Mwe Wakwasi—Mwakwavwa Awana Winu Ukukunda Yehova

1-2. Londololani umulandu wuno amawaliko yamwi yakakwizila mukucindama kwe sweswe nga cakuti ivintu vyapiluka mu wumi.

YELENGANYANI ukuti pawanda wawinga, e siwinga ne nawinga wawisileko sana amano pano e kalanda akulanda ilyasi. Amawaliko yano akuwazya mwe lyo-o ilyasi, asa mapya kwe woliwo. Lelo ukufuma pe wonye uwanda, yandi yawe amacindame nkaninye kwe woliwo. Amulandu ci? Amuno wandi wayawomvya mwi twala lyawo.

² Wonye avino cikawa na ku wina Klistu nga cakuti wakwata awana. Pa myaka imivule, wakalanga lyo wivwapo amalyasi amavule yano yakalanda pa vya kukuzya awana. Nomba peyo-o impindi apano ya-a amalyasi yakacindama sana kwe woliwo. Amuno lyo wandi wakwate umwana wo wandi watalike ukukuzya. Ukwasowa nu kuvwilika, wo-o amulimo uwukulu nkaninye. Co-o cikulanjizya apatiswenye ukuti nga cakuti ivintu vyapiluka mu wumi apano amawaliko yamwi yakakwiza mu kucindama nkaninye kwe sweswe. Fwandi awuli umulandu wuno awina Klistu wazipizile ukuwawazizya amawaliko ngati avino Leza wanenile izya Mfumu zya mu Israeli ukucita. Wawanenile ukuti wazipizile ukwelenganya peya-a amazwi “Penye” mu wumi wawo.​—Amasu. 17:19.

3. Avyani vino twandi tusambilile mwe co-o icipande?

³ Mwe wakwasi mwawa nu mulimo uwukulu uwakusambilizya awana winu pe Yehova. Lelo kwawa cimwi cino muzipizile ukucita cino cacila napakusambilizya awana winu pe Leza. Muzipizile ukwavwa awana winu ukukunda sana Yehova. Nomba mungacita wuli pakwavwa awana winu ukukunda Yehova? Mwe co-o icipande twandi tulande pa visinka vya masundo ya mu Baibolo 4 vino vingavwa awakwasi. (2 Tim. 3:16) Swinya twandi tulande na pavizima vino awakwasi awina Klistu wazanamo mukukonka ukusunda kwa mu Baibolo.

IVISINKA 4 VINO VINGAVWA AWAKWASI

4. Acisinka ci icakutalicila cino cingavwa awakwasi ukwavwa awana wawo ukukunda Yehova ni myezo yawo yonsinye? (Jemusi 1:5)

⁴ Icisinka 1: Mwaleka Yehova awamyavwa. Mwamulenga ukuti awamipa amano yakwavwa awana winu ukumukunda. (Wazyani Jemusi 1:5.) Amuno e Yehova awili e kapanda mano mukulu. Swinya kwawa imilandu yino yalenga tusinincizye co-o. Nomba katulandeko vye pe yiwili. Uwakutalicila awakuti, e Yehova awili umukwasi mukulu pa wakwasi wonsinye. (Amalu. 36:9) Uwaciti wili awakuti, mukupanda amano kwakwe konsinye, mukafumamo ivizima.​—Ayize. 48:17.

5. (a) Avyani vino iwungwe lya kwe Yehova lya pekanizizya awakwasi vino vingawavwa? (b) Ukulingana ne vidyo, avyani vino mwasambilizileko ku mwanawitu ne nkazi Amorim pevino wakuzizye awana wawo?

⁵ E Yehova akawomvya e Baibolo ni wungwe lyakwe, pakupekanizizya awakwasi vino vingawavwa ukusambilizya awana wawo ukumukunda. (Mat. 24:45) Ku cakulolelako, mungazana vino vingamyavwa pa cipande cakuti “Vino Vingavwa Ulupwa” cino cikawa mwe Loleni! na pa webusaiti. Cinji acakuti, pa jw.org pawa ama vidyo muno mwawa ukuwuzya ni vilanjililo vino vingavwa awakwasi ukukonka ukusunda kwa kwe Yehova pano wakukuzya awana wawo.b—Imilu. 2:4-6.

6. Uzye umukwasi wumwi uwaconsi numuci wakakwivwa wuli pe vyo Yehova akawapekanizizya ivya kuwavwa ukuwomvya iwungwe lyakwe?

⁶ Awakwasi awavule wakalanjizya ukuti wakasalifya pe vyo Yehova akawapekanizizya ivya kuwavwa ukupitila mwi wungwe lyakwe. E Joe umukwasi waconsi walanzile ukuti: “Ukukuzizya awana watatu mucine asamulimo uwupepuke. Nene newakwane tukapepa kwe Yehova ukuti awatwavwa. Swinya ilivule nga cakuti icipande nanti e vidyo vyafuma, tukakwivwa ukuti e Yehova watupekanizizya ivya kutwavwa pa mpindi iyizima ukulinganavye na vino tukupitamo. Lyonsinye tukasintilila sana pa kwavwa kwa kwe Yehova.” Umwanawitu e Joe numuci wazana ukuti ama vidyo nivipande vya pa jw vikakwavwa nkaninye awana wawo ukupalamila kwe Yehova.

7. Amulandu ci wuno awakwasi wazipizile ukuwombesya ukuwa acakulolelako icizima ku wana wawo? (Waroma 2:21)

⁷ Icisinka 2: Mwawa mwe cakulolelako icizima. Awana wakalola sana vino awakwasi wawo wakacita swinya wakawakolanya. Kweni kutawa umukwasi wino wapwililika. (Roma. 3:23) Lelo nanti ciwe wo-o, awakwasi wazipizile ukuwombesya na maka ukuwa acakulolelako icizima ku wana wawo. (Wazyani Waroma 2:21.) Umukwasi wumwi awaconsi walanzile pa wana ukuti: “Awana wawa ngati we pamba yino yikakonka vyonsinye. Waliwatunena nga cakuti tutakucita vino tukuwasambilizya.” Fwandi nga tukulonda awana witu ukukunda Yehova, tuzipizile ukutalicilapo ukuwomya wuciwuza witu ne Yehova nukulanjizya vino twamukunda.

8-9. Tukusambililako cani kwe vino e Andrew ne Emma walanzile?

⁸ Kwawa inzila izivule zino awakwasi wangasambilizizyamo awana wawo ukukunda Yehova. Lolani vino umwanawitu e Andrew uwa myaka 17 walanzile. Watili: “Awakwasi wane wanenanga uwucindami wi pepo. Cilawanda uwusiku, e tata wizanga mu kupepela ponga na nene nanti acakuti mpefile kaali. Awakwasi witu watunenanga ukuti: ‘Mungapepa kwe Yehova imiku iyili yonsinye yino mukulonda.’ Pamulandu navino awakwasi wane wacitanga, cikampepucila ukupepa kwe Yehova swinya nkamulola ukuti amukwasi wane uwa lukundo.” Acino mwe wakwasi, mwakwizuka ukuti vino mwakunda e Yehova avino vingavwa awanawinu ukumukunda.

⁹ Lekani tulandeko na pe nkazi e Emma. Pano tata wawo wawasile, lyo wakongola indalama izivule kuwantu zino mama wawo wazipizile ukunyosya. E Emma watili: “Impindi imvule e mama watamikanga pakuzana indalama. Lelo nanti ciwe wo-o, lyonsinye watusakamalanga nukutupa vino tukulonda. Wo vino wacitanga calenzile nsinincizye ukuti wasuwizile mwe Yehova. Ukwasowa nukuvwilika e mama wawomvyanga vino wansambilizyanga.” Tukusambililako cani? Awakwasi wazipizile wakwizuka ukuti nga cakuti wali acakulolelako icizima wangasambilizya awana wawo na pano ivintu vitazile.​—Gal. 6:9.

10. Ampindi ci pano awakwasi awina Israeli walanzyanyanga na wana wawo pe Yehova? (Amasundo 6:6, 7)

¹⁰ Icisinka 3: Mwalanzyanya na wana winu lyonsinye. E Yehova wanenile awakwasi awina Israeli ukuti wasambilizya awana wawo lyonsinye pe weliwe. (Wazyani Amasundo 6:6, 7.) Awina Israeli wawanga ni mpindi iyikulu iyakulanzyanya na wana wawo, nukuwasambilizya ukukunda Yehova ni myezo yawo yonsinye. Ku cakulolelako, ilivule umulumendo umwina Israeli wasumbanga impindi inkulu ukuwa ponga ne yisi pano akumwavwa ukulima ivizawalo nga nukusombola. Ne e nkazi yakwe angalanga ali ponga ne mama wakwe pa mpindi nkulu pano akumwavwa ukupikula, ukusuma nga nukuwomba imilimo yinji iya pa ng’anda. Pano awakwasi wawombelanga ponga na wana wawo, walanzyanyanga pa malyasi ayavule ayacindame. Ku cakulolelako, walanzyanyanga pa wuzima wa kwe Yehova na pe vino wawavwanga mu lupwa.

11. Ampindi ci yimwi yino awakwasi awina Klistu wakakwata, yo wangawomvya ukulanzyanya na wana wawo?

¹¹ Ivintu vyapiluka peyo-o impindi. Munsi izivule, awakwasi na wana wasiwa caponga pa wanda wonsinye. Amuno awakwasi wakalanga wali ku ncito ne wana nawo wali ku sukulu. Nga cawa wo-o, awakwasi wazipizile ukusola impindi yino wangalanzyanya na wana wawo. (Efes. 5:15, 16; Flpi. 1:10) Impindi yimwi yino wangalanzyanya na wana wawo, apano wali pa mapepo ya lupwa. Umwanawitu e Alexander uwacitici watili: “Lyonsinye e tata akapekanya impindi yakukwata amapepo ya lupwa swinya asileka icili consinye ukuvulunganya yoyo impindi yakuwa ponga. Ne pansizi ya mapepo ya lupwa, tukatalika ukulanzyanya pe vinji ivya palwitu.”

12. Avyani vino umutwe wa lupwa azipizile ukwizuka pano wali pa mapepo ya lupwa?

¹² Nga cakuti mwe mutwe wa lupwa, mungacita wuli pakuti awana winu wayitopwa amapepo ya lupwa? Nga mukulonda, mungatalika ukuwasambilizya mwi buku ilipya ilyakuti Ungikala Amanda Pe! Amuno lyo-o ibuku likaleka acipepuka ukulanzyanya. Fwandi nga cakuti mukulonda awana winu walanda vino wakuyivwa na vino vikuwasakamika, mutazipizile mwawomvya impindi ya mapepo yalupwa kukuwakalipila nukuwalengulula. Swinya muzipizile ukwelezya namaka ukukana fulwa nga cakuti umwana walanda cimwi cino cipusine na masundo ya mu Baibolo. Muzipizile mwakwivwa icete nga cakuti awana winu wakulanda vino wakuyivwa mu cisinka swinya muzipizile nu kuwawomelezya ukuti watwalilile ukuminena vino wakuyivwa. Mwakwizuka ukuti mungavwa vye awana winu nga cakuti mwamanya vino wakuyivwa.

13. Anzila ci nayinji yino awakwasi wangawomvya pakwavwa awana wawo ukupalamila kwe Yehova?

¹³ Mwe wakwasi mwawomvya impindi iyili yonsinye yino mwasyucila cila wanda ukwavwa awana winu ukupalamila kwe Yehova. Mutazipizile ukulindilila ukuti mpaka impindi yize yifike yino mukawasabilizizyapo e Baibolo apano mwize muwasambilizye pe Yehova. Yivwani vino e nkazi Lisa umukwasi uwacanaci walanzile. Watili: “Tukawomvya ivili vyonsinye vino vili mupipi vyo Yehova welewula pakusambilizya awana witu pe Yehova. Ku cakulolelako, nga cakuti imbwa yacita vimwi vino vyalenga awana waseka, tukawasambilizya ukuti e Yehova we Leza wa nsansa. Swinya akalonda na sweswe tuwawa ni nsansa aco wapanjizile zyo-o imbwa.”

14. Amulandu ci wuno cicindamizile kuwakwasi ukwavwa awana wawo ukusola icete iviwuza? (Imilumbe 13:20)

¹⁴ Icisinka 4: Mwakwavwa awana winu ukusola icete iviwuza. E Baibolo yikatunena ukwasowa nukutupita mu mbali ukuti iviwuza vingalenga tuwe nimiwele mizima nanti ukuwa nimiwele miwipe. (Wazyani Imilumbe 13:20.) Mwe wakwasi, uzye mwawamanya wano wakakwizya na wana winu? Uzye mwawalolapo swinya mukatela amuwapo nawo pa mpindi yimwi? Mungacita wuli pakwavwa awana winu ukupanga iviwuza na wano wakunda e Yehova? (1 Kor. 15:33) Mungavwa awana winu ukupanga iviwuza ivizima nga cakuti mukwitako wano wawa nawuciwuza uwuzima ne Yehova ukuti wize wamyavweko ukuwomba vimwi na wana winu.​—Amalu. 119:63.

15. Uzye awakwasi wangacita wuli pakwavwa awana wawo ukusola icete iviwuza?

¹⁵ Yivwani vino calinji ku mwanawitu e Tony umukwasi waconsi. We-e umwanawitu walondolozile vino weliwe nu muci wacisile pakwavwa awana wawo ukupanga iviwuza ivizima. Watili: “Pa myaka imivule nene ne wakwane tukakwitako awanawitu na wankazi awavimo ivilekane lekane ni nkulilo izilekane lekane. Tukalila nawo caponga ivya kulya nukuwa nawo pa mapepo ya lupwa. Yo-o ayili inzila iyizima iyakumanyilako wano wakunda e Yehova swinya wano wakamuwombela ni nsansa. Twapocelelapo wa kangalila wamiputule, wamisionari nawanawitu vye wanji ukwiza mukwikala nawo pa ng’anda. Vino wa-a awanawitu wapitamo, vino wakawombesya na vino wakayikundila ukuwomba, vyavwa nkaninye awana witu swinya vyalenga wapalamile sana kwe Yehova.” Mwe wakwasi twalililani ukwavwa awana winu ukupanga iviwuza ivizima!

MUTAVWILIKA!

16. Mungacita wuli nga cakuti umwana walanda ukuti asakulonda ukuwombela Yehova?

¹⁶ Mungacita wuli nga cakuti asamulandu na vino mwawombesya, umwana walanda ukuti asakulonda ukuwombela Yehova? Mutazipizile ukwelenganya ukuti muposilwe ukuwomba umulimo winu ngati amukwasi. Amuno e Yehova wapa swensinye ukuwikako nawana winunye insambu zya kuyisolelapo nampo nga akumuwombela nanti awe. Nga cakuti umwana wasolapo ukusya e Yehova, mutazipizile ukuvwilika ukuti alinyoka nu kutalika ukumuwombela naswinya. Izukani icilanjililo ca mwana umusowe. (Luk. 15:11-19, 22-24) We-e umulumendo wacisile iviwipe ivivule nkaninye, lelo mukulecelezya wizile anyocela kwe yisi. Wamwi wangalanda ukuti: “Lyo-o alilyasivye. Nga vingacitika wuli kwe sweswe? Uzye umwana wane alitela talikepo ukuwombela e Yehova naswinya?” Ukwasowa nu kuvwilika, alitalika! Wonye avino calinji ku mulumendo uwizina lya kuti Elie.

17. Uzye vino e Elie wapisilemo vya miwomelezya wuli?

¹⁷ E Elie walanzile pawakwasi wakwe ukuti: “Awakwasi wane wawombesizye ukunjavwa ukukunda Yehova ni Zwi lya kwe e Baibolo. Nomba pano nalinji nimyaka mu ma 15 nizile intalika ukuwa nimiwele imiwipe.” E Elie wizile atalika ukucita iviwipe mukuvwama. Awakwasi wakwe welezizye na maka ukumwavwa ukupalamila kwe Yehova, lelo wakanile ukuwivwila. Watili wafuma pa ng’anda watalisile ukucita iviwipe. Lelo nanti ciwe wo-o, mpindi zimwi walanzyanyanga nu muwuye pa vya mu Baibolo. E Elie watili: “Pano nayanga nkulanda sana pe Yehova apano nayanga nkwelenganya sana pe weliwe. Mukupita kwa mpindi nizile inzana ukuti imbeyu zya visinka vya mu Baibolo zino zyalinji mu mwezo wane zyo awakwasi wawombesizye na maka ukukomela, zyatalisile ukumela.” E Elie wizile anyoka kwe Yehova.c Teyelenganyani pe vino awakwasi wayivwile, wano wawombesizye na maka ukumusambilizya ukukunda Yehova ukufuma kuwutici!​—2 Tim. 3:14, 15.

18. Uzye mukayivwa wuli pa wakwasi wano wakawombesya ukusambilizya awana wawo ukukunda e Yehova?

¹⁸ Mwe wakwasi e Yehova wamipa icawila icizima nkaninye, icakukuzya inkulilo iyipya iyakapepa wa kwe Yehova. (Amalu. 78:4-6) Wo-o, asa mulimo uwupepuke. Tukumisalifya nkaninye mwe wakwasi pe vino mukawombesya ukwavwa awana winu. Nga cakuti mwatwalilila ukuwombesya ukwavwa awana winu ukukunda Yehova nukuwavwa ukuwa nicivwila, ukwasowa nukuvwilika e Yehova wandi awasecelela.​—Efes. 6:4.