Ukulingana ne Mateyo

12 Pe yoyo impindi, e Yesu na wasambi wakwe wapisile mu calo ca ngano pa wanda wi Sabata, awasambi wakwe wivwile inzala. Acino watalisile ukulya ingano zino zyalinji mu calo. 2 Walile Awafalisi walola vyo-o, wanenile Yesu ukuti: “Lola awasambi wako! Wakucita vino watazipizile ukucita pi Sabata. 3 Nga Yesu awanena ukuti: “Uzye mutawazya mu Mawaliko pe vino Devedi wacisile pano weliwe na wonsi wakwe wivwile inzala? 4 Uzye e Devedi atinjizile mu ng’anda ya kwe Leza? Swinya uzye e Devedi na wonsi wakwe watalile imikate yino amasundo yalesizye ukuti watafwile ukulya, pa mulandu wakuti wasimapepo watupunye awano wayine ukulya? 5 Nanti, uzye mutawazya mu Masundo ukuti, pa wanda wi Sabata wasimapepo wasileka ukuwomba pa ng’anda ya kwe Leza swinya wasiwapa umulandu wakukana ukukonka isundo lyi Sabata? 6 Nomba nkuminena nkuti umucindame ukucila ing’anda ya kwe Leza ali pa-a. 7 Mulange mwivwicisya uwupiliwulo wa mazwi yano yakati: ‘Nakunda uluse asa nzuwi zya nyama’ nga mutapile wa-a awantu wano wataluvinye umulandu. 8 Nkulanda wo-o amuno Umwana wa muntu awino wawa na maka pi Sabata.”

9 Walile wafumavye kwe co-o icifulo, wayile kwi sinagogi lyawo. 10 Swinya lolani! Kwalinji umonsi wino ikasa lyakalizile.* Apano awonsi wamwi awakolowozya Yesu awati: “Uzye Amasundo yazumilizya ukupozya umuntu pa wanda wi Sabata?” Wakolowozizye wo-o pakuti wamupe umulandu. 11 Nga Yesu awasuka ukuti: “Nga cakuti ing’onzi yako yonganye yino wawa nayo yaponela mu cizinji pa wanda wi Sabata. Uzye utanga uyileme nu kuyifumyamo? 12 Fwandi umuntu wacindama nkaninye pa ng’onzi! Acino amasundo yatakanya ukucita icizima pa wanda wi Sabata.” 13 Nga Yesu anena weyo umonsi ukuti: “Tambalika ikasa lyako.” Nawe watambalisile, swinya lyapozile aliwa ngati aliwuye. 14 Lelo Awafalisi wafumilepo awaya mukwivwana ivya kumukoma 15 Walile Yesu wamanya pe co-o, wafumileko. Awantu awavule wamukonsile swinya wawapozizye wonsinye, 16 lelo wawakonkomecezizye ukuti watakanene uwili wensinye pe weliwe, 17 pakuti aficilisye amazwi yano kasesema Ezaya walanzile ayakuti:

18 “Lolani! Umuwomvi wane wino nasola, wino nakunda swinya akansecelesya. Ndiwika umuzimu wane pe weliwe, alilenga awantu wa misango yonsinye ukumanya inzila inzima iyakucitilamo ivintu. 19 Atalipanga ivikanza nanti ukupunda, swinya izwi lyakwe litaliyivwika mu misewo. 20 Atalifwanta itete ilivunike, swinya atalizimya ulukozyo luno lukusuka icusi, mpaka ayizemale ukuzifya vyonsinye vino vitawa icete. 21 Swinya awantu ukufuma mu nsi zyonsinye walisuwila mwi zina lyakwe.”

22 Apano awamuletela umonsi wino wizile awa antonko swinya ciwulu pa mulandu nu muzimu uwuwipe wuno wakweti. Yesu wawinzile icimuzimu iciwipe nu kumupozya, icakuti umonsi e ciwulu watalisile ukulanda nu kulola. 23 Awantu wazungusile nu kutalika ukulanda ukuti: “Uzye we-e asa Mwana wa kwe Devedi?” 24 Pano Awafalisi wivwile vino awantu walandanga, watili: We-e umuntu akafumizya iviwa ku maka ya kwe Belizebuli* e kateka wa viwa.” 25 Pa mulandu wakuti e Yesu wamanyile vino welenganyanga, wawanenile ukuti: “Uwufumu wonsinye nga wapawunkana, wusitwalilila. Nu musumba wonsinye nanti ing’anda yonsinye nga yapawunkana ikakononeka. 26 Nga cakuti e Satana akawinga iviwa vyakwe, cingawa nge akuyilwisya umweneco. Uwufumu wakwe wungapawunkana swinya wutanga wutwalilile. 27 Mukanena mukati cino nkawinjila iviwa amuno nkawombela ponga ne Satana. Nomba awasambi winu nawonye wakawinga iviwa, lyo mukuti weni wakafumya amaka kwe weni? Awuli umulandu wuno awasambi winu walimilanjizya ukuti vino mukalanda avya wufi. 28 Lelo nga cakuti nkawomvya amaka ya kwe Leza pakufumya iviwa, lyo Uwufumu wa kwe Leza wiza pe mwemwe ukwasowa ukuti mumanye. 29 Nanti uzye umuntu anginjila wuli mu ng’anda ya muntu wa maka nu kumupoka iviya? Azipizile ukutalicila ukumunyepa amakasa na manama, apano anginjila mu ng’anda yakwe nu kusenda vyonsinye vino vyawamo. 30 Wensinye wino atawa ku luwali lwane, lyo akandwisya. Na wensinye wino asiwombela ponga nani ukulonganika awantu, lyo akawasalanganya.

31 “Acino nkuminena nkuti, awantu waliwatetela pa luwembu lonsinye ni miponto, lelo wensinye wino wapontela umuzimu wa kwe Leza, watalimutetela. 32 Ku cakulolelako, wensinye wino wapontela Umwana wa muntu, walimutetela. Lelo wensinye wino wapontela umuzimu wa kwe Leza watalimutetela pe yo-o impindi nanti munsi mpya yino yikwiza.

33 “Nga mwe cimuti icizima, mwandi mwakoma ivikomwa ivizima. Lelo nga mwe cimuti iciwipe, ni vikomwanye vyandi vyawa aviwipe. 34 Mwe wana wanzoka mwe! Mungalanda wuli ivizima pano mwe wawipe? Amuno umuntu akalanda vino vizula mu mwezo wakwe. 35 Umuntu umuzima akalanda ivizima amuno mu mwezo wakwe mwizula ivizima, nu muntu umuwipe akalanda ivintu iviwipe amuno mu mwezo wakwe mwizula iviwipe. 36 Nkuminena nkuti, awantu waliluwululilapo pa Wanda wa Wupinguzi, pa mazwi yonsinye ayavye yano wakalanda; 37 amuno amazwi yako nga amazima, Leza alikuwika pa muntu wino akacita ivizima, lelo amazwi yako nga amawipe, e Leza alikupa umulandu.”

38 Nga Wafalisi na wakasambilizya wa masundo awamunena awati: “Musambilizya, tulanjizye icimanyilo cino twandi tumanyileko ukuti we Leza wakutuma.” 39 Ne Yesu awasuka ati: “Mwe wantu awawipe mwe, wano watawa ni civwila* kwe Leza. Mwe wano mukalondavye ukulola icimanyilo. Lelo mutalitela mulole icimanyilo sukavye ica kwe kasesema Yona. 40 Wulyanye vino Yona walinji munda ya nswi pa manda yatatu, umusanya nu wusiku, avino nu Mwana wa muntu aliwa mu nkungwe pa manda yatatu umusanya nu wusiku. 41 Awantu wa mu Ninive walikatuka ponga na wantu wa pe yo-o impindi mu mpindi ya wupinguzi swinya waliwasinila, amuno weni walapizile pano Yona wawawizizizye. Nomba lolani! umuntu wino walusya Yona, ali pa-a. 42 Pa wanda wa wupinguzi e Namfumu wa ku Sheba, alikatucila ponga na wantu wa pe yo-o impindi nu kuwasinila, amuno wafumile ukutali nkaninye ukuti ayize ateyelezye vye ku mazwi ya mano aya kwe Solomoni. Nomba lolani! Wino walusya Solomoni ali pa-a.

43 “Nga cakuti umuzimu uwuwipe wafuma mu muntu, wukapita muno musi aminzi pakuya mukuvwamba apakupuzila, lelo usipazana. Lelo nga wutapazanile, 44 Apano wukati; ‘Nkunyocela kwe wilyanye umuntu wino nafumilemo.’ Swinya nga wafika, wukazana musi nanti kamwi, lelo mwapyelwa swinya mukuloleka umwa wusaka. 45 Nga winjila mu muntu, wukafuma nu kuyasenda imizimu na yinji imiwipisye 7. Na weyo umuntu akakwiza mukuwipa ukucila na vino walinji pakutalika. Wonye wo-o avino ciliwa na kwe yo-o inkulo imbipe.”

46 Pano wacilinji akulanda na wantu, e mama wakwe na wazuna wakwe wimilile palonde amuno walondanga ukulanda nawe. 47 Acino wumwi wizile amunena ati: “Musambilizya e mama wako na wazuna wako, wali pa londe wakulonda ukulanda nawewe.” 48 Nge Yesu amwasuka ukuti: “Uzye wawamanya wa mayo wane na wazuna wane? 49 Nga asonta awasambi wakwe ati: “Wa-a awali wamayo na wanyina wane! 50 Amuno wensinye wino akacita ukulonda kwa kwe Tata uwa mwi yulu, awili e mama wane, umunyina wane swinya e nkazi yane.”