Ukulingana ne Luka
23 Awantu awavule wakatusile nu kulema Yesu awamutwala kwe Pilato. 2 Watalisile ukumuwipizya wakuti: “We-e umuntu akuleta icimvulunganya ku wantu witu. Akawakanya ukulipila umusonko kwe Kaisare swinya akalanda akuti we Klistu imfumu.” 3 Nge Pilato amukolowozya ati: “Uzye we Mfumu ya wa Yuda?” Ne Yesu amwasuka ati: “Wayilandila we mweneco.” 4 Apano Pilato anena intunguluzi zya simapepo na wantu ukuti: “Nene ntazanilemo umulandu mwe we-e umuntu.” 5 Lelo watwalilizilevye ukumunena ati: “Akasovya awantu mwe vino akasambilizya mu Yudeya monsinye, ukufumilila ku Galili ukufika na konye.” 6 Walile Pilato wivwa wo-o, wakolowozizye nga cakuti e Yesu walinji amwina Galili. 7 Pano e Pilato wamanyile ukuti e Yesu wafumile ku citungu cino Herodi watekanga, wamutumile kwe weliwe, lyo e Herodi ali mu Yerusalemu pe yoyo impindi.
8 Pano e Herodi waweni e Yesu, wivwile icete nkaninye. Amuno walondesyanga ukumulola pa mpindi ntali pa mulandu ni vintu ukuvula vino wivwile pe weliwe. Swinya walondanga ukuti acite icizungusyo lyo akulolako. 9 Acino watwalilizile ukumukolowozya pa mpindi ntali, nawe atamwasusile cimwi. 10 Lelo intunguluzi zya simapepo na wakasambilizya wa masundo, wakatukanga lyo wakalifile wakumupa imilandu. 11 Nga Herodi na wasoja wakwe awatalika ukumucuzya swinya pakumutumfya wamuzwisile icizwalo icizima, nu kumunyocezya kwe Pilato. 12 Ukufumilila yilyanye impindi, e Herodi ne Pilato wizile awawa aviwuza, amuno kali wativwananga.
13 Apano e Pilato ayita intunguluzi zya simapepo, wakateka na wantu wanji 14 nga awanena ati: “Mwalesile we-e umuntu kwe nene, mwatinji akunena awantu ukuti wakatucile uwuteko. Temwayivwila pano tenkumukolowozya amawuzyo, nomba ntamuzanilepo nu mulandu nanti wumwi pe yonsinye yino temukumupa. 15 Ne Herodi nye atamuzanilepo nu mulandu, aco tewamunyosya na ko-o, atacisile umulandu uwuli wonsinye uwakufwilapo. 16 Acino nandi mumevye ivikoti nga mulecele apite.” 17 —— 18 Lelo awantu wonsinye wapunzile ati: “Mukomanivye, mutusapulile ne Baraba!” 19 (We-e umuntu wamunyefile mu cifungo amuno walinji pe wano wakatucizile uwuteko swinya walinji nu mulandu wa wucikoma.) 20 Naswinyanye e Pilato walanzile nawo, amuno walondanga ukuti alecele Yesu. 21 Acino awantu watalisile ukupunda wakuti: “Mupamantilanivye pa cimuti! Mupamantilani!” 22 Wawanenile pa muku waciti tatu ati: “Nga cani? Aviwipe ci vino we-e umuntu acisile? Amuno ntamuzanilepo nu mulandu uwuli wonsinye wuno angafwilapo; Nandi mulecelevye apite.” 23 Walile walanda wo-o apano walusizye ukumupaticizya, swinya wapundanga ukuti azipizilevye ukufwa. Watwalilizilevye ukupunda icakuti e Pilato watontezile kwe vino walandanga. 24 Acino Pilato wapinguzilepo ukucita vino walondanga. 25 Wa wasapulizile umuntu wino walondanga, wino wamunyefile pa mulandu wakukatucila uwuteko na wucikoma, lelo wawatayizile Yesu ukuti wamucite vino walondanga.
26 Nomba pano wayanga mukumupamantila, walemile umonsi wumwi uwizina lyakuti Simoni uwa ku Kureni lyo akufuma mu musumba. Wamupaticizizye ukunyamula icimuti nu kukonka Yesu mu nsizi. 27 Awantu awavule wakonkanga Yesu, kumwi na wanaci wano wayumanga pa vifuwa pa mulandu nu wulanda lyo wakumulosya. 28 E Yesu wizile apiliwuka nu kunena wa-a awanaci ati: “Mwe wana awanaci awa mu Yerusalemu, lekani ukundila. Lelo mwayililila mweweneco nu kulilila awana winu, 29 amuno impindi yikwiza pano awantu waliwa wati, ‘Awa nsansa awanaci ing’umba, wano wasitela wakwatepo awana na wano wasitela wonsyepo!’ 30 Pano waliwanena imyamba wakuti, ‘Tuponelani!’ Na ku milundu wati ‘tuvwimbani!’ 31 Nga cakuti wacita vyo-o ivintu pano icimuti cicili aciwisi, nga pano cilikala ciliwa wuli?”
32 Wasenzile na wonsi wawili wano walinji avipondo, awaya mukuwapamantila ponga nawe. 33 Pano wafisile pa cifulo cino witanga ukuti ipanga, wamupamantizile pa cimuti ponga ni vipondo, conga kwe ndilo ne cinji kwe kamani. 34 Lelo e Yesu watili: “Tata, watetele, amuno watamanyile vino wakucita.” Swinya wasenzile ni vizwalo vyakwe, awapenduzya pakuti wavyankane. 35 Awantu wimilile wakulolecesya. Lelo intunguluzi, zyamusekanga nu kulanda ukuti: “Wapususyanga wanji; nga cakuti we Klistu wa kwe Leza wino wasolwa lekani ayipususye.” 36 Kumwi na wasoja nye wamutumfyanga, swinya wamupile ne waini iyikantuke. 37 Wamunenile nu kuti: “Nga we Mfumu ya wa Yuda yipususye.” 38 Papela wawisilepo ni cipampa cino catinji: “Imfumu ya wa Yuda.”
39 Apano icipondo conga pe vino wamupamantizile ponga navyo, acitalika ukumupontela ukuti: “Watinji we Klistu, ale yipususye we mweneco utupususye nasweswe!” 40 Ngi cipondo ciwuye acimukalipila, acimunena ati: “Uzye usitina ne Leza wo-o vino wakupinguzile icili conga na we-e umuntu? 41 Sweswe cili icetenye, amuno watupingulila pe vino twacisile; lelo we-e umuntu atacitapo iciwipe icili consinye.” 42 Acino watili: “Yesu, uyize unjizuke nga wiza wawa we Mfumu.” 43 Nga Yesu amunena ati: “Ilelonye lyo-o nkukunena nkuti, uliwa na nene mu paradaise.”
44 Yo-o impindi yalinji aku ma 12 ya musanya, lelo munsi monsinye mwizile amuwa imfinzi ukufika ku ma 15, 45 amuno ilanzi lyalesile ukuloleka. Ni katani lino lyalinji mwi tempile lyalepusile pakasi ukufuma papela mpaka pansi. 46 Swinya Yesu wapunzile nkaninye ati: “Tata, nawika uwumi wane mu makasa yako.” Walile walanda wo-o, afwa nu kufwa. 47 Pano e songo wa wasoja waweni vino vyacitisile, watalisile ukulumbanya Leza, watili: “Molimonye, we-e umuntu walinji awakaele.” 48 Na wantu wonsinye wano walinjipo pano wapamantilanga Yesu waweni vino vyacitisile swinya wanyocezile ku mang’anda lyo wakuyuma pa vifuwa. 49 Wonsinye wano wamanyine ne Yesu wimilizile akatalamucila, kumwi na wanaci wano wamukonsile ukufuma ku Galili, waweni vino vyacitisile.
50 Nomba kwalinji umuntu wumwi uwi zina lyakuti Jozefu, wino walinji awa mu cilye icikulu ica wa Yuda, swinya walinji amuntu umulungamane. 51 (Atazumilizizye ku melenganyo yawo yano wakweti pe Yesu.) Walinji awa ku Arimatiya, umusumba wa waYuda, swinya walindililanga Uwufumu wa kwe Leza. 52 Wayile kwe Pilato nu kumulenga ukuti amupe icitumbi ca kwe Yesu. 53 Acino wasawuzile umuwili wa kwe Yesu, awupomba na mu mwenda uwuzima amuwika na mu nkungwe yino yimvilwe mu ciliwe, muno wasitela wazikemo umuntu, nga kunkulusizyapo ni ciliwe. 54 Nomba walinji awanda Wakupekanya, swinya lyo Isabata lili mupipi nu kutalika. 55 Lelo awanaci wano wafumile ku Galili wakonsile awaya walola pano wazisile Yesu na vino wawisile umuwili wakwe, 56 swinya awanaci wanyocezile mukupekanya ivinuncile na mafuta amanuncile. Lelo pa wanda wi Sabata wapuzile ukulingana na vino amasundo yalandanga.