Ukulingana ne Yohani
16 “Nalanda vyo-o ivintu pakuti mutize muleke ukuwa ni suwilo.* 2 Awantu walimiwinga mwi sinagogi, swinya impindi yikwiza pano wensinye wino wamikoma aliwalola ngati akuwombela Leza. 3 Lelo walicita vyonsinye vyo-o pa mulandu wakuti watamanya e Tata na nene. 4 Naminena vyo-o ivintu pakuti pano impindi yilifika iyakuti vicitike, mwize mwizuke ukuti naminenile.
“Ntamiwuzizye vyo-o ivintu pakutalika amuno nalinji na mwemwe. 5 Nomba nkuya kwe wino wantumile, lelo kusi nanti wumwi pe mwemwe wino akunkolowozya ukuti: ‘Ukuya kwinye?’ 6 Mwawa nu wulanda pa mulandu wakuti naminena vyo-o ivintu. 7 Nkuminena icisinka nkuti, nga napita cilimizipila mwemwenye. Amuno nga ntapisile, e kavwa ataliyiza kwe mwemwe; lelo nga napita ndimutuma. 8 Alila wiza alilenga awantu ukumanya uluwembu, uwulungamane nga nu wupinguzi wa kwe Leza: 9 Icakutalicila alisokolola uluwembu lwa wantu wa munsi, amuno watasuwila mwe nene; 10 apano ayize asokolole uwulungamane, amuno nga naya kwe Tata, mutalindola naswinya; 11 Swinya alilanjizya wano Leza alipingula, amuno wapingula kali e kateka we yo-o insi.
12 “Ncili ndi ni vivule ivyakuminena, lelo mutanga muvivwe pe yo-o impindi. 13 Nomba, nga mwiza mwapocelela umuzimu wa kwe Leza wuno wukasokolola icisinka, wulimyavwa ukumanya icete icisinka. Lelo wo-o umuzimu wa kwe Leza wusiyiwombelavye ivintu, wukasokololavye vino Leza wapingulapo ukuti vimanyikwe. Wulimyavwa ukumanya ivintu vino viliyiza vicitike. 14 Wo-o umuzimu wa kwe Leza wulincindamika, amuno wuliminena vino vilifuma kwe nene. 15 Ivintu vyonsinye vino Tata wawa navyo avyane. Awuli umulandu wuno tenamiwuzizya ukuti, vino wuliminena vilifuma kwe nene. 16 Kwasyalavye katici, lyo mwaleka ukundola swinya kwasyalavye katici, mulindola.”
17 Nga wasambi wakwe wamwi awatalika ukulanzyanya wakuti: “Nga wasula mwinye pakutunena ukuti, ‘Kwasyalavye katici, lyo mwaleka ukundola swinya kwasyalavye katici, mulindola,’ amuno ‘nkuya kwe Tata’?” 18 Walandanga wakuti: “Uzye wasula mwinye pakulanda ukuti, ‘Kwasyalavye katici’? Tutamanyile cino akulandapo.” 19 E Yesu wamanyile ukuti walondanga ukumukolowozya, acino wawanenile ukuti: “Uzye mukukolowozyanya pa kuti mumanye cino tenalandila ukuti: ‘Kwasyalavye katici lyo mwaleka ukundola swinya kwasyalavye katici, mulindola’? 20 Nkuminena icisinkanye nkuti, mulilila nu kuwa nu wulanda, lelo awantu wa munsi walisecelela; mulilosya, lelo ukulosya kwinu kulipiluka insansa. 21 Nga cakuti umwanaci ali mukukwata umwana, akakwivwa uwulumila, amuno lyo impindi yakwe iyakuti apape yafika. Nomba nga cakuti umwana wakwatwa, akakwiwilila na kuwulumilanye, amuno akasecelela sana pa mwana wino wakwatwa munsi. 22 Acino namwemwenye muli nu wulanda; lelo mulila mwandola naswinya, mulisecelela, swinya kusi wino alimipoka zyo-o insansa. 23 Pe wowo uwanda, mutalinkolowozyapo iwuzyo ilili lyonsinye. Nkuminena icisinkanye nkuti, nga mwalenga Tata icili consinye ukupitila mwi zina lyane, alimipa. 24 Ukufika pa-a, musitela mulengepo icili consinye ukupitila mwi zina lyane. Acino lengani, mulipocelela swinya muliwa ni nsansa nkaninye.
25 “Nalanda vyo-o ivintu kwe mwemwe ukuwomvya ivilanjililo. Lelo impindi yikwiza pano ndilandavye ukwasowa ukuwomvya ivilanjililo pe vino Tata wawa na vino akacita. 26 Pe wowo uwanda, mulilenga kwe Tata ukupitila mwi zina lyane; Lelo ntakupiliwula ukuti ndimilenjelako kwe Tata. 27 Amuno e Tata wamikunda pa mulandu wakuti mwankunda swinya mwasuwila ukuti natumwa ne Leza. 28 E Tata wantumile ukwiza munsi. Nomba pa-a nkufuma munsi, nu kunyocela kwe Tata.”
29 Nga wasambi wakwe awalanda ukuti: “Tatakulu, pa-a nomba twivwicisya vino ukulanda, amuno utakuwomvya ivilanjililo. 30 Pa-a nomba, twamanya ukuti wamanya vyonsinye, usilondekwa nu kulindilila ukuti wumwi akukolowozye amuno ukalanga umanyile kali vino akwelenganya.” 31 E Yesu ayasuka ukuti: “Pa-a mwasuwila, 32 lelo impindi yikwiza swinya ayonye yo-o, pano cila muntu alisamalila ku ng’anda yakwe nu kunsya nenga. Nomba ntawa nenga, nawa ne Tata. 33 Nalanda vyo-o ivintu pakuti mwize muwe nu mutende pa mulandu na nene. Amuno muliwa mwacula mo-o munsi, lelo sipani! Amuno ncimvizye insi.”