Amulandu ci Wuno wa Nte Wakapilucilako mwe Vimwi Vino Wazumizile Kali?

Lyonsinye tukalenga ukuti e Baibolo ayino yatutungulula mwe vino twazumilamo. Acino tukapiluka mwe vino twazumizilemo kunsizi ukulingana ni vipya vino twivwicisya mwe Baibolo.a

Ko-o ukupiluka kukakwivwana ni cisinka ca mu Baibolo cino cawa pa Imilumbe 4:18 pano pakati: “Inzila yino awalungamane wakapita yakolana nukufuma kwilanzi, kuno kukalanga kukuwala akusuka kucha.” Wulyanyene vino ilanzi nga likuya likuwoma apano tukatalika ukulola icete vino tutate tukulola pakutalika, avino ne Leza nye akatwavwa ukwivwicisya icisinka ca mu Baibolo katici-katici pampindi yakwe umweneco. (1 Peter 1:10-12) Wulyanyene vino Baibolo yalandizile lyankani, e Leza akulenga vyo-o ukucitika mwe yo-o “impindi ya nsilo.”​—Daniel 12:4.

Ko-o ukupiluka mwe vino twazumizilemo, kutazipizile ukutuzungusya nanti ukutuvulunganya. Wonye avino calinji na kuwawomvi wa kwe Leza awa kunsizi, impindi zimwi wapilukanga mwe vino wenecelanga na vino wamanyile nga wiluka ukuti cino wamanyile pakutalika calinji aciluwo.

• E Musa walondanga ukuluwula awina Israeli lyo kwasyala imyaka 40 pakuti impindi ya kwe Yehova yifike iyakuwaluwula.​—Imilimo 7:23-25, 30, 35.

• Awatumwa wativwicisizye muno mwasuzile uwusesemo wuno walandanga pa mfwa ya kwe Mesiya nukuzyulupuka kwakwe.​—Ayizeya 53:8-12; Mateyu 16:21-23.

• Awina Klistu wakutalicila wamwi, wamanyile vinji pa mpindi ya “wanda wa kwe Yehova.”​—2 Watesalonika 2:1, 2.

Lelo e Leza wawalenzile ukwivwicisya icisinka, swinya tukupepelavye ukuti wandi atwalilile ukucita icili conganye na kwe sweswenye.​—Jemusi 1:5.