Ukulingana ne Marko
5 Apano walambizile mbalama yinji iye sumbi ku citungu ce Gerasa 2 Pano Yesu wafumilevye mu wato, wasunkinye umonsi wumwi mu manda wino walinji nu muzimu uwuwipe. 3 Wikalanga ku manda, swinya kutalinji umuntu nanti wumwi wino walinji na maka yakumunyepa nanti akwe ceninye. 4 Awantu welezizye imiku imivule ukumunyepa amakasa na manama ku ma ceni, lelo waputulanga. Kutalinji nanti wumwinye wino walinji na maka yakumulema. 5 Swinya cilawanda uwusiku nu musanya, wapundanga mu manda na mu myamba nu kuyilembanya na mawe. 6 Acino pano waweni e Yesu akatalamucila, wayile akusamala aya mufukamila. 7 Nga fika apunda pa kulanda ati: “Nga cani cino ukulonda kwe nene we Yesu, mwana wa kwe Leza uwa maka yonsi? Nkulonda ukuti ulape mwi zina lya kwe Leza ukuti usakuncuzya.” 8 Amuno Yesu wanenile wowo umuzimu uwuwipe ati: “Fuma mwe we-e umonsi, we muzimu uwuwipe.” 9 Nga Yesu amukolowozya ati: “Weweni izina?” Nawe atolelela ati: “Izina lyane ne liwumba, amuno swe wavule.” 10 Swinya imizimu imiwipe yalambilizizye Yesu ukuti atakayiwinge mwe yoyo insi.
11 Mu mbali ya mwamba mwalinji wa kapoli awavule wano walyanga. 12 Apano imizimu imiwipe ayilambilizya Yesu ayiti: “Leka tukinjile mwa kapoli.” 13 Acino wayizumilizizye. Nayo ayifuma nu kuya mwa kapoli, nawo wasamalizile ku mutentemuko nu kuyaponela mwe sumbi, icakuti wakapoli wonsinye 2,000 wamwezile mwe sumbi. 14 Lelo wakacema wasamazile nu kuyalanda vyonsinye vino vyacitisile mu kaya, swinya awantu wonsinye wizile mukulola vino vyacitisile. 15 Acino wizile kwe Yesu awazana nu monsi wino walinji ni mizimu imiwipe azwite, ayisile nu kwikala lyo amupuma. Acino wivwile intete nkaninye. 16 Wano walinjipo watalisile ukulondololela awantu vino vyacitisile kwe we-e umonsi uwa mizimu imiwipe na kwa kapoli. 17 Acino walambilizizye Yesu ukuti afume mu kaya kawo.
18 Nomba pano wakwezile uwato, umonsi wino wapozile ku mizimu imiwipe walambilizizye Yesu ukuti amukonke. 19 Lelo atamuzumilizizye, wamunenile ukuti: “Yanga ku ng’anda kwa lupwa lwako, ukawanene vyonsinye vino Yehova* akucitizile na pa luse luno akulanjizizye.” 20 We-e umonsi wapisile, swinya wayile atalika ukuwizya mu Dekapolisi* pe vyonsinye vino Yesu wamucitizile icakuti awantu wazungusile nkaninye.
21 Pano Yesu walambizile na swinya ku mbalama zinji, awantu wayile awawungana ponga kwe weliwe lyo acili atani afume pe sumbi. 22 Pano intunguluzi ya mwi sinagogi uwi zina lyakuti Jailo waweni e Yesu, wayile amufukamila. 23 Amulambilizya pa miku imivule amunena ati: “Akamwana kane akakazyana akalwale nkaninye. Nazina tuye ukawikepovye amakasa yako pe koliko, pakuti kapole katwalilile ukuwa nu wumi.” 24 Acino e Yesu wapisile nawe, na wantu awavule wamukonsile swinya wamutiticizyanga.
25 Nomba kwalinji umwanaci wino walwile indwala yakufuma uwazi* pa myaka 12. 26 Wayile kwa dokota awavule swinya wayimvile nkaninye. Wawomvizye ni cuma cakwe consinye, lelo asitela awepo icete, icakuti indwala yayanga yikuwomelakovye. 27 Pano wivwile vino awantu walandanga pe Yesu, wamukonsile ayayinjila mwi wumba nu kumulema ku cizwalo cakwe ica kulonde, 28 amuno watinji: “Nga namulemavye ku cizwalo cakwe ica kulonde, nandi mpole.” 29 Paponye uwazi awuleka nu kufuma, swinya wizile ayiluka ukuti apozile ku ndwala yino yamucuziye nkaninye.
30 Walile Yesu wivwa ukuti amaka yafuma mu muwili, wapiliwucizile kwi wumba nu kukolowozya ukuti: “Weweni wino wandema ku vizwalo vya kulonde? 31 Nga wasambi wakwe awamunena ati: “Uweni awantu ukuvula wano wali pa-a, icakuti wakukutiticizya nu kukutiticizya apano ukulowozye ukuti ‘Weni wandema?’” 32 Lelo walolecesyanga pakuti alole wino wamulemile. 33 Pano umwanaci wamanyile vino vyacitisile, wivwile intete swinya watalisile ukuzakaza, acino wayile kwe weliwe afukama nu kumunena icisinka. 34 Nawe wamunenile ukuti: “Mwanane, isuwilo lyako lyakupozya. Upite umutende swinya upole na ku ndwala yako imbipisye.”
35 Pano wacilinji akulanda, awonsi wano wafumile ku ng’anda ya kwe Jailo wizile nu kumunena ati: “Umwana wako afwile kali! Nga cani cino ukucuzizya umusambilizya?” 36 Pano Yesu wivwile vino walanzile, wanenile Jailo ukuti: “Utatina, usuwilevye.” 37 Lelo atalondanga uwili wensinye ukumukonka, acino wasenzilevye Petro, Jemusi ne Yohani umunyina Jemusi.
38 Pano wafisile pa ng’anda ya kwe Jailo, wazanile pali icongo amuno awantu walilanga nkaninye. 39 Walile winjila, wanenile awantu ukuti: “Nga cani cino mukulilila nu kupanga icongo? Amuno umwana atafwile lelo alazilevye.” 40 Pano walanzile wo-o, wamusesile nkaninye. Lelo wafumizye wonsinye panzi. Acino wasenzile e yisi wa mwana ne mama wakwe na wasambi wano walinji nawo, awaya kuno umwana walinji. 41 Walemile ikasa lya mwana nu kumunena ati: “Talʹi·ta kuʹmi.” cino cikapiliwula ukuti: “Mukazyana nkukunena nkuti, katuka!” 42 Paponye akakazyana kakatusile nu kutalika ukupita. (Kalinji ni myaka 12.) Pano vyo-o vyacitisile awakwasi wakunzile nkaninye. 43 Lelo wawakonkomecezizye pa miku imivule ukuti watakaneneko uwili wensinye pe vino vyacitisile, wawanenile nu kuti wape umwana ivyakulya.