasi. 11 Apano wawanenile ukuti: “wensinye wino waleka umuci nu kutwala winji, lyo wacita uwucende. 12 Nanti amwanacinye wino waleka umulume nu kutwalwa kunji, lyo wacita uwucende.”
13 Apano awantu watalisile ukumutwalila awana pa kuti awapale, lelo awasambi wawalesyanga. 14 Walile Yesu walola wo-o, atakunzile. Acino wawanenile ati: “Lekani awana awacitici wize kwe nene; mutawalesya, amuno Uwufumu wa kwe Leza awe wano wawa ngati awa-a awana. 15 Nkuminena nkuti, wensinye wino atapocelezile Uwufumu wa kwe Leza ngati awa-a wana, ataliyinjilamo.” 16 Wasenzile awana awakukutila nga awalema pa mitwe atalika ukuwapala.
17 Pano wapitanga mu nzila, umonsi wumwi wamusamalizile, amufukamila, nga mukolowozya ati: “Musambilizya muzima, avyani vino nzipizile ukucita pakuti njize mbe nu wumi wamuyayaya?” 18 Nga Yesu amwasuka ati: “Nga cani cino wanjitila ukuti umuzima? Amuno kutawa umuntu umuzima sukavye Leza. 19 Wivwa kuno amasundo yakalanda ukuti: ‘Utakoma, utacita uwucende, utakwiwa, utawa we kamboni wa wufi, utacenjezya umuwuyo, wacindika e baba wako ne mama wako.’” 20 Nu monsi amunena ati: “Musambilizya, vyonsinye vyo-o nkavikonka ukufumilila ku wutici wane.” 21 E Yesu walolecesizye we-e umonsi swinya pa mulandu wakuti wamukunzile, wamunenile ati, “Kuli icintu cimwi cino usowezizye: Pitanga kakazye vyonsinye vino wakwata nu kupa indalama ku wapina, swinya uliwa ni vyuma mwi yulu nga uyize uwe we musambi wane.” 22 Walile wivwa vyo-o, wivwile uwulanda amuno walinji ni vyuma ivivule nkaninye.
23 Yesu Walile walolecesya awantu, wanenile awasambi wakwe ukuti: “Cilisyupa nkaninye ku wa vyuma ukwinjila mu Wufumu wa kwe Leza.” 24 Acino awasambi wazungusile pe vino wawanenile, nga Yesu awanena swinyanye ati: “Wanane, citapepuka ukwinjila mu Wufumu wa kwe Leza. 25 Capepukapo pa ngamila ukwinjila pa kapongolo ka nsindano ukucila uwa vyuma ukwinjila mu Wufumu wa kwe Leza.” 26 Apano awasambi wacizilemo ukuzunguka swinya wamunenile ati: “Nge weni fwandi wino angapusuka?” 27 Walile Yesu wawalolecesya, wawanenile ukuti: “Ku muntu kweni asacipepuke, lelo kwe Leza acipepuke, amuno weni angacita icili consinye.” 28 Nge Petro amunena ati: “Sweswe twasya vyonsinye nu kukukonka” 29 Ne Yesu awasuka ukuti: “Nkuminena icisinkanye nkuti, kusi wino wasya ing’anda yakwe, awanyina wakwe, wa nkazi zyakwe, e mama wakwe, e baba wakwe, awana nanti avyalo pa mulandu wane na pa mulandu wi lyasi lizima, 30 wino atalipoka icilambu imiku 100 pe yo-o impindi, ama ng’anda, awanyina, wankazi zyakwe, wa mama wakwe, awana ni vyalo pa mulandu wakumucuzya, na munsi mpya ayize awe nu wumi wa muyayaya. 31 Lelo awavule awakutalicila waliwa awakulecelezya na wakulecelezya waliwa awakutalicila.”
32 Pano wayanga ku Yerusalemu, e Yesu walinji pa nkolelo swinya awasambi wazungusile, lelo wano wawakonkanga weni wivwile intete. Naswinyanye wasenzile awasambi wakwe 12 pa mbali, nu kutalika ukuwanena vino vyalinji nu kumuciticila, watili: 33 “Tukuya ku Yerusalemu swinya Umwana wa muntu waliya wakamupe ku ntunguluzi zya simapepo na wakasambilizya wa masundo, nawo walimupingula ukufwa nu kumupa mu makasa ya wantu wa mu nko. 34 Nawo waliwa wamutumfya, ukumuswilila amati, ukumucapa swinya walimukoma. Lelo pansizi ya manda yatatu, alizyulupuka.”
35 E Jemusi ne Yohani wa mwana Zebedi, wayile kwe Yesu nu kumunena ati: “Musambilizya, tukulonda utucitile vyonsinye vino twandi tulenge.” 36 Nga nawe awanena ati: “Avyani vino mukulonda micitile?” 37 Nawo wamwasusile ati: “Tukulenga ukuti wenga ayize yikale kwi kasa lyako ilya kwe ndilo, ne winji kwe kamani pano uliwateka mu Wufumu wako.” 38 Ne Yesu awasuka ati: “Mutamanyilevye vino mukulenga, uzye mungamwela mwe kapu yino nkumwelamo, nanti ukubadizwa ulubadizyo luno ndi mukubadizwamo?” 39 Nawo awati: “Tungamwela.” Nga Yesu awanena ukuti “acisinka mulimwela mwe kapu yane nu kubadizwa ulubadizwo luno nkubadizwa. 40 Lelo umukwasi wane awino wasola awakwikala kwi kasa lya kwe ndilo na wakwikala kwi kasa lye kamani.”
41 Pano awasambi wanji wivwile vyo-o, wafulizilwe e Jemusi ne Yohani. 42 Lelo e Yesu wawisile nu kutalika ukuwanena ati: “Mwamanya ukuti izya mfumu zino zikateka zikatiticizya awantu, 43 lelo wo-o asa vino cifwile ukuwa kwe mwemwe. Wensinye wino akulonda ukuwa we songo pe mwemwe afwile amiwombela, 44 na wensinye wino akulonda ukuwa awakutalicila pe mwemwe afwile ukuwa amuwomvi we wonsinye. 45 Amuno nu mwana wa muntunye, atizile ukuti wamuwombela lelo wizile mukuwombela wanji nu kupa uwumi wakwe pakuti apususye awantu awavule.”
46 Apano wayile ku Jeriko. Nomba pano e Yesu, awasambi wakwe na wantu wanji wafumanga mu Jeriko, wazanile e Bartimeyo (umwana wa kwe Timeyo) wino walinji antonko ayisile mu mbali ya musewo akulenga. 47 Pano wivwile ukuti we Yesu umwina Nazareti, watalisile ukupunda ukuti: “Yesu mwana wa kwe Devedi njivwila uluse!” 48 Pano awantu wamwivwile, watalisile ukumukalipila ukuti amyalale. Lelo apano wacizilemo ukupunda ati: “Mwana wa kwe Devedi njivwila uluse!” 49 Acino Yesu wimilizile awanena ati: “Mwitani.” Nawo wayile wita weyo umonsi intonko awamunena ati: “Woma katuka, e Yesu akukwita.” 50 Acino wasumvile icizwalo cakwe icakunzi, aya kwe Yesu lyo kusinta. 51 Nga Yesu amukolowozya ati: “Ngu kulonda nkucitile cani?” Ngu monsi ntonko alanda ati: “Musambilizya,* mpozya ntalike ukulola na swinya.” 52 Apano Yesu amunena ati: “Pitanga ku ng’anda, isuwilo lyako lyakupozya.” Paponye watalisile ukulola nu kutalika ukukonka Yesu.”