Ukulingana ne Mateyo
4 Pansizi yakubadizwa, e Leza wawomvizye amaka yakwe ukutungulula Yesu ukuya mu mpanga. Kulyanye akuno Satana wayile awamwelezya, 2 lyo wikala amanda 40 umusanya nu wusiku ukwasowa ukulya cimwi, icakuti wivwile inzala nkaninye. 3 Acino e Ciwa wizile mukumwelezya, amunena ati: “Nga we mwana wa kwe Leza, pilula ya-a amawe yawe avyakulya.”* 4 Ne Yesu amwasuka ukuti: “Amawaliko yakati: ‘Asa vyakulya vitupu vino vingalenga umuntu ukuwa nu wumi, suka ukukonka amazwi yonsinye yano Yehova* akalanda.’”
5 Satana amusenda nu kumutwala ku musumba wa Yerusalemu, aya mukwezya pa ntonje* ya cikulwa ci tempile, 6 nga amunena ati: “Nga we mwana wa kwe Leza, tolocela pansi,* amuno amawaliko yakati: ‘Alituma awangeli wakwe kwe wewe,’ nawo, ‘Walikunyamulila pa makasa yawo pakuti utize ucisike kwi liwe.’” 7 Ne Yesu amwasuka ati: “Nomba amawaliko yakalanda nu kuti: ‘Utakwelezya e Yehova* Leza wako.’”
8 Avyo Satana amunsenda swinyanye, nu kumutwala pa mwamba uwutali nkaninye, amulanjizya amawufumu yonsinye aya munsi ni vyuuma vino vyawamo. 9 Amunena ati: “Nkukupa vyonsinyene vyo-o, nga wamfukamila vye nu kumpepa lyonganye.” 10 Apano Yesu amwasuka ati: “Fuma pa-a Satana! Amuno amawaliko yakati: ‘Uwapepa Yehova e Leza wako wenganye, swinya awino uwawombela.’” 11 Nga Satana amusya. Na wangeli awiza nu kutalika ukumwavwa.
12 Mukupita kwa mpindi, pano Yesu wivwile ukuti walemile Yohani nu kumwinjizya mu cifungo, wayile ku Galili. 13 Walile wafuma ku Nazareti, wayile ku Kapernahumu mupipi ne sumbi mu citungu ce Zebuloni ne Nafutali, 14 pakuti amazwi yano kasesema Ezaya walanzile yaficiliswe, ayakuti: 15 “Mwe wantu wa mu nsi zya kwe Zebuloni ne Nafutali, mwe wano mwikala mupipi nu musewo, ne sumbi, ku mbalama ye Yordani, mu Galili muno awantu wano wafuma mu nko zyonsinye wikala! 16 Awantu wano walinji mu mfizi walola uluswepo ulukulu, na wonsinye wano wikala munsi yino yawa mu cinzungwani cino cikaleta imfwa, uluswepo lwawawalila.” 17 Ukufuma palyanye, e Yesu watalisile ukuwizya ukuti: “Lapilani, amuno Uwufumu wa mwi yulu wupalamizile.”
18 Pano wapitanga mu mbali ye Sumbi we Galili, waweni awonsi wawili awanyina, e Simoni wino akakwitwa ukuti Petro, ne Andreya, wakuteya ikonde amuno walinji awalondo wa nswi. 19 Awanena ati: “Nkokani, ndimilenga ukuwa awalondo wa wantu.” 20 Awasya amakonde yawo paponye nu kumukonka. 21 Ukufuma papo, azana swinya wa mwana Zebedi wawili awonsi, e Jemusi ne Yohani, umuzuna wakwe, wali mu wato ne yisi, wakumenda amakonde, Yesu awanena ukuti wamukonke. 22 Paponye, wasile uwato ne yisi nu kukonka Yesu.
23 Yesu wapisile mu Galili monsinye, akusambilizya mu masinagogi. Wawizyanga ni lyasi lizima ilya Wufumu nu kupozya indwala zya misango yonsinye mu wantu. 24 Awantu wano wikalanga mu Siria monsinye wivwile ululumbi lwe vino Yesu wacitanga, acino watalisile ukumuletela awantu wano walwile indwala impusane pusane, awa mizimu imiwipe,* wano cawumanga na wano watapitanga pa mulandu wakuti ivilundwa vyakalizile ku ndwala. Ne Yesu wawapozyanga. 25 Acino awantu awavule watalisile ukumukonka. Palinji wano wafumile ku Galili, ku Dekapoli, ku Yerusalemu, ku Yudeya na mu twaya tunji utwa mu mbalama ye Yordani.