ICIPANDE CA KUSAMBILILAMO 26
ULWIMBO 123 Twatontela Vino Leza Watantika
Mwayicefya nga Kuli Vimwi Vino Mutamanya
“Amaka yakwe Leza yakulisya tutanga tumupalamile.”—JOB 37:23.
VINO TWANDI TUSAMBILILE
Twandi tusambilile pe vino ukuwika amano pe vino twamanya nu kusuwila Yehova kungatwavwa ukusipicizya kwe vino tutamanya.
1. Uzye e Yehova watwelewula mu nzila ci, swinya amulandu ci?
E YEHOVA watwelewula mu nzila ya kuzungusya. Watwelewula ukuti twakwelenganya, twasasambilila ivipya, twakwiluka nu kumanya vino tungawomvya vino twasambilila. Amulandu ci wuno watupanjila mwe yo-o inzila? Amuno akalonda ‘tusambilile’ pe weliwe nu kuwamuwombela na mano yakwiluka.—Imilu. 2:1-5; Roma. 12:1.
2. (a) Avyani vino tutamanya? (Job 37:23, 24) (Lolani ni cikope.) (b) Amulandu ci wuno cacindamila ukuyicefya nu kumanya ukuti tutamanya vyonsi?
2 E Yehova watwelewuzile munzila yakuti twasambilila ivintu, lelo nanti ciwe wo-o kwawa ivivule vino tutamanya. (Wazyani Job 37:23, 24.) Lekani tulande pe Job. E Yehova wamukolowozizye amawuzyo amavule yano yamwavwizye ukulola ukuti atamanyile ivivule. Ko-o ukulanzyanya kwamwavwizye ukuyicefya nukupiluka mwe vino welenganyanga. (Job 42:3-6) Nasweswenye tuzipizile ukuyicefya nu kumanya ukuti tutamanya vyonsi. Co-o cingalenga tusuwile ukuti e Yehova awino angatunena vino akulonda tumanye pakuti twapingula icete pa vintu.—Imilu. 2:6.
Tungazanamo ivizima mukukanawika amano kwe vino tutamanya ndi wulyanye vino calinji kwe Job (Lolani paragrafu 2)
3. Avyani vino twandi tusambilile mwe co-o icipande?
3 Mwe co-o icipande twandi tusambilile pe vimwi vino tutamanya ni ntazi zino tungapitamo pamulandu nu kukana manya vyovyo ivintu. Twandi tulande nu mulandu wuno cacindamila ukukana manya vimwi ivintu. Ukusambilila pe vyo-o kwandi kutwavwe ukumanya ukuti e Yehova “uwamano” awino angatunena vino tuzipizile ukumanya.—Job 37:16.
TUTAMANYA PANO INSILO YANSI YILIYIZILA
4. Ukulingana ne Mateyu 24:36, avyani vino tutamanya?
4 Wazyani Mateyu 24:36. Tutamanya pano insilo ya kwe yo-o insi yilizila. Ne Yesu nye pano walinji munsi atamanyile “uwanda ni mpindi.”[NWT]a Swinya mukupita kwa mpindi wizile anena na wasambi wakwe ukuti e Yehova mutupunye awino akasola impindi nzima pano ivintu vimwi vizipizile ukucitika. (Imili. 1:6, 7) Fwandi e Yehova mutupunye awino wasola uwanda pano insilo yakwe yo-o insi yiliyizila.
5. Acani cino cingacitika pa mulandu wakuti tutamanya pano insilo yansi yiliyizila?
5 Kweni tutamanya uwanda pano insilo ya kwe yo-o insi yiliyizila ndi wulyanye vino Yesu walanzile. Co-o cingalenga twavilwa ukutekanya swinya twakwivwa uwuwi, maka maka nga cakuti twalindilila uwanda wa kwe Yehova pampindi ntali. Ne mpindi zimwi tungakwivwa uwuwi nga cakuti awa mu lupwa nanti awantu wanji wakutuseka pa mulandu wakuti insilo yitani yize. (2 Pet. 3:3, 4) Nce pamwi tungalola ukuti cingatupepucilavye ukutekanya nu kusipicizya nga twamanya uwanda.
6. Amulandu ci wuno cazipila wo-o vino tutamanya impindi pano insilo ya kwe yo-o insi yiliyizila?
6 Pamulandu wakuti e Yehova atatunena uwanda pano insilo ya nsi yiliyizila calenga tuwe nu longo lwa kulanjizya ukuti twamukunda swinya twamusuwila pano tukumuwombela. Amuno tukalonda ukutwalilila ukuwombela Yehova na pano insilo yansinye yiliyiza. Fwandi ukucila ukuwika amano ku mpindi yino uwanda wa kwe Leza wuliyiza, tuzipizile ukuwika amano ku vizima vino vilicitika nga cakuti wo-o uwanda wapita. Ukucita wo-o kulilenga tupalamile kwe Yehova, tumusuwile nu kucita ivyakumusecelesya.—2 Pet. 3:11, 12.
7. Avyani vino twamanya?
7 Cacindama nkaninye ukuwika amano kwe vino twamanya. Twamanya ukuti amanda ya kulecelezya yatalisile mu 1914. Mwe Baibolo mwawa amasesemo yano yalenga tusinincizye ukuti amanda yakulecelezya yatalisile mu 1914. Swinya yalanda na pe vino vyalinji nu kuwacitika pa nsizi ye wonye umwaka. Vyonsinye vyo-o, vyalenga tusinincizye ukuti “uwanda wukulu uwa Mfumu e Leza” wupalamizile (Zefa. 1:14) Cinji cino twamanya, amulimo wuno Yehova watupa ukuwomba. Akuli ukuti ukuwizizya awantu “ilandwe zima . . . ilya Wufumu.” (Mat. 24:14) Lyo-o ilyasi lizima likuwizwa munsi mupipi ne 240, mu vitundu ukucila pe 1,000. Fwandi tusilondekwa ukumanya “uwanda ni mpindi” pakuti twawombesya mu mulimo wakuwizya.
TUTAMANYA VINO YEHOVA ALICITA PA KUTWAVWA
8. Uzye amazwi yakuti ‘vino Leza akacita’ yakasula mwinye? (Ekawizya 11:5)
8 Ase lyonsi pano tukamanya ‘vino Leza akacita.’ (Wazyani Ekawizya 11:5.) Amazwi yakuti vino Leza akacita yakasula kwe vino akalenga ukuti avicitika pakuti aficilisye ukulonda kwakwe. Swinya tusimanya umulandu wuno Yehova akalenga vimwi ukucitika na vino alitwavwa ku nkolelo. (Amalu. 37:5) Ku cakulolelako, tutamanya vino umwana akakula mwi fumo lya kwe nyina. Na wano wasambilila ivye sayansinye watamanya icete cete. Wonye avino tutamanya vino Yehova alicita na vino akacita pakuficilisya ukulonda kwakwe.
9. Avyani vino tungatalika ukwelenganya nga tutamanyile vino Yehova alitwavwa?
9 Tungawayawaya ukupingula pe vimwi nga tutamanyile vino Yehova alitwavwa nga twasolapo ukucita wowo. Mpindi zimwi, cingatuwomela ukupepusya imikalile pakuti twawombesya mu mulimo wakuwizya nanti ukuya kuno wakawizya wacepa. Swinya tungalola ngati e Yehova atakutwavwa nga cakuti tukuwombesya mu mulimo wakwe lelo tutakuficilisya vino twapanga. Cinji acakuti tungawombesya mu mulimo wakuwizya, ukwasowa ukukwata isambililo lye Baibolo. Nanti pamwi tungazana ukuti tukuwombesya nkaninye mu mulimo uwuyiwele lelo tukupita mu ntazi. Vyonsinye vyo-o vingalenga twalola ngati e Yehova asakutwavwa.
10. Amiwele ci yino tuzipizile ukuwa nayo pamulandu wakuti tutamanya vino Yehova alicita?
10 Tukalondekwa ukuyicefya pamulandu wakuti tutamanya nanti katicinye vino Yehova alicita. Ukucita wo-o, kungatwavwa ukumanya ukuti vino Yehova akakwelenganya na vino akacita ivintu vyapusana nkaninye nasweswe. (Ayize. 55:8, 9) Cinji acakuti, kungatwavwa ukusuwila ukuti e Yehova aliwatusakamala. Fwandi nga cakuti mu mulimo wakuwizya nanti mu mulimo wunji wuno tukuwomba mwi wungwe mukufuma ivizima, tuzipizile twalenga ilumbo nu mucinzi ukuya kwe Yehova. (Amalu. 127:1; 1 Kor. 3:7) Nga cakuti ivintu vitacitisile ukulingana na vino tukwenecela, tuzipizile ukusuwila ukuti e Yehova amanyile vyonsinye. (Ayize. 26:12) Swinya tuzipizile ukucita vino tungakumanisya nu kusuwila ukuti e Yehova alitwavwa nanti acakuti atanga atwavwe mu cizungusyo ndi vino wacitanga ku nsizi.—Imili. 16:6-10.
11. Avyani vino twamanya?
11 Twamanya ukuti e Yehova wawa nu lukundo, umulinganya na mano. Swinya akasalifya pe vino tukamucitila na pe vino tukacitila awanawitu na wankazi. Twamanya nu kuti akalambula wano wakamuwombela ni cisinka.—Hebe. 11:6.
TUTAMANYA VINO VILICITIKA MUTONDO
12. Avyani vino tukusambililako ku mazwi yano yawa pe Jemusi 4:13, 14?
12 Wazyani Jemusi 4:13, 14. Icisinka acakuti tusimanya vino uwumi witu wuliwa mutondo. Amuno ivintu ivyasowa ukwenecela na vino tutakwetipo amaka vingatuciticila. (Ekawi. 9:11) Na cino cingafumamo acakuti, tutanga tumanye nga cakuti vino twapanga ukucita viliwomba nanti nga tulilanga tuli nu wumi.
13. Uzye tungayivwa wuli nga cakuti ivintu vitacitisile ukulinga na vino tukwenecela?
13 Pamulandu wakuti tutamanya vino vilicitika ku nkolelo, cingatuwomela ukusipicizya. Amulandu ci wuno twalandila wo-o? Amuno mpindi zimwi tungasakamikwa pe vino vyandi vicitike vino vingalenga tutawa ni nsansa. Swinya ivintu vingapiluka mu wumi ukwasowa ukwenecela, na co-o cingalenga twayivwa uwuwi. Cinji acakuti tunganenuka nga cakuti ivintu vitacitisile ukulingana na vino tukwenecela.—Imilu. 13:12.
14. Avyani vino vingalenga tuwe ni nsansa zya cisinka? (Lolani ni cikope.)
14 Nga cakuti twatwalilila ukuwombela Yehova na pano tukupita mu ntazi lyo tukulanjizya ukuti tukamuwombela pamulandu wakumukunda. Amalyasi ya mu Baibolo yakalanjizya ukuti tutazipizile twakwenecela ukuti e Yehova angatucinjilila mwe vyonsinye vino tukupitamo nanti ukuti wapanga lyankani vino vilituciticila. Wamanya ukuti, ukumanya vino vilicitika ku nkolelo asa kuno kungalenga tuwe ni nsansa. Lelo tungawa ni nsansa nga tukumwivwila nanti tukumulenga ukuti awatutungulula mwe vino tukucita. (Jere. 10:23) Nga cakuti tukunena Yehova ukuti atwavwe pano tukupingulapo pe vimwi, tutaliwasakamikwa nkani pe vino vingiza vifumemo. Nga twacita wo-o, cingawa ngati awulyanye vino Jemusi walanzile ukuti: “Ndi Imfumu ikulonda, tulilanga swewumi tuwachita choo-nachoo.”—Jemu. 4:15.
Ukulenga ukuti e Yehova awatutungulula nu kumwivwila kungalenga tucinjililwe (Lolani amaparagrafu 14-15)b
15. Avyani vino twamanya?
15 Nanti acakuti tusimanya vino vilicitika uwanda wuno wukonsilepo, twamanya ukuti e Yehova watulaya uwumi wamuyayaya nampo nga twawa ni suwilo lyakwikala munsi nanti kwi yulu. Twamanya nu kuti e Yehova atanga awipe swinya kusi icili consinye cino cingamulesya ukuficilisya vino watulaya. (Tait. 1:2) Cinji acakuti weliwe wenganye awino “akalanda vino vilicitika ku nkolelo.” Vyonsinye vino walandizile lyankani ku nsizi vizile avicitika. Co-o calenga tusuwile ukuti na vino watulayanye ku nkolelo vilicitika. (Ayize. 46:10) Twamanya ukuti pasi cino cililesya e Yehova ukutukunda. (Roma. 8:35-39) Akatusansamusya nu kutupa amano na maka yano yakatwavwa ukusipicizya intazi zyonsinye zino tungapitamo. Vyo-o vingalenga tusuwile ukuti e Yehova alitwavwa nu kutupaala.—Jere. 17:7, 8.
TUTANGA TWIVWICISYE VINO YEHOVA WATUMANYA
16. Avyani vino Yehova wamanya pe sweswe, swinya vikalenga twayivwa wuli? (Amalumbo 139:1-6)?
16 Wazyani Amalumbo 139:1-6. E Kelewula witu wamanya vino twapangwa. Wamanya vino tukaloleka, vino tukayivwa na vino tukakwelenganya. Lyonsinye akatuwikako amano. Akamanya vino tukalanda na cino calenga tulande wowo. Swinya akamanya vyonsinye vino tukucita nu mulandu wuno tukuvicitila. E Devedi walanzile ukuti e Yehova wayipekanya swinya wawa na maka yakutwavwa. Uzye mukayivwa wuli ukumanya ukuti e Yehova e Leza wa maka yonsi wamiwikako amano? Nce pamwi mungayivwa ndi vino Devedi wayivwile pano walanzile ukuti: “Ukumanya kuno wamanya nene akwakuzunguka; achitale kwenene ukwiluka.”—Amalu. 139:6.
17. Avyani vino vingalenga twalola ngati e Yehova atatuwikako amano?
17 Nce pamwi pamulandu nu lupwa luno twakulilamo, intambi na vino twazumizilemo pano tutani tusambilile icine, vingalenga twalola ngati e Yehova atatuwikako amano. Nanti pamulandu ni viluwo vino twacisile kunsizi cingalenga twalola ngati e Yehova atange atemwe ukutumanya swinya wawa ukutali nasweswe. Wonye wo-o avino ne Devedi nye wayivwanga. (Amalu. 38:18, 21) Ne mpindi zimwi umuntu wino akulonda ukupilula imiwele yakwe nu kutalika ukukonka amasundo ya kwe Yehova angayikolowozya ukuti, ‘Nga cakuti e Yehova wamanya icete, amulandu ci wuno akulonda ndeke imiwele yino yikuloleka ukuti amitamye ukuleka?’
18. Uzye ukumanya ukuti e Yehova watumanya icete kungatwavwa wuli? (Lolani ni cikope.)
18 Tungazumila ukuti e Yehova watumanya icete ukucila navino twayimanya swe weneco. Swinya kwawa ivizima vino akalola mwe sweswe vyo tusilola. Nanti acakuti e Yehova wamanya vino tukaluvyanya swinya wamanya na vino tukayivwa na cino cikalenga twacita vimwi, wamanya ukuti tungapiluka swinya angatwavwa ukucita wo-o. (Roma. 7:15) Ukumanya co-o icisinka kukalenga twawa ni nsansa nkaninye swinya kukalenga twavwambisya ukumuwombela ni cisinka.
Vino Yehova watulaya vikatwavwa nkaninye ukuwomya isuwilo litu. Swinya vikatwavwa ukusipicizya intazi zino zikakwiza ukwasowa ukwenecela (Lolani amaparagrafu 18-19)c
19. Avyani vino twamanya pe Yehova?
19 Twamanya swinya tusivwilika nanti katicinye ukuti e Yehova we lukundo. (1 Yoh. 4:8) Twamanya nu kuti vino akalonda twacita na vino asilonda twacita vikalanjizya ukuti watukunda swinya vyawela ku wuzima witu. Cinji acakuti akalonda twize tuwe nu wumi wamuyayaya. Pakuti co-o cize cicitike watumile umwana wakwe ukuwa anzuwi. Pamulandu wakuti e Yesu watufwizile, tungasuwila ukuti tungatwalilila ukuwombela Yehova mu nzila yino akalonda asa mulandu nu kuti tutapwililika. (Roma. 7:24, 25) Asa vyo-o vitupu twamanya nu kuti e “Leza wakula walusya amelengania yitu, swinya wamanya nivintu vyonsi.” (1 Yoh. 3:19, 20) E Yehova wamanya vyonsinye pe sweswe swinya watusuwila ukuti tungatwalilila ukumuwombela.
20. Acani cino cingalenga tutasakamikwa?
20 E Yehova asitufisa nanti cimwinye pe vino tuzipizile ukumanya. Nga twamanya co-o icisinka tutaliwasakamikwa pe vino tutamanya. Lelo tuliwawika amano ku vicindame. Nga tukucita wo-o, lyo tukulanjizya ukuti twasuwila e Yehova, ‘uwamano nawuzyenye.’ (Job 36:4) Nanti acakuti tutanga twivwicisye ivintu vimwi pe yo-o impindi, cino twamanya acakuti e Yehova alitwalilila ukutusambilizya ivintu ivipya umuyayaya. Swinya tukakwivwa icete nkaninye amuno tutalitela tuleke ukusambilila pe Yehova.—Ekawi. 3:11.
ULWIMBO 104 Umuzimu Uwutele aca Wila Ukufuma kwe Leza
a E Yesu awino aliwa pankolelo pa nkondo yino yiliwako pano waliwakonona imitecele ya kwe Satana. Fwandi tungati pe yo-o impindi e Yesu wamanya uwanda wuno e Armagedoni yiliyiza na pano ‘alicimvya.’—Ukuwu. 6:2; 19:11-16.
b UKULONDOLOLA ICIKOPE : E Yisi nu mwana wakulonga ivintu mukacola pakuti wayipekanye ukusamala nga kwacitika vimwi.
c UKULONDOLOLA ICIKOPE: Umwanawitu wino akupita mu ntazi akwelenganya pa nsansa zino aliwayitopwa mu nsi mpya.