Ukulingana ne Mateyo
28 Pano Isabata lyasizile, lyo kwati kwaya mukuca uwanda wakutalicilapo mwe sabata, e Mariya umwina Magadala ne Mariya winji* wizile mukulola inkungwe.
2 Swinya, Lolani! Walile wafika wazanile kupisile icinzumanzi icikulu, amuno umungeli wa kwe Yehova wisile ukufuma mwi yulu nu kukunkulusya iciliwe ayikala na penepo. 3 We-e umungeli walangalilanga ngati akumesya kwa mvula swinya ivizwalo vyakwe vyalinji avitiswe nkaninye. 4 Wano walondanga inkungwe ya kwe Yesu wamutinile nkaninye, swinya wazakazile icakuti walinjivye ngati wafwile.
5 Lelo umungeli wanenile awanaci ukuti: “Mutatina, amuno manyile ukuti mukuvwamba Yesu wino wapamantizile pa cimuti. 6 Asi mwenemo mo-o, azyulupusile, wulyanye vino walanzile. Nzanji, mulole pano palinji umuwili wakwe. 7 Pitisyani nombanye, yanji kanenani awasambi wakwe muti, azyulupusile ku wafwe, amuno, lolani! ali munzila akuya ku Galili, akuno mwandi mukamuzane. Yizukani vyo-o vino naminena”.
8 Awanaci wafumile ku nkungwe* zuwa zuwa. Nanti walinji ni ntete, lelo walinji ni nsansa nkaninye. Awasamala ukuya mukunena awasambi wakwe. 9 Paponye, e Yesu wa wasunkinye, nga awalamuka ukuti: “Muli wuli!” Wayile kwe weliwe, nu kukontamila pa matamba yakwe. 10 Nga Yesu awanena ukuti: “Mutatina! Yanji kanenani awasambi wane ukuti waye ku Galili, kulyanye akuno wandi wakanzane.
11 Pano awanaci wacili wakuya, wamwi pe wano walondanga, wayile mu musumba nukusimicila intunguluzi zya simapepo vyonsinyene vino vyacitisile. 12 Zyalile intunguluzi zya simapepo zyalongana ponga na wasongo, zyapandine amano, nu kupa wa malonda indalama imvule izye Silva, 13 awawanena ukuti: “Mwize mulande muti, ‘Awasambi wakwe wizile wamwiwa uwusiku lyo tulazile. 14 Swinya lyo-o ilyasi nga liza lyafika kwe Pilato, mutiza musakamale, tulimulondololela. 15 Acino wa-a wamalonda wasenzile zyozyo indalama zye silva nu kucita wulyanye vino wawanenile. Swinya lyo-o ilyasi lyasalangana mu Yuda monsinye ukufika ni lelo lyo-o.
16 Lelo awasambi 11 wayile ku Galili, ku mwamba kuno Yesu wawanenile ukuti wize wakasunkanile. 17 Walile wamulola, wamukontamizile, nomba wamwi wavwilisile. 18 Walile e Yesu wapalamila kuno walinji, wawanenile ukuti: “E Leza ampile maka yonsinye mwi yulu na munsi. 19 Acino, yanji kasambilizyanji awantu awa mu nko zyonsinye pakuti wawe awasambi wane. Muwawabadizizya mwi zina lya kwe Tata, ilya mwana ni lya muzimu wa kwe Leza 20 Mwawasambilizya ukuti wakonka vyonsinye vino namisambilizye swinya muwakwizuka ukuti nandi nawa namwe mpaka na ku nsilo ya kwe yo-o insi.”