Ukulingana ne Luka
11 Wanda wumwi pano Yesu wamazile ukupepa, awasambi wakwe wamunenile ukuti: “Tatakulu, tusambilizye ivya kupepa, wulyanye vino ne Yohani wasambilizizye awasambi wakwe.”
2 Nawe wawanenile ukuti: “Pano mukupepa, mwalanda mukuti: ‘Tata wa kwi yulu, Tukupepa ukuti awantu wacindika izina lyako. Tukupepa ukuti Uwufumu wako wutalike ukuteka. 3 Uwatupa ivyakulya vyecila wanda ukulingana na vino tukulondekwa. 4 Swinya uwatutetela imembu ndi wulyanye vino nasweswe tukatetela wano wakatuluvyanya. Uwatwavwa pano twelezwa ukuti tucite iviwipe.’”
5 Wawanenile nu kuti: “Tuti wumwi pe mwemwe wawa ne ciwuza, nga muye kwe weliwe uwusiku pakasi nu kumunena ukuti, ‘We wane nkulengako imikate yitatu, 6 napocelela umweni, wafuma ukutali nkaninye, nomba nsi ni vya kumupa ukuti alye.’ 7 Ne nawe amwasucile mu ng’andanye ukuti: ‘Acani cino wizila yo-o impindi? Awusiku wo-o. Njiyazile kali ku cisakati, swinya tulazile na wana wane. Ntakukumanisya ukukatuka nu kukupa icili consinye.’ 8 Nkuminena nkuti, angakatuka nu kumupa vino alenzile, cino angakatucila asa mulandu wakuti we ciwuza wakwe, lelo apa mulanduvye wakuti atwalilizile ukumulenga. 9 Acino nkuminena nkuti, mwatwalilila ukulenga, mulipocelela, mwatwalilila ukuvwamba, mulivizana, mwatwalilila ukukong’onsya, walimiyulila. 10 Amuno wensinye wino akalenga wakamupa, swinya wensinye wino akavwamba akavizana, na wensinye wino akakong’onsya wakamwiyulila. 11 Weweni pe mwemwe wino umwana wakwe nga wamulenga inswi, angamupa inzoka? 12 Nanti nga wamulenga ilyenza amupe ikalayili? 13 Acino nanti acakuti mukacita iviwipe, mwamanya ukupa awana winu ivyawupe ivizima, mungasuwila ukuti Umukwasi winu uwa kwi yulu nawenye alipa umuzimu wakwe, kwe wonsinye wano wakamulenga!”
14 Mukuya kwa mpindi Yesu wapozizye umonsi wumwi wino walinji nu muzimu uwuwipe uwakukanalanda. Pano umuzimu wuwipe wafumile mwe weliwe, watalisile ukulanda icakuti awantu wazungusile nkaninye. 15 Lelo wamwi watili: “Akafumizya iviwa ku maka ya kwe Belizebuli* e kateka wa viwa. 16 Wanji nawo pakuti wamwelezye, watalisile ukumupaticizya ukuti acite icimanyilo ukufuma mwi yulu. 17 Pa mulandu wakuti e Yesu wamanyile vino welenganyanga, wawanenile ukuti: “Uwufumu wonsinye nga wapawunkana wusitwalilila, swinya ing’anda yino yapawunkana yikapona. 18 Wonye avyo cawa na kwe Satana, nga cakuti akuyilwisya umweneco, uwufumu wakwe wutange wutwalilile. Mukati nkafumizya iviwa ku maka ya kwe Belizebuli. 19 Nomba nga cakuti nkafumizya iviwa ku maka ya kwe Belizebuli, lyo awana winu weni wakafumya amaka kwe weni? Awuli umulandu wuno awana winu walimisinila ukuti vino mukalanda avyawufi. 20 Lelo nga cakuti nkawomvya amaka ya kwe Leza pa kufumya iviwa, lyo Uwufumu wa kwe Leza wiza pe mwemwe ukwasowa ukuti mumanye. 21 Nga cakuti umonsi wa maka swinya wino ali ni vyanzo akulonda ing’anda yakwe, iviya vyakwe vikacinjililwa. 22 Lelo nga cakuti wino amulusizye amaka wiza nu kumulwisya, akasenda ivyanzo vyakwe vyonsinye vino wasuwizile, nu kwankanyako wanji ivintu vino wapoka. 23 Wensinye wino atawa ku luwali lwane lyo akandwisya, na wensinye wino asiwombela ponga na nene mukulonganika awantu lyo akawasalanganya.
24 Nga cakuti umuzimu wuwipe wafuma mu muntu, wukapita muno mutawa aminzi pa kuya mukuvwamba apakupuzila, nomba nga wutapazanile wukati, ‘Nkunyocela kwe wilyanye umuntu wino nafumilemo.’ 25 Swinya nga wafika, wukazana mwapyelwa mukuloleka umwawusaka. 26 Nga winjila mu muntu, wukafuma nu kuyasenda imizimu na yinji imiwipisye 7. Na weyo umuntu akakwiza mukuwipa ukucila na vino walinji pakutalika.”
27 Nomba pano walandanga vyonsinye vyo-o, umwanaci wumwi mwi wumba wapunzile ati: “Awa nsansa umwanaci wino wakukwasile* nu kukonsya!” 28 Lelo wamunenile ukuti: “Awe, nandi minene awantu wano wawa sana ni nsansa. Awawo wano wakakwivwa izwi lya kwe Leza nu kucita vino likalanda!”
29 Pano amawumba ya wantu yayanga mu kuwungana kwe weliwe, watalisile ukuwanena ati: “Yo-o inkulo, aya wantu awawipe; amuno yikalondavye ukulola icimanyilo, lelo watalitela walole icimanyilo sukavye ica kwe kasesema Yona. 30 Amuno wulyanye vino Yona walinji acimanyilo ku wina Ninive, avino ciliwa na ku Mwana wa muntu ku wantu wa pe yo-o impindi. 31 Pa wanda wa wupinguzi e namfumu wa ku Sheba alikatucila ponga na wantu wa pe yo-o impindi nu kuwasinila, amuno wafumile ukutali nkaninye ukuti ayize ateyelezyevye ku mazwi ya mano aya kwe Solomoni. Nomba, lolani! Wino walusya Solomoni ali pa-a! 32 Awantu wa mu Ninive walikatuka ponga na wantu wa pe yo-o impindi mu mpindi ya wupinguzi swinya waliwasinila, amuno weni walapizile pano Yona wawawizizizye. Nomba, Lolani! Umuntu wino walusya Yona, ali pa-a. 33 Umuntu nga wasya ulukozyo asilufisa, nanti ukuluwika mwisika mwi tebulo lelo akaluwika papela pakuti lwakozezya wonsinye. 34 Uluswepo lwa muwili aminso yako. Nga cakuti aminso yako yakulolecesyavye pa vintu ivizima lyo umuwili wako wonsinye wuliwa mu luswepo. Nomba nga cakuti aminso yako yakulolecesya pa viwipe, lyo nu muwili wako wonsinye wuliwa mu mfinzi. 35 Cenjelani pakuti uluswepo luno lwawa mwa kwe mwemwe, lutawa amfinzi. 36 Acino nga cakuti umuwili wako wonsinye wuli mu luswepo, kusi ni cilundwa cino cili mu mfinzi, lyo umuwili wako wonsinye wuliwa mu luswepo ngati awulyanye vino ulukozyo lukakukozezya.”
37 Pano walanzile vyo-o, Umufalisi wumwi wamunenile ukuti waye walye nawe. Acino wayile ayikala atalika ukulya pi tebulo. 38 Lelo Umufalisi wazungusile nkaninye pano waweni e Yesu atasamvile* ku makasa pakutalika ukulya. 39 Acino Tatakulu wamunenile ati: “Nomba mwemwe mwe Wafalisi, mukapizyavye kapu ni mbale kunzi lelo mukasi mwizulavye uwucenjezi nu wuwipe. 40 Mwe wawelewele mwe! Uzye wino wapanzile kunzi, atapanzile na mukasi? 41 Lelo mwemwe pano mukupa* awapina, muwapa ukufuma pa mwezo, nga mwacita wo-o muliwa mwe wasanguluke mwe vyonsinye. 42 Acawulanda kwe mwemwe mwe Wafalisi, amuno mukapa ivyawila, e minti ne Lu, ni misalu yinji iya mu gadeni,* lelo mwasula amasundo amacindame aya kwe Leza! Kweni muzipizile ukucita vyovyo ivintu lelo mutazipizile ukusula amasundo. 43 Acawulanda kwe mwemwe mwe Wafalisi, amuno mwakunda ukwikala pa vilimba vya kunkolelo* mu ma sinagogi swinya mukakwivwa icete awantu nga wakumilamuka mu ma maliketi! 44 Acawulanda kwe mwemwe, amuno mwawa ngati ankungwe zyo zyapwela zisiloleka, zino awantu wakapitapo ukwasowa ukuzilola!
45 Wumwi pe wano wamanyile nkaninye amasundo wamunenile ati: “Musambilizya, ngu kulanda vyovyo lyo ukutuka nasweswenye.” 46 Nawe watili: “Acawulanda na kwe mwemwenye mwe wano mwamanya amasundo, amuno mukanyepa iviya ivikulu nu kutwika awantu, lelo mwemwe musilemamo nanti akalikasa konga!
47 Acawulanda kwe mwemwe, amuno mukazenjelela inkungwe zya kwa kasesema wano awakwasi winu wakomile! 48 Mwamanyanye vino awakwasi winu wacisile, lelo mukazumilizya ku viwipe vino wacisile, amuno mukazenjelela inkungwe zya kwa kasesema wano wakomile. 49 Awuli umulandu wuno e Leza walanzile ukuwomvya amano yakwe ukuti: ‘Ndituma wakasesema na watumwa kwe woliwo, swinya walikoma nu kucuzyapo wamwi, 50 pakuti awantu wa pe yo-o impindi wize wawapingule pa wazi wonsinye wuno wazwisya ukufumilila pa kutalika kwa nsi. 51 Ukufumilila pa wazi wa kwe Abelo ukufika pa wa kwe Zekariya wino wakomezile pakasi ki tempile na pano wapelelanga inzuwi.’ Nkuminena nkuti awantu wa pe yo-o impindi waliwapingula pe wo-o uwazi.
52 “Acawulanda na kwe mwemwenye mwe wano mwamanya amasundo, mwapoka awantu ama kii yakwinjila mu Wufumu wa kwe Leza. Amuno mwemwe mutinjilamo swinya mukakanya na wano wakulonda ukwinjilamo.”
53 Walile wafuma koko, wakasambilizya wa masundo na Wafalisi awamukatucila nu kutalika ukumukolowozya amawuzyo amavule. 54 Wavwambanga inzila ya kumupelelamo umulandu.