Uzye Avyani Vino Vingatwavwa Ukupekanizizya Icete Ukulongana?

Nga cakuti mukasambilila Baibolo ni Nte zya kwe Yehova mufwile mukapekanizizya lyankani pano mutani musambilile. Na pano mutani muye mukulongana nye naponye cacindama sana ukupekanizizya lyankani. Nga tukuyipekanizizya lyankani tuliwayitopwa sana ukulongana

Solani impindi ya kupekanya ni cifulo icizima. Ampindi ci yino mukulola ukuti mungapekanya ukulongana ukwasowa ivya kumipumvyanya? Uzye amutondo tondo pano mutani muye ku ncito nanti awusiku pano awana wonsinye waya mukulala? Nanti acakuti mutanga musumbe impindi iyikulu ukuwazya, mwatantika impindi ya kupekanya swinya mutaleka icili consinye camipumvyanya. Muwaya mukupekanizizya kuno kusi ivya kupumvyanya nu kuzimya vyonsinye vino mukulola ukuti vingamupumvyanya ndi vino TV, icilimba nu foni. Ndi mwatalicilapo ukupepa pano mutani mutalike ukusambilila, cilimyavwa ukuwika vye amano pa kuyisambilizya Izwi lya kwe Leza asa pa masakamika yano mukupitamo.—Wafilipi 4:6, 7

Zanani ivyasuko nu kuyipekanizizya ukwasukapo. Mwatalicila ukumanya cino wakulandapo. Mwakwelenganya pa mutwe nanti icipande nanti isambililo lino likulandwapo, mwalola vino utumitwe tulemenkine na cino wakulandapo. Lolani ni vikope vino vilimo nu kwelenganya pa mawuzyo ya kupitulukamo yano yakulanda pa visinka vikulu. Nga mwacita wo-o, apano nomba mungawazya paragrafu yonga na yonga nu kuzana ivyasuko ku mawuzyo yano wawuzizye. Wazyani na mawaliko yano wawisilemo nu kwelenganya pe vino ya kutunjilila icisinka cino mukusambilila. (Imilimo 17:11) Ndi mwazana icasuko mwakwalapo pa kuti mutize mwiwilile icasuko pano mukulongana. Pano mukulongana, mungatumpula ikasa nga mukulonda ukwasukapo nu kulandapo mu mazwi yinu.

Nga cakuti mukupekanizizya lyonsinye pano mutani muye mukulongana mulimanya ivivule pe Baibolo nu kuvisunjila “mu nkoma” yinu.—Mateyu 13:51, 52.

• Uzye avyani vino vilimyavwa ukupekanizizya lyankani pano mutani muye mukulongana?

• Uzye acani cino mungacita pa kupekanizizya lyankani ivya kwasuka pa kulongana?