Ukulingana ne Luka
15 Nomba wakasoncezya wamisonko na wawembu wonsinye wayile kwe Yesu mukuteyelezya vino wasambilizyanga. 2 Swinya Awafalisi na wakasambilizya wa masundo wayilizyanyanga wakuti: “We-e umuntu akapocelela awawembu nu kulya nawo ponga.” 3 Ne nawe wawanenile icilanjililo cakuti: 4 “Weweni pa kwe mwemwe wino ngali ni ng’onzi 100 yonga yasowa wino atangasye izili 99 nukuya mukuvwamba yonga yino yisovile? 5 Nga wayizana angayiwika pa viweya lyo akusecelela. 6 Swinya ngawafika ku ng’anda angita iviwuza vyakwe, na wawuye nu kuwanena ati ‘secelelani ponga nanene amuno nzanile ing’onzi yane yino teyasowa.’ 7 Wonye avyo kuliwa ukusecelela na kwi yulu nga cakuti umuwembu wenga walapila pa walungamane 99 wano wasakulondekwa ukulapila.
8 “Nanti amwanaci ci wino nga ali na ma koyini* 10 aye silva nga wasovyapo yonga asikwasya ilampi apyela mu ng’anda nu kuvwambilizya mpaka azane e koyini yino isovile? 9 Nga wayizana akakwita iviwuza vyakwe nawina mupalamo nu kulanda ati, ‘Nzanji musecelele nani ponga amuno nazana e koyini* yane iye silva yino teyisovile.’ 10 Wonye, avino awangeli wa kwe Leza wakasecelela nga cakuti umuwembu wenga walapila.”
11 Walanzile nu kuti: “Umuntu wumwi walinji na wana wawili awonsi. 12 Acino umutici wayile kwe baba wakwe nu kumunena ukuti, ‘Tata njankanya lyankani ivyuma vino uzipizile ukumpa.’ Acino e tata wawo wawankinye ivyuma. 13 Pa nsizi yamanda vye matici, we-e umwana umuticipo uwa cilumendo wasenzile ivyuma vyakwe nu kuya kunsi yinji iyakutali, kulyanye akuno wayile ayonona ivyuma vyakwe ku miwele miwipe. 14 Walile wamala vyonsinye vino wakweti kwaponile icipowe mwe yoyo insi yonsinye swinya watalisile ukuyimba. 15 Acino wayile alambilizya umuntu wamwe yoyo insi ukuti amwinjizye incito, nawe wamupile incito yakucema wakapoli. 16 Swinya wakumbucilanga nu kulya ivyakulya vino wakapoli walyanga, lelo kusi nanti wumwinye wino wamupanga ivyakulya.
17 “Pano wilusile ukuti vino wacisile vyalinji aviwipe, watili, ‘E tata winjizya awawomvi awavule nkaninye wano wakalya umukate pano wakulondela. Nomba nene ko-o nkufwa ninzala! 18 Acino nandi nyocele kwe tata nkamunene ukuti: “Tata nawembucila e Leza wa kwi yulu, swinya nawembucila nawewenye. 19 Ntazipizile nu kwitwa ukuti ne mwana wako leka vye imbe nge awawomvi wako.”’ 20 Acino wakatusile nu kuya kwe baba wakwe. Walile e baba wakwe wamulola akatalamucila, wamwivwizile uluse swinya wamusamalizile aya mukukutila, nga amufyompa. 21 Apano anena e baba wakwe ukuti, tata nawembucila e Leza wa kwi yulu swinya nawembucila nawewenye. Ntazipizile nakwitwa nu kuti ne mwana wako.’ 22 Lelo e yisi wawuzizye awawomvi wakwe ukuti, ‘Pitisyani! letani icizwalo icizima mu muzwike swinya mu muzwike ne ling’i ni ndyatu. 23 Acino komani ni ng’ombe iyizima tulye pano tukuzevya, 24 amuno wafwile lelo ali nu wumi; wasovile nomba alolesile.’ Acino watalisile ukuzevya nu kusecelela.
25 “Lelo pano umwana wakwe e songo wapalamizile ku ng’anda lyo akunyoka ku vyalo, wivwile indwimbo zikulila na wantu wakucina. 26 Acino wakolowozizye umuwomvi wumwi vino vyacitikanga. 27 Umuwomvi wamunenile ukuti, ‘Umuzuna wako anyosile, e baba wako amukomezile ing’ombe iyizima amuno atili anyosile umutende.’ 28 Lelo wafuzilwe nkaninye akana nu kwinjila mukasi. Acino e baba wakwe wafumile atalika ukumulambilizya. 29 Nawe wanenile e baba wakwe ati, ‘Tata nikala nawe nu kukuwombela pa myaka imivule swinya nsitela nkupondocelepo lelo usitela umpepo nanti akana kambuzinye ukuti indye ni viwuza vyane nanti awanda wonganye. 30 Lelo umwana wako wino wayile ayononela indalama zyako zyonsinye ku wanaci wa malaya, alile wanyokavye, wafika wamukomela ni ng’ombe yilyanye iyizima.’ 31 Nge baba wakwe amunena ukuti, ‘Wewe wawa nani lyonsinye swinya vyonsinye vino nawa navyo, avyako. 32 Lelo tuzipizile vye ukuzevya nu kusecelela pa muzuna wako, amuno wafwile nomba ali nu wumi; wasovile nomba alolesile.”’