Ukulingana ne Luka
16 Pa nsizi ye vyo-o e Yesu wanenile awasambi wakwe ukuti: “Kwalinji umuntu wumwi uwa vyuma, wakweti umuwomvi wino walinji we songo wa wawomvi pa ng’anda. We-e umuwomvi wayile awamulongola ukuti wononanga ivyuma. 2 Acino e yisikulu wamwisile nu kumunena ukuti, ‘Amalyasi yano nkwivwa pe wewe yatazifile nanti katicinye. Acino yanga kalembe vino wawomvyanga indalama zyane, amuno nakuwinga incito. 3 Acino we-e songo wa wawomvi watalisile ukwelenganya ukuti, ‘Uzye nkucita wuli wo-o vyo tatakulu wambinga incito? Amuno ntawoma uwakuti inje mukulima, swinya nkwivwa ni nsoni zyakuya mukulenga. 4 Eya! Namanya ivyakucita, pakuti wo-o vyo incito yasila, awantu wize wampocelele mu mang’anda yawo.’ 5 Acino wisile wonsinye wano walinji ni nkongole kwe yisikulu, wanenile uwakutalicila ati, ‘We zinga zino wakongola kwe tatakulu?’ 6 Nawe wamwasusile ati, ‘Amafuta ya miolife ama lita 2,200.’* Acino wamunenile ati, senda pano mwalembesinye ulembepo ati 1,100* nombanye. 7 Nga anena winji ati, ‘Nga wewe wezinga zino wakongola?’ Nawe watili, ‘Amasaka ya ngano 100.’* Nawe wamunenile ati, ‘Senda pano mwalembesinye ulembepo amasaka 80.’* 8 E yisikulu wamusalifizye nkaninye, nanti acakuti atalinji amulungamane, pa mulandu wakuti vino wacisile vyalanjizizye ukuti walinji na mano. Amuno awantu wa mwe yo-o insi wawa na mano mwe vyo wakacita ku wantu wa pe yo-o impindi* ukulusya awana waluswepo.
9 “Acino nkuminena nkuti: Yipanjilani iviwuza ku vyuma vino vitalungamana, pakuti nga vyasila wize wamipocelele mu vifulo vyakwikalamo umuyayaya. 10 Umuntu wa cisinka mu tutici lyo awacisinka na muvivulenye, nu mulungamane mu vitici lyo walungamana na muvivulenye. 11 Nga cakuti, mutawa ni cisinka ku vyuma vino vitalungamana, lyo kusi wino alimisuwila ku vyuma vyacisinka. 12 Swinya nga mutawa ni cisinka ku vintu vya wantu wanji, lyo kusi wino alimipa icilambu cino calinji nu kuwa acinu. 13 Kusi umuwomvi wino angawombela wa songo wa ncito wawili. Amuno angapata wenga nu kukunda, winji. Swinya angawa ni cisinka kwe wenga nu ku kanacindika winji. Fwandi indalama nga azino wacindamika nkani mu wumi wako, utalitela uwombele Leza.”
14 Nomba Awafalisi wano wakundisizye indalama, wivwanga vyonsinye vyo-o, acino watalisile ukumutumfya. 15 Nga Yesu awanena ukuti: “Mwemwe mukayilanjizya ku wantu ukuti mwe walungamane, lelo e Leza, weni wamanya vino vyawa mu myezo yinu. Amuno vino awantu wakalola ukuti vyacindama, e Leza weni akavilola ukuti avya wunyali.
16 “Amasundo na vino wakasesema walandanga wavisambilizyanga ukufika pa mpindi ya kwe Yohani. Lelo ukufumilila pe yoyo impindi Uwufumu wa kwe Leza awuno wakawizya, swinya awantu awavule wakawombesya pa kuti wize winjilemo. 17 Kweni capepukapo kwi yulu ni nsi ukufumapo, ukulusya akalilembo nanti konganye akamasundo ukukanaficiliswa.
18 “Wensinye wino waleka umuci watwala nawinji lyo wacita uwucende, swinya wino watwala umwanaci wino wamuleka kwe wakwakwe, lyo nawenye wacita uwucende.
19 E Yesu watwalilizile ukulanda ati: “Kwalinji umuntu wumwi uwa vyuma wino wazwalanga ivizwalo vya mutengo, swinya wikalanga icete nkaninye. 20 Pa mulyango wakwe, awantu watwalangapo umuntu wumwi uwi zina lyakuti Lazalo wino umuwili wakwe walinji ivilonda vitupunye swinya wayanga vye mukulenga. 21 Wakumbucilanga ni mvongonyo zya vyakulya zino zyaponanga kwi tebulo lya wavyuma. Na wasimbwa wizanga mukumumyanta pa vilonda. 22 Mukupita kwa mpindi, we-e wino wayanga mukulenga, wafwile, swinya awangeli wamusenzile nu kumutwala kwe Abrahamu.*
“Nu muntu wa vyuma nawenye wafwile swinya wamuzisile. 23 Nomba wayimvile nkaninye pano walinji mu nkungwe.* Walile winula aminso, alola Abrahamu apatali lyo ali ne Lazalo.* 24 Nga apunda ati: “Tata Abrahamu, njivwila uluse utume e Lazalo atumpike insongo zya kwi kasa lyakwe mu minzi, pakuti ayize antalalike pa lulimi, amuno nkuyimba ko-o mu mulilo.’ 25 Lelo Abrahamu wamwasusile ati, ‘Mwanane, yizuka ukuti pano walinji nu wumi wikalanga icete nkaninye, lelo e Lazalo weni wayimvile nkaninye. Acino weni ko-o, akusecelela nomba wewe ukuyimba. 26 Swinya pe mwemwe nasweswe pali icizinji* icitali nkaninye, icakuti wano wali kwe mwemwe watange wize kwe sweswe, na wantu wano wali ko-o watange wize kwe mwemwe.’ 27 Fwandi nga wowo tata Abrahamu, nkukulenga ukuti tuma Lazalo ku ng’anda ya kwe tata, 28 aye akasoke awanyina wane 5 pakuti watize wize ko-o mukuyimba. 29 Lelo e Abrahamu watili, ‘Wali na mawaliko ya kwe Mozesi na ya kwa kasesema; nga wakulonda wangivwa.’ 30 Nawe watili, ‘Awe tata Abrahamu, sukavye wumwi ku wafwe nga waya kwe woliwo apano wangalapila.’ 31 Lelo e Abrahamu watili, ‘Nga wakana ukwivwa kwe vyo Mozesi na wakasesema walemvile, lyo watange wivwe na ku muntunye wino wazyulupuka ukufuma ku wafwe.’”