Ukulingana ne Mateyo
11 Walile Yesu wamala ukunena awasambi wakwe 12 ivyakucita, wafumile koko nu kuya ku misumba yinji yino yalinji mupipi mukusambilizya nu kuwizya ilyasi lizima.
2 Nomba pano e Yohani walinji mu cifungo, wivwile imilimo yino Klistu wawombanga, acino watumile awasambi wakwe 3 ukuya mukumukolowozya ukuti: “Uzye awewenye we muno twalindililanga nanti kuliyiza winji?” 4 Yesu wawasusile ati: “Nyocelani kwe Yohani mukamunene muti: 5 Intonko zikulola, awalemale wakupita, awamambombo wakupola, waciwulu wakulanda, awafwe wakuzyulupuka na wapina wakwivwa ilyasi lizima. 6 Awa nsansa umuntu wino asileka ukuwa ni suwilo pa mulandu na nene.”
7 Awasambi wa kwe Yohani watalisile ukunyocelamo. Nga apano, e Yesu asyala akunena awantu pe Yohani ukuti: “Uzye acani cino mwayile mukulola mu mpanga? Uzye alitete lino lyayingananga ku muza? 8 Avyani vino mwaweni? Uzye amuntu wino akazwala ivizwalo vyamutengo? Awe, amuno awantu wano wakazwala ivizwalo vyamutengo wakakwikala mu mang’anda ya zyamfumu. 9 Nga fwandi mwayile mukulola weni? Uzye we kasesema? Nkuminena nkuti wino mwayile mukulola walusya na pe kasesema. 10 Wenye we-e awino Amawaliko yalandapo ukuti: “Nkutuma wumwi wino alilanda amazwi pa nkolelo yako, wino alikupekanizizya inzila. 11 Nkuminena icisinka nkuti, pe wonsinye wano wakwatwa ku wanaci, pasi nanti wenganye wino wacindama ukucila Yohani Kabadizya. Lelo wino wawa ni cifulo icitici mu Wufumu wa kwe Leza, wamulusya. 12 Ukufumilila pano Yohani Kabadizya watalicizile ukuwizya mpaka ilelo, cino awantu wakavwambisya, Awufumu wa mwi yulu, swinya wano wakatwalilila ukuwuvwamba wakawuzana. 13 Amuno ukufika pa mpindi ya kwe Yohani, Wakasesema wonsinye na Masundo, walandizile lyankani pe vino vyalinji nu kucitika ku nkolelo, 14 swinya e Yohani, awili e ‘Eliya wino Amawaliko yalandizile lyankani ukuti walinji nu kwiza.’ 15 Acino wino akulonda ukwivwa, ayivwe.
16 “Akwinye kuno ningakolanya yo-o inkulo? Yawa ngati awana wano wisile pa maliketi, wano wakupundilila awawuye 17 wakuti: ‘Tetwamilizizya indwimbo, mutakucina, tetwalosya lelo mutalanjizizye ukuti muli nu wulanda.’ 18 Acili conganye, e Yohani akaleka ukulya swinya asimwa wayini, nomba awantu wakati, ‘Wawa nu muzimu uwuwipe.’ 19 Lelo Umwana wa muntu weni, akalya nu kumwa, lelo awantu wakati, ‘Lolani! We-e umuntu wamilicisya swinya we cakolwa. Akakwizya na wakasoncesya wa misonko na wawembu.’ Nomba, umuntu akalanjizya ukuti awa mano mwe vino akacita.”
20 Apano Yesu atalika ukukalipila awantu wano wafumile mu misumba muno wacisile ivizungusyo ivivule pa mulandu wakuti watalapizile, 21 watili: “Acawulanda kwe wewe Korazini ne Betisaida, amuno ivizungusyo vyonsinye vino vyacisilwe mwakwe mwemwe vyange vicitwe mwe Turi ne Sidoni, awantu nge walapizile, swinya nge wazwite insamu* nu kuyisansa amatoyi. 22 Nkuminena nkuti, cilipepuka kwe Turi ne Sidoni pa Wanda wa Wupinguzi ukucila pe mwemwe. 23 Ne nawe Kapernahumu utaliya kwi yulu, uliya ku nkungwe. Amuno imilimo yino yacitwa mwe wewe yange yicitwe ku wantu wa mu Sodomu, umusumba wawo nga pano wuli na peyonye impindi. 24 Acino nkukunena nkuti, cilipepuka ku musumba wa Sodomu pa Wanda wa Wupinguzi ukucila wewe.”
25 Pe yoyo impindi e Yesu watili: “Nkukulumbanya Tata wa mwi yulu pa wantu wonsinye wano wali pa-a, amuno wafisa vyo-o ivintu ku wa mano na wantu awasambilile nu kuvisokolola ku tunya. 26 Nkukulumbanya Tata, amuno wonye avino wazumilizya. 27 E Tata wampa amaka pa vintu vyonsinye. Kusi wino wamanya Umwana suka Yisi, swinya pasi wino wamanya Yisi suka Umwana, na ku wili wensinye wino Umwana wasolapo ukumusokololela. 28 Zanji kwe nene mwe wano mwatonta swinya mwe wano mwamwamilwa, nandi mipe amaka. 29 Zanji mwawomba na nene nu kusambilila kwe nene amuno natontelela swinya nayicefya, nani ndimiwomya. 30 Swinya mungakumanisya ukunyamula iciya cino nkuminena ukuti munyamule amuno capepuka.”