Ukulingana ne Mateyo
3 Wanda wumwi e Yohani kabadizya wizile mukuwizya mu mpanga ya mu Yudeya 2 wavwanganga ukuti: “Lapilani amuno Uwufumu wa mwi yulu wupalamizile.” 3 Wenye e Yohani awino e kasesema Ezaya walanzilepo ukuti: Izwi likupunda mu mpanga likuti: ‘Pekanyani inzila ya kwe Yehova* nu kuyizifya.’” 4 Nomba e Yohani wazwalanga icizwalo ca meya ya ngamila ne bewoti* mu mutembeleko. Ivyakulya vino walyanga ampanzi* nu wuci. 5 Pe yoyo impindi awantu ukufuma ku Yerusalemu, mu Yudeya monsinye ni nsi zino zyazingulusile uluzi lwa Yordani, wayanga mukwivwa kwe Yohani, 6 nawe wawabadizyanga* mu luzi lwa Yordani, swinya nawo wasokololanga imembu zyawo pa minso ye wonsinye.
7 Walile e Yohani walola Awafalisi na Wasaduki awavule wakwiza kuno wabadizizyanga, awanena ati: “Mwe wana wa nzoka mwe, weweni wino waminena ukuti mulipusuka ku wukali wa kwe Leza wuno wukwiza? 8 Fwandi citani vino vikulanjizya ukuti mulapizile. 9 Mutati mwayiwipa ukuti, ‘mwe wana wa kwe Abrahamu’ amuno ndi Leza akulonda angakatusya awana wa kwe Abrahamu mwe yanye ya-a amawe. 10 Impasa yili mupipi nu kuputula umusisi wa vimiti. Acino umuti uwuli wonsinyene wuno wusikoma ivikomwa ivizima, waliwukoma nu kuwusumbila mu mulilo. 11 Nene nkumibadizya amuno mulapizile, nkumibadizyavye mu minzi lelo wino akwiza awa maka ukundusya wino ntawa ni nsambu zyakumuzula indyatu. Weni alimibadizizya ku muzimu wa kwe Leza nu mulilo. 12 Alemile icakwelela ingano, aliyela impumba zyakwe izya ngano nu kuziwika umwakusunjila ivyakulya, ni lyelelo alilyoca mu mulilo wuno wutanga wuzime.”
13 Yesu wafumile ku Galili nu kuya ku luzi lwa Yordani, pakuti e Yohani amubadizye. 14 Lelo e Yohani wakanile, amunena ati: “Awe, awemuno ufwile ukumbadizya asa nene.” 15 Yesu amunena ati: “utakana amuno nga twacita wo-o apano twandi tucite vyonsinyene ivilungamane.” Apano Yohani azumila. 16 Walile e Yesu wabadizwa paponye afuma mu minzi, iyulu aliyuka. Yohani alola umuzimu wa kwe Leza wukwiza pe Yesu ngati ankunda. 17 Paponye izwi alivwika ukufuma kwi yulu aliti: “We-e Amwana wane wino nakunda, akansecelesya nkaninye.”