Ukulingana ne Luka
14 Wanda wunji e Yesu wayile mukulya mu ng’anda ye songo wa Wafalisi pi Sabata swinya wano walinjimo wamulolecesyanga nkaninye. 2 Nomba kwalinji umonsi wumwi wino walwile indwala yino yalenzile amakasa na manama ukuvimba.* 3 Acino e Yesu wakolowozizye wano wamanyicisizye Amasundo na Wafalisi ukuti: “Uzye cawa icetenye ukupozya umuntu pa wanda wi Sabata?” 4 Lelo wamyalilevye. Acino e Yesu wawisile ikasa pe we-e umonsi amupozya, amunena nu kuti apite. 5 Apano Yesu awanena ati: “Uzye weweni pa kwe mwemwe wino angakana ukufumya umwana wakwe nanti ing’ombe yino yaponela mu cifula pa wanda wi Sabata?” 6 Lelo waposilwe ukumwasuka.
7 Pano Yesu waweni awantu wano walalisilwe wakusola ivilimba ivizima ivyakwikalapo, wawanenile icilanjilillo cakuti: 8 “Pano wamita ku winga mutavwambisya ukwikala pa vilimba ivicindame, amuno mungazana ukuti wino amisile ku winga alalisile umuntu winji umucindame ukumicila. 9 Acino angakunena ukuti, ‘Fumapo, leka we-e umuntu ayikalepo,’ Icakuti ungivwa insoni, uye ukikale na pa cilimba ca kunsizi cilyanye cino citacindime nu kucindama. 10 Nga wakwita, uwaya mukwikala pa cilimba cino citacindime, pakuti wino akwisile ku winga nga wiza, akunene umweneconye ukuti, ‘Wane, nzanga uyikale ku nkolelo.’ Apano ulicindama kwe wonsinye wano wisilwe. 11 Amuno wensinye wino akayicindamika, walimucefya, na wensinye wino akayicefya, walimucindamika.”
12 Wanenile na wano wamulalisile ukuti: “Nga walalika awantu ku cakulya camusanya nanti amanguzi, utakwitavye iviwuza vyako, wa lupwa lwako, wamunyonko nanti awina mupalamano wako awakankala. Amuno na wewenye wangize wakwite, swinya coconye acino cingawa acilambu cako.” 13 Lelo pano wapekanya umuteweto, uwakwita awapina, wacilema ni ntonko, 14 uliwa ni nsansa amuno weni wasi na cimwi icakukunyosezya lelo e Leza awino alikulambula pano aliwazyulupula awalungamane.”
15 Wumwi pe wano walalisilwe walile wivwa vyo-o wanenile Yesu ukuti: “Awa nsansa wino alilya mu Wufumu wa kwe Leza.”
16 E Yesu wamunenile ukuti: “Umonsi wumwi wapekinye icakulya ca manguzi swinya wisile awantu awavule. 17 Acino watumile umuwomvi wakwe ukuya mukwita wonsinye wano wisilwe, wamunenile ati, ukawanene uti: ‘Zanji amuno vyonsinye mpekinye kali.’ 18 Lelo pakuti watakayeko, watalisile umwakuwipicizya. Uwakutalicila watili, ‘Nakazile impanga, aco nkulonda inje mukuyilola; untetele ntakukwanisya.’ 19 Ne winji watili, ‘Unteteleko ntandi nkwanisye. Nkazile ing’ombe 10 swinya nkuya mukuzyelezya ndole vino zingawomba.’ 20 Winji nawe watili, ‘Apano natwazile, acino ntanga nkwanisye.’ 21 Apano umuwomvi wanyocezile anena yisikulu vyonsinye vyo-o. Pano yisikulu wivwile, wafuzilwe nkaninye swinya wanenile umuwomvi ati: “Yanga mu misewo imikulu na mutunzila twa mu misumba, ukalete awapina, awalemale na wano wasilola.’ 22 Pano umuwomvi wamazile vino wamunenile wanyosile, anena yisikulu ati, ‘Namala ukucita vino temunenile, lelo incende yicili amoyili.’ 23 Ne yisikulu wamunenile ati: ‘Yanga mu nzila zinji zino zyawela kunzi ya musumba, ukite awantu ukuti wize pakuti ing’anda yane yizule. 24 Amuno nkukunena nkuti, pasi nanti wenganye pe wano walalisilwe pakutalika wino alilya vino mpekinye.’”
25 Nomba awantu awavule wapitanga ponga nawe, acino wizile apiliwuka nu kuwanena ukuti: 26 “Nga wumwi wiza kwenene lelo atapata e baba wakwe, e mama wakwe, e wakwakwe, awana wakwe, awanyina, wankazi zyakwe nu wumi wakwe, atanga awe amusambi wane. 27 Wensinye wino atasenzile icimuti cakuculilapo* nu kwiza kwe nene, atanga awe amusambi wane. 28 Ku cakulolelako, weweni pe mwemwe wino nga kulonda ukuzenga ulupungu atanga ayikale pansi nu kupenda indalama zino angawomvya pakuti lusile? 29 Nga tapendulusilemo, angazengavye fawundesheni* apotwe nukumala ulupungu, icakuti wano wakupitapo wangatalika ukumuseka, 30 wangati: ‘We-e umuntu watalisile ukuzenga nomba aposilwe ukumala.’ 31 Nanti Amfumu ci yino yikulonda ukuya mukulwa, yino yili na wasoja 10,000 yitange yikale pansi nu kulola nga wangakumanisya ukuya mukulwa na wasoja 20,000? 32 Nga yalola ukuti yitange yikumanisye, yingatuma awakuya mukuyimililako pakuti wapange umutende. 33 Acili conga namwemwenye, wensinye wino akulonda ukuwa amusambi wane, azipizile ukusya vyonsinyene vino wakwata.
34 “Umucele wazipa, nomba vwilani nga wasukuka, wungawomba na swinya? 35 Wutange wuwombe ku musili nanti akumuvundonye watanga wawomvye, awantu wakawusumbavye. Wino angivwa, lekani ayivwe.”