UKULINGANA NE YOHANI

1 Kali nkaninye pano icili consinye citani cipangwe, e Lizwi akuno walinji, swinya e Lizwi walinji ponga ne Leza, swinya e Lizwi nye walinji ngati we Leza.* 2 Wenye awino walinji ne Leza ukufuma pakutalika. 3 E Leza wamuwomvizye ukupanga vyonsinye. Swinya kusi nanti conga cino capanzilwe ukwasowa weliwe.

Cino cizile aciwako ukupitila 4 mwe weliwe, awumi. Swinya uwumi wakwe walinji aluswepo lwa wantu. 5 Swinya uluswepo lukuwala mu mfinzi, lelo imfinzi yapotwa ukuluzimya.

6 Kwalinji umuntu wino Leza watumile ukumwimililako, izina lyakwe walinji we Yohani. 7 We-e umonsi wizile mukunena awantu pe lo-o uluswepo, pakuti awantu wa misango yonsinye wasuwile, pa mulandu na vino walanzile. 8 Asa wino walinji aluswepo, lelo wizile mukunena awantu pe lo-o uluswepo.

9 Uluswepo lwa cisinka luno lukawalila awantu wonsinye, lwalinji mupipi nu kwiza mu nsi. 10 Walinji mu nsi, swinya e Leza wamuwomvizye ukupanga ivintu vyonsinye, lelo awantu wa mu nsi watamumanyile. 11 Wizile ku mwawo, lelo awantu wakwe watamupocelezile. 12 Walenzile wonsinye wano wamusuwizile ukuwa awana wa kwe Leza, pa mulandu wakuti wasuwizile mwi zina lyakwe. 13 Swinya watakwasilwe ku wakwasi, nanti pa mulandu wa kulonda kwa wakwasi wawo, lelo akulingana nu kulonda kwa kwe Leza.

14 E Lizwi wizile awa amuntu, wisile ponga naswe, swinya twaweni nu kucindama kwakwe. Ukucindama kulyanye kuno umwana wino wakwatwa wenganye akapocelela kwe yisi. Wasecelesyanga Leza mwe vyonsinye swinya wasambilizyanga icisinka. 15 (E Yohani wawizyanga pe weliwe, wapundanga ukuti: “We-e awino nalanzilepo ukuti, ‘Wino akwiza pa nsizi yane wandusya, amuno pano ntani nkwatwe, lyo weni wawako kali.”’) 16 Swinya pa mulandu wakuti walinji ni cikuku ni cisinka, calenga ukuti tupocelele uluse lwa kwe Leza. 17 Amuno e Leza wapile amasundo ukupitila mwe Mozesi, lelo icikuku ni cisinka vizile ukupitila mwe Yesu Klistu. 18 Kusi wino walola Leza, sukavye umwana wino wawa ngati we leza swinya wino wikala ponga* ne Yisi awino wamulondolola.

19 Pano awa Yuda watumile wasimapepo na wina Levi awa ku Yerusalemu mukukolowozya e Yohani ukuti: “Uzye weweni?” 20 e Yohani Wawasusile icisinkanye ukwasowa nu kuwafisa ukuti: “Nsi ne Klistu.” 21 Nawo wamukolowozizye ukuti “Nga weweni fwandi, Uzye we Eliya?” Nawe awasuka ati: “Awe.” Nawo awati “We Kasesema?” Anyoka awasuka ukuti: “Awe!” 22 Acino wamunenile ukuti: “Ale fwandi weweni? Tuwuzye pakuti tukanene wano watutumile. Uzye ukati weweni?” 23 Nawe watili: “Ne lizwi lye wino akupunda mu mpanga akuti, ‘Yololani inzila ya kwe Yehova,* ndi wulyanye vino e kasesema Ezaya walanzile.” 24 Awafalisi awano watumile wa-a awantu wano wakolowozyanga amawuzyo. 25 Acino wakolowozizye Yohani ukuti: “Nga cakuti usi we Klistu, e Eliya nanti e Kasesema amulandu ci wuno ukabadizizya?” 26 Nga wasuka ukuti: “Acisinka, nene nkabadizya mu minzi, lelo kuli wumwi wino ayimilile pe mwemwe wino mutamanyile. 27 Akwiza pa nsizi yane swinya ntawa ni nsambu zyakumuzula indyatu.” 28 Vyo-o vyacitisile mu Betani, mbalama ye Yodani kuno e Yohani wabadizyanga.

29 Uwanda wuno wakonsilepo e Yohani waweni e Yesu akuya kwe weliwe, acino watili: “Lolani! wawa ngati ang’onzi yino Leza akapa ku kufumyapo imembu zya munsi. 30 Wenye awino nalanzilepo ukuti: ‘Kuli wino akwiza pa nsizi yane wino wandusya,* amuno walinjjiko pano ncili ukuwako.’ 31 Naninye ntamumanyile lelo njizile mukubadizya mu minzi pa kuti awina Israeli wamumanye.” 32 E Yohani walanzile nu kuti: “Naweni umuzimu wa kwe Leza wukufuma mwi yulu, wika pe weliwe ngati ankunda swinya watwalilizile ukuwa pe weliwe. 33 Nanenenye ntamumanyile lelo wino Wantumile ukubadizya mu minzi, wanenile ati: ‘Nga wiza walola umuzimu wa kwe Leza wika nu kwikala pe wumwi, uyize umanye ukuti awino alibadizizya awantu ku muzimu wa kwe Leza.’ 34 Naweni uwusinincizyo wakuti wenye awili Umwana wa kwe Leza.”

35 Uwanda wuno wakonsilepo, e Yohani wimilile na wasambi wakwe wawili, 36 swinya pano waweni e Yesu akupita, watili: “Lolani umwana wa Ng’onzi uwa kwe Leza.” 37 Pano wa-a awasambi wawili wivwile vyo-o, wakonsile Yesu. 38 Walile Yesu wapiliwuka nu kuzana wakumukonka, wawanenile ukuti: “Nga mukuvwamba cani?” Nawo watili: “Rabi (izwi lino likapiliwula ukuti “musambilizya”), ukakwikala kwi?” 39 Nawe wawanenile ati: “Nzanji mulole kuno nkakwikala.” Nawo wayile, awaya walola kuno wikalanga swinya wisile nawe wo-o uwanda. Wayile kwe weliwe ku ma 16 awazi.* 40 E Andreya e munyina Simoni Petro walinji pe wa-a awasambi wawili wano wivwile vino Yohani walanzile nu kukonka Yesu. 41 Andreya watalicizile ukuya kwe Simoni umunyina, amunena ati: “Twazana Mesiya” (izwi lino likapiliwula ukuti “Klistu”), 42 nga mutwala na kwe Yesu. Walile e Yesu wamulola, wamunenile ati: “Simoni mwana Yohani, ilelo lyo-o wandi wakwitwa ukuti Kefasi” (izina lino likapiliwula ukuti “Petro”).

43 Uwanda wuno wakonsilepo e Yesu walondanga ukuya ku Galili, swinya pano wasunkinye Filipu wamunenile ukuti: “Nzanga, uwe we musambi wane.” 44 E Filipi wafumile ku Betisaida, umusumba muno mwikalanga e Andreya ne Petro. 45 E Filipi wazanile Natanayeli, amunena ati: “Twazana wino e Mozesi walanzilepo mu masundo swinya na wino wakasesema walemvilepo,” we Yesu umwana Jozefu uwa ku Nazareti.” 46 Lelo e Natanayeli wamunenile ati: “Uzye kuli icizima cimwi cino cingafuma mu Nazareti?” Nge Filipu amunena ati: “Tuye ukalole.” 47 Pano e Yesu waweni e Natanayeli akuya kwe weliwe walanzile pe weliwe ukuti: “We-e amwina Israeli wacisinka wino mweweliwe mutawapo uwufi wumwi.” 48 Apano e Natanayeli wanenile Yesu ati: “Nga wamanya wuli?” Ne Yesu amwasuka ukuti: “Pano e Filipu atani akwite, tenkuweni lyo uli mu cimuti ca mukunyu mwisika.” 49 Nga Natanayeli alanda ati: “Rabi, namanya ukuti mwelimonye we mwana wa kwe Leza, Imfumu ya wina Israeli.” 50 Apano Yesu amunena ati: “Uzye wansuwila pa mulandu we vino tenakunena ukuti tenkuweni mu cimuti ca mukunyu mwisika? Ulilola ivintu vyakuzungusya na vinji ukucila vyo-o.” 51 E Yesu wamunenile nu kuti: “Nkuminena icisinka nkuti, mulilola iyulu liyusile, na wangeli wa kwe Leza wakukwela nu kwika ukwiza ku Mwana wa Muntu.”

2 Nomba pano papisile amanda yawili, ku Kana mu Galili kwalinji uwinga swinya e mama wa kwe Yesu akuno walinji. 2 E Yesu na wasambi wakwe nawonye, wawisile kwe wo-o uwinga.

3 Pano e waini yayile mukusila, e mama wa kwe Yesu wayile kwe weliwe nu kumunena ati: “Watakweti e waini.” 4 Lelo e Yesu wamwasusile ukuti: “Mama vyovyo vitatukumile, nene impindi yane yitani yifike.” 5 Nge mama wakwe anena wano wapekanyanga waini ukuti: “Mucite icili consinye cino wandi aminene.” 6 Nomba palyanye palinji insembo 6 izya minzi* zino zyalondekwanga pakuti wasambe ku makasa pano watani watalike ukulya ukulingana ni sundo lya wa Yuda. Cila nsembo yalinji na malita 44 ukufika kwe 66.* 7 E Yesu wanenile wano wapekanyanga waini ukuti: “Yizuzyani aminzi mu nsembo.” Nawo wizuzizye mpaka papela. 8 Apano anyoka awanena ati: “Pungulani yamwi mukape e songo wa winga”, nawo wapunguzile awamutwalila. 9 Acino e songo wawinga wamwilemo ya-a aminzi yano yapilusile e waini, nomba atamanyile kuno we-e waini wafumile (lelo wano wapekanyanga weni wamanyile). Nga pano ayita e siwinga 10 amunena ati: “Umuntu wensinye wino akutwala, akatalicila aleta waini iyikalipe apano awantu nga wakolwa, aleta waini yino yitakalifile. Lelo wewe tusunzile e waini iyizima ukufika pe yo-o impindi.” 11 E Yesu wacisile co-o icizungusyo ku Kana mu Galili swinya acili icizungusyo cakutalicilapo. Walanjizizye amaka yakwe swinya awasambi wakwe wizile awamusuwila.”

12 Pa nsizi ye vyo-o, e Yesu, e mama wakwe, awanyina na wasambi wakwe, wayile ku Kapenahumu lelo watisileko amanda amavule.

13 Nomba pano kwasyazilevye katici ukuti awa Yuda wazevye Icakupitililwa, e Yesu wayile ku Yerusalemu. 14 Pano winjizile mwi tempile, wazanile awantu wakukazya ing’ombe, ing’onzi ni nkunda swinya wazanile na wano wakawulanga indalama wisile pa ma tebulo yawo. 15 Acino wasenzile umusanzu awinga wonsinye ponga ni ing’onzi ni ng’ombe zyawo mwi tempile, ayitila ni ndalama zye wano wakawulanga, apenulanya na matebulo yawo. 16 Wanenile na wonsinye wano wakazyanga inkunda ukuti: “Fumyani vyo-o mo-o! ing’anda ya kwe Tata asayakukazizyamo.”* 17 Walile awasambi walola vyonsinye vyo-o, wizusile vino amawaliko yalanda ukuti: “Nakundisya nkaninye ing’anda yako.”

18 Apano awa Yuda wanenile Yesu ukuti: “Uzye wandi utulanjizye vizungusyo ci pakuti tumanye ukuti uli na maka yakucita vyonsinye vyo-o?” 19 Nawe Yesu wawasusile ukuti: “Mongolani lyo-o itempile, nani ndilizenga mu mandavye yatatu.” 20 Nga wa Yuda awamunena ati: “Lyo-o itempile lyazenzilwe mu myaka 46, uzye wewe awe muno ulilizenga mu mandavye yatatu?” 21 Lelo itempile lino Yesu walandangapo, amuwili wakwe. 22 Walile e Yesu wazyulupuka, awasambi wakwe wizusile ukuti walandangapo ya-a amazwi swinya wasuwizile amawaliko na mazwi yakwe.

23 Pano e Yesu walinji mu Yerusalemu pa wanda wa kuzevya Icakupitililwa, awantu awavule wamusuwizile* pano waweni ivizungusyo vino wacisile. 24 Lelo e Yesu atawasuwizile nkani, amuno wawamanyile, 25 swinya atalondanga uwili wensinye ukumunena vino awantu wakakwelenganya amuno umweneco wamanyile vino vyawa mu mwezo wa muntu.

3 Kwalinji umonsi wumwi Umufalisi uwizina lyakuti Nikodemasi, intunguluzi ya wa Yuda. 2 Wayile kwe Yesu uwusiku, amunena ati: “Rabi tumanyile ukuti we musambilizya wino watumwa ne Leza, amuno kusi uwili wensinye wino angacita ivizungusyo vino ukacita nga cakuti asi ne Leza.” 3 E Yesu wamwasusile ati: “Nkukunena icisinkanye nkuti nga cakuti wumwi atakwasilwe na swinya, atanga alole Uwufumu wa kwe Leza.” 4 Ne Nikodemasi amunena ati: “Ngu muntu e songo angakwatwa wuli na swinya? Uzye anganyocela munda ya kwe mama wakwe nu kukwatwa na swinya?”* 5 E Yesu amwasuka ati: “Nkukunena icisinkanye nkuti, umuntu nga takwasilwe ku minzi na ku muzimu wa kwe Leza, atanga ayinjile mu Wufumu wa kwe Leza. 6 Wensinye wino wakwatwa ku muntu, amuntu, na wensinye wino wakwatwa ku muzimu wa kwe Leza, amuzimu. 7 Mutakazunguke pe vino naminena ukuti: Muzipizile ukukwatwa naswinya. 8 Umuza wukaya* kuno wukulonda swinya mukakwivwa nakuno wukupupa lelo musimanya kuno wukufumilila nakuno wukuya. Wonye avino cawa na ku muntu wino wakwatwa ku muzimu wa kwe Leza.”

9 Ne Nikodemasi amunena ati: “Uzye vyonye vyo vingacitika?” 10 Nge Yesu amwasuka ati: “Uzye wewe usi we musambilizya wa wina Israeli. Amulandu ci wuno utamanyila vyo-o? 11 Nkukunena icisinkanye nkuti, tukalanda vino twamanya swinya tukasimika vino twalola lelo mwemwe musizumila vino tukasimika. 12 Nkaminena ivintu vya mu nsi, lelo musinsuwila uzye mungansuwila wuli nga naminena ivya mwi yulu? 13 Kusi umuntu uwili wensinye wino akatela aya kwi yulu, sukavye wenganye wino wafumile kwi yulu, akuli ukuti Umwana wa muntu. 14 Swinya ndi wulyanye vino Mozesi watumpuzile inzoka pa cimuti mu mpanga,* avino walicita na ku Mwana wa muntunye, 15 pakuti wensinye wino wamusuwila ayize awe nu wumi wa muyayaya.

16 “E Leza wakunzile nkaninye awantu wa munsi icakuti watumile Umwana wakwe wino wakwatwavye wenga, pakuti wensinye wino wamusuwila atize ayononeke lelo ayize awe nu wumi wa muyayaya. 17 Amuno e Leza atatumile umwana wakwe pakuti ayize pingule awa mu nsi, lelo wamutumile pakuti awa munsi wize wapusucile mwe weliwe. 18 Wensinye wino wamusuwila atazipizile ukupingulwa, lelo wensinye wino atakumusuwila lyo pinguzilwe kali amuno lyo kanile ukusuwila mwi zina lya Mwana wenganye uwa kwe Leza. 19 Nomba cino awantu walipingulilwapo acakuti: uluswepo lwiza mu nsi lelo awantu wakunda infinzi ukucila uluswepo, amuno vino wakacita vyawipa. 20 Wensinye wino akacita iviwipe wapata uluswepo swinya asikwiza ku luswepo pakuti vino akacita vitasokoloka. 21 Nomba wensinye wino akacita ivizima, akakwiza ku luswepo pakuti cimanyikwe apatiswenye ukuti vino akacita vyalingana nu kulonda kwa kwe Leza.”

22 Pansizi ye vyo-o, e Yesu na wasambi wakwe wayile mu twaya twa mu Yudeya. Wisile kulyanye na wasambi wakwe swinya wabadizyanga. 23 Lelo e Yohani nawe wabadizyanga mu ncende ya Aenoni mupipi ne Salimu, amuno koko aminzi yavuzile, awantu wayanga kwe weliwe swinya wabadizwanga; 24 pe yo-o impindi lyo e Yohani atani awe mu cifungo.*

25 Nomba awasambi wa kwe Yohani watalisile ukupanzinkana nu mu Yuda wumwi pe vino umuntu angacita pakuti e Leza awamulola ukuti amuswepe. 26 Acino awasambi wayile kwe Yohani nu kumunena ukuti: “Rabi, umuntu wino mwalinji nawe ku mbalama ye Yordani, weyo wino wapile uwusinincizyo wakuti e Leza wamutuma, akubadizya awantu swinya awavule wakuya kwe weliwe.” 27 Ne Yohani wawasusile ukuti: “Umuntu atanga awe ni cili consinye, sukavye nga wamupa ukufuma kwi yulu. 28 Mwemwenye mwe wakamboni wane ku mazwi yano nalanzile ukuti, ‘Nsi ne Klistu, lelo wantumilevye ukuti mukolelele.’ 29 E nawinga, akawa awa kwe siwinga. Nomba e ciwuza wa kwe siwinga, ndi wimilila mu pipi ne siwinga swinya watalika nu kwivwa vino akulanda, akatemwa nkaninye. Naninye, ntemilwe nkaninye. 30 E Klistu wandi aya akukulilakovye, nomba nene nandi naya nkucepelakovye.”

31 Wino wafuma kwi yulu walusya wonsinye. Ne wino wafuma munsi akalanda ivya mu nsinye amuno akuno* wafuma. Wino wafuma kwi yulu walusya wonsinye. 32 Akapa uwusinincizyo kwe vino waweni nu kwivwa lelo kusi wino wivwile. 33 Wensinye wino wazumila uwusinincizyo wa kwe Klistu, akasuwila nu mwezo* wakwe wonsinye ukuti e Leza awacisinka. 34 E Klistu wino Leza watuma akalanda amazwi ya kwe Leza, amuno e Leza asisinilila pakupa umuzimu wakwe. 35 Umukwasi wakunda Umwana swinya wamupa amaka pe vyonsinye. 36 Wensinye wino akasuwila Umwana aliwa nu wumi wa muyayaya; wensinye wino asisuwila Umwana, ataliwa nu wumi wa muyayaya, lelo Leza atalitela aleke ukumufulilwa.*

4 Walile Tatakulu* wamanya kuno Awafalisi wivwile ukuti akubadizya nu kupanga awasambi awavule ukucila Yohani— 2 nanti acakuti e Yesu asa wino wabadizyanga lelo awasambi wakwe awano wabadizyanga— 3 wafumile mu Yudeya nu kunyocela naswinya ku Galili. 4 Lelo calondekwanga ukuti mpaka apite mu Samariya. 5 Acino wizile mu kaya* ka Samariya kano wakakwita ukuti Sikari mupipi ni mpanga yino e Yakobi wapile umwana wakwe e Jozefu. 6 Kulyanye akuno kwalinji nicifula ca kwe Yakobi. Walile e Yesu watonta pa mulandu nu wulendo, wisile pe conye co-o icifula. Impindi yalinji kuma 12 awazi ya musanya.

7 Umwanaci umwina Samariya wizile mukusemba aminzi. Nga Yesu amunena ati: “Nkulengako aminzi.” 8 (Lyo awasambi wakwe wayile mu kaya mukukala ivyakulya.) 9 Ngu mwanaci umwina Samariya amwasuka ati: “Nga cani cino wewe we mu Yuda ukulenga nene ne mwina Samariya aminzi yakumwa?” (Amuno awa Yuda wasikwivwana na wina Samariya.) 10 Nge Yesu amwasuka ati: “Utamanyile icawila cino Leza akukupa swinya utamanyile na wino akuti, ‘mpako aminzi yakumwa.’ Amuno wange umanye nga tewamulenga, nawe nga tewakupa aminzi yano yakapa uwumi”. 11 Nu mwanaci amwasuka ati: “Musambilizya, nga vyo utakweti ne baketi yakusembela aminzi, ni cifula naco acitali, nga minzi ya wumi wandi uyafumye kwi? 12 Uzye wakulisya ukucila umukwasi witu uwa ku kali* e Yakobi wino watusila co-o icifula, swinya wino wamwanga na wana wakwe ni ng’ombe mwe conye icifula?” 13 Nge Yesu amwasuka ati: “Wensinye wino akamwa ya-a aminzi, aliwa nu lusala na swinya. 14 Nomba wensinye wino wamwa aminzi yano niza namupa, ataliyivwa ulusala na swinya, lelo ya-a aminzi yano ndimupa yaliwa mwe weliwe ngati acifula ca minzi amavule yano yakapa uwumi wa muyayaya.” 15 Ngu mwanaci amunena ati: “Musambilizya mpaa yayo aminzi, pakuti ntize njivwe ulusala naswinya nanti ukwiza kawili kawili mukusemba aminzi kwe yo-o incende.”

16 Apano e Yesu amwasuka ati: “Yanga kite wakwako mwize nawe.” 17 Ne umwanaci alanda ati: “Ntatwalwa.” Nga Yesu amunena ati: “Acisinka cino walanda ukuti, ‘Utatwalwa.’ 18 Amuno watwazilwepo ku wonsi 5, ne wino ukwikala nawe pe yo-o impindi, ase wakwako. Fwandi cino tewalanda acisinka.” 19 Nu mwanaci amunena ukuti: “Musambilizya, nalola ukuti we kasesema. 20 Awakwasi witu awakukali wapepelanga pe wo-o umwamba, lelo mwe wa Yuda mukati awantu wazipizile ukupepelavye mu Yerusalemu.” 21 Nga e Yesu amunena ati: “Nsuwila, impindi yikwiza pano mwemwe mutaliwa mwapepa Tata pe wo-o umwamba nanti mu Yerusalemu. 22 Mukapepa cino mutamanya, lelo sweswe tukapepa cino twamanya amuno awa Yuda awano Leza watalicizile ukusokololela vino alicita pakupususya awantu. 23 Nanti ciwe wo-o, impindi yikwiza, swinya ayonye yo-o, pano wano wakapepa Leza ukulingana na vino akalonda, waliwa mupepa mu muzimu wakwe na mu cisinka. Swinya e Tata akalondesya sana awamusango wo-o ukumupepa. 24 E Leza amuzimu, fwandi wano wakamupepa wazipizile ukumupepela mu muzimu wakwe na mu cisinka.” 25 Ne umwanaci wamunenile ukuti: “Namanya kali ukuti wino akakwitwa ukuti Klistu aliyiza. Swinya awino alitulondololela vyonsinye”. 26 Nge Yesu amunena ati: “Anenenye, ne muno nkulanda nawewe.”

27 Nomba pe yilyanye impindi, awasambi wakwe wanyosile, swinya wazungusile nkaninye pano wazanile e Yesu akulanda na we-e umwanaci. Lelo pasi nanti wumwi pe woliwo wino wakolowozizye Yesu cino walandilanga na we-e umwanaci, nanti vino walondanga kwe weliwe. 28 Acino umwanaci wasile icakusembelamo aminzi,* aya mukaya nu kunena awantu ukuti: 29 “Tuyani mukalole umuntu wino anenile vyonsinye vino nacitanga. Uzye angalanga awili e Klistu?” 30 Na wantu wafumile mukaya awaya kwe Yesu.

31 Pano awantu watani wafike, awasambi wanenanga Yesu ukuti: “Rabi,* lya ivyakulya.” 32 Lelo wawasusile ukuti: “Nkweti kali ivyakulya vino mwemwe mutamanyile.” 33 Apano awasambi awatalika ukuwuzyanya ukuti: “Uzye lyo weweni wino amuletezile ivyakulya?” 34 Nga Yesu awanena ati: “Ivyakulya vyane akucita ukulonda kwa kwe Leza wino wantumile nu kumalizya umulimo wakwe.” 35 Mukuti kwasyalavye imyezi 4 pakuti kuwe ukusombola, lelo nkuminena nkuti: Lolecesyani ivilimwa mu vyalo, vicile kali vikulondekwa ukusombola. 36 Wino akasombola akapocelela icilambu nu kulonganika ivilimwa vya wumi wamuyayaya pakuti wino akakomela na wino akusombola wize wasecelele ponga. 37 Acino imvwango yakuti: “Wenga akakomela ne winji akasombola, ayacisinka.” 38 Namituma mukusombola vino mutakomezile. Wano wawomvilemo awanji, lelo mwemwe mwazanamo uwuzima mwe vino wanji wawomvile.”

39 Awina Samariya awavule awa mwe kako akaya, wasuwizile Yesu pa mulandu nu wusinincizyo wuno umwanci wapile uwakuti awino wamunenile vyonsinye vino wacisile kali. 40 Acino pano awina Samariya wayile kwe weliwe, wanenile Yesu ukuti ayikale nawo. Nawe wisile nawo amanda yawili. 41 Walile awantu wivwa vino Yesu wasambilizyanga, awavule wamusuwizile nkaninye, 42 swinya wanenile we-e umwanaci ukuti: “Pa-a tutasuwizilevye pa mulandu na mazwi yano tewatunena; amuno twayivwila sweweneconye swinya twamanya ukuti we-e umuntu alipususya awantu pakuti e Leza ayize awapale.”

43 Pansizi ya manda yawili e Yesu wafumileko aya ku Galili. 44 Wayilandizile umweneconye ukuti e kasesema wasimucindika ku mwawo. 45 Acino pano wafisile mu Galili, awina Galili wamupocelezile pa mulandu wakuti waweni ivizungusyo vino wacisile mu Yerusalemu pa cakupitililwa.

46 Yesu wanyocezile na swinya ku Kana mu Galili kuno wapiluzile aminzi ukuwa waini. Nomba ku Kapenahumu kwalinji e songo wa kwi sano* wino umwana wakwe walwile. 47 Pano we-e umonsi wivwile ukuti e Yesu afumile ku Yudeya ayile mu Galili, wayile kwe weliwe nu kumulambilizya ukuti apite nawe ku Kapenahumu pakuti akapozye umwana wakwe, amuno walinji mukufwa. 48 Lelo e Yesu wamunenile ati: “Pasi wino angazumila pe mwemwe sukavye nga mwalola ivizungusyo ni vimanyilo.” 49 Nge songo wa kwi sano* amunena ati: “Tatakulu, tuye tupite zuwa pano umwana wane atani afwe.” 50 Yesu nawe amunena ukuti: “Pitanga ku ng’anda, umwana wako apozile.” Umonsi wasuwizile ya-a amazwi yano Yesu wamunenile, apita nu kupita. 51 Lelo pano wanyocelanga, wasunkinye awawomvi wakwe wano wamukoncezile mukumunena ukuti, umwana wako apozile. 52 Nawe wawakolowozizye impindi yino wapozile. Nga awamwasuka ati: “Wapozile yo-o indwala ye malelya* mutondo* ku ma 13 awazi.”* 53 Nga yisi wa mwana ayiluka ukuti ayilyanye impindi yino Yesu walandizilepo ukuti: “Umwana wako apozile.” Apano weliwe na wa mu ng’anda yakwe wonsinye awasuwila mwe Yesu. 54 Co-o acili icizungusyo ca citi wili cino Yesu wacisile mu Galili pano wafumile ku Yudeya.

5 Pa nsizi ye vyo-o kwalinji umuteweto wawa Yuda, acino e Yesu wayile ku Yerusalemu. 2 Nomba mu Yerusalemu mupipi nu mulyango wa ng’onzi, mwalinji iciziwa cino mu CiHeberi witanga wakuti Betizeta, mumbali mwalinji utwakupitamo 5 tuno twalinji ni misonje. 3 Monye amuno mwalalanga awalwale, intonko, awalemale na wano walinji na manama nanti amakasa amakalile. 4* —— 5 Palyanye palinji umonsi wino walwile pa myaka 38. 6 Pano Yesu waweni we-e umonsi alazile na pa mulandu wakumanya ukuti walwile pa mpindi ntali, wamunenile ukuti: “Uzye ukulonda ukupola?” 7 Nawe umonsi umulwale amunena ati: “Musambilizya ntawa nu wiliwensinye uwakumbika mu minzi nga yavunduka, nkacita nga nati njinjile, lyo winji ayinjizilemo kali.” 8 Nga Yesu amunena ati: “Katuka senda icitanda cako talika ukupita.” 9 Acino we-e umonsi wakatusile paponye, asenda ni citanda cakwe atalika ukupita.

Wo-o walinji awanda wi Sabata. 10 Acino awa Yuda watalisile ukunena we-e umonsi wino wapozile ukuti: “Wo-o awanda wi sabata, isundo litazumilizya ukusenda icitanda.” 11 Nga nawe awasuka ukuti: “Wino tewampozya awino tewanena ukuti, ‘Senda icitanda cako talika ukupita.’” 12 Nawo wamukolowozizye ukuti: “Nga weweni weyonye wino tewakunena ukuti, ‘senda icitanda upite’?” 13 Lelo we-e umonsi atamanyile wino wamupozizye amuno e Yesu wafumile pi wumba lino lyalinji papo.

14 Pansizi ye vyo-o, e Yesu wamuzanile mwi tempile swinya wamunenile ukuti: “Upozile, utiza uwembuke na swinya pakuti iviwipe ukucila pe vyo-o vitize vikuciticile.” 15 Acino we-e umonsi wayile ku wa Yuda nu kuwanena ukuti e Yesu awino wamupozizye. 16 Co-o calenzile awa Yuda watalike ukucuzya Yesu amuno watinji wacitanga vyonsinye vyo-o pa wanda wi sabata. 17 Lelo e Yesu wawasusile ukuti: “E Tata acili akawomba ukufika na pe yo-o impindi, acino nanenenye natwalilila ukuwomba.” 18 Co-o acino calenzile awa Yuda wavwambisye na nkani ukumukoma, amuno watinji asakulonda ukukonka vye isundo lyi Sabata litupu lelo akuyilinganya kwe Leza pano walandanga ukuti amwana wa kwe Leza.

19 Acino e Yesu wasusile ati: “Nkuminena icisinkanye nkuti umwana atange acite icili consinye wenga lelo akacita ivintu vino e yisi akacita. Amuno ivintu vyonsinye vino yisi akacita, avino nu mwananye akacita. 20 Amuno umukwasi wakunda umwana, akamulanjizya vyonsinye vino akacita swinya alimulanjizya imilimo nayinji ukucila nape yo-o, pakuti mwize muzunguke. 21 Amuno ndi wulyanye vino e Tata akazyulupula awafwe, avino nu Mwananye akazyulupula wano akulonda. 22 E Tata asipingula uwili wensinye, lelo wapa nene amaka yakupingula, 23 pakuti wacindike Umwana ndi wulyanye vino wacindika Yisi. 24 Nkuminena icisinkanye nkuti, wensinye wino wivwa amazwi yane nu kusuwila wino wantumile, aliwa nu wumi wa muyayaya, swinya atalipingulwa lelo aliwa ngati amuntu wino wafwile nga wawa nu wumi.

25 “Nkuminena icisinkanye nkuti, impindi yikwiza swinya ayonye yo-o, pano awafwe waliyivwa izwi lya mwana wa kwe Leza, na wonsinye wano wivwile kwe vino walandanga waliwa nu wumi. 26 Ndi wulyanye vino e Yisi wawa na maka yakupa uwumi avino wapa nu Mwananye amaka yakupa uwumi. 27 Swinya wamupa na maka yakupingula, amuno Amwana wa muntu. 28 Mutakazunguke pe vino nalanda, amuno impindi yikwiza pano wonsinye wano wawa mu nkungwe* waliyivwa izwi lyakwe 29 nu kufumamo. Wonsinye wano wacitanga ivizima walizyulupuka nu kuwa nu wumi wamuyayaya ne wano wacitanga iviwipe walizyulupuka nu kupingulwa. 30 Nsicita icili consinye pa lwane, lelo nkapingula awantu ukulingana na vino Tata wanena. Nkawapingula mu wulungamane amuno asakulonda kwane lelo akulonda kwa kwe Tata wino wantumile.

31 “Nga cakuti ne mweneconye nkunena wanji pe nene, watanga wasuwile vino nkulanda. 32 Lelo kuli winji wino akasimika pe nene swinya namanya ukuti vino akalanda avyacisinka. 33 Mwatumile awonsi winu kwe Yohani, nawe wayile aminena icisinka pe nene. 34 Nsilondekwa umuntu uwili wensinye ukunena awantu pe nene, lelo na minena vyo-o pakuti mwize muwe nu wumi. 35 Weyo umuntu walinji ngati alukozyo luno lukwaka nu kuwala swinya mwalondesyanga ukusecelela mu luswepo lwakwe pa mpindi yitici. 36 E Yohani wanenanga awantu ukuti nafuma kwe Tata, lelo nawa nu wusinincizyo ukucila na pe Yohani wuno wukalanjizya ukuti, e Tata wantuma. Swinya yonye imilimo yino nkuwomba pe yo-o impindi, ayino yikupa wo-o uwusinincizyo. 37 Ne Tata nye wapa uwusinincizyo wakuti awino wantuma, lelo musitela mwivwepo izwi lyakwe nanti ukulola vino akaloleka. 38 Swinya musisunga amazwi yakwe mu myezo yinu amuno musisuwila wino watumile.

39 “Mukawazya Amawaliko amuno mukakwelenganya ukuti ayano yalilenga muwe nu wumi wa muyayaya; yanye amawaliko ayano yakasimika pe nene. 40 Lelo musilonda ukunkonka pakuti mwize muwe nu wumi wa muyayaya. 41 Kweni Nsilonda ukuti awantu wancindamika,* 42 lelo namanya ukuti mwemwe mutakundavye Leza. 43 Nizila mwi zina lya kwe Tata nomba mutampocelela, lelo winji nga wizavye mwi zina lyakwe, mungamupocelela. 44 Nga mungasuwila wuli, wo-o vino mukacindikana mwe weneco swinya musilonda nu mucinzi wuno wukafuma kwe Leza umweneco? 45 Mutakwelenganya ukuti ndimipa imilandu kwe Tata; lelo vino Mozesi nye wino mwasuwila walemvile, avino vikamisinila ukuti muluvinye. 46 Nga cakuti mwasuwizile e Mozesi, naninye nga munsuwizile amuno e Mozesi walemvile pe nene. 47 Lelo nga mutasuwila vino walemvile, nga mungasuwila wuli vino nkulanda?”

6 Pansizi ye vyo-o, e Yesu walambizile kumbalama yinji iye Sumbi we Galili nanti Tiberia. 2 Swinya awantu awavule wamukonkanga amuno waweni ivizungusyo vino wacisile ivya kupozya awalwale. 3 Acino e Yesu nawasambi wakwe wayile ku mwamba, swinya kulyanye akuno wayile awikala. 4 Nomba ukuzevya kwa Cakupitililwa ukwa wa Yuda kwapalimizile. 5 Walile e Yesu winula aminso nu kulola awantu awavule wakuya kwe weliwe, wanenile Filipu ukuti: “Uzye twandi tukale kwinye imikate iyakuti awantu wonsinye wa-a walye?” 6 Lelo wamukolowozizye wo-o pakuti amanye vino Filipu welenganyanga, amuno lyo amanyile kali vino walinji nu kucita. 7 Nga Filipu amwasuka ati: “Nanti acakuti tungakala imikate ya ma denari* 200, yitange yiwakumane swinya nanti tungawapa katici katicinye naponye yitange yiwakumane.” 8 Apano umusambi wakwe winji, e Andreya e munyina Simoni Petro wanenile Yesu ati: 9 “Pali umwana umulumendo wino ali ni mikate 5 nu tunswi tuwili ututici. Nomba tonye to-o, uzye twandi tukumane* awantu wonsinye wano wali pa-a?”

10 E Yesu watili: “Nenani awantu ukuti wikale pansi.” Nomba pe coco icifulo pamezile nkaninye isote, acino wisile pansi, pe wa-a awantu palinji awonsi ku ma 5, 000. 11 E Yesu wasenzile imikate swinya pa nsizi yakupepa, wapile wonsinye wano wisile; wonye avino wacisile na kutunswi. Swinya awantu walile awikuta. 12 Walile awantu walya wikuta, e Yesu wanenile awasambi wakwe ukuti: “Longanikani vyonsinye vino vyasyala pakuti kutononeka nanti cimwi.” 13 Nawo walonganisile vino vyasyazile ku mikate 5 yino awantu walile swinya vizwile ivise 12.

14 Walile awantu walola ivizungusyo vino wacisile, watalisile ukulanda ati: “Mwelimonye, we-e wekasesema wino walandizilwe lyankani ukuti aliyiza.” 15 Pano Yesu wamanyile ukuti walinji nu kwiza mukumulema pa maka pakuti wamuwike pa wufumu, wafumilepo aya ku mwamba na swinya wenganye.

16 Kwalile kwafita, awasambi wakwe wayile ku cituntu ce sumbi, 17 swinya walile wakwela uwato, walamvile e sumbi awaya ku Kapernahumu. Pe yo-o impindi lyo ni mfinzi yakoma ne Yesu lyo atani anyoke. 18 Aminzi yatalisile ukukatuka nkaninye pe sumbi amuno palinji icimuza icikulu nkaninye. 19 Pano wapisile ama kilomita* mupipi ne 6, waweni e Yesu akupita pa minzi akupalamila ku wato, icakuti watinile nkaninye. 20 Lelo e Yesu wawanenile ati: “Mutatina, anene!” 21 Acino wamusenzile mu wato swinya paponye uwato wafisile ku cituntu kuno wayanga.

22 Uwanda wuno wakonsilepo, awantu wano walinji ku mbalama yinji iye sumbi, waweni ukuti uwato uwukulu wusipo palivye akatici. Acino wilusile ukuti e Yesu atakonsile awasambi wakwe mu wato, wayile wonganye. 23 Amawato yano yafumanga ku Tiberia yaficililanga palyanye pano Tatakulu wawapezile ivyakulya pa nsizi yakupepa. 24 Acino pano awantu awavule waweni ukuti e Yesu na wasambi wakwe wasiko, wakwezile amawato yawo awaya ku Kapernahumu mukumuvwamba.

25 Pano wamuzanile ku mbalama yinji iye sumbi, wamunenile ukuti: “Musambilizya, nga uyizile mpindi ci ko-o?” 26 E Yesu wasusile ukuti: “Nkuminena icisinkanye nkuti, mutakumvwamba pa mulandu wakuti mwaweni ivizungusyo, lelo apamulandu wamikate yino mwalile nu kwikuta. 27 Mutawombela ivyakulya vino vikakononeka, lelo mwawombela ivyakulya vino vililenga muwe nu wumi wa muyayaya vino umwana wa muntu alimipa; amuno e Leza, e Yisi awino wamuzumilizya ukucita wo-o.”

28 Apano wamukolowozizye ukuti: “Avyani vino tungacita pa kuti twawomba imilimo ya kwe Leza.” 29 Ne Yesu awasuka ati: “Pakuwomba umulimo wa kwe Leza, muzipizile ukusuwila wino watumile.” 30 Nawo wamuneneli ukuti: “Acizungusyo ci cino wandi ucite pakuti tulole nu kukusuwila? Amulimo ci wuno wandi uwombe? 31 Awakwasi witu awakukali walile mana mu mpanga, ndi wulyanye vino amawaliko yakalanda ukuti: ‘Wawapile umukate wakulya ukufuma mwi yulu.’” 32 Nga Yesu awanena ati: “E Tata awino akamipa umukate wacisinka ukufuma kwi yulu, lelo e Mozesi weni atamipile umukate wacisinka ukufuma kwi yulu. 33 Amuno umukate wa kwe Leza awuno wafuma kwi yulu swinya wukapa uwumi ku wantu wa munsi.” 34 Acino wamunenile ati: “Tatakulu, uwatupa lyonsinye wo-o umukate.”

35 Lelo Yesu wawanenile ukuti: “Ne mukate wuno wukapa uwumi. Wensinye wino wiza kwe nene ataliyivwa inzala nanti katicinye, swinya wensinye wino wansuwila atalitela ayivwe ulusala. 36 Ndi wulyane vino naminenile, mukandola lelo mutansuwila. 37 Wensinye wino Tata wampa aliyiza kwe nene, swinya wensinye wino aliyiza kwe nene ntalimuwinga; 38 amuno ntafuma kwi yulu ukwiza mukucita ukulonda kwane, lelo niza mukucita ukulonda kwe wino wantumile. 39 Wino wantumile akalonda ukuti ntiza nsovye nanti wenga pe wano wampa, lelo njize mbazyulupule pa wanda wakulecelezya. 40 Amuno wonye avino Tata akalonda, ukuti wensinye wino wamanya Umwana nu kumusuwila ayize awe nu wumi wamuyayaya, swinya nani ndimuzyulupula pa wanda wakulecelezya.”

41 Nga wa Yuda awatalika ukuyilizyanya pa mulandu na mazwi yano wawanenile ayakuti: “Ne mukate wuno wafuma kwi yulu.” 42 Swinya watalisile nu kulanda wakuti: “Uzye we-e asa mwana wa kwe Jozefu? e baba wakwe ne mama wakwe twawamanya. Angalanda wuli ukuti, ‘Nafuma kwi yulu’?” 43 Lelo e Yesu wawanenile ati: “Lekani ukuyilizyanya. 44 Kusi umuntu wino angiza kwe nene ukwasowa ukuti e Tata amulete, swinya ndimuzyulupula pa wanda wakulecelezya. 45 Wakasesema walemvile ukuti: ‘E Yehova* aliwasambilizya wonsinye.’ Swinya wensinye wino wivwa kwe Tata nu kusambilila kwe weliwe, akakwiza kwe nene. 46 Co-o cisakupiliwula ukuti kuli umuntu wino walola Tata, sukavye wino wafuma kwe Leza; wenye awino walola Tata. 47 Nkuminena icisinkanye nkuti, wensinye wino wansuwila aliwa nu wumi wa muyayaya.

48 “Ne mukate wuno wukapa uwumi. 49 Awakwasi winu pano walinji mu mpanga* walile mana, lelo wafwile. 50 Wo-o amukate wuno wukafuma mwi yulu, pakuti wensinye wino walya atafwa. 51 Ne mukate wuno wukapa uwumi wuno wafuma kwi yulu. Wensinye wino walya wo-o umukate aliwa nu wumi wamuyayaya; swinya umukate wuno ndimipa amuwili wane pakuti awantu wa munsi wize wawe nu wumi.”

52 Apano awa Yuda watalisile ukuyilizyanya awalanda wakuti: “Uzye we-e umuntu angalanda wuli ukuti angatupa umuwili wakwe ukuti tulye?” 53 Ne Yesu wawasusile ati: “Nkuminena icisinkanye nkuti, nga mutalile umuwili wa Mwana wa muntu nu kumwa uwazi wakwe, mutaliwa nu wumi. 54 Wensinye wino walya umuwili wane nu kumwa uwazi wane aliwa nu wumi wamuyayaya, swinya nani ndimuzyulupula pa wanda wakulecelezya; 55 amuno umuwili wane acakulya ca cisinka nu wazi wane acakumwa ca cisinka. 56 Wensinye wino akalya umuwili wane nu kumwa uwazi wane alitwalilila ukuwa na nene, nani nditwalilila ukuwa nawe. 57 Ndi wonye vino nawa nu wumi pa mulandu wa kwe Tata uwa wumi wino wantumile, avino na wino akulya umuwili wane aliwa nu wumi pa mulandu wane. 58 Wonye awuli umukate wuno wafuma kwi yulu. Wupusineko na wuno awakwasi winu walile lelo mukupita kwa mpindi awafwa. Wensinye wino walya wo-o umukate, aliwa nu wumi wamuyayaya.” 59 Walanzile vyonsinye vyo-o pano wasambilizyanga mwi sinagogi* mu Kapernahumu.

60 Walile wivwa vyo-o, awasambi awavule walanzile ukuti: “Ya-a amazwi yawoma; kusi wino angivwa!” 61 E Yesu wamanyile ukuti awasambi wakwe wayilizyanyanga pe vino walanzile, acino wawanenile ukuti: “Uzye vyo-o vyamipunuzya? 62 Uzye mutalilusya ukuyivwa uwuwi nga cakuti Umwana wa muntu wanyocela kuno walinji pakutalika? 63 Amuno umuzimu wa kwe Leza wutupunye, awuno wukapa uwumi; awantu watanga wayipe uwumi aweneco. Ya-a amazwi yano nkaminena, awuli umuzimu wa kwe Leza swinya awuli wumi. 64 Lelo kuli wamwi pe mwemwe wano watawa ni suwilo.” E Yesu walanzile wo-o, amuno wamanyile ukufumilila pakutalika wano watamusuwizile na wano walinji nu kumukazya. 65 Yesu watwalilizile ukulanda ukuti: “Awuli umulandu wuno minenezile ukuti, kusi wino angiza kwe nene, sukavye nga Tata wakunda ukumuleta.”

66 Pa mulandu na co-o, awasambi wakwe awavule wanyocezile mukucita vino wacitanga kali swinya walesile ukumukonka. 67 Nga Yesu anena awatumwa wakwe 12 ukuti: “Uzye namwemwenye mukulonda munsye?”* 68 E Simoni Petro ayasuka ukuti: “Tatakulu nga tungakonka weni? Awemuno ukasambilizya vino vingalenga tuwe nu wumi wa muyayaya. 69 Twasuwila swinya twamanya ukuti watumwa ne Leza.” 70 Ne Yesu ayasuka ukuti: “Namisola mwensinye 12, lelo wenga pe mwemwe, we cawufi.”* 71 E Yesu pa-a walandanga pe Yuda Skarioti umwana wa kwe Simoni, amuno nanti acakuti walinji pa watumwa 12, awino walinji nu kumukazya.

7 Pa nsizi ye vyo-o, e Yesu watwalilizile uwulendo wakuya ku Galili, atalondanga ukupitila mu Yudeya amuno awa Yuda walondanga ukumukoma. 2 Nomba pe yo-o impindi ukuzevya kwa wa Yuda ukwa misakuta kwapalamizile. 3 Acino awazuna wakwe, wamunenile ati: “Fuma ko-o yanga ku Yudeya, pakuti awasambi wako wakalole imilimo yino ukuwomba. 4 Amuno kusi wino akafisa vino akucita nga akulonda ukuti vize vimanyikwe ku wantu awavule. Acino pa mulandu wakuti ukucita vyo-o ivintu, leka awantu wonsinye wamanye.” 5 Awanyina watamusuwizile. 6 E Yesu wawanenile ukuti: “Impindi yane yitani yifike, lelo mwemwe mukawa ni mpindi lyonsinye. 7 Awantu wa munsi watawa nu mulandu wakumipatilapo, nomba nene wampata, amuno nkasokolola ukuti vino wakacita vyawipa. 8 Mwemwe yanji ku muteweto, nene ntakuya amuno impindi yane yitani yifike.” 9 Pano wawanenile vyo-o, e Yesu wasyazile mu Galili.

10 Walile awanyina wapita ku muteweto, e Yesu nawenye wayile mu nkama ukwasowa uwili wensinye ukumanya. 11 Awa Yuda watalisile ukumuvwamba ku muteweto, walandanga wakuti: “Uzye we-e umuntu alikwinye?” 12 Acino awantu watalisile ukutokotezyanya mwi wumba, wamwi watinji: “Amuntu umuzima.” Ne wanji nawo awati: “Awe, akasovya awantu.” 13 Lelo kusi wino wamulandanga pa wantu awavule, amuno watinanga awa Yuda.

14 Pansizi ya manda 4 ukufumilila pano umuteweto wasilizile, e Yesu wayile mwi tempile mukusambilizya. 15 Awa Yuda wazungusile nkaninye, watinji: “Uzye wenye umuntu wafumya kwinye amano yakumanya amawaliko, amuno asitela asambililepo na ku masukulu?”* 16 Lelo e Yesu wawasusile ukuti: “Vino nkasambilizya asa vyane, lelo avya muntu wino wantumile. 17 Uwili wensinye wino akulonda ukucita ukulonda kwa kwe Leza, alimanya nga cakuti vino nkasambilizya vikafuma kwe Leza nanti avyane. 18 Wensinye wino akasambilizya vino akwelenganya, akayivwambila umucinzi umweneco; lelo wensinye wino akalonda ukupa umucinzi kwe wino wamutumile, awacisinka swinya mwe weliwe mutawa uwuwipe nanti wumwi. 19 Uzye e Mozesi atamipile amasundo, lelo pasi nanti wumwi pe mwemwe wino akayakonka. Acani cino mukalondela ukunkoma?” 20 Nga wantu awamwasuka ati: “Siwapena, nga weweni akulonda ukukukoma?” 21 Ne Yesu awasuka ukuti: “Nacisilevye icizungusyo conga pi sabata, swinya mwensinye mwazungusile. 22 Awuli umulandu wuno e Mozesi wamipile isundo lya kuzembululwa, nomba litatalicizile pe Mozesi, lelo akuwakwasi winu awakukali swinya mukazembulula umuntu na pa wanda wi sabata. 23 Nga cakuti mukazembulula pi sabata pakuti mukonke Isundo lya kwe Mozesi, lyo amulandu ci wuno mwafulilwa pano napozya umuntu pa wanda wi sabata? 24 Mutati mwapingula pa mulanduvye na vino mwalola, lelo mwapingula mu wulungamane.”

25 Apano awantu wamwi wano wikalanga mu Yerusalemu awalanda wakuti: “Uzye wenye umuntu asa wino wakulonda ukukoma. 26 Lolani akusambilizya pa wantu lelo pasi nanti cimwi cino wakumunena. Uzye intunguluzi zingalanga zimusuwizile ukuti we Klistu? 27 Swensinye twamanya kuno we-e umuntu wafuma, lelo pano e Klistu aliyiza tutalimanya na kuno alifuma.” 28 Pano Yesu wasambilizyanga mwi tempile, walanzile ati: “Mwamanya swinya mwamanya na kuno nafuma. Ntayituma, lelo wino wantuma awacisinka nomba mutamumanya. 29 Namumanya amuno anemuno nkamwimililako swinya awino wantumile.” 30 Acino watalisile ukuvwambilizya inzila yakumulemelamo, lelo waposilwe amuno impindi yakwe lyo yitani yifike. 31 Lelo awantu awavule wamusuwizile swinya watalisile ukulanda ati: “Uzye pano Klistu aliyiza, atalicita ivizungusyo ivivule ndi vino wenye we-e umuntu akucita?”

32 Awafalisi wivwile awantu wakutokotezyanya vyo-o ivintu pe Yesu, acino intunguluzi zya simapepo na Wafalisi watumile awakuya mukumulema. 33 Nga Yesu awanena ati: “Nandi imbe namwe pa mpindivye iyitici pano ntani inje kwe wino wantumile. 34 Mulisyala mukumvwamba, lelo mutalinzana, swinya kuno ndiwa mwemwe mutange mwize.” 35 Lelo awa Yuda watalisile ukulanzyanya wakuti: “Nga wenye we-e umuntu akulonda ukuya kwinye kuno tutange tumuzane? Uzye akulonda ukuya ku wa Yuda wano wasalanganila mu wa Giriki nu kuya mukusambilizya awa Giriki? 36 Nga akupiliwula cani wo-o vyo walanda ukuti, ‘Mulisyala mukumvwamba, lelo mutalinzana, swinya kuno ndiwa mutange mwize’?”

37 Nomba pa wanda wakulecelezya, wuno walinji awanda uwucindame nkaninye pa mpindi ya muteweto, e Yesu wimilile nga atalika ukulanda ati: “Wensinye wino ali nu lusala, lekani ayize kwe nene, pakuti mupe aminzi yakumwa. 38 Amawaliko yakalanda pe wonsinye wano wansuwila ukuti: ‘Aminzi yano yakapa uwumi yalitwalilila ukukonkoloka ukufuma mwe welilwe.’” 39 Lelo walanzile vyo-o pa mulandu nu muzimu wa kwe Leza, wuno wano wamusuwizile walinji nu kupocelela; pe yoyo impindi lyo umuzimu wutani wize, amuno lyo Yesu watani wamucindamike. 40 Pano awantu wamwi wano walinji mwi wumba wivwile vyo-o, watalisile ukulanda ukuti: “Acisinkanye we umuntu we kasesema.” 41 Wanji walandanga ukuti: “We-e we Klistu.” Lelo wanji nawo watinji: “Uzye e Klistu alifuma mu Galili? 42 Uzye amawaliko yatalanda ukuti e Klistu alifuma mu mwana wa kwe Devedi nu kuti alifuma mu kaya ka Betelehemu muno Devedi wafumile?” 43 Acino awantu waposilwe ukwivwana pe Yesu. 44 Wamwi walondanga ukumulema, lelo kusi nanti wenganye wino wamulemile.

45 Walile awasoja wanyocela, intunguluzi zya wa simapepo na Wafalisi wawakolowozizye ukuti: “Nga cani cino mutamuletezile?” 46 Nawo awasoja awasuka ukuti: “Kusitela kuwe umuntu wino akalanda ndi vino weyo.” 47 Nga Wafalisi awasuka ukuti: “Sinamwemwenye amisovizye? 48 Kusi e kateka nanti umu Falisi uwili wensinye wino amusuwizile? 49 Wa-a awantu wano watamanya Amasundo, watipwa.” 50 E Nikodemasi wino wayilepo kwe Yesu swinya wino walinji pa Wafalisi, wawanenile ukuti: 51 “Ukulingana ni sundo litu, kutawa ukupingula umuntu ukwasowa ukumanya vino akucita?” 52 Nawo wamwasusile ukuti: “Nga cani cino ukulandila wowo, sinawewenye we wa mu Galili? Kavwambilizye mu mawaliko, wandi uzane ukuti kusi e kasesema wino alifuma mu Galili.”*

8 12 Yesu wawanenile naswinya ati: “Ne luswepo lwa nsi. Wensinye wino akunkonka atalitela pitepo mu mfinzi, lelo aliwa nu luswepo lwa wumi.” 13 Acino Awafalisi wamunenile ukuti: “Vino ukanena awantu pe wewe we mweneco asa vya cisinka.” 14 Nga Yesu awasuka ati: “Vyonsinye vino nkanena awantu pe nene ne mweneco avyacisinka, amuno namanya kuno nafuma na kuno nkuya. Nomba mwemwe mutamanya kuno nafuma na kuno nkuya mutakumanyile. 15 Mukapingula ukulingana vye na vino awantu wakakwelenganya; Lelo nene nsipingula umuntu uwili wensinye. 16 Lelo nga napingula nkapingula ukulingana navino cifwile ukuwa, amuno ntawa nenga, nawa ne Tata wino wantumile. 17 Swinya calembwa na mu masundo yinu ukuti: ‘Wukamboni wa wantu wawili awacisinka.’ 18 Nene nkanena awantu ivya cisinka pe nene ne mweneco swinya Tata wino wantuma we kamboni.” 19 Nawo wamunenile ukuti: “Nge Tata wako alikwinye?” Ne Yesu wawasusile ati: “Mutamanya nene mutamanya ne Tata nye. Mwange mumanye nene nge mwamanya ne Tata.” 20 Walandizile ya-a amazwi kuno kwawezile akambokosi ka musangulo mwi tempile. Lelo kusi nanti wumwi wino wamulemile amuno lyo impindi yakwe yitani yifike.

21 Wawanenile na swinyanye ukuti: “Nkupita, swinya mulisyala mukumvwamba lelo mulifwila mu membu zinunye. Kuno nkuya mutange mwize.” 22 Awa Yuda watalisile ukulanda ukuti: “Uzye akulonda ukuyikoma? Amuno akulanda ukuti, ‘Kuno nkuya mutange mwize’” 23 Nga twalilila ukuwanena ukuti: “Mwemwe mwe wa munsi nene ne wa kwi yulu. Mwe wa munsi, lelo nene nsi ne wa munsi. 24 Awuli umulandu wuno minenezile ukuti: Mulifwila mu membu zinu. Amuno nga cakuti mutasuwila ukuti anene, mulifwila mu membu zinunye.” 25 Acino watalisile ukumunena wakuti: “Nga weweni?” Nawe Yesu awasuka ati: “Ntamanyile na cino nkulandila na mwemwe. 26 Nkweti ivivule ivyakulanda pe mwemwe, swinya ndi ni milandu imivule iyakupingula, na wino wantumile awacisinka, ni vintu vino nivwile kwe weliwe avino nkalanda ku wa munsi.” 27 Lelo watilusile ukuti wawanenanga pa Mukwasi wakwe. 28 E Yesu walanzile nu kuti “Mulila mwapamantila umwana wa muntu pa cimuti, apano mulimanya ukuti anenenye swinya mulimanya ukuti nsicita ivintu ku maka yane; lelo vino Tata wansambilizya avino nkalanda. 29 Wino wantumile wawa nanene; asitela ansye nenga amuno lyonsinye nkacita ivyakumusecelesya.” 30 Pano walanzile vyo-o ivintu, awantu awavule wamusuwizile.

31 Apano Yesu watwalilizile ukulanda ku wa Yuda wano wamusuwizile ukuti: “Nga mwatwalilila ukwivwila amazwi yane, lyo mwelimonye mwe wasambi wane, 32 swinya mulimanya icisinka, ni cisinka cililenga muwe mwe wantungwa.” 33 Nawo wamwasusile ukuti: “Swe wana wa kwe Abrahamu swinya tusitela tuwepo swe wazya wa muntu uwili wensinye. Amulandu ci wuno ukulandila ukuti, ‘Muliwa mwe wantungwa’?” 34 Nge Yesu awasuka ati: “Nkuminena icisinkanye nkuti, wensinye wino akacita uluwembu, amuzya wa luwembu. 35 Umuzya asitwalilila ukwikala mu ng’anda ya kwe yisikulu, suka umwana awino akakwikalililamo umuyayaya. 36 Acino nga cakuti umwana wamiluwula, muliwa mwe wantungwa. 37 Namanya ukuti mwe wana wa kwe Abrahamu, lelo mukalonda ukunkoma amuno vino nkalanda visimifika pa mwezo. 38 Nkalanda ivintu vino naweni kwe Tata pano nalinji nawe, lelo mwemwe mukacita ivintu vino mwivwa ku wakwasi winu.” 39 Nga awamwasuka ukuti: “Umukwasi witu we Abrahamu.” Ne Yesu awasuka ukuti: “Mwange muwe mwe wana wa kwe Abrahamu, nge mukakonka icakulolelako cakwe. 40 Nomba ne muno nkuminena icisinka cino nivwile kwe Leza, anemuno mukulonda ukukoma. E Abrahamu asitela acitepo icamusango wo-o. 41 Mukucita imilimo ya mukwasi winu.” Nawo wamunenile ati: “Tusi swe wana wakupempa,* twawavye nu Mukwasi witu wenga, e Leza.”

42 E Yesu wawasusile ukuti: “E Leza wange awe amukwai winu nga mwankunda, amuno nafuma kwe Leza swinya ndi pa-a. Ntayituma ne mweneco lelo awino wantuma. 43 Uzye mumanyile cino mutakwivwila vino nkulanda? Apamulandu wakuti mutange mwivwe. 44 Mwe wana wa kwe Satana swinya mukavwambisya ukucita vino Umukwasi winu akalonda. Weyo walinji we cikoma na pakutalika, swinya atatwalilizile ukuwa mu cisinka amuno atawa ni cisinka. Nga walanda, akalanda ukulingana na vino wawa, amuno we cawufi swinya awili e yisi wa wufi. 45 Amuno nene nkalanda icisinka lelo musinsuwila. 46 Weweni pe mwemwe wino anganena ukuti ne muwembu? Nga cakuti nkalanda icisinka, amulandu ci wuno musinsuwilila? 47 Wensinye wino wafuma kwe Leza, akakwivwa amazwi ya kwe Leza. Awuli umulandu wuno musikwivwila kwe nene amuno mutafuma kwe Leza.”

48 Nawo wamwasusile ati: “Uzye tukuwipa wo-o vino tukukunena ukuti we mwina Samariya swinya wawa nu muzimu wuwipe’?” 49 Ne Yesu wawasusile ukuti: “Ntawapo nu muzimu wuwipe, lelo nkancindika Tata, nomba mwemwe mukansalula. 50 Ukuwa kweni nsiyilondela umucinzi; lelo e Leza awino akalonda ukuti mwancindika swinya awili e kapingula. 51 Nkuminena icisinkanye nkuti, wensinye wino akacita vino nkalanda, atalitela afwe.” 52 Nga wa Yuda awamunena awati: “Pa-a apano twasinincizya ukuti wawa nu muzimu wuwipe. E Abrahamu wafwa na wakasesemanye wafwa, nomba wewe ukuti, ‘wensinye wino akucita vino nkulanda atalitela afwe.’ 53 Uzye we songo pa mukwasi witu e Abrahamu wino wafwa? Wakasesema nawonye wafwa, nga wewenye weweni?” 54 E Yesu wawasusile ati: “Nga cakuti nkuyicindamika ne mweneco lyo nkuyicuzyavye. Amuno e Tata awino akancindamika, wino mwemwe mukuti we Leza winu. 55 Mwemwe mutamumanya, lelo nene namumanya. Nga nalanda ukuti ntamumanya, lyo nawa ne cawufi ngati amwemwe. Namumanya swinya nkacita vino akalanda. 56 E Abrahamu umukwasi winu walondesyanga nkaninye ukulola uwanda wakwiza kwane swinya wawuweni nu kusecelela.” 57 Apano awa Yuda wamunenile ati: “Utani ufisye ni myaka 50, awemuno ungalanda ukuti walola Abrahamu?” 58 Ne Yesu wawasusile ukuti: “Nkuminena icisinkanye nkuti, pano e Abrahamu atani aweko, lyo nene akuno nawa.” 59 Acino wasozile amawe ukuti wamufwante lelo e Yesu wavwamile afuma na mwi tempile.

9 Pano e Yesu wapitanga, waweni umonsi wino wakwasilwe antonko. 2 Awasambi wakwe wamukolowozizye ukuti: “Rabi, uzye we-e umuntu pakuti akwatwe intonko, weliwe wawembusile nanti awakwasi wakwe?” 3 Ne Yesu wawasusile ukuti: “Wonsinye watawembusile, lelo apakutivye imilimo ya kwe Leza yilolecele mwe weliwe. 4 Tuzipizile twawomba imilimo ye wino wantumile; amuno uwusiku wukwiza pano kusi umuntu wino aliwawomba. 5 Lelo pano ncili ndi munsi, ne luswepo lwa nsi.” 6 Walile walanda wo-o, waswilizile amati pansi, ayakandinkanya nivu, nga apaka umonsi ntonko mu minso, 7 amunena ukuti: “Yanga mu ciziwa ca Siloamu, ukasambe mu minso.” (izwi lyakuti Siloamu likasula ukuti “Aminzi Amatumwe”). We-e umonsi wayile samba swinya wanyosile lyo kulola.

8 Awina mupalamano na wano wamulolanga akulenga, watalisile ukulanda ukuti: “Uzye we-e asa monsi wino wikalanga akulenga?” 9 Wamwi walandanga wakuti: “Weliwe.” Ne wanji watinji: “Awe, wafwile wakolinevye.” Nu monsi walandanga ukuti: “Anenenye.” 10 Acino watalisile ukumukolowozya wakuti: “Nga weni tewakupozya pakuti utalike ukulola?” 11 Nawe wawasusile ukuti: “Aweyo umonsi wino akakwitwa ukuti Yesu, tewaswilila amati pansi wayakandinkanya nivu, nga wampaka mu minso, wambuzya nu kuti, ‘Yanga ku ciziwa ca Siloamu ukasambe mu minso.’ Avyo nani tenaya nasamba, natalika nu kulola.” 12 Nga wamukolowozya ukuti: “Nga alikwinye?” Nawe ati: “Ntamanyile.”

13 Awatwala we-e umonsi wino walinji antonko ku Wafalisi. 14 Nomba walinji awanda wi Sabata pano Yesu wakandinkinye amati nivu nu kupozya we-e umonsi. 15 Nga Awafalisi nawonye awatalika ukumukolowozya vino calinji pakuti atalike ukulola. Ne nawe wawanenile ukuti: “Tewampaka ivu mu minso, nani naya nasamba, natalika nu kulola.” 16 Nga wamwi pa Wafalisi awatalika ukulanda ati: “We-e umuntu atafuma kwe Leza, amuno asisunga uwanda wi Sabata.” Ne wanji nawo awati: “Uzye umuntu umuwembu angacita wuli ivizungusyo vyonsinye vyo-o?” Acino wapusine mwe vino walandanga.* 17 Awakolowozya intonko swinya awati: “Wewe ukutipo wuli pe we-e umonsi, wo-o vino awemuno apozizye aminso?” Nawe wasusile ukuti: “Wafuma kwe Leza.”

18 Lelo awa Yuda watazumizile ukuti we-e umonsi walinjipo antonko nu kuti watalisilevye ukulola, mpaka awasuka awita awakwasi wakwe. 19 Awawakolowozya ukuti: “Uzye we-e, amwana winu, wino mwatinji wakwasilwe antonko? Nga atalisile wuli ukulola?” 20 Ne awakwasi wakwe wasusile ukuti: “Kweni mwelimonye, we-e amwana witu, swinya wakwasilwe antonko. 21 Nomba vino atalisile ukulola; avino tutamanyile, nanti awino amupozizyenye, tutamumanyile. Mukolowozyani, we songo, wandi ayilandile.” 22 Awakwasi wakwe walanzile wo-o, pa mulandu wakuti watinanga awa Yuda, amuno lyo awa Yuda wivwine kali ukuti wensinye wino walanda pe Yesu ukuti we Klistu, lyo azipizile ukuwingwa mwi sinagogi. 23 Conye acino calenzile walande ukuti: “Mukolowozyani, we songo, wandi ayilandile.”

24 Naswinyanye wisile we-e umonsi wino wakwasilwe antoko, awamuwuzya awati: “Landa icisinka pa minso ya kwe Leza; amuno sweswe twamanya ukuti we-e umuntu amuwembu.” 25 Nawe wasusile ukuti: “Nene ntamanyile nga muwembu nanti asa muwembu, cino manyilevye acakuti nalinji ne ntonko, nomba pa-a nkulola.” 26 Nawo wamunenile ati: “Nga fwe tecili wuli? Tewacita wuli pakuti akupozye?” 27 Nawe wawasusile ukuti: “Minenile kali, nomba musakwivwa, avyani vinji vino mukasi minene? Si namwemwenye mukulonda ukuwa awasambi wakwe?” 28 Nga awamupontela, awamunena awati: “Wewenye awemuno we musambi wakwe, nomba sweswe swe wasambi wa kwe Mozesi. 29 Sweswe twamanya ukuti e Leza wawomvizye Mozesi ukuwa we kasesema, nomba we-e umuntu tutamanya na wino wamutuma.” 30 Nenawe ati: “Mwanzungusya nkaninye pakulanda ukuti mutamanya wino wamutuma, umuntu awino tewampozya aminso natalika nu kulola. 31 Swensinye twamanya ukuti e Leza asikwivwa ku mapepo ya wawembu, lelo akakwivwa kwe wino akamutina swinya akacita nu kulonda kwakwe. 32 Ukufumilila na kali tusitela twivwepo ukuti wumwi wiyuzile aminso ya kwe wino wakwasilwe antonko. 33 Nga cakuti we-e umuntu ase Leza wamutuma, atanga acite icili consinye.” 34 Ne nawo wamuwuzizye ukuti: “Ukufumilila pano wakwatizilwe ukufika na pe yo-o impindi, ucili we muwembu, awe muno ungatusambilizya wewe?” Awamuwinjila na pa londe.

35 E Yesu wivwile ukuti wawinzile we-e umonsi. Pano wamusunkinye, wamukolowozizye ukuti: “Uzye ukusuwila Umwana wa muntu?” 36 Nawe wamwasusile ukuti: “Weweni weyonye? Nazina mbuzya, pakuti musuwile.” 37 Ne Yesu wamwasusile ukuti: “Umuweni kali, swinya awenye wino akulanda nawewe.” 38 Acino we-e umonsi watili: “Nakusuwila Tatakulu.” Swinya wamufukamizile* nu kumupa umucinzi. 39 Ne Yesu wamunenile ukuti: “Niza munsi pakuti vyonsinye vino nkucita, vilenge wano wasilola, watalike ukulola, ne wano wakalola, wawe antonko.” 40 Walile Awafalisi wano walinjipo wivwa ya-a amazwi, awamunena ukuti: “Uzye nasweswenye, swe ntonko?” 41 Ne Yesu wawasusile ukuti: “Mwange muwe mwe ntonko, nga musi nu luwembu. Nomba wo-o vino mukuyilandila ukuti, ‘Mukalola.’ Uluwembu lwinu lutalitela lutetelwe.”

10 “Nkuminena co-o nkuti, wensinye wino asikwinjilila pa mulyango wa luwa lwa ng’onzi, lyo mung’o akoncezilevye ukwiwa. 2 Nomba wino akakwinjilila pa mulyango, we kacema wa ng’onzi. 3 Wino akawa pa mulyango akamwiyulila, nawe nga winjila akakwita ing’onzi zyakwe amazina. Nazyo zikakwivwa izwi lyakwe nu kwiza kwe weliwe, azifuma mu luwa nu kumukonka. 4 Nga wafumya ing’onzi zyakwe zyonsinye, akakolela, nazyo zikamukonka kuno akuya amuno zyamanya izwi lyakwe. 5 Ing’onzi zisikonka umuntu wino zitamanya, lelo zikamusamala amuno zitamanya izwi lyakwe.” 6 Yesu wawanenile co-o icilanjililo, nomba waposilwe ukwivwicisya cino walandangapo.

7 E Yesu naswinya watili: “Ne mulyango wuno ing’onzi zikapitapo. 8 Wonsinye wano wakakwiza wakuyipanga ngati anene, awang’o swinya wakakonkavye ukwiwa; lelo ing’onzi zisikwivwa kwe woliwo. 9 Ne mulyango; wensinye wino winjilila kwe nene alipusuka, aliyinjila nu kufuma swinya alizana umulemvwe. 10 Umung’o nga wiza lyo akonsile ukwiwa, ukukoma nu konona. Niza pa kuti ing’onzi ziwe nu wumi, swinya zize ziwe nu wumi wamuyayaya. 11 Ne kacema muzima wino wayipelesya ukufwila ing’onzi. 12 Umuntu wino winjizyavye incito wino ase kacema swinya asamweneco wa ng’onzi, nga walola icinyama icikalipe ciza, akasamala nu kusya ing’onzi zyonga—naco cikasyala acilema ing’onzi zimwi, ne zinji azisamala— 13 Akasamala amuno amuwomvivye wino akuwombela indalama swinya atasakamile ni ng’onzi. 14 Nene ne kacema muzima, namanya ing’onzi zyane, nazyo zyamanya 15 ndi wulyanye vino e Tata wamanya nani namumanya; swinya nayipelesya ukufwa* pakuti mpususye ing’onzi.

16 “Ndi ni ng’onzi zinji zino asa zya muluwa* lo-o; nazyonye ndizileta, ziliyivwa kwi zwi lyane swinya ziliwa aliwumba lyonga* ne kacema wenga. 17 Awuli umulandu wuno Tata wankundila, amuno nkapa uwumi wane, pakuti njize imbe nawo na swinya. 18 Kusi wino alimpoka uwumi wane, lelo ndiyikundilavye ukuwupa, amuno nawa ni nsambu zyakuwupa nu kuwupocelela na swinya. E Tata awino wambuzya ukucita wo-o.”

19 Awa Yuda naswinyanye wizile awapawunkana pa mulandu na ya-a amazwi. 20 Awavule walandanga ukuti: “Ali nu muzimu wuwipe swinya apenile. Nga cani cino mukwivwila kwe weliwe?” 21 Ne wanji walandanga wakuti: “Umuntu wa muzimu wuwipe atanga alande wo-o. Uzye umuzimu wuwipe wungiyula aminso ya muntu intonko?”

22 Pe yoyo impindi, awa Yuda walinji nu kuzevya kwa kupa ing’anda ya kwe Leza mu Yerusalemu. Nomba yo-o yalinji ampindi ya mpepo. 23 E Yesu wapitanga mwi tempile mwe kolido* yino witanga ukuti Solomoni. 24 Apano awa Yuda wayile awamuwunganila, awatalika ukumunena wakuti: “Ulitunena mpindi ci pakuti tumanye nga we Klistu nanti usi we Klistu? Nga we Klistu tuwuzyevye” 25 Ne Yesu wawasusile ukuti: “ Naminena kali nomba musisuwila. Imilimo yino nkacita mwi zina lya kwe Tata ayino yikaminena pe nene. 26 Nomba musisuwila amuno musi mwe ng’onzi zyane. 27 Ing’onzi zyane zikakwivwa kwi zwi lyane, nazimanya swinya zikankonka. 28 Ndizipa uwumi wamuyayaya, zitaliyononeka swinya kusi wino alizisompola mwi kasa lyane. 29 Ing’onzi zino Tata wampa zyacindama nkaninye ukucila pe vyonsinye, swinya Tata akazisakamala, icakuti kusi nanti wenganye wino alizisompola mu makasa yakwe. 30 Nene ne Tata twalemenkana mwe vino tukacita.”

31 Swinyanye awa Yuda awasola amawe pa kuti wamufwante. 32 E Yesu wawanenile ukuti: “Namilanjizya imilimo imivule sana ukufuma kwe Tata, pe yonsinye yo-o imilimo yino nacita, ayili kwinye yino mukulonda mumfwantilepo amawe?” 33 Ne wa Yuda wamwasusile ukuti: “Tutakukufwantila pa mulimo uwuzima wuno ukuwomba, lelo apamulandu wakuti ukupontela Leza, nanti acakuti wewe we muntuvye, ukucita ngati we Leza.” 34 Nga Yesu awasuka ukuti: “Uzye Amasundo yinu yatalanda yati, ‘e Leza watili: “Mwe wa leza”’?* 35 Nga cakuti e Leza wisile awantu ukuti ‘awa leza,’ walyanye wano izwi lyakwe likati wawipa,—swinya twamanya nukuti amawaliko yasipiluka— 36 Uzye mukumbuzya ukuti ‘nkupontela Leza,’ ne muno wansola, swinya ne muno watuma na munsi, pa mulandu vye wakuti tentili ‘Ne Mwana wa kwe Leza’? 37 Nga cakuti nsiwomba imilimo ya kwe Tata, lyo mutakansuwile. 38 Lelo nga milimo yakwe yino nkawomba, nanti acakuti muntansuwizile nye, fwe musuwile imilimo yino nkawomba, pakuti mumanye ukuti e Tata wawa mwe nene nani nawa mwe Tata.” 39 Walondanga ukumulema naswinyanye, lelo waposilwe.

40 E Yesu naswinyanye walamvile uluzi lwa Yordani aya ku ncende yino Yohani wabadizizyanga pakutalika, swinya wisile kulyanye. 41 Awantu awavule wayile kwe Yesu awatalika ukulanda ati: “E Yohani asitela acitepo icizungusyo nanti cimwi, lelo ivintu vyonsinye vino walanzile pe we-e umuntu avyacisinka,” 42 icakuti awavule koko wamusuwizile.

11 Nomba, kwalinji umuntu wumwi wino walwile uwi zina lyakuti Lazalo wino wikalanga mu Betani, akaya muno mwikalanga e Mariya ne Marita e nkazi yakwe. 2 We-e Mariya, aweyo wino witizile Tatakulu amafuta amanuncile nga amupuputa amatamba ku nyele zyakwe, wenye awino e ndume yakwe e Lazalo walwile. 3 Acino wa nkazi zyakwe watumile wumwi kwe Yesu mukumunena ukuti: “Tatakulu! E ciwuza wako wino wakunda amulwale.” 4 Nomba pano Yesu wivwile vyo-o, watili: “Yo-o indwala yitizileko pakuti afwe, lelo apakuti e Leza acindamikwe, na pakuti Umwana wa muntu acindamikwe kwe yoliyo.”

5 E Yesu wakunzile nkaninye Mariya, Marita ne Lazalo. 6 Nomba pano wivwile ukuti e Lazalo amulwale, wisile kulyanye kuno walinji, amanda na yanji yawili. 7 Pa nsizi ya manda yawili, wawuzizye awasambi wakwe ukuti: “Tuyani tunyocele ku Yudeya na swinya.” 8 Nga wasambi wakwe awamunena ati: “Rabi, wakasi wakufwante na mawe ku Yudeya nombanye, akuno ukulonda unyocele naswinya?” 9 Nga Yesu awanena ati: “Uzye mu wanda mutawa ama awazi 12 aya musanya? Wensinye wino akupita umusanya asiyipunula ku cili consinye, amuno akalanga akulola uluswepo lwa munsi. 10 Lelo wensinye wino akapita uwusiku, akayipunula, amuno lyo asi nu luswepo.”

11 Walile walanda wo-o, watili: “E ciwuza witu e Lazalo alazile utulo, lelo nandi inje muziwule.” 12 Nga wasambi wakwe awamunena ati: “Tatakulu, nga alazilevye utulo, lyo wandi awe icetenye.” 13 Lelo cino Yesu walandangapo acakuti, e Lazalo wafwile. Nomba weni welenginye ngati walandanga pa kupuza kwa kulala utulo. 14 Apano Yesu wawanenile mukulungatika ukuti: “E Lazalo afwile, 15 ndi ni nsansa wo-o vino ntalinjiko, amuno vino nandi nje ncite, vikuyawomya isuwilo linu. Acino tuyani kwe weliwe.” 16 Apano e Tomasi wino witwanga ukuti Mpundu, awuzya awasambi wawuye ukuti: “Nasweswenye tuyani pakuti tukafwile ponga ne Yesu.”

17 Pano e Yesu wafisile, wazanile ukuti pano wazicizile Lazalo, papita na manda 4. 18 Nomba umusumba wa Betani walinji mupipi ne Yerusalemu, pano patalimfile amakilomita yatatu.* 19 Swinya awa Yuda awavule wayile kwe Marita ne Mariya mukuwawomelezya pa mfwa ya kwe ndume yawo. 20 Pano e Marita wivwile ukuti e Yesu akwiza, wayile mukumusunkanya; lelo e Mariya weni wasyazile ayisilevye pa ng’anda. 21 E Marita wanenile Yesu ukuti: “Tatakulu, wanga uwepo, e ndume yane nga tafwile. 22 Lelo na panye manyile ukuti icili consinye cino ungalenga kwe Leza, wandi akupe.” 23 Ne Yesu wamunenile ukuti: “E ndume yako wandi akatuke.” 24 E Marita wamwasusile ati: “Manyile ukuti alizyulupuka pa wanda wakulecelezya.” 25 Apano Yesu wamunenile ukuti: “Ne kuzyulupuka swinya ne wumi. Wensinye wino wansuwila, nanti wafwa nye aliwa nu wumi naswinya; 26 swinya wensinye wino ali nu wumi nga wansuwila, atalitela afwe. Uzye wasuwila vino nakunena?” 27 Ne watili: “Eta Tatakulu, nasuwila ukuti we Klistu Umwana wa kwe Leza, wino Leza watili aliyiza munsi.” 28 Walile Marita walanda vyo-o, wayile mukwita Mariya umuzuna wakwe, amusenda pa mbali nga amunena ati: “Umusambilizya ayizile, akukwita.” 29 Pano Mariya wivwile vyo-o, wakatusile paponye aya kwe Yesu.

30 Pe yo-o impindi lyo Yesu atani afike mu kaya, walinji kulyanye kuno Marita wamusunkinye. 31 Pe yoyo impindi kwalinji awa Yuda wamwi wano walinji mu ng’anda ne Mariya wakumuwomelezya. Pano waweni wakatuka zuwa wafuma panzi, wamukonsile, amuno walolanga ngati waya ku manda mukulosya. 32 Walile Mariya walola Yesu wafisile pano walinji afukama nga amunena ati: “Tatakulu, wanga uwe ko-o, e ndume yane nga tafwile.” 33 Pano Yesu waweni e Mariya na wa Yuda wano walinji nawo wakulosya, wasinsimucizile swinya wivwile nkaninye uwulanda. 34 Acino wawakolowozizye ukuti: “Mwamuzika kwinye?” Nawo wamunenile ukuti: “Tatakulu, tuye tukulanjizye.” 35 Nga Yesu alila. 36 Awa Yuda watalisile ukulanda ukuti: “Lolani vino Yesu wamukunzile!” 37 Ne wamwi watalisile ukulanda wakuti: “Uzye we-e umuntu asa wino wiyuzile aminso ya muntu wino walinji antonko? Acani cino atacitizilepo cimwi pakuti e Lazalo atafwa?”

38 Walile Yesu wasinsimucila naswinya, wayile pa nkungwe. Yo-o inkungwe yawezile mu ciliwe swinya wakupisilepo ni liwe ilikulu. 39 E Yesu watili: “Fumyanipo iliwe.” Nga Marita, e nkazi ya kwe wino wafwile, alanda ati: “Tatakulu, pe yo-o impindi pamwi atalisile nu kununka, amuno papita amanda 4.” 40 Ne Yesu wamunenile ukuti: “Uzye ntakunenile ukuti nga wasuwila wandi ulole vino Leza wawa na maka?” 41 Acino wafumizyepo iliwe. Nga Yesu alolecesya mupela, alanda ati: “Tata nasalifya wo-o vino wanjivwa. 42 Namanya ukuti lyonsinye ukanjivwa; lelo nalanda wo-o pa mulandu na wantu wano wali pa-a, pakuti wasuwile ukuti awe muno wantumile.” 43 Walile walanda wo-o, wapunzile ati: “Lazalo! Nkuti, fuma!” 44 Umuntu wino wafwile wafumile, lyo wamupomvile ama nama na makasa. Swinya wamupomvile imyenda na pa minsonye. Acino Yesu wawanenile ukuti: “Musapulani muleke apita.”

45 Pano awa Yuda wano wayile kwe Mariya waweni vino Yesu wacisile wamusuwizile, 46 Lelo wamwi wayile awanena Awafalisi vyonsinye vino wacisile. 47 Acino intulunguluzi zya simapepo na Wafalisi wawungine ponga mu Sanihedrini awalanzyanya awati: “Twandi tucite wuli? Amuno we-e umuntu akucita ivizungusyo ivivule nkaninye. 48 Nga cakuti twamulekavye, awantu walimusuwila, swinya awina Roma walitupoka itempile nu luko lwitu.” 49 Swinya pe woliwo palinji umonsi wumwi uwizina lya kuti Kayafa wino walinji we simapepo mukulu mwe wowo umwaka, wawanenile ukuti: “Mutamanyile cino mukulandapo, 50 Uzye mutanga mulole ukuti cazipapo umuntu wenga ukufwila awantu wonsinye ukucila uluko lonsinye ukononwa?” 51 Atayilandizilevye ya-a amazwi, lelo apa mulandu wakuti walinji we simapepo mukulu mwe wowo umwaka, e Leza wamuwomvizye ukusesema ukuti e Yesu walinji nu kufwila awa Yuda. 52 Atalinjivye nu kufwila awa Yuda watupu lelo nu kulonganika awana wa kwe Leza wano wasalangana. 53 Acino ukufumilila pe wulyanye uwanda, walondanga ukumukoma.

54 E Yesu walesile ukupita kuno kwawanga awantu awavule,* lelo wafumile koko aya ku citungu cino cawezile mupipi ni mpanga, mu musumba wa Efulemu swinya wisile kulyanye na wasambi wakwe. 55 Nomba impindi yakuzevya Icakupitililwa ca wa Yuda yapalamizile, swinya awantu ukufuma mu twaya, wayile ku Yerusalemu pano Icakupitililwa citani citalike mukuyiswefya ukulingana nu lutambi. 56 Wavwambanga e Yesu acino watalisile ukulanzyanya pano walinji mwi tempile wakuti: “Mwenji mukwelenganya cani? Uzye akwiza ku muteweto?” 57 Lelo intunguluzi zya Simapepo na Wafalisi wanenile awantu ukuti uwili wensinye wino wamanya kuno Yesu ali, akawawuzye pakuti wakamuleme.

12 Pano kwasyazile amanda 6 ukuti Icakupitililwa citalike, e Yesu wayile ku Betani kuno kwikalanga Lazalo wino wazyulupuzile ku wafwe. 2 Wamupekanizizye icakulya ca manguzi kulyanye, e Lazalo walinji pe wano walyanga nawe swinya e Marita awino wa wapekanizizyanga. 3 E Mariya wasenzile hafu lita ya mafuta amanuncile nkaninye yano yitwanga ukuti nardi swinya ayamutengo, ayitila ku matamba ya kwe Yesu nga talika ukumupuputa ni nyele. Icakuti mu ng’anda mwanuncizile amafuta matupunye. 4 Lelo e Yuda Skarioti umusambi wakwe wino walinji nu kumukazya watili: 5 “Acani cino watanga wakazye vye ya-a amafuta amanuncile pa ma denari* 300 nu kupa awapina indalama?” 6 E Yuda atalanzile wo-o pa mulandu wakuti wawisile amano ku wapina, lelo apa mulandu wakuti walinji amung’o. Awino wasunganga indalama pa wasambi wonsinye, nomba wiwanga. 7 Nga Yesu amunena ati: “Muleke umweneco, amuno vyo-o vino akucita, akupekanizizya umuwili wane ukuzikwa. 8 Amuno awapina mulilanga mwawa nawo lyonsinye, lelo nene mutalilanga mwawa nani.”

9 Walile awa Yuda awavule wamanya ukuti e Yesu walinji koko, wayile kulyanye, nomba watayile mukulola Yesu lelo wayile mukulola Lazalo wino wazyulupuzile ku wafwe. 10 Intunguluzi zya simapepo zyalondanga ukukoma ne Lazalo nye, 11 amuno awino walenzile awa Yuda awavule waya kwe Yesu nu kumusuwila

12 Uwanda wuno wakonsilepo, awantu awavule wano wayile mukuzevya ku Yerusalemu, wivwile ukuti e Yesu akwiza. 13 Acino wapambuzile insamba zya vimiti awaya mukumusunkanya, nga watalika ukupunda wakuti: “Tukupepa ukuti mupususyani! Wapalwa umuntu wino akwizila mwi zina lya kwe Yehova!* Imfumu ya wina Israeli.” 14 Pano e Yesu wazanile umwana wa ndokwe,* wakwezilepo, ndi wulyanye vino amawaliko yalanda ukuti: 15 “Utatina we mwana umwanaci wa kwe Zioni. Imfumu yako yikwiza kwe wewe, yikwezile pa mwana wa ndokwe.” 16 Awasambi wakwe waposilwe ukwivwicisya vyo-o pakutalika, lelo pano e Yesu wamucindamisile kwe Yisi, wizile awizuka ukuti vyonsinye vino vyacisilwe kwe weliwe, avino vyalemvilwe.

17 Nomba wonsinye wano waweni kuno Yesu wisile Lazalo ukufuma mu nkungwe nu kuti wamuzyulupuzile ukufuma ku wafwe, watwalilizile ukunena wanji vino vyacitisile. 18 Awuli umulandu wuno awantu wayile mukumusunkanya amuno wivwile ukuti wacisile co-o icizungusyo. 19 Acino Awafalisi watalisile ukulanzyanya wakuti: “Muweni! Pasi icili consinye cino cikufumamo mwe vino tukucita, amuno wonsinye wayile kwe weliwe.”

20 Nomba pa wantu wano wayile mukupepa pa wanda wakuzevya, palinji na wa Giriki. 21 Acino wayile kwe Filipu wino wafumile ku Betisaida mu Galili awamunena ukuti: “Tatakulu, tukulonda ukulola Yesu.” 22 E Filipu wayile anena Andreya, apano wonsinye wowili, awaya wanena Yesu.

23 Lelo Yesu wawasusile ukuti: “Impindi yikwiza pano umwana wa muntu alicindamikwa. 24 Nkuminena icisinkanye nkuti, ulupumba lwa ngano nga lutaponile pa nsi nu kuwola,* lukatwalilila ukuwa longanye; lelo nga lwawola, lukamela aluwa ni mpumba na zinji. 25 Wensinye wino wakundisya uwumi wakwe, aliwusovya umuyayaya, lelo wino wapata uwumi wakwe mwe yo-o insi, aliwucinjilila pakuti ayize awe nu wumi wamuyayaya. 26 Wensinye wino akulonda ukuwa umuwomvi wane, lekani ankonke, swinya kuno indi akuno nu muwomvi wanenye azipizile ukuwa. Wensinye wino akumbombela, e Tata alimucindamika. 27 Nsakamile nkaninye, ntakweti ni vyakulanda. Tata, mpususya kwe yo-o impindi. Lelo yonye impindi ayino nizila munsi. 28 Tata, cindamika izina lyako.” Paponye izwi alivwika ukufuma mwi yulu aliti: “Nalicindamika kali, ndilicindamika naswinyanye.”

29 Walile awantu wano walinjipo wivwa wo-o, watalisile ukulanda ukuti amvula yawuluma. Ne wanji watili: “Amungeli walanda nawe.” 30 E Yesu wasusile ukuti: “Lyo-o izwi litivwisile pa mulandu wane, lelo apamulandu na mwemwe.” 31 Impindi yakupingula insi yifisile nomba e kateka we yo-o insi walimuwinga. 32 Lelo walila wampamantila pa cimuti,* ndilenga awantu awavule ukwiza kwe nene.” 33 Walanzile wo-o, pakulanjilila vino walinji nu kufwa. 34 Nga wantu awamunena ukuti: “Twivwa vino amasundo yalanda ukuti e Klistu alitwalila ukuwako umuyayaya. Nomba wewe ungalanda wuli uti umwana wa muntu walimupamantila pa cimuti? Nga umwana wa muntu nye weyo wino ukulandapo weweni?” 35 Apano Yesu awanena ati: “Uluswepo lucili na mwemwe impindi vye yitici. Mwapita pano mucili muli nu luswepo, pa kuti imfinzi yitize yimicimvye; wensinye wino akapita mu mfinzi asimanya kuno akuya. 36 Suwilani uluswepo pano mucili muli nalo, pakuti muwe mwe wana wa luswepo.”

Walile e Yesu walanda vyo-o wafumilepo, ayavwama. 37 Nanti acakuti wacisile ivizungusyo ivivule pe woliwo, watamusuwizile, 38 pakuti amazwi yano e kasesema Ezaya walemvile yaficiliswe, ayakuti: “We Yehova!* Uzye kuli wino wasuwila ivintu vino twivwile? Swinya akweweni kuno Yehova* wasokolola amaka yakwe?” 39 E Ezaya walemvile naswinya umulandu wuno walenzile watasuwila, watili: 40 “Natonkola aminso yawo, nalenga ni myezo yawo ukuwoma. Nacita wo-o pakuti watalola swinya watamanya ivintu vino wazipizile ukucita, pakuti wize wanyocele kwe nene, nani mbapozye.” 41 E Ezaya walanzile vyo-o ivintu pe Klistu pa mulandu wakuti waweni icifulo icicindame cino walinji naco, swinya awino walandangapo. 42 Lelo awavule, kumwi ni ntunguluzi zya wa Yuda wamusuwizile, nomba wapotwanga ukulanda amuno watinanga Awafalisi ukuti wangawawinga mwi sinagogi; 43 Amuno wakunzile ukucindamikwa na wantu ukucila ukucindamikwa ne Leza.

44 Lelo e Yesu walanzile ukuti: “Wensinye wino wansuwila, lyo atasuwizilevye nene lelo lyo wasuwila na wino wantumile; 45 swinya wensinye wino wandola, lyo walola na wino wantumilenye. 46 Niza ngati aluswepo munsi, pakuti wensinye wino wansuwila atikalilila mu mfinzi. 47 Wensinye wino wivwa amazwi yane lelo asakuyakonka, nsimupa umulandu, amuno ntiza mukupingula awantu wa munsi, lelo niza mukuwapususya. 48 Wensinye wino atancindisile swinya atakukonka na vino nkulanda, kuli wino alimupingula. Izwinye lino nkulanda, alino lilimupingula pa wanda wakulecelezya. 49 Amuno vino nkalanda asavyane, lelo nkalanda vino Tata wino wantumile wambuzizye. 50 Namanya ukuti amasundo yakwe yakapa uwumi wa muyayaya. Acino vyonsinye vino nkalanda, avilyanye vino Tata wambuzizye.”

13 Nomba pano icakupitililwa citani citalike, e Yesu wamanyile ukuti impindi yafisile iyakuti afume munsi nu kuya kwe Yisi. E Yesu wakunzile nkaninye awantu wamwe yo-o insi swinya wawakunzile ukufika na kunsilo. 2 Pano walyanga icakulya camanguzi lyo Satana awisile kali amelenganyo mawipe mu mwezo wa kwe Yuda aya kuti akazye e Yesu. We-e Yuda we mwana Simoni Skarioti. 3 E Yesu wamanyile ukuti e Yisi wamupile vyonsinye nu kuti watumilwe ne Leza swinya akuno walinji nu kuya, 4 acino wakatusile pi tebulo, azula ivizwalo vyakwe ivyakunzi awika pa mbali, nga senda itawulo anyepa mu mutembeleko. 5 Pano wacisile wo-o, wasenzile aminzi mu kadishi, atalika ukupwizya awasambi wakwe ku matamba, nga awapuputa ukuwomvya itawulo lino lyalinji mu mutembeleko. 6 Walile wafika pe Simoni Petro, wamuwuzizye ukuti: “Tatakulu, ukulonda upwizye na matamba yanenye?” 7 E Yesu wamwasusile ukuti: “Utanga uyivwicisye vino nkucita pe yo-o impindi, lelo uliyivwicisya ku nkolelo.” 8 Nga Petro ayasuka ati: “Nene utakutela umpwizyepo.” Ne Yesu amunena ati: “Nga ntakupwizizye, lyo utazipizile ukuwa nani.” 9 Apano e Simoni Petro alanda ati: “Tatakulu, fwe utampwizyavye ku matamba, lelo mpwizya na ku mutwenye.” 10 Ne Yesu watili: “Wensinye wino asamvile kali, lyo umuwili wakwe wonsinye awuswepe, atazipizile ukusamba naswinya, sukavye ukusamba ku matamba. Mwemwe mwe waswepe kali, lelo asa mwensi.” 11 Walanzile ukuti “asa mwensi” pa mulandu wakuti wamanyile wino walinji nu kumukazya.

12 Walile wamala ukuwapwizya amatamba, azwala ivizwalo vyakwe ivya kunzi, apano aya yikala pi tebulo naswinya nga alanda ati: “Uzye mumanyile umulandu wuno nacitila wo-o kwe mwemwe? 13 Mukanjita ukuti ‘Musambilizya’ swinya ‘Tatakulu,’ cino mukalanda acisinka amuno wonye avino nawa. 14 Nga cakuti nene ne sokulu swinya ne musambilizya winu namipwizya amatamba, lyo namwemwenye muzipizile ukupwizyanya amatamba. 15 Amuno namipa icakulolelako ukuti wonye vino nkucita, avino namwemwenye mwacita. 16 Nkuminena icisinkanye nkuti umuwomvi atange alusye yisikulu, swinya wino watumile atacindama ukulusya wino amutumile. 17 Wo-o vino mwamanya vyo-o ivintu, muliwa mwe wa nsansa nga mukuvikonka. 18 Ntakulanda pe mwemwe mwensi; amuno namanya wano nasola. Lelo iwaliko lizipizile ukuficiliswa lino likati: ‘Umuntu wino walyanga ponga nani ankazizye.’ 19 Naminenela lyankani vyo-o pano vitani vicitike, pakuti pano vilicitika mwize munsuwile ukuti anemuno lyo-o iwaliko likalandapo. 20 Nkuminena icisinkanye nkuti, wensinye wino wapocelela wino natuma lyo wapocelela na nene, na wensinye wino wampocelela, lyo wapocelela na Wino wantumile.”

21 Walile walanda vyo-o, wasakamisilwe nkaninye mu mwezo, nga alanda pe wonsinye ukuti: “Nkuminena icisinkanye nkuti, wumwi pe mwemwe wandi ankazye.” 22 Awasambi watalisile ukulolecesyanya, amuno watamanyile wino walandangapo. 23 Umusambi wumwi wino Yesu wakunzile nkaninye, wisile pi tebulo mupipi ne Yesu.* 24 E Simoni Petro wizile akompezya wenye umusambi amunena ati: “Tuneneko, weweni wino akulandapo.” 25 Acino wenye umusambi weyamizile pa cifuwa ca kwe Yesu nga munena ati: “Tatakulu, weweni wino ukulandapo?” 26 Nga Yesu amwasuka ati: “Wino nkupa umukate wuno nandi ntimpike mu mbale. Acino walile watimpika umukate mu mbale, wapile Yuda, umwana Simoni Skarioti. 27 Walile Yuda wasenda umukate, nga Satana atalika ukumutungulula. Acino Yesu wamunenile ati; “Cita zuwa vino utalisile.” 28 Lelo pe wano walyanga pi tebulo, pasi nanti wenganye wino wamanyile cino Yesu wanenezile Yuda wo-o. 29 Pa mulandu wakuti e Yuda awino wasunganga akabokosi ka ndalama, wamwi welenganyanga ukuti e Yesu wamuwuzyanga ukuti, ‘akakale vino vyalondekwanga pa muteweto nanti ukupa vimwi ku wapina. 30 Acino walile Yuda wasenda umukate, paponye wafumile panzi lyo kwizile nu kwila.

31 Pano Yuda wafumizile panzi, e Yesu watili: “Umwana wa muntu nomba wacindamikwa, swinya e Leza wacindamikwa mwe weliwe. 32 E Leza wandi acindamike Umwana wa muntu, swinya wandi acite co-o nombanye. 33 Viwuza vyane, nkuwa namwe pa kampindivye katici. Mulimvwamba, lelo naminena ndi wulyanye vino nawuzizye awa Yuda ukuti ‘Kuno nkuya mutanga mwize. 34 Namipa isundo ilipya ilya kuti mwakundana, ndi wonye vino namikunda avino na mwemwenye mwakundana. 35 Nga mwakundana apano wonsinye walimanya ukuti mwe wasambi wane.”

36 Nga Simoni Petro akolowozya Yesu ati: “Tatakulu, ngu kuya kwinye?” Ne Yesu amwasuka ukuti: “Kuno nkuya, pe yo-o impindi utanga unkonke, nomba uliyiza linji.” 37 E Petro nawe amuwuzya ati: “Tatakulu, nga cani cino ntanga nkukoncele pe yonye impindi? Amuno njipekinye ukufwila pe wewe.” 38 Nga Yesu ayasuka ukuti: “Uzye wati uyipekinye ukufwila pe nene? Nkukunena icisinkanye nkuti, pano mukolwe atani alamule, wandi unkane imiku yitatu.”

14 “Mutasakamala. Suwilanivye Leza; munsuwile na nene. 2 Mu nga’nda ya kwe Tata mwawa apakwikala apavule, mwange mutawa nga naminena. Acino nkuya mukumipekanizizya apakwikala. 3 Ndila naya namipekanizizya apakwikala, ndinyoka mukumisenda, mitwale kuno nikala, pakuti kuno ndiwa akuno namwemwenye mwize muwe. 4 Swinya mwamanya inzila yakuyila kuno nkuya.”

5 Nga Tomasi amunena ati: “Tatakulu, nga tungamanya wuli inzila pano tutamanyile na kuno ukuya?”

6 E Yesu wamunenile ukuti: “Ne nzila, ne cisinka swinya ne wumi. Pasi wino angiza kwe Tata ukwasowa ukupitila mwe nene. 7 Mwange mumanye nene, nga mwamanya ne Tata nye; Ukufumilila pa-a, mwamumanya swinya mwamulola.”

8 Nge Filipu amunena ati: “Tatakulu, tulanjizyevye Tata wako, lyo casila.”

9 Nga Yesu amuwuzya ati: “Impindi uwukulu yino nikala namwemwe, we Filipu na nomba utamanya? Wensinye wino walola nene, lyo walola ne Tata nye. Nga ungalanda wuli ukuti ‘Tulanjizye umukwasi wako?’ 10 Uzye mutasuwila ukuti nawa ne Tata, ne Tata wawa na nene? Vyonsinye vino nkalanda kwe mwemwe asavyane, lelo avya kwe Tata wino akawomba imilimo yakwe ukuwomvya nene. 11 Nsuwilani ukuti nawa ne Tata ne tata wawa nanene; nga sawowo, musuwile vye imilimo yino tata akawomba ukuwomvya nene. 12 Nkuminena icisinkanye nkuti wensinye wino wansuwila aliwomba imilimo yino nkuwomba swinya aliwomba ni milimo ukulusya na pe yo-o, amuno nkuya kwe Tata. 13 Swinya vyonsinye vino mwalenga ukuwomvya izina lyane, ndivicita, pakuti e Tata ayize cindamicilwe mu Mwana. 14 Ivili vyonsinye vino mwalenga ukuwomvya izina lyane, ndivicita.

15 Nga mwankunda, mwandi mwakonka amasundo yane. 16 Ndilenga e Tata ukuti ayize mipe e kavwa* na winji, uwakuwa na mwemwe umuyayaya. 17 Alimipa umuzimu wakwe wuno awa munsi watanga wapocelele, amuno wasiwulola swinya watawumanya. Lelo mwemwe mwawumanya amuno wawa mwa kwe mwemwe swinya mwawa nawo lyonsinye. 18 Ntalimisya mwenga.* Ndinyoka kwe mwemwe. 19 Kwasyala vye katici awantu wa munsi watalitela wandolepo na swinya, lelo mwemwe mulindola, amuno nditwalilila ukuwa nu wumi ponga na mwemwe. 20 Pe wulyanye uwanda apano mulimanya ukuti nawa ponga ne Tata namwe mwawa ponga nanene nani nawa ponga na mwemwe. 21 Wensinye wino wamanya amasundo yane nu kuyakonka lyo wankunda. Swinya wensinye wino wankunda, ne Tata alimukunda. Naninye ndimukunda, swinya ndimwavwa ukuti amanye icete.”

22 Nge Yuda (ase Yuda Skarioti), amunena ati: “Tatakulu amulandu ci wuno ukuyimanyisizya kwe sweswe ukucila ukuti uyimanyisye ku wantu wa munsi?”

23 Nga Yesu amwasuka ati: “Wensinye wino wankunda aliwacita vino nkalanda ne Tata alimukunda swinya tuliya kwe weliwe nawe aliwa ponga na sweswe. 24 Wensinye wino atankunda asicita vino nkalanda. Ya-a amazwi yano mukwivwa, asayane lelo aya kwe Tata wino wantuma.

25 Nalanda vyo-o ivintu pano ncili ndi na mwemwe. 26 Lelo e kavwa, umuzimu wa kwe Leza wuno e Tata alimitumila ukupitila mwe nene, wulimisambilizya nu kumizusya vyonsinye vino naminenile. 27 Namisila umutende wuno nkapa, ntamipile ndi wuno awa munsi wakapa. Mutasakamala swinya mutatina. 28 Mwivwile vino minenile ukuti, ‘Nkupita swinya ndinyoka kwe mwemwe.” Nga cakuti mwankunda, mwandi musecelele wo-o vino nkuya kwe Tata, amuno e Tata wawa na maka ukundusya. 29 Naminenela lyankani vyo-o ivintu pano vitani vicitike, pakuti nga vyacitika, mwize musuwile. 30 Nsakuminena ivivule, amuno e kateka we yo-o insi akwiza, lelo atakweti amaka pe nene. 31 Nomba pakuti awantu wa munsi wamanye ukuti nakunda Tata, nkucita vilyanye vino Tata wambuzizye. Katukani, tuyani tufume ko-o.

15 “Ne cimuti ca cisinka ica vikomwa vya kupanjila waini swinya e Tata awino akacisakamala. 2 Akaputula insamba zyonsinye mwe nene zino zisikoma, swinya akapambulila zyonsinye zino zikakoma pa kuti zikome ivikomwa ivivule. 3 Mwemwe mwaswepa kali pa mulandu wakuti mwivwizile vino naminenile. 4 Twalililani ukuwa na nene, nani nditwalilila ukuwa na mwemwe. Ndi wulyanyene vino ulusamba lutanga lukome ivikomwa nga lusi ku cimuti ca vikomwa vyakupanjila waini, namwemwenye mutange mukome ivikomwa nga musi ponga na nene. 5 Ne cimuti ca vikomwa vyakupanjila waini. Wensinye wino watwalilila ukuwa na nene, nani natwalilila ukuwa nawe, awino akakoma ivikomwa ivivule; ukwasowa nene, mutanga mucite icili consinye. 6 Wensinye wino atatwalilizile ukuwa na nene, wawa ngati alusamba luno nga waputula lukakala. Na wantu wakakwiza awazilonganika nu kuzisumbila mu mulilo, awazyoca. 7 Nga mwatwalilila ukuwa na nene swinya mukwivwila na vino nkulanda, consinye cino mwalenga, mulipocelela. 8 E Tata akacindikwa nga mwatwalilila ukukoma ivikomwa nu kulanjizya ukuti mwe wasambi wane. 9 Wulyanye vino Tata wankunda, avino nanenenye namikunda; acino twalililani ukuwa mu lukundo lwane. 10 Nga mwatwalilila ukwivwila amasundo yane, mulitwalilila ukuwa mu lukundo lwane, ndi wulyanye vino nani natwalilila ukuwa mu lukundo lwa kwe Tata pa mulandu wakuti nkakonka amasundo yakwe.

11 “Nalanda vyo-o ivintu pa kuti nasecelela mwe mwemwe, namwe mwasecelela ngati anene. 12 Isundo lino nkumipa alyakuti, mwakundana ngati awonye vino namikunda 13 Kusi umuntu wino wawa nu lukundo ngati alo-o, ulwakuti afwile na wawuye. 14 Nga cakuti mukucita vino nkuminena, muliwa mwe viwuza vyane. 15 Ndesile ukumita ati mwe mwawomvi wane, amuno umuwomvi asimanya vino yisikulu* akucita. Lelo nkumita ukuti mwe viwuza vyane, amuno minenile vyonsinye vino Tata wambuzizye. 16 Asa mwemwe mwansola, lelo anemuno namisola ukuti mutwalilile ukukoma ivikomwa nu kuti ivikomwa vinu vitwalilile ukuwako, pakuti consinye cino mwalenga Tata ukupitila mwi zina lyane, ayize amipe.

17 “Nkuminena vyo-o ivintu pakuti mwakundana. 18 Nga cakuti awantu wa munsi wamipata, mwamanya ukuti watalicizilepo ukupata nene pano watani wamipate. 19 Mwange muwe ngati awantu wa mwe yo-o insi, nga wamikunda. Nomba namisola, mutawa ngati awantu wa mwe yo-o insi. Awuli umulandu wuno awantu wa munsi wamipatila. 20 Mwakwizuka amazwi yano naminenile ukuti: Umuwomvi atange alusye yisikulu. Nga cakuti wancuzizye, walimicuzya na mwemwenye; nga wivwizile amazwi yane, lyo waliyivwa na mazwi yinunye. 21 Lelo walicita vyonsinye vyo-o kwe mwemwe, amuno watamanya wino wantumile. 22 Nanga ntiza nu kulanda nawo, nga wasi nu luwembu, nomba pa-a, watakweti nu mwakuwipicizya pa luwembu lwawo. 23 Wensinye wino wampata, lyo wapata ne Tata nye. 24 Nanga ntawomba imilimo yino wumwi asitela awombepo, nga wasi nu mulandu. Lelo wandola, nomba wampata, wapatila kumwi ne Tata nye. 25 Vyo-o vyacitika pakuti amazwi yano yalembwa mu masundo yawo, yaficiliswe ayakuti: ‘Wampata ukwasowa umulandu.’ 26 Ndimitumila e kavwa wino Tata alimpa, umuzimu wa kwe Leza uwacisinka wuno wulifuma kwe Tata, wuliyiza wuminene ivivule pe nene. 27 Ne namwe mwize mwanena wanji pe nene, amuno mwatwalila ukuwa na nene ukufuma pa kutalika.

16 “Nalanda vyo-o ivintu pakuti mutize muleke ukuwa ni suwilo.* 2 Awantu walimiwinga mwi sinagogi, swinya impindi yikwiza pano wensinye wino wamikoma aliwalola ngati akuwombela Leza. 3 Lelo walicita vyonsinye vyo-o pa mulandu wakuti watamanya e Tata na nene. 4 Naminena vyo-o ivintu pakuti pano impindi yilifika iyakuti vicitike, mwize mwizuke ukuti naminenile.

“Ntamiwuzizye vyo-o ivintu pakutalika amuno nalinji na mwemwe. 5 Nomba nkuya kwe wino wantumile, lelo kusi nanti wumwi pe mwemwe wino akunkolowozya ukuti: ‘Ukuya kwinye?’ 6 Mwawa nu wulanda pa mulandu wakuti naminena vyo-o ivintu. 7 Nkuminena icisinka nkuti, nga napita cilimizipila mwemwenye. Amuno nga ntapisile, e kavwa ataliyiza kwe mwemwe; lelo nga napita ndimutuma. 8 Alila wiza alilenga awantu ukumanya uluwembu, uwulungamane nga nu wupinguzi wa kwe Leza: 9 Icakutalicila alisokolola uluwembu lwa wantu wa munsi, amuno watasuwila mwe nene; 10 apano ayize asokolole uwulungamane, amuno nga naya kwe Tata, mutalindola naswinya; 11 Swinya alilanjizya wano Leza alipingula, amuno wapingula kali e kateka we yo-o insi.

12 “Ncili ndi ni vivule ivyakuminena, lelo mutanga muvivwe pe yo-o impindi. 13 Nomba, nga mwiza mwapocelela umuzimu wa kwe Leza wuno wukasokolola icisinka, wulimyavwa ukumanya icete icisinka. Lelo wo-o umuzimu wa kwe Leza wusiyiwombelavye ivintu, wukasokololavye vino Leza wapingulapo ukuti vimanyikwe. Wulimyavwa ukumanya ivintu vino viliyiza vicitike. 14 Wo-o umuzimu wa kwe Leza wulincindamika, amuno wuliminena vino vilifuma kwe nene. 15 Ivintu vyonsinye vino Tata wawa navyo avyane. Awuli umulandu wuno tenamiwuzizya ukuti, vino wuliminena vilifuma kwe nene. 16 Kwasyalavye katici, lyo mwaleka ukundola swinya kwasyalavye katici, mulindola.”

17 Nga wasambi wakwe wamwi awatalika ukulanzyanya wakuti: “Nga wasula mwinye pakutunena ukuti, ‘Kwasyalavye katici, lyo mwaleka ukundola swinya kwasyalavye katici, mulindola,’ amuno ‘nkuya kwe Tata’?” 18 Walandanga wakuti: “Uzye wasula mwinye pakulanda ukuti, ‘Kwasyalavye katici’? Tutamanyile cino akulandapo.” 19 E Yesu wamanyile ukuti walondanga ukumukolowozya, acino wawanenile ukuti: “Uzye mukukolowozyanya pa kuti mumanye cino tenalandila ukuti: ‘Kwasyalavye katici lyo mwaleka ukundola swinya kwasyalavye katici, mulindola’? 20 Nkuminena icisinkanye nkuti, mulilila nu kuwa nu wulanda, lelo awantu wa munsi walisecelela; mulilosya, lelo ukulosya kwinu kulipiluka insansa. 21 Nga cakuti umwanaci ali mukukwata umwana, akakwivwa uwulumila, amuno lyo impindi yakwe iyakuti apape yafika. Nomba nga cakuti umwana wakwatwa, akakwiwilila na kuwulumilanye, amuno akasecelela sana pa mwana wino wakwatwa munsi. 22 Acino namwemwenye muli nu wulanda; lelo mulila mwandola naswinya, mulisecelela, swinya kusi wino alimipoka zyo-o insansa. 23 Pe wowo uwanda, mutalinkolowozyapo iwuzyo ilili lyonsinye. Nkuminena icisinkanye nkuti, nga mwalenga Tata icili consinye ukupitila mwi zina lyane, alimipa. 24 Ukufika pa-a, musitela mulengepo icili consinye ukupitila mwi zina lyane. Acino lengani, mulipocelela swinya muliwa ni nsansa nkaninye.

25 “Nalanda vyo-o ivintu kwe mwemwe ukuwomvya ivilanjililo. Lelo impindi yikwiza pano ndilandavye ukwasowa ukuwomvya ivilanjililo pe vino Tata wawa na vino akacita. 26 Pe wowo uwanda, mulilenga kwe Tata ukupitila mwi zina lyane; Lelo ntakupiliwula ukuti ndimilenjelako kwe Tata. 27 Amuno e Tata wamikunda pa mulandu wakuti mwankunda swinya mwasuwila ukuti natumwa ne Leza. 28 E Tata wantumile ukwiza munsi. Nomba pa-a nkufuma munsi, nu kunyocela kwe Tata.”

29 Nga wasambi wakwe awalanda ukuti: “Tatakulu, pa-a nomba twivwicisya vino ukulanda, amuno utakuwomvya ivilanjililo. 30 Pa-a nomba, twamanya ukuti wamanya vyonsinye, usilondekwa nu kulindilila ukuti wumwi akukolowozye amuno ukalanga umanyile kali vino akwelenganya.” 31 E Yesu ayasuka ukuti: “Pa-a mwasuwila, 32 lelo impindi yikwiza swinya ayonye yo-o, pano cila muntu alisamalila ku ng’anda yakwe nu kunsya nenga. Nomba ntawa nenga, nawa ne Tata. 33 Nalanda vyo-o ivintu pakuti mwize muwe nu mutende pa mulandu na nene. Amuno muliwa mwacula mo-o munsi, lelo sipani! Amuno ncimvizye insi.”

17 Walile Yesu walanda vyo-o, walolecesizye mwi yulu, nga landa ati: “Tata, cindamika umwana wako, pakuti awantu wakulumbanye, 2 mucindamike, ndi wulyanyene vino wamupa amaka pa vya wumi vyonsinye,* pakuti ape uwumi wamuyayaya kwe wonsinye wano wewe wamupa. 3 Wonsinye wano wakulonda ukwizawa nu wumi wamuyayaya wazipizile ukukumanya, we Leza wacisinka swinya wazipizile nu kumanya wino watumile, e Yesu Klistu. 4 Nakucindamika mo-o munsi, amuno namala ukuwomba umulimo wuno wampile. 5 Acino Tata, ncindamika nu kumpa icifulo cino nalinji naco pano nalinji nawewe, lyo awantu watani waweko.

6 “Namanyisya izina lyako ku wantu wano wampa ukufuma munsi. Walinji awantu wako, nawe wawapile kwe nene, swinya wakakwivwila izwi lyako. 7 Pe yo-o impindi wamanyile ukuti ivintu vyonsinye vino wampile, avyako; 8 amuno nawanena amazwi yano wambuzizye, nawo wayasuwila, swinya wamanya ukuti nafuma kwe wewe, nu kuti awe muno wantumile. 9 Nkawapepelako; nsipepela awantu wa munsi, lelo nkapepela wano wampa, amuno awako. 10 Ivintu vyane vyonsinye, avyako, ni vyako, avyane swinya nacindamicilwa mwe woliwo.

11 “Nkufuma mo-o munsi nkwiza kwe wewe, lelo weni wakusyala monye munsi. Tata we muno wacindamisya, uwawacinjilila pa mulandu ni zina lyako lino nawamanyisya, pakuti wawe awalemenkane, vino wewe na nene twalemenkana. 12 Pano nalinji nawo nawacinjililanga, pa mulandu ni zina lyako lino wanenile ukuti mbamanyisye; nawacinjilila, pasi nanti wenganye wino wasowa, sukavye umuntu wenga, awino wandi ayononeke, pakuti amawaliko yaficiliswe. 13 Nomba pa-a, nkwiza kwe wewe, swinya nkulanda vyo-o ivintu pano ncili ndi munsi pakuti wasecelele nkaninye ngati anene. 14 Mbanenile amazwi yako, nomba awantu wa munsi wawapasile pa mulandu wakuti asa wa munsi, ndi vino na nenenye nsi ne wa munsi.

15 “Ntakulenga ukuti uwafumye mwe yo-o insi, lelo nkuti wacinjililange pa mulandu ne Satana.* 16 Asa wa munsi, ndi vino na nenenye nsi ne wa munsi. 17 Wacindamike* mu cisinka; amuno izwi lyako alya cisinka. 18 Wulyanye vino wantumile ukwiza munsi, avino na nenenye mbatumile ku wantu wa munsi. 19 Nkuyicindamicila mwe woliwo, pakuti nawo wacindamicilwe ku cisinka.

20 “Nsakupepelavye wa-a wonga, lelo kupepelako na wonsinye wano walinsuwila nga wivwa kwi zwi lyawo, 21 pakuti wize walemenkane vino wewe na nene Tata twalemenkana, na pakuti nawonye wize walemenkane na sweswe, alyakuti awantu wa munsi wazumile ukuti awe muno wantumile. 22 Nawacindamika ndi vino wewe wancindamika, pakuti walemenkane vino sweswe twalemenkana. 23 Nene na woliwo twalemenkana swinya wewe na nene twalemenkana, alyakuti walemenkane icete, pakuti awa munsi wamanye ukuti awemuno wantumile, wamanye nu kuti wawakunda ndi wulyanye vino wewe wankunda. 24 Tata nkulonda wano wampa wize wawe ponga nanene kuno ndiwa, pakuti wize walola vino uncindamisile, amuno wewe wankunzile pano awantu watani waweko munsi. 25 Tata we mulungamane, acisinkanye awantu wa munsi watakumanya, lelo nene nakumanya, nawanye wano wampa, wamanya ukuti awe muno wantumile. 26 Nawamanyisya izina lyako swinya nditwalilila ukulimanyisya, pakuti walanjizya ulukundo kwe wanji ndi vino na wewe ukalanjizya ulukundo kwe nene, pakuti ndemenkane nawo.”

18 Walile Yesu walanda vyonsinye vyo-o, wayile na wasambi wakwe ku calo ukulamba ulunyika lwa Kidroni. 2 E Yuda wino walinji nu kumukazya, na wenye wamanyile yo-o incende amuno akuno Yesu wavulizile ukuya mukusunkana na wasambi wakwe. 3 Nomba e Yuda wayile ni wumba lya wasoja na wamalonda wapi tempile wano intunguluzi zya simapepo na wa Falisi watumile. Wasenzile ama toci, ama lampi ni vyanzo. 4 E Yesu wamanyile vyonsinye vino vyalinji nu kumuciticila, acino wawakolowozizye ukuti: “Mukuvwamba weni?” 5 Nawo awamwasuka ukuti: “E Yesu umwina Nazareti.” Acino wawanenile ukuti: “Anenenye.” E Yuda wino wamukazizye nawenye walinji ponga nawo.

6 Lelo walile e Yesu wawanena ukuti, “Anenenye,” wanyocezile icifunda nsizi awapona pansi. 7 Naswinyanye e Yesu awakolowozya ukuti “Nga mukuvwamba weni fwandi?” Nawo awamwasuka ukuti: “E Yesu umwina Nazareti.” 8 Ne Yesu awasuka ukuti: “Minenile kali ukuti anenenye. Acino nga mukumvwamba, lekani wa-a wapite.” 9 Wacisile wo-o pakuti aficilisye vino walanzile ukuti: “Ntasovya nanti wenga pe wano wewe wampa.”

10 Nga Simoni Petro, asenda panga nu kuputula ikutwi lya muwomvi wa kwe simapepo mukulu ilya kwe ndilo. We-e umuwomvi walinji we Makasi. 11 Lelo e Yesu wanenile Petro ukuti: “Wika e panga muno azipizile ukuwa. Uzye ntazipizile ukumwela mwe kapu yino e Tata wampa?”

12 Apano awasoja, e songo wa wasoja na wamalonda awalema Yesu nu kumunyepa amakasa. 13 Wamutwazile kwe Anasi, amuno walinji we yisivyala wa kwe Kayafa wino walinji we simapepo mukulu mwe wowo umwaka. 14 E Kayafa nye awino wanenile awa Yuda ukuti, cazipapo umuntu wenga ukufwila awantu wonsinye.

15 Nomba e Simoni Petro nu musambi winji, wakonkanga Yesu. We-e umusambi wamanyisilwe kwe simapepo mukulu swinya wayile ne Yesu mu luwanza lwa ng’anda ya kwe simapepo mukulu, 16 lelo e Petro wasyazile ayimilile pa mulyango. Acino umusambi winji wino wamanyine ne simapepo mukulu, wayile alanda nu muwomvi wa pa mulyango, nawe ayinjizya Petro mukasi. 17 Umukazyana wino wawombelanga pa mulyango wanenile Petro ukuti: “Uzye nawewenye usi we musambi wakwe?” Nawe watili: “Awe.” 18 Nomba palyanye palinji na wawomvi na wamalonda wano wimilile wakota umulilo wamalasha wuno wakozizye pa mulandu wakuti kwalinji impepo. Ne Petro nye wimilile palyanye akota umulilo.

19 Acino intunguluzi zya simapepo zyakolowozizye Yesu pa wasambi wakwe na pe vino wasambilizyanga. 20 Ne Yesu awasuka ukuti: “Lyonsinye nasambilizyanga pa wantu awavule, mu masinagogi na mwi tempile muno awa Yuda wonsinye wakaya mu kulongana, swinya kusi vino nalandilanga mu nkama. 21 Acani cino mukunkolowozezya? Kolowozyani wano wivwile vino nawasambilizyanga, amuno wamanya vino nasambilizyanga, swinya wamanya na vino nalandanga.” 22 Walile Yesu walanda vyo-o, wenga pa malonda wino wimilile mupipi nawe, amuma ulupi nu kumunena ati: “Avyo ungakwasuka e simapepo wowo?” 23 Nge Yesu amwasuka ukuti: “Mbuzya,* nga ciwipe ci cino nalanda; nga cakuti vino nalanda avya cisinka, acani cino wanjumila?” 24 Nge Anasi awanena ukuti wamunyepe, wamutwale kwe Kayafa e simapepo mukulu.

25 E Simoni Petro wimilile palyanye akota umulilo. Acino wamunenile ukuti: “Uzye nawewenye usi we musambi wakwe?” Nawe akana alanda ati: “Awe asa nene.” 26 Umuwomvi wa kwe simapepo mukulu wumwi wino walinji we lupwa lwa muntu wino Petro waputuzile ikutwi, wanenile e Petro ukuti: “Uzye ntatenkuweni ponga nawe mu calo wewe?” 27 Lelo e Petro wakanile na swinyanye, paponye ne mukolwe alila.

28 Pano kwacile umutondotondo, wafumizye e Yesu ku ng’anda ya kwe Kayafa nu kumutwala ku ng’anda ya kwe Pilato e kateka wa mu Yudeya. Lelo weni watinjizile mu ng’anda ya kwe we-e kateka pa kuti watakakombele lelo walye Icakupitililwa. 29 E Pilato wafumile panzi awanena ukuti: “Aviwipe ci vino we-e umuntu acisile?” 30 Nawo wamwasusile ukuti: “We-e umuntu wange awe awakayele, nga tutamulesile kwe wewe.” 31 Nawe e Pilato awanena ati: “Musendani mwe weneco mukamupingule ukulingana na masundo yinu.” Ngi ntunguluzi zya wa Yuda azimunena ukuti: “Sweswe isundo litatuzumilizya ukukoma uwili wensinye.” 32 Vyo-o vyacitisile pa kuti vificilisye vino Yesu walanzile pe vino walinji nu kufwa.

33 E Pilato winjizile mu ng’anda ya kwe kateka, nga yita Yesu nu kumunena ati: “Uzye we Mfumu ya wa Yuda?” 34 Nge Yesu amwasuka ukuti: “Uzye ukukolowozya pa mulandu wakuti ukulonda ukumanya nanti palivye wino akunenile pe nene?” 35 Apano e Pilato amwasuka ati: “Nene nsi ne mu Yuda. Awantu wa muluko lwakonye ni ntunguluzi zya simapepo awano wakulesile kwe nene. Nga uluvinye cani?” 36 Nge Yesu amwasuka ukuti: “Uwufumu wane asa wa munsi. Amuno wange wuwe awa munsi awawomvi wane nga watalesile awa Yuda wandema. Lelo ndi vino ndanzilenye, Uwufumu wane asa wa mo-o munsi.” 37 Acino e Pilato wamukolowozizye ukuti: “Uzye we mfumu?” Nge Yesu amwasuka ukuti: “Wayilandila wemweneco ukuti ne mfumu. Conye acino nakwatilwa swinya acino nizila munsi ukuti nsokolole icisinka. Wensinye wino akakwikala ukulingana ni cisinka, akakwivwa kwi zwi lyane.” 38 Apano e Pilato amukolowozya ukuti: “Nga icisinkanye acani?”

Walile walanda wo-o, wafumile na swinya, anena awa Yuda ukuti: “Ntazanilepo umulandu mwe we-e umuntu. 39 Nomba ukulingana nu lutambi lwinu, nzipizile ukumisapulila umufungwa wenga pa Cakupitililwa. Uzye mukulonda misapulile Imfumu ya wa Yuda?” 40 Nawo awasuka ukuti: “Tusakumulonda, tusapulile Baraba”! Nomba e Baraba walinji acipondo.

19 Acino e Pilato wanenile awasoja ukuti wasende Yesu nu kumuma ivikoti. 2 Awasoja wapanzile ni cisote ca myunga, awamuzwika ku mutwe, nga awamuzwika ni cizwalo iciwenzulucile. 3 Swinya wayanga kwe weliwe mukumutumfya, wakuti “Uli wuli we Mfumu ya wa Yuda!” Wamumanga na mapi pa minso. 4 E Pilato wafumile panzi anena awantu ukuti: “We-e namiletela pakuti mumanye ukuti ntamuzanile nu mulandu.” 5 Nga Yesu afumila panzi, lyo wamuzwisile ni cisote ca myunga ni cizwalo iciwenzulucile. Acino Pilato wawanenile ati: “Lolani umuntu we-e!” 6 Lelo pano intunguluzi zya simapepo na wamalonda wamuweni, wapunzile wakuti: “Mupamantilani pa cimuti! Mupamantilani pa cimuti!” Nge Pilato awanena ati: “Musendani mukamupamantile mwe weneco, amuno nene ntamuzanile nu mulandu.” 7 Apano awa Yuda wamwasusile ukuti: “Ukulingana ni sundo litu azipizilevye ukufwa, amuno akati amwana wa kwe Leza.”

8 Pano Pilato wivwile vino awa Yuda walanzile, intete zyamulemile nkaninye, 9 naswinya winjizile mu ng’anda ya kwe kateka nga nena Yesu ati: “We wakwinye?” Lelo e Yesu atamwasusile cimwi. 10 Acino e Pilato wamunenile ati: “Ukukana nu kunjasuka? Uzye utamanyile ukuti ndi na maka yakukwavwa nanti ukukupamantila pa cimuti?” 11 Lelo e Yesu wamwasusile ati: “Utakwetipo amaka yakucita icili consinye pe nene, sukavye nga wakupa ukufuma kwi yulu. Awuli umulandu wuno umuntu wino andesile kwe wewe ali nu luwembu ulukulu nkaninye.”

12 Co-o calenzile e Pilato atwalilile ukuvwambilizya inzila ya kumulecela ukuti apite, lelo awa Yuda wapunzile awati: “Nga wamulecela wapita, lyo usi we ciwuza wa kwe Kateka.* Amuno wensinye wino akayipanga ukuti amfumu lyo akulwisya Kateka.” 13 Walile Pilato wivwa ya-a amazwi, watwite Yesu palonde, swinya wisile pa cilimba ca kupingulilapo cino cawezile pa cifulo cino wakambatisile amawe pansi, co-o icifulo mu ciHeberi wakacita ukuti Gabata. 14 Nomba walinji awanda Wakupekanya Icakupitililwa;* swinya impindi yalinji ku ma 12 awazi* ya musanya. Acino Pilato wanenile awa Yuda ukuti: “Lolani! Yo-o ayili imfumu yinu!” 15 Lelo awa Yuda wapunzile awati: “Mufumyani pa-a! Mufumyani pa-a! Mupamantilani pa cimuti!” Lelo e Pilato wawanenile ati: “Uzye mpamantile imfumu yinu pa cimuti?” Nga intunguluzi zya simapepo azyasuka ukuti: “Tutawa ni mfumu yinji ukulusya pe Kateka wa ku Roma.”* 16 Acino wawanenile ukuti wamusende wakamupamantile pa cimuti.

Nawo wamusenzile. 17 Yesu wayisendezile ni cimuti ca kumupamantililapo,* wayile naco ku cifulo cino wakakwita ukuti Ipanga, mu ciHeberi wakati Golgota. 18 Kulyanye wamupamantizile pa cimuti ponga na wonsi wawili, wenga kwe kamani ne winji kwe ndilo, e Yesu walinji pakasi. 19 E Pilato walemvile pa cipampa ukuti: “Yesu umwina Nazareti, Imfumu ya wa Yuda, swinya waciwisile na pa cimuti* papela. 20 Awa Yuda awavule wawazizye ya-a amazwi, amuno pa cifulo pano wapamantizilepo Yesu palinji apafupi nu musumba, swinya walemvile mu ciHeberi, mu Cilatini na mu Cigriki. 21 Lelo intunguluzi zya simapepo izya wa Yuda zyayile azinena e Pilato ukuti: “Acani cino walembela ukuti, ‘Imfumu ya wa Yuda?’ Vifutulule, ulembe uti, ‘Watinji ne Mfumu ya wa Yuda.’” 22 Lelo e Pilato wawanenile ati: “Cisizile ndemvile kali.”

23 Nomba pano awasoja wapamantizile Yesu pa cimuti, wasenzile ivizwalo vyakwe ivyakulonde awankanya mu viputulwa 4, cila musoja wasenzile conga, swinya wasenzile ni cizwalo cakwe icamukasi. Lelo icizwalo camukasi ceni citakweti umusumo* uwuli wonsinye, ukufuma papela ukufika pansi. 24 Apano watalisile ukulanzyanya wakuti: “Tutacilepula lekani tupenduzye vye tulole wino angasenda.” Co-o cacitisile pa kuti cificilisye iwaliko lino likati: “Wankine ivizwalo vyane swinya wapenduzizye pa vizwalo vyane.” Awasoja awano wacisile vyonsinye vyo-o.

25 Mupipi ni cimuti cino wapamantizilepo* e Yesu pimilile e mama wakwe nu munyina, e Mariya e muka Klopasi ne Mariya umwina Magadala. 26 Acino, walile e Yesu walola mama wakwe nu musambi wakwe wino wakunzile nkaninye wimilile mupipi, wanenile e mama wakwe ati: “Umwana wako weyo!” 27 Swinya wanenile umusambi wakwe ati: “Lola e mama wako weyo!” Ukufumilila pe yilyanye impindi we-e umusambi wasenzile mama wa kwe Yesu ku ng’anda ku mwakwe.

28 Pa nsizi ye vyo-o, pano Yesu wamanyile ukuti wacita vyonsinye vino Leza wamunenile ukucita, watili: “Nivwa ulusala.” Walanzile vyo-o pakuti aficilisye vino iwaliko lyalanzile. 29 Paponye palinji ne ja muno mwalinji e waini iyikantuke. Acino wano walinji mupipi wasenzile pamba awatimpika* mwe waini nga wawika ku kamuti awaya wamuwika ku mulomo. 30 Walile wamyanta waini iyikantuke, walanzile ukuti: “Nacita vyonsinye vino wambuzizye ukuti ncite!” Nga akontamika umutwe pansi, avino wafwile.

31 Pa mulandu wakuti walinji awanda Wakupekanya, awa Yuda watalondanga ivitumbi vino wapamantizile pa vimuti ukusyala palyanye pa wanda wi sabata, (amuno uwanda wi sabata walinji awucindame nkaninye). Awuli umulandu wuno wayile awalenga kwe Pilato ukuti wavune amanama ya wantu wano wapamantizilwe pa vimuti pakuti wisye ivitumbi. 32 Acino awasoja wayile awavuna amanama ya wonsi wawili wano wapamantizilwe ponga ne Yesu. 33 Nomba pano wayile pe Yesu wazanile afwile kali, acino watamukontozile amanama. 34 Lelo umusoja wumwi wasenzile isumo amulasa mu mbazu, swinya paponye uwazi na minzi vyafumile. 35 Umuntu wino waweniko awino wasimika vyo-o ivintu, swinya vino wasimika avyacisinka, pakuti mumusuwile. 36 Vyo-o vyacitisile pakuti iwaliko lificiliswe lino likati: “Pasi ifupa lyakwe lino lilikontoka.” 37 Naswinya iwaliko linji likati: “Walilolecesya ku muntu wino walasile ni sumo.”

38 Vyalile vyo-o ivintu vyacitika, e Jozefu uwa ku Arimatiya, wayile alenga kwe Pilato nga cakuti angasenda umuwili wa kwe Yesu. E Jozefu walinji amusambi wa kwe Yesu, nomba atayisokolozile pa mulandu wakuti watinanga awa Yuda. Acino e Pilato wamuzumilizizye, nawe wayile asenda umuwili wa kwe Yesu. 39 Ne Nikodemasi wino wayile kwe Yesu uwusiku pa muku wakutalicilapo, nawenye wizile swinya walesile e muri iyisanzinkanye ne aloyi yino yamwamile ama kilogilamu 30. 40 Acino wasenzile umuwili wa kwe Yesu awawupomba mu mwenda swinya wawisilemo ni vinuncile, ukulingana nu lutambi luno awa Yuda wakonkanga pa kuzika. 41 Swinya mupipi ni cifulo pano wamupamantizile palinji icalo muno mwalinji inkungwe iyipya yino watatezile wazikemo umuntu. 42 Nomba pa mulandu wakuti walinji awanda Wakupekanya ukuzevya kwa wa Yuda swinya ni manda yalinjivye apafupi, wasile awazika Yesu kulyanye.

20 Pa sabata,* e Mariya umwina Magadala wapulusile lyo kucili kufisile aya ku manda, nomba wazanile ukuti pa nkungwe pasi iwe walikunkulusizyepo. 2 Acino wayile kwe Simoni Petro na ku musambi winji wino Yesu wakunzile lyo akusamala, nga afika awanena ati: “Wafumizye e Tatakulu mu nkungwe, tutamanyile kuno wamutwazile.”

3 Acino e Petro nu musambi winji wayile ku manda. 4 Wonsinye wawili wayile wakusamala, lelo umusambi winji weni watalicizilepo ukufika ku manda amuno wasamazile nkaninye asya Petro. 5 Walile wafika pa nkungwe, wasungamizile mukasi, azana mulivye imyenda yino wamupomvilemo, lelo atinjizilemo. 6 E Simoni Petro nawenye wafisile, acino winjizile mu nkungwe. Lelo wazanilemovye imyenda mitupunye. 7 Umwenda wuno wapomvile Yesu ku mutwe weni wutalinji ponga ni myenda yinji, walinjivye wonga lyo wupomvilwe. 8 Apano umusambi winji wino watalicizilepo ukufika nawenye winjizile mu nkungwe, swinya wazanile ukuti vino wawanenile vyalinji avyacisinka. 9 Lelo lyo watani wivwicisye iwaliko lino lyalanzile ukuti azipizile ukuzyulupuka ku wafwe. 10 Acino wanyocezilemo ku mang’anda.

11 Lelo e Mariya weni wasyazile pa nkungenye akulila, acino pano walilanga, wizile akontama alolecesya mu nkungwe, 12 swinya wizile alola awangeli wawili wano wazwite ivitiswe wisile, wenga kuno kwawezile umutwe wa kwe Yesu ne winji kuno kwawezile matamba yakwe. 13 Acino wamukolowozizye ukuti: “Nga ukulila cani?” Nawe awanena ati: “Wasenzile e Tatakulu, nomba ntamanyile kuno wamuzisile.” 14 Walile walanda vyo-o, wapiliwusile nga alola Yesu ayimilile, lelo atamanyile ukuti we Yesu. 15 Acino e Yesu wamukolowozizye ukuti: “Ngu kulila cani? Ukuvwamba weni?” Weni welenginye ukuti we simafamu, acino wamunenile ukuti: “Tatakulu nga cakuti awemuno umusenzile, mbuzya kuno uyile wamuzika pa kuti nkamusende.” 16 E Yesu wamupunzile ati: “Mariya!” nawe wapiliwusile, nga landa mu ciHeberi ati: “Rab·boʹni!” (cino cikapiliwula ukuti “Musambilizya!”) 17 E Yesu wamunenile ati: “Leka ukulila, amuno ntani inje kwe Tata. Lelo yanga ku wanyina wane uwanene ukuti, ‘Nkuya kwe Tata, umukwasi winu, e Leza wane swinya e Leza winu.’” 18 Acino e Mariya umwina Magadala wayile anena awasambi lyo-o ilyasi, ati: “Tenalola Tatakulu.” Wawawuzizye na vyonsinye vino e Yesu wamunenile.

19 Uwanda wulyanyene amanguzi pa sabata,* awasambi wa kwe Yesu wawungine ponga, nomba wamanzile ivisakati muno walinji, amuno watinanga awa Yuda. Apano e Yesu wizile ayimilila pano walinji awanena ati: “Umutende wuwe namwe.” 20 Walile walanda wo-o, wawalanjizizye amakasa na ku luwazu kuno kwalinji iwamba. Nga wasambi awasecelela nkaninye pakulola Tatakulu. 21 E Yesu wawanenile naswinya ukuti: “Umutende wuwe namwe. Ndi wulyanye vino Tata wantumile, avino nanenenye nkumituma.” 22 Walile walanda wo-o, wizile awaputa, nga wanena ukuti: “Pocelelani umuzimu wa kwe Leza. 23 Uwili wensinye wino mwatetela imembu zyakwe, alitetelwa; lelo wino mutatetezile lyo imembu zyakwe zitatetezilwe.”

24 Nomba e Tomasi wino walinji pa wasambi 12 wino witwanga ukuti Mpundu, atalinjipo pano Yesu wizile. 25 Acino awasambi wawuye wamunenile ukuti: “Tetwalola Tatakulu.” Lelo wakanile, alanda ukuti: “Ntakutela nsuwile, sukavye nga nalola amakasa muno wamupamantizile* imisomali na muluwazu, ndememo nu kulema.”

26 Pa nsizi ya manda 8, awasambi wawungine naswinyanye mung’anda, ne Tomasi nye amuno walinji. E Yesu winjizile nu kwimilila nanti acakuti ivisakati vyalinji avimangwe, alanda ati: “Umutende wuwe namwe.” 27 Swinya wanenile Tomasi ati: “Ndema mu makasa na mu luwazu, pakuti uleke ukuvwilika lelo usuwile.” 28 Nga Tomasi ayasuka ati: “Tatakulu, Leza wane!” 29 Nga Yesu amunena ati: “Uzye wasuwila pa mulandu wakuti wandola? Awansansa wano wakasuwila na pano watani walole.”

30 Pakuti amwavwe ukusinincizya, wacisile ivizungusyo na vinji ivivule lyo na wasambi wanji wakulolako, lelo vyeni vitalembwa mwe co-o icimvungwa. 31 Lelo vyo-o vyeni vyalembwa pakuti musuwile ukuti e Yesu we Klistu, Umwana wa kwe Leza, na pakuti musuwile ukuti mungawa nu wumi wa muyayaya ukupitila mwi zina lyakwe.

21 Pa nsizi ye vyo-o, e Yesu naswinya walolecezile ku wasambi wakwe pe sumbi we Tiberia, wo-o avino calinji. 2 E Simoni Petro, e Tomasi (wino witwanga ukuti Mpundu), e Natanayeli uwa ku Kana ya mu Galili, wa mwana Zebedi wawili na wasambi wawili, walinji ponga. 3 E Simoni Petro wawawuzizye ukuti: “Nene napita mukulema inswi.” Nawo awamunena ati: “Tukupita swensi.” Acino wayile wonsinye, awakwela uwato, lelo pe wowo uwanda uwusiku watatezile walemepo inswi.

4 Pano kwayanga kukuca, e Yesu wimilile ku cituntu, lelo awasambi wakwe watamumanyile. 5 Acino e Yesu wawakolowozizye ati: “Wana wane, uzye muli ni vyakulya?”* Nawo awamwasuka ukuti: “Awe tutakweti” 6 E Yesu wawanenile ukuti: “Teyani amakonde yinu kwe ndilo ya wato, mwandi muleme inswi.” Nawo wateyile, swinya walemile inswi mvule icakuti waposilwe nu kuzuta ikonde. 7 Nomba umusambi wino Yesu wakunzile, wanenile Petro ukuti: “We Tatakulu!” Walile e Petro wivwa ukuti we Tatakulu, wazwite icizwalo cakwe ica kunzi amuno wasyazilevye ni cizwalo ca mukasi, nga yinjila pe sumbi. 8 Lelo awasambi wanji, wasyazile awamukonka mu kawato akatici, lyo wakuzuta ni konde lino lizwile inswi, amuno kwasyazilevye ama mita 100* ukuti wafike ku cituntu.

9 Walile wafika ku cituntu, waweni umulilo wa malasha wukwaka lyo pali inswi nu mukate vikupya. 10 E Yesu wawanenile ukuti: “Letaniko inswi zimwi pe zino mwalema.” 11 Acino e Simoni Petro wayile mu wato, akwemela ikonde ku cituntu lino lyalinji ni nswi nkulu 153. Lelo litalepusile nanti acakuti inswi zyavuzile 12 Nga Yesu awanena ati: “Zanji ko-o mulye ivyakulya vya mutondotondo.” Lelo pasi nanti wumwi pa wasambi wino watezile amukolowozya ukuti: “Uzye weweni?” amuno wamanyile ukuti we Tatakulu. 13 E Yesu wasenzile umukate awapa, swinya wonye avino wacisile na ku nswi. 14 Wo-o amuku waciti tatu wuno e Yesu walolecezile ku wasambi wakwe ukufumilila pano wazyulupucizile ku wafwe.

15 Walile wamala ukulya, e Yesu wawuzizye e Simoni Petro ukuti: “Simoni mwana Yohani, uzye wankunda ukulusya inswi?” Nawe ayasuka ukuti: “Eta Tatakulu, nawewenye wamanya ukuti nakukunda.” Nga Yesu amunena ati: “Lisya utwana twane utwa ng’onzi.” 16 Naswinyanye wamukolowozizye ati: “Simoni mwana Yohani, uzye wankunda?” Nawe ati: “Eta Tatakulu, nawewenye wamanya ukuti nakukunda.” Nga amunena ati: “Cema utwana twane utwa ng’onzi.” 17 Wanyosile amukolowozya umuku waciti tatu ati: “Simoni mwana Yohani, uzye wankunda?” E Petro wivwile uwulanda nkaninye pa mulandu wakuti wamukolowozizye umuku wa citi tatu ukuti: “Uzye wankunda?” Acino wamunenile ukuti: “Tatakulu wamanya ivintu vyonsinye; wamanya nu kuti nakukunda?” Nga Yesu amunena ati: “Lisya utwana twane utwa ng’onzi. 18 Nkukunena icisinkanye nkuti: Pano walinji we mutici, wayizwalilanga nu kuya ukuli konsinye kuno ukulonda. Lelo nga wakula, umuntu winji aliwakulemelezyavye ikasa swinya aliwakutwala na kuno utakulonda ukuya.” 19 Yesu walanzile wo-o pakulanjilila imfwa yino Petro walinji nu kufwa pa kucindika Leza. Walile walanda vyo-o wamunenile ati: “Twalilila ukunkonka.”

20 E Petro wapiliwusile nukulola umusambi wino e Yesu wakunzile akumukonka, swinya awili wenye wino weyamizile Yesu pa cifuwa pa wanda wa cakulya ca manguzi nu kumunena ukuti: “Tatakulu weweni wino akukukazya?” 21 Acino pano e Petro wamuweni, wakolowozizye Yesu ukuti: “Tatakulu, nga we-e weni, avyani vino vilimuciticila?” 22 Nga Yesu amunena ati: “Acani cino ukulonda ukumanyila? Ngandi nemweneco nkulonda ukuti ayize atwalilile ukuwako mpaka njize njize? Wewe twalililavye ukunkonka.” 23 Acino awasambi wonsinye wizile wivwa ukuti atalifwa. Lelo e Yesu, atalanzilepo ukuti we-e umusambi atalifwa, wanenilevye Petro ukuti: “Acani cino ukulonda ukumanyila? Ngandi nemweneco nkulonda ukuti ayize atwalilile ukuwako mpaka njize njize.”

24 We-e awili umusambi wino waweniko pano vyonsinye vyo-o vyacitikanga swinya awino walemvile na vyonye vyo-o ivintu, twamanya nu kuti vino walemvile avyacisinka.

25 Kwawa na vinjinye vino e Yesu wacisile, vino nga vyalemvilwe vyonsinye, patange pawe apakuwika ivimvungwa munsi.