Ukulingana ne Mateyo
17 Yalile amanda 6 yapita, e Yesu asenda Petro, Jemusi nu munyina Yohani akwela nawo pa mwamba uwutali pakuti wawe vye wonga. 2 Yesu wapilusile imilolecele lyo wakulolako; pa minso pizile apawala ngati alilanzi, ni vizwalo vyakwe vizile avyaka ngati aluswepo. 3 Paponye awalola e Mozesi ne Eliya wakulanzyanya ne Yesu. 4 Nga Petro anena Yesu ati: “Tatakulu, twatemwa sana ukwiza ko-o. Nga ukulonda, panye pa-a pa mwamba, ningapangapo amatenti yatatu, lyonga ilyako, ilya kwe Mozesi ne Eliya.” 5 Pano Petro acili akulanda, lolani! iwingo ilitiswe aliwavwimba. Ni zwi alifuma mwi wingo aliti: “We-e amwana wane, wino nakunda, akansecelesya nkaninye. Mwivwanji.” 6 Walile awasambi wivwa vyo-o, watinile nkaninye, awapona pansi nu kumukontamila. 7 Nga Yesu apalamila, nu kuwalema, nga wanena ati: “Katukani. Mutatina.” 8 Pano wakwiza mukwinula aminso, watawenipo uwili wensinye, sukavye e Yesu mutupunye. 9 Pano wakutentemuka umwamba e Yesu awakonkomecezya ukuti: “Mutakanenepo uwili wensinye pe vino temwalola, mpaka pano Umwana wa muntu alizyulupuka.”
10 Nga awasambi awamuwuzya ukuti: “Nomba acani cino wakasambilizya wa masundo wakalandila ukuti e Eliya awino alitalicilapo ukwiza pe Klistu?” 11 Ne nawe wawasusile ukuti: “Acisinka, e Eliya aliyiza, swinya alilenga ivintu vyonsinye ukuwa vino vizipizile ukuwa. 12 Lelo nkuminena nkuti: “Eliya wiza kaali, swinya awantu watamumanyile, lelo wamukomile ndi vino aweneco walondanga. Wonye wo-o, avino walinkoma.” 13 Apano awasambi awiluka ukuti pano walandanga pe Eliya, walozyanga kwe Yohani Kabadizya.
14 Pano wanyocezile kuno kwalinji iwumba lya wantu, umonsi wumwi wayile kwe Yesu, amufukamila nu kumunena ukuti: 15 Tatakulu, si yivwila umwana wane umonsi uluse, amulwale nkaninye. Cikamuma, swinya ilivule akaponela mu mulilo na mu minzi. 16 Temulesile ku wasambi wako, nomba waposilwe ukumupozya.” 17 Nga Yesu awanena ati: “Mwe wawembu mwe, mwe wi suwilo litici, uzye ndilanga nawa na mwemwe ukufika mpindi ci? Swinya ndisipicizya ukufika mpindi ci pa miwele yinu? Muletani ko-o.” 18 Walile wamuleta, e Yesu akalipila umuzimu uwuwipe wuno walinji mu mulumendo, nawo awufuma, nu mulumendo apola paponye. 19 Nga wasambi awaya kwe Yesu ku mbali, awamukolowozya ukuti: “Nga cani cino sweswe tetwapotelwa ukuwufumya?” 20 Awasuka ati: “Apa mulandu wakuti musi ni suwilo iliwome. Nkuminena nkuti, mwange muwe ni suwilo ngati ambeyu ya kwe muzimwa, munganena umwamba wo-o ukuti, ‘Fuma pa-a yanga koko, nawo wufumepo, swinya pasi icili consinyenye cino mungapotwa ukucita.” 21 ——
22 Pano wacili walongine mu Galili, Yesu anena awasambi wakwe ukuti: “Umwana wa muntu walimukazya nu kumupa mu makasa ya walwani. 23 Walimukoma, swinya pa wanda waciti tatu, e Leza alimuzyulupula.” Walile awasambi wivwa ya-a amazwi, wivwile uwulanda nkaninye.
24 Pano wafisile mu Kapernahumu, awonsi wano wasoncezyanga amakoini yawili aya musonko* wayile kwe Petro nu kumuwuzya ukuti: “Uzye umusambilizya winu akalipila amakoini yawili aya musonko?” 25 Nawe ayasuka ukuti: “Eta, akalipila. Walile Petro winjila mu ng’anda, e Yesu atalicilapo ukulanda ukuti: “Wenji ukuti wuli Simoni? Akwa weni kuno izyamfumu zya munsi zikapoka imisonko? Uzye aku wana wawo nanti aku wantu vye wanji?” 26 Walile Petro wasuka ukuti: “Aku wantu vye wanji,” Yesu amunena ukuti: “Lyo fwe awana wa mfumu watazipizile ukulipila imisonko. 27 Nomba pakuti tutaleta icimvulungunya, yanga kwe sumbi, ukasumbilemo iswelo, usende inswi yino wandi ukatalicile ukuswela, nga wayiyula umulomo, wandi ukazanemo e koini ye silva.* Uyisende, nu kuwapa pakuti undipilileko, uyilipilile na wemweneco.”