Vino Yehova Watetelanga Awantu Kaali Pano Kutani Kuwe Inzuwi

E Yehova akatutetela pa mulandu nu wazi wa nzuwi yino Yesu wapile. (Efes. 1:7) E Baibolo yikalanda ukuti: “Leza amutecele wapupuzyanga nanti ukutetela ku luwembu luno lwacisilwe kali,” pano Yesu, atani ape uwumi wakwe ngati anzuwi. (Roma. 3:25) Uzye e Yehova watetelanga wuli awantu kwe vino wawembukanga pano kutani kuwe inzuwi swinya pa mpindi iyili yonganye watwalilila nu kukonka vino watantisile ukuti avino vililingana na cino Adamu wasovizye?

Ukufumililavye pano Yehova walandizile ukuti kwalinji nu kuwa “ikwata” lino lyalinji nu kupususya wano walitwalilila ukuwa ni cisinka nu kumusuwila, kwe weliwe calinji ngati lyolyo ikwata litalisile nu kuwomba. (Inta. 3:15; 22:18) E Yehova wasuwizile ukuti pa mpindi iyiyane, e Yesu walinji nu kuyikundila ukuya mukupa uwumi wakwe ukuwa anzuwi. (Gal. 4:4; Hebe. 10:​7-10) Swinya e Yehova wapileko ne Yesu amaka yakutetela awantu pano walinji mu nsi nanti aca kuti peyoyo impindi lyo atani ape inzuwi. Cinji aca kuti ne Yesu nye watetelangavye wano walinji ni suwilo, amuno wamanyile ukuti inzuwi yalinji nu kufuta pe vyonsinye vino wawembukanga.—Mat. 9:​2-6.