Ukulingana ne Luka
13 Pe yoyo impindi wano walinjiko, wayile awanena Yesu pa wina Galili wano e Pilato wakomile, asanzinkanya uwazi wawo ni nzuwi zino wapanga. 2 Ne Yesu wawanenile ati: “Uzye mukwelenganya ukuti wa-a awina Galili wafwile pa mulandu wakuti walinji awawembu nkaninye ukulusya awina Galili wonsinye? 3 Nkuminena nkuti, namwemwenye nga mutalapizile, muliyononeka. 4 Nanti, uzye mukwelenganya ukuti wawo awantu 18 mu Siloamu wano ulupungu lwaponezile nu kuwakoma walinji awawembu nkaninye ukulusya awantu wonsinye mu Yerusalemu? 5 Awe, lelo nkuminena nkuti namwenye nga mutalapizile, mulifwa.”
6 Apano wawanenile icilanjililo cimwi ati: “Umuntu wumwi walimile icalo ca vikomwa vyakupanjila waini, muno mwamezile icimuti ca mukunyu. Nomba pano wayile ukuti akakuntule imikunyu, wazanile kusi. 7 Acino wanenile umuntu wino wawombanga mu calo ca vikomwa ati, ‘Wo-o amwaka wa citi tatu wuno niza mukulola ivikomwa kwe co-o icimuti, nomba nsizanako nanti cimwi. Acino ciputule, nga cani cino tungacilecela mu calo cakonona vye umusili?’ 8 Ngu muwomvi wa mu calo amunena ati, ‘Tatakulu cilindililekovye nanti amwaka wonga, njize ncilimilile mbikemo nu muvundo. 9 Nga ciza cakoma ivikomwa ku nkolelo, lyo cazipa. Lelo nga citakomile, uyize ucikome.’”
10 Nomba e Yesu wasambilizyanga mwi sinagogi limwi pa wanda wi Sabata. 11 Monye mwalinji umwanaci wumwi wino umuzimu wuwipe* walwalisile pa myaka 18 icakuti atakontamukanga. 12 Pano Yesu wamuweni, wamunenile ati: “Nkazi yane wapola ku ndwala yako.” 13 E Yesu wawisile amakasa pe weliwe, nawe paponye wizile apola akontamuka nu kukontamuka. Swinya watalisile nu kulumbanya Leza. 14 Lelo e songo wi sinagogi, wafuzilwe nkaninye pa mulandu wakuti e Yesu wapozizye we-e umwanaci pa wanda wi Sabata. Wanenile awantu ati: “Kwawa amanda 6 ayakuwombamo imilimo, acino mwakwiza mwe ya-a amanda ukuti amipozye, asa pa wanda wi Sabata.” 15 Lelo e Tatakulu Yesu wamwasusile ati: “Mwe wacawufi mwe! Uzye mwemwe musisapulila ing’ombe zinu ni ndokwe pa wanda wi Sabata nu kuzitwala mukulya na mukumwa aminzi? 16 Nga we-e umwanaci umwana wa kwe Abrahamu wino Satana wacuzya pa myaka 18, uzye weni atanga aluwuke ku ndwala yakwe pa wanda wi Sabata?” 17 Pano walanzile vyo-o, wonsinye wano wamukanyanga wivwile insoni, lelo awantu wonsinye wakunzile nkaninye pa vintu vyakuzungusya vino wacisile.
18 Swinya watwalilizile ukulanda ukuti: “Uzye Uwufumu wa kwe Leza wawa ngati acani, swinya ningawukolanya ku cani? 19 Wawa ngati akalupumba akatici* kano umuntu wakomezile mu calo, swinya kakuzile akawa icimuti, ni vinyunyi vyamupela vyayanga nu kupangako ivinsalanzo.”
20 Na swinya watili: “Akwinye kuno ningakolanya Uwufumu wa kwe Leza? 21 Wawa ngati we yisiti yino umwanaci wasenzile nu kusanzinkanya mwe fulaulo yino yalinji mu ciya* icikulu, mpaka yonsinye ayitutumuka.”
22 Wapitanga mu misumba yonsinye na mu twaya, akusambilizya swinya watwalilizile nu wulendo wakuya ku Yerusalemu. 23 Umonsi wumwi wamunenile ati: “Tatakulu, uzye awaticivye wano walipusuka?” Nawe wamunenile ati: 24 “Wombesyani pakuti mwinjile pa mulyango uwufyenenkane, amuno nkuminena nkuti, awavule waliwalonda ukwinjila lelo walipotwa. 25 Nga cakuti umweneco wa ng’anda wamanga ku cisakati, muliyimilila panzi nu kukong’onsya muti, ‘Tatakulu, twiyulileko.’ Lelo nawe alimyasuka ati: ‘Ntamanyile kuno mufumile.’ 26 Apano mulitalika ukulanda ati, ‘Twalyanga nu kumwela ponga na wewe, swinya wasambilizyanga na mu musumba witu.’ 27 Lelo aliminena ati, ‘Ntamanyile kuno mufumile. Fumani pa-a, mwe wakacita wa viwipe mwe!’ 28 Kulyanye akuno muliwa mwalila nu kulumanya amino, nga muwalola Abrahamu, e Isaki e Yakobi na wakasesema wanji wisile mu Wufumu wa kwe Leza, lyo mwemwe wamisumbila kulonde. 29 Swinya awantu walifuma kapela na kasika ku kambazwa ke kamani na kwe ndilo, waliyiza nu kwikala pi tebulo mu Wufumu wa kwe Leza. 30 Awakulecelezya waliwa awakutalicila, na wakutalicila walilwa awakulecelezya.”
31 Pe yilyanye impindi Awafalisi wamwi wizile nu kumunena ati: “Fuma ko-o pitanga, amuno Herodi akulonda ukukukoma.” 32 Nawe Yesu wawanenile ati: “Wacenjela ngati we mumbwe.* Yanji kamunenani muti, ‘Ilelo na mutondo nkupozya awalwale nukufumya imizimu miwipe, swinya pa wanda waciti tatu lyo namala umulimo wane.’ 33 Lelo asamulandu na vino vingacitika nzipizile ukutwalilila ukuwomba umulimo wane ilelo na mutondo, nu wanda wuno wulikonkaponye swinya nkutwalilila ukupita, amuno e kasesema atanga afwile ku ncende yinji sukavye ku Yerusalemu. 34 Mwe wantu wa mu Yerusalemu, wakakoma wa kwa kasesema swinya mwe wano mwatamile awantu wano watumilwe ne Leza amawe, nalondanga ukumilonganika ndi wulyanye vino e nyina nkoko akalonganika utwana mu mapa! Lelo mutalondanga. 35 Nomba, lolani! E Leza asile ing’anda yinu. Nkuminena nkuti mutalitela mundole mpaka mwize mulande ukuti: ‘Wino akakwizila mwi zina lya kwe Yehova,* wapalwa!’”