Ukulingana ne Mateyo

9 Acino e Yesu, wakwezile uwato, alamba sumbi nu kuya ku Kapenahumu, ku musumba wuno wikalangamo. 2 Nga wantu awamutwalila umonsi wino atapitanga pa mulandu ni ndwala, wamusendezile vye apakulalila. Pano Yesu waweni isuwilo lyawo, wanenile umonsi wino walwile ukuti: “Sipa, mwana wane! Nakutetela amawembuko yako.” 3 Nomba wakasambilizya wa masundo wamwi welenganyanga ukuti, “We-e umuntu akupontela Leza.” 4 Pa mulandu wakuti e Yesu wamanyile vino welenganyanga, wawanenile ukuti: “Acani cino mukwelenganizizya pa viwipe? 5 Ku cakulolelako, acili kwinye cino casyupa sana, pa kulanda ukuti, ‘Nakutetela amawembuko yako,’ nu kulanda ukuti, ‘Katuka, talika ukupita?’ 6 Nomba lekani milanjizye ukuti Umwana wa muntu wawa na maka yakutetela uluwembu. Nga Yesu alanda ukuti: “Katuka, senda icitanda cako uye ku ng’anda.” 7 Nawe wakatusile nu kuya ku ng’anda ku mwakwe. 8 Awantu wano walinjipo walile walola vino vyacitisile, watinile nkaninye swinya wacindisile Leza, wino wapile awantu amaka yakucita ivizungusyo.

9 Pano Yesu wafumanga koko, waweni umonsi uwi zina lyakuti Mateyo ayisile pi ofesi lya kwa kasoncezya wa misonko, nga Yesu amunena ukuti: “Nzanga uwe we musambi wane.” Paponye wakatusile nu kumukonka. 10 Pano Yesu wisile na wasambi wakwe mu ng’anda, wakulya pi tebulo, wakasoncezya wa misonko awavule na wawembu nawonye wizile nu kutalika ukulya nawo. 11 Nomba pano Awafalisi waweni vyonsinye vyo-o wanenile awasambi wakwe ukuti: “Amulandu ci wuno e kasambilizya winu akalila ponga na wakasoncezya wa misonko na wawembu?” 12 Walile Yesu wivwa ya-a amazwi, watili: “Awapuma wasilonda uwakuwapozya, suka awalwale. 13 Fwandi, pitanji kasambililani muno lyo-o iwaliko likasula lino likati: ‘Nkalonda uluse asa nzuwi zya nyama’. Amuno ntiza mukwita awalungamane, lelo niza mukwita awawembu.”

14 Nga awasambi wa kwe Yohani Kabadizya awiza kwe Yesu nu kumuwuzya awati: “Amulandu ci wuno sweswe na Wafalisi tukalecela ukulya, nomba awasambi wako wasileka ukulya?” 15 Yesu awasuka ukuti: “Awawuye wa kwe siwinga wasiwa nu mulandu wakuwa nu wulanda nga wali ne siwinga. Nomba impindi yikwiza pano e siwinga walimusenda, apano awawuye walisyala waleke ukulya. 16 Kusi wino akasenda icikamba ca mwenda uwupya akambika pa cizwalo icikali, amuno icikamba ca mwenda uwupya cingalepula icizwalo icikali, na pano palepusile pangakulilako. 17 Swinya awantu wasiwika wayini iyipya mu vyola* vyakusunjilamo waini ivikali, amuno nga wacita wo-o ivyakusunjilamo vingalepuka ne wayini yingitika. Lelo awantu wakawika wayini mu vyakusunjilamo ivipya pakuti vyonsinye vitononeka.”

18 Pano acili akuwanena vyo-o, paponye e kateka* wumwi wayile kwe weliwe nu kufukama,* amunena ati: “Pa-a pano nkulanda pamwi umwana wane afwile nu kufwa, tuye ukamuwikepovye nanti alikasa lyako pakuti awe nu wumi.”

19 Paponye e Yesu na wasambi wakwe wakonsile we-e umonsi. 20 Swinya umwanaci wino walwile indwala yakufuma uwazi akonka Yesu kunsizi nu kumulema ku cizwalo cakwe ica kulonde. We-e umwanaci wacuzile na yo-o indwala imyaka 12. 21 welenganyanga ukuti: “Nga nalemavye ku cizwalo cakwe, nandi mpole.” 22 Yesu wapiliwusile, swinya walile wamulola, wamunenile ukuti: “Utatina mwanane! Isuwilo lyako lyakupozya.” Ukufuma palyanye, we-e umwanaci wapozile.

23 Nomba pano Yesu winjizile mu ng’anda ya kwe kateka walola wano wakulizya indwimbo, na wantu wano wapanganga icongo, 24 wawanenile ukuti: “Fumilani panzi, amuno umukazyana atafwile lelo alazilevye utulo.” Awantu watalisile ukumuseka. 25 Walile awantu wafumilavye palonde, e Yesu winjizile kuno wawisile we-e umwana umukazyana, amulema ikasa, nu mwana akatuka. 26 Lyo-o ilyasi lyasalangine mu citungu consinye.

27 Pano Yesu wafumanga koko, awonsi wawili intonko wamukonsile lyo wakupunda wakuti: “Twivwile uluse, Mwana wa kwe Devedi.” 28 Pano Yesu winjizile mu ng’anda yimwi, wa-a awonsi wawili intonko wayile kwe welilwe, nga Yesu awakolowozya ati: “Uzye musuwizile ukuti ningamipozya?” Awamwasuka awati: “Tuli ni suwilo Tatakulu.” 29 Nga awalema pa minso nu kuwanena ukuti: “Pa mulandu wakuti muli ni suwilo aminso yinu yandi yatalike ukulola.” 30 Walile Yesu walanda wo-o, zyo-o intonko zyatalisile ukulola. Lelo e Yesu wa wakonkomecezizye ukuti: “Mutaleka umuntu nanti wumwi amanye co-o cino cicitisile.” 31 Nomba walile wa-a awonsi wano walinji antonko wafumila pa londe, wasalanginye ilyasi pe Yesu mwe coco icitungu consinye.

32 Pano wafumanga koko, awantu wamuletezile umonsi e ciwulu wino walinji ni mizimu imiwipe. 33 Walile Yesu wamufumya icimuzimu iciwipe, we-e umonsi watalisile ukulanda. Acino awantu wazungusile nkaninye awati: “Ica musango wo-o cisitela cicitikepo mu Israeli.” 34 Lelo Awafalisi wamwi walandanga ukuti: “E kateka wa viwa awino akamwavwa ukufumya iviwa.”

35 E Yesu watalisile ukupita mu misumba yonsinye na mu twaya, wasambilizyanga mu masunagogi yawo nu kuwizya ilyasi lya Wufumu swinya wapozyanga indwala zya musango wonsinye. 36 Walile walola awantu awavule wano wayile kwe weliwe, wivwile uluse nkaninye amuno awantu wa wacuzyanga swinya walinji ngati ang’onzi zino zitawa ne kacema. 37 Nga anena awasambi ukuti: “Molimonye kuli ivyakulya ivivule ivya kusombola, nomba awawomvi wacefile. 38 Acino lengani umweneco wa mulimo wakusombola ukuti atume awawomvi na wanji.”