Ukulingana ne Mateyo
27 Kwalile kwaca umutondotondo, intunguluzi zya simapepo zyonsinye na wasongo wa wantu wawungine ponga pakuti walanzyanye ivya kukoma Yesu. 2 Walile wamunyepa amakasa, wamutwite kwe Pilato e kateka wa Yudeya.
3 Walile e Yuda, wino wamukazizye, walola ukuti e Yesu wamupingulila ukufwa wivwile uwuwi pe vino wacisile swinya wasenzile indalama zye silva 30 nu kutwalila intunguluzi zya simapepo na wasongo, 4 awanena ukuti: “Nawembusile pakukazya uwazi wa muntu wakaele.” Ne nawo wamunenile ukuti: “Yoyo asa ntazi yitu!” 5 Nga e Yuda asya wasumba indalama zye silva mwi tempile, apita, nu kuyayinyonga. 6 Lelo intunguluzi zya simapepo zyasenzile zyo-o indalama zye silva nu kulanda ukuti: “Amasundo yatazumilizya ukuwika zyo-o indalama mwi tempile muno wakasunjila indalama, amuno andalama zya wazi.” 7 Pa nsizi yakulanzyanya, wasenzile zyo-o indalama awaya awakalilamo impanga,* iyakuzicilamo wano wafumanga ku nsi zinji. 8 Acino, yoyo impanga wakayitila ukuti Impanga ya Wazi ukufika na pe yo-o impindi. 9 Apano amazwi yano Leza walandizile lyankani mwe kasesema Yelemiya yizile ayaficiliswa ayakuti: “Wasenzile indalama zye silva 30, zino wakazizyangapo umuntu. Umutengo wuno awana wa kwe Israeli wazumizile ukulipila pa kumukala. 10 Swinya wazilipizile ku kukalilamo impanga, ukulingana na vino Yehova wanenile.”
11 Pe yoyo impindi, e Yesu, wino wimilile pa nkolelo ya kwe Pilato, wamukolowozizye ukuti: “Uzye we Mfumu ya wa Yuda?” Nga Yesu amwasuka ukuti: “Wayilandila we mweneco.” 12 Lelo pano intunguluzi zya simapepo na wasongo wamupanga imilandu, atasusilepo nanti cimwi. 13 Nga Pilato amunena ati: “Uzye usakwivwa imilandu ukuvula yino wa-a awantu wakukupa?” 14 Lelo Yesu atamwasusile nanti cimwi. Icakuti e Pilato wazungusile nkaninye.
15 Cila mwaka nga kuli ukuzevya icakupitililwa, e kateka wafumizyanga awantu umufungwa wenga wino aweneco wakulonda. 16 Pe yilyanye impindi kwalinji icipondo cimwi cino witanga ukuti Baraba cino camanyisilwe nkaninye swinya wacinyefile mu cifungo. 17 Walile awantu walongana ponga, e Pilato wawakolowozizye ukuti: “Weweni wino mukulonda misapulile, uzye we Baraba nanti we Yesu wino mwe weneco mukakwita ukuti Klistu?” 18 Amuno e Pilato wamanyile ukuti cino watwalizile Yesu kwe weliwe amulandu wa lupato. 19 Pano Pilato wisile pa cilimba cakupingulilapo, umuci watumile amazwi yakuti: “Muleke vye weyo umuntu wakaele, amuno ncuzile nkaninye mu ciloto pa mulandu na weliwe.” 20 Lelo intunguluzi zya simapepo na wasongo wapaticizizye awantu ukuti walenge Baraba, lelo Yesu wamukome. 21 Nga e Pilato swinya awanena ukuti: “Weweni pe wa-a wino mukulonda misapulile?” Nga wantu awati: “E Baraba.” 22 Apano Pilato awanena ukuti: “Nga mukulonda ncite cani kwe Yesu wino mweweneco mukati Klistu?” Nga wantu wonsinye awati, “Mupamantilani pa cimuti!” 23 Nga Pilato awasuka ukuti: “Amulandu ci? Nenani iciwipe cino acisile.” Lelo awantu watwalilizile vye ukupunda wakuti: “Mupamantilani pa cimuti!”
24 Walile Pilato wapotwa ivyakucita, walola kuno kwawa vye ivimvulunganya, wasenzile aminzi asamba ku makasa lyo na wantu wonsinye wakulola, nga alanda ukuti: “Nsi nu mulandu ku wazi wa muntu we-e. Amulandu winu mwe weneco.” 25 Awantu wonsinye awamwasuka ukuti: “Uwazi wakwe wize pe sweswe na pa wana witu.” 26 Nga e Pilato awasapulila Baraba lelo wawanenile ukuti wume Yesu ivikoti, amupa na ku wakumupamantila pa cimuti.
27 Nga wasilika wa kwe Pilato awasenda Yesu nu kumutwala ku ng’anda ya kwe Pilato, na wasilika wonsinye awamuzinguluka. 28 Wamuzuzile ivizwalo vyakwe nu kumuzwika ivizwalo iviwenzu. 29 Wapanzile icisote ca myunga nu kumuzwika. Nga awamulemeka itete kwi kasa lya kwe ndilo. Awatalika ukumufukamila, wakulanda amazwi yamitumfyo wakuti: “Tukukulamuka, we Mfumu ya wa Yuda.” 30 Awamuswilila amati, awamupoka ni tete lino wamupile awatalika ukumuma nalyo pa mutwe. 31 Walile waleka ukumutumfya, wamuzuzile icizwalo iciwenzu cino wamuzwisile, awamuzwika ivizwalo vyakwe ivyakulonde. Awamusenda awaya mukumupamantila pa cimuti.
32 Pano wafumanga mu musumba, wazanile umonsi uwizina lya kuti Simoni umwina Kureni. We-e umonsi wamupaticizizye ukunyamula icimuti ca kuculilapo ica kwe Yesu. 33 Swinya walile wafika pa cifulo cino witanga ukuti Golgota, cino cikapiliwula ukuti, Ipanga, 34 wasenzile e waini awasanzinkanyamo ni vilule, nomba walile wivwa vino vikwivwika, wakanile ukumwa. 35 Walile wamupamantila pa cimuti, wasenzile ivizwalo vyakwe ivya kulonde nu kupenduzya pakuti wamanye vino cila muntu walinji nu kusenda. 36 Swinya wisile palyanye wakumulonda. 37 Wasenzile ni cipampa awaciwika pa mutwe papela pano walemvile umulandu wuno wamupile ukuti: “We-e we Yesu Imfumu ya wa Yuda.”
38 Wulyanye uwanda, kwalinji ivipondo viwili vino wizile awapamantila pa vimuti, conga calinji kwi kasa lyakwe ilye ndilo ne cinji kwe kamani. 39 Wano wapitangapo wamupontelanga nu kupunzya imitwe yawo, 40 swinya walandanga wakuti: “Uzye asa we muno ungamongola itempile nu kulizenga mu manda yatatu? Yipususye nombanye! Nga we mwana wa kwe Leza yika papo pa cimuti pano wakupopezile. 41 Intunguluzi zyasimapepo, wakasambilizya wa masundo na wasongo, nawonye watalisile ukumutumfya wakuti: 42 “Wapususyanga wanji, nomba weni camupota ukuyipususya! Nga cakuti Amfumu ya wina Israeli, katulole nga wandi ayike pa cimuti papo, apano twandi tumusuwile. 43 Uzye atasuwizile nkaninye mwe Leza, icakuti watinji: ‘Ne mwana wa kwe Leza’? Kayize amupususye nga akulonda ukumwavwa.’ 44 Ni vipondonye vino vyapamantizilwe ponga nawe, navyonye avyamupontela.
45 Ukutalika ku ma 12 awazi umusanya,* munsi mwizile amuwa imfinzi ukufika ku ma 15* awazi. 46 Ku ma 15 nye apano Yesu wapunzile ukuti: “Eli, Eli, lama sabakitani?” Akuli ukuti, “Leza wane, Leza wane, nga cani cino wandecelezezya?” 47 Wano walinji mupipi pano wivwa wo-o, watili: “We-e umuntu akupunda Eliya.” 48 Paponye umonsi wumwi, wasamazile aya senda pamba, atumpika mwe waini iyikantuke, awika kwi tete, apa Yesu ukuti amwe. 49 Lelo wanji watili: “Muleke vye! Leka tulole e Eliya nga wandi ayize amupususye.” 50 Swinyanye e Yesu wizile apunda nkaninye, afwa nu kufwa.*
51 Paponye ikatani lino lyalinji mwi tempile, lyalepusile pakasi ukufuma papela mpaka pa nsi, swinya insi yayingine na mawe yalepusile. 52 Swinya inkungwe ziyusile ni miwili imivule iya wantu wa kwe Leza wano wafwile ku nsizi yatalisile ukuloleka, 53 ku wantu awavule. (Walile e Yesu wazyulupuka, awantu wamwi* wafumile ku cifulo kuno kwalinji inkungwe, awinjila mu Yerusalemu*). 54 Lelo pano e songo wa wasilika na wano walondanga Yesu waweni icinzumanzi na vyonsinyene vino vyacitisile, wivwile nkaninye intete swinya walanzile ukuti: “Molimonye, we-e walinji Amwana wa kwe Leza.”
55 Swinya kwalinji awanaci awavule wano watambanga akatalamucila, wano wakonsile Yesu ukufuma ku Galili pakuti wamwavwako. 56 Pe wa-a palinji e Mariya umwina Magadala, e Mariya e mama wa kwe Jemusi ne Jose, ne mama wa wana wa kwe Zebedi.
57 Nomba pano ilanzi lyati lyawa mupipi nu kwinjila, kwizile Jozefu uwa ku Arimatiya, walinji nkaninyene ni cuma. Nawenye walinji amusambi wa kwe Yesu 58 We-e umonsi wayile kwe Pilato nu kumulenga icitumbi ca kwe Yesu. Nawe Pilato walanzile ukuti wamupe. 59 Jozefu wasenzile umuwili wa kwe Yesu, nu kuwupomba mu mwenda uwuswepe swinya uwuzima, 60 swinya wawuwisile mu nkungwe iyipya yino wimvile mwi liwe. Asenda ni liwe ilikulu akunkulusizyapo, apita nu kupita. 61 Lelo e Mariya umwina Magadala ne Mariya e mama wa kwe Jemusi ne Jose, wasyazile kulyanye, wisile pankwelelo ya nkungwe.*
62 Vyo-o vyonsinye vyacitisile pa wanda wuno wapekanizizyanga Isabata. Uwanda wuno wakonsilepo, intunguluzi zya simapepo na Wafalisi, wayile kwe pilato, 63 awamunena awati: “Tatakulu, tukwizuka vino weyo cawufi walanzile pano atani afwe, ukuti, ‘Pansizi ya manda yatatu ndizyulupuka.’ 64 Acino, nena wamwi awakuya mukulonda mpaka pa wanda waciti tatu, pakuti awasambi wakwe watamwiwa nukunena awantu ukuti, ‘Azyulupusile ku wafwe!’ Amuno wo-o uwufi wuliwipa ukulusya uwakutalicila.” 65 Nge Pilato awasuka ukuti: “Yanji na wa-a wa malonda, muye mukayilonde nkaninye.” 66 Acino wayile nu kuwikapo iliwe ilimwame pa nkungwe, awawikapo na wakulonda.