Vino Tungasambililako ku ma Kalata Yawili Yano Peter Walemvile

1. Avyani vino Yehova wanenile umutumwa Peter ukucita pano walinji mupipi nu kufwa?

UMUTUMWA Peter wawombezile Yehova ni cisinka pa myaka imivule. Ku cakulolelako, wawomvile umulimo wakuwizya ponga ne Yesu, wayanga mukuwombela ku vifulo kuno wasitela wawizizyepo swinya wawomvilepo na mwiwumba lino likatungulula. Imilimo yino wawomvile yitapelezile vye pa-a, e Yehova wamupile na yinji. Pano cafikanga kuma 62-64 C.E., wamunenile ukulemba ama kalata yawili, akuli ukuti ibuku lya kwe 1 ne 2 Peter. E Peter wamanyile ukuti ya-a ama kalata yalinji nu kwavwa awina Klistu wanji na pano wafwanye.—2 Pet. 1:​12-15.

2. Amulandu ci wuno tungalandila ukuti e Peter walemvile ama kalata pa mpindi yilyanye pano yalondekwanga?

² Pano Peter walembanga ama kalata yakwe yawili, lyo awina Klistu wawuye ‘wakatamika mu melezyo mavule.’ (1 Pet. 1:6) Awantu awawipe wizile awatalika ukuleta ivisambilizyo vya wufi ni miwele miwipe mwiwungwe lya kwe Yehova. (2 Pet. 2:​1, 2, 14) Patalinji nu kuzimba kwalinji nu kuwa “insilo ya vintu vyonsi” mu Jerusalem, akuli ukuti awa silika awina Roma walinji nu konona umusumba ni tempile. (1 Pet. 4:7) Ukwasowa nu kuvwilika ama kalata yano Peter walemvile yalinji nu kwavwa awina Klistu ukusipicizya intazi zino walinji nazyo nu kuyipekanizizya kucili kwe zino walinji nu kusunkanya ku nkolelo.b

3. Amulandu ci wuno tuzipizile twawazizya ama kalata ya kwe Peter?

³ Nanti acakuti e Peter walembezile vye awina Klistu wakutalicila ya-a ama kalata, e Yehova walenga yalembwe mwi Zwi lyakwe e Baibolo. Fwandi nasweswenye tunganoncelamo mwe ya-a ama kalata yano wawalembezile (Roma. 15:4) Amuno ndi wulyanye vino calinji ku wina Klistu wakutalicila, nasweswenye tukakwikala na wantu wano wakacita iviwipe vino vingalenga catutalila ukuwombela Yehova. Swinya nombanye twandi tupite mu wucuzi wukulu wuno wuliwipisya ukulusya na pe vino calinji pano awasilika awina Roma wononile umusumba wa Yerusalemu ni tempile. Nomba mu ma kalata yawili yano Peter walemvile tukazanamo ivintu ivicindame. Vyo-o ivintu vingatwavwa ukutwalilila ukulindilila uwanda wa kwe Yehova, ukuleka ukutina awantu nu kuwelako nu lukundo. Swinya vingavwa na wa eluda ukulola vino wangacita pa kutwalilila ukwavwa awanawitu na wankazi ukuwa na wuciwuza uwuwome ne Yehova.

TWALILILANI UKULINDILILA

4. Ukulingana ne 2 Peter 3:​3, 4, acani cino cingalenga isuwilo litu ukutonta?

⁴ Tukakwikala na wantu wano watasuwila amasesemo ya mu Baibolo. Swinya awalwani witu wakatuseka pa mulandu wakuti twalindilila pa myaka imivule ukuti insilo yakwe yo-o insi yize, lelo yitiza. Wamwi wakalanda nu kuti yitalitela yize. (Wazyani 2 Peter 3:​3, 4.) Nga cakuti wano tukawizizya, wano tukawomba nawo nanti wa lupwa lwitu walanda amazwi ya musango wo-o, ncepamwi isuwilo litu lingatonta. Nomba umutumwa Peter walanzileko vino vingatwavwa.

5. Acani cino cingatwavwa ukutwalilila ukulindilila Yehova ukuti ayize ayonone yo-o insi mbipe? (2 Peter 3:​8, 9)

⁵ Wamwi wangakwelenganya ukuti e Yehova akawayawaya ukwiza mukonona yo-o insi mbipe. Lelo amazwi yano Peter walanzile yakatwavwa. Amuno vino Yehova akapima impindi vyapusana nkaninye na vino sweswe swe wantu tukalola. (Wazyani 2 Peter 3:​8, 9.) Kwe Yehova imyaka 1,000 yikaloleka ngati awanda wonga. E Yehova watekanya swinya asilonda umuntu nanti wenganye ukwiza yononeka. Nga cakuti uwanda wuno watantika wiza wafika, aliyonona yo-o insi imbipe. Fwandi cicindime nkaninye ukuwomvya impindi yino tusyazile nayo ukuwizizyako awantu wonsinye munsi.

6. ‘Tungatwalilila wuli ukulindilila’ uwanda wa kwe Yehova? (2 Peter 3:​11, 12)

⁶ E Peter watuwomelezizye ukuti “tutwalilile ukulindilila” uwanda wa kwe Leza. (Wazyani 2 Peter 3:​11, 12.) Nomba tungacita wuli wo-o? Tuzipizile twakwelenganya cila wanda pa vizima vino tuliwayitopwa mu nsi mpya. Ku cakulolelako, twavipanga ukuti tukufuta akaluza akazima, tukulya ivya kulya ivizima, tukupocelela wa lupwa ni viwuza wano wakuzyulupuka swinya tukusambilizya na wantu wano walinjiko kaali nkaninye pe vino amasesemo ya mu Baibolo yaficiliswanga. Nga mukucita wo-o cilimyavwa ukutwalilila ukulindilila pe wo-o uwanda nu kusuwila ukuti insilo yakwe yo-o insi yipalamizile. Pa mulandu wa kuti ‘twamanya vyo-o’ vino vilicitika ku nkolelo, ‘watalitela watusovye’ ku wantu wano wakasambilizya ivya wufi.—2 Pet. 3:17.

UKULEKA UKUTINA AWANTU

7. Uzye ukutina awantu kungalenga tucite cani?

⁷ Nga cakuti lyonsinye tukwelenganya ukuti uwanda wa kwe Yehova wupalamizile, tuliwavwambisya ukuwizizyako wanji ilyasi lizima. Nomba mpindi zimwi tungapotwa ukucita wo-o. Amulandu ci? Amuno tungatina pe vyo awantu wandi wakwelenganya pe sweswe. Swinya wonye avino calinji ku mutumwa Peter. Pa wanda wakulecelezya uwusiku lyo Yesu ali mupipi nu kufwa, e Peter wakanile ukuti atalinji amusambi wakwe, swinya wanyocezizyepo imiku imivule ukulanda ukuti ata mumanyile. (Mat. 26:​69-75) Lelo wizile aleka ukutina awantu nu kulemba ukuti: ‘Mutize muwatina awantu, nanti akusakamala.’ (1 Pet. 3:14) Ya-a amazwi ya kwe Peter yakatwavwa ukusinincizya ukuti tungaleka ukutina awantu.

8. Avyani vino vingatwavwa ukuleka ukutina awantu? (1 Peter 3:15)

⁸ Avyani vino vingatwavwa ukuleka ukutina awantu? E Peter watunenile ukuti: “Yimichilanji e Klistu mumyezo yinu, muleke awe a Mfumu yinu.” (Wazyani.1 Peter 3:15) Mukucita wo-o, mwasanzyamo ukwelenganya pa mulimo wuno Yesu akawomba na pa maka yano wawa nayo. Fwandi nga cakuti mwivwa intete pano mwawa nu longo lwa kuwizizya umuntu wumwi, mwakwizuka Imfumu yitu. Mwakwelenganya ukuti mukumulola akuteka kwi yulu ni mintapendwa ya wangeli yimuzingulusile. Mwakwizuka ukuti wawa ‘na maka yonsi mwiyulu na munsi’ swinya wandi ‘awawa naswe ukufika na kunsilo ya nsi.’ (Mat. 28:​18-20) E Peter watuwomelezizye nu kuti ‘twayisengania’ pa kuti twalanda pe vino twazumilamo. Uzye mungatemwa ukuwizizyako wumwi pano muli ku ncito, ku sukulu nanti kucifulo vye cinji? Mwakwelenganya kucili pa mpindi pano mungaya mumuwizizye, nu kuyipekanizizya lyankani ivyewo vino mungaya mulanzyanye. Mwapepa kwe Yehova ukuti amyavwe ukusipa nu kusuwila ukuti wandi amyavwe ukuleka ukutina awantu.—Imili. 4:29.

“KUNDANANJI NKANINYE”

9. Uzye e Peter waposilwe wuli ukulanjizya ulukundo impindi yimwi? (Lolani ni cikope.)

⁹ E Peter wamanyile ukuti wazipizile ukukunda awantu wanji. Amuno apano walinji po Yesu walanzile ukuti: “Lyoo alisundopya lino nawapa; Kundananji. Ndivino nawakunda avino namwemwe kundananji.” (Yoha. 13:34) Lelo nanti ciwe wo-o wizile aleka ukulya na wanawitu na wankazi wano watalinji awa Yuda pa mulandu vye wakutina awina Klistu wawuye awa Yuda. Umutumwa Paulo wavwizye Peter pe vino ‘waluvinye’. (Gal. 2:​11-14) Acino e Peter wivwizile vino wamulunjisile nu kusambililako. Swinya mu ma kalata yonsinye yano walemvile wakomayizile pa cisinka cakuti, tutazipizile vye ukupelela pa kulanda ukuti twakunda awanawitu na wankazi, lelo tuzipizile ukucitapo cimwi.

10. Avyani vino vikafumamo nga cakuti tuli nu “lukundo luntakopeka”? Londololani. (1 Peter 1:22)

¹⁰ E Peter watili tuzipizile ukuwa nu ‘lukundo luntakopeka’ ku wanawitu na wankazi mwiwungwe. (Wazyani 1 Peter 1:22.) Nga tuli nu lukundo lwa musango wo-o, lyo tukulanjizya ukuti ‘tukatontela ukusimichila’ kuno twasambilila. Mwe ko-o ukusimicila mwasanzyamo ni cisinka cakuti ‘e Leza atawa nakapatulula.’ (Imili. 10:​34, 35) Tutanga tuti tukakonka isundo lyakuti mwakundana nga cakuti twakunda vye wamwi mwiwungwe. Kweni kungawa wamwi wano wangatupepucila, ngati awulyanye vino calinji na kwe Yesu. (Yoha. 13:23; 20:2) Lelo e Peter watwizusizyeko ukuti tuzipizile ukukunda awanawitu na wankazi wonsinye, amuno twawa mu lupwa longa.—1 Pet. 2:17.

11. Avyani vino vyasanzyamo mukukunda wanji “nimyezo yinu yonsi”?

¹¹ E Peter walemvile ukuti “kundananji nimyezo yinu yonsi.” Mwe lyo-o izwi lya kuti “nimyezo yinu yonsi” mwasanzyamo ukukunda umuntu wumwi na palyanye pano citazile ukucita wowo. Ku cakulolelako, tungacita wuli nga cakuti umwanawitu nanti e nkazi walanda nanti ukucita cimwi cino catulumisya umwezo? Pa kutalika ncepamwi tungalonda ukuti tumunyocezyemo pe vino acisile ukucila ukumulanjizya ukuti twamukunda. Nomba e Peter wasambilizileko kwe Yesu ukuti, ukulandula kusisecelesya Yehova. (Yoha. 18:​10, 11) E Peter walemvile ukuti: “Ndi wumwi wawawifya mutize namwe mumuwifye; pamwi ndi wumwi wawatuka mutize namwe mumutuke; Ukuwa mwenji muwawapepela.” (1 Pet. 3:9) Nga cakuti mwakunda awantu ni myezo yinu yonsi muliwa ni cikuku swinya mutaliwafulilwa wanji ukuwikako na walyanye wano wamifyenzile.

12. (a) Avyani vinji vino ulukundo lukatwavwa ukucita? (b) Ukulingana ne vidyo ya kuti Tulecita Ifingalenga Twatwalilila Ukuba Abaikatana, avyani vino mukuvwambisya ukucita?

¹² Mwe kalata yakutalicila yino umutumwa Peter walemvile wawomvizye amazwi ya kuti “kundananji nkani.” Ulukundo lwa musango wo-o, lusivwimba pa viluwo vitici lelo lukavwimba pa “mawembuko mavule.” (1 Pet. 4:8) E Peter afwile wizukanga vino Yesu wamusambilizizye pa kutetela wanji. Fwandi pano walanzile ukuti angatetela umuntu winji imiku “munenulambali 7” weni wayilolanga ngati nga wacita wo-o, lyo ali ni cikuku nkaninye. Lelo e Yesu watusambilizizye swensinye ukuti tuzipizile ukutetela wanji “amakumi munenulambali impindi munenula mbali 77,” akuli ukuti kusi ukupenda imiku yino twatetela wanji. (Mat. 18:​21, 22) Nga cakuti cikamitalila ukukonka ko-o ukusunda, mutazipizile ukwivwa uwuwi. Amuno awawomvi wa kwe Yehova wonsinye cikawatalila ukutetela wanji pa mulandu wa kuti tutapwililika. Fwandi icicindamisye cino mwemwe muzipizile ukucita pe yo-o impindi, akwelezya na maka ukutetela awanawitu na wankazi nu kupanga umutende nawo.c

WA ELUDA MWACEMA ING’ONZI

13. Acani cino cingalenga cawomela wa eluda ukucema ing’onzi zya kwe Yehova?

¹³ E Peter afwile atiwilizile amazwi yano Yesu wamunenile pano wazyulupusile vye aya kuti: “Cemanga ing’onzi zyane.” (Yoha. 21:16) Ya-a amazwi yangawomba na kwa eluda. Lelo nanti ciwe wo-o, mpindi zimwi cingawawomela ukuwomba wo-o umulimo uwucindame. Ku cakulolelako, wazipizile ukusakamala indupwa zyawo mwe vino zikulondekwa pa kuti watwalilile ukuwa nu wumi, ukuwalanjizya ulukundo nu kuwavwa ukuwomya wuciwuza wawo ne Yehova. Cinji acakuti, wakatungulula umulimo wa kuwizya swinya wakapekanya nu kulanda amalyasi pa kulongana kwa pi wungwe, ku muputule na kucitungu. Ne wamwi wakawombako mwe Komiti wa Kwivwanilamo ni Vipatala na mwe dipatimenti ya Local Design/Construction. Ukwasowa nu kuvwilika wa-a awonsi wawa ni vya kucita ivivule

14. Acani cino cingavwa wa eluda ukuwasakamala ing’onzi zya kwe Leza? (1 Peter 5:​1-4)

¹⁴ E Peter wanenile wa eluda ukuti “cemanji uwufyo wa kwe Leza,” (Wazyani.1 Peter 5:​1-4) Twamanya ukuti mwewa eluda mwatemwa awanawitu na wankazi swinya mukalondesya sana ukuwasakamala. Lelo mpindi zimwi cingamitalila ukucita wo-o, pa mulandu wa kutonta nanti ukuwa ni vya kucita ivivule. Nomba mungacita wuli nge cawa wo-o? Mwanena Yehova vyonsinye vino mukuyivwa. E Peter Walemvile ukuti: “wensi wino akuwizya ale awawizya amazwi yakwe Leza-nye . . . namaka yano Leza wamupa.” (1 Pet. 4:11) Amuno mpindi zimwi awanawitu na wankazi wangapita muntazi zino zitanga zisile pe yo-o impindi. Mwakwizuka ukuti “umucemi mukulu,” e Yesu, angawavwa ukucila vino mwemwe mungawavwa. Angawavwa pe yo-o impindi na munsi mpya. E Yehova akalonda mwewa eluda mwakunda nu kusakamala awanawitu na wankazi, swinya nu kuwa “mwevilolelo vya wufyo.”

15. Uzye eluda wumwi wacisile wuli pa kucema ing’onzi zya kwe Leza? (Lolani ni cikope.)

¹⁵ Umwanawitu e William wino wawomba wu eluda pa myaka imivule, wamanya vino umulimo wa kusakamala awanawitu na wankazi wacindama. Pano Korona yatalisile, we-e umwanawitu na wa eluda wawuye watantisile ukuti cila sabata watumila cila kawizya wenga na wenga mu mawumba muno walinji. Walondolozile umulandu wuno wacitizile wo-o ukuti: “awavule wawanga wonga pa ma ng’anda nu kuti ncepamwi wangatalika ukwelenganya iviwipe.” Umwanawitu William akawika sana amano ku wanawitu na wankazi wano wakupita muntazi nu kulola vino vikulondekwa pa kuwavwa. Cinji acakuti, akavwamba amabuku na mavidyo pa webusayiti yitu vino vingawavwa. Walanzile nu kuti: “Pe yo-o impindi apano cikulondekwa sana ukuwomba umulimo wa wucemi. Swinya ndi wulyanye vino tukawombesya ukwavwa awantu ukusambilila pe Yehova avino tuzipizile ukuwombesya pa kucema ing’onzi zya kwe Yehova nu kuzyavwa ukutwalilila ukuwa awa cisinka kwe weliwe.”

MWALEKA YEHOVA AWAMISAMBILIZYA

16. Tungawomvya wuli vino tusambilizile mu ma kalata yawili yano umutumwa Peter walemvile?

¹⁶ Tusambilizile vye vitici pa ma kalata yawili yano umutumwa Peter walemvile. Ncepamwi mungalanga muweni mumwi muno mukulondeka ukuzifya. Ku cakulolelako, uzye mutanga mutemwe ukuwakwelenganya pa vizima vino viliwako munsi mpya? Uzye mwapangapo ukuwomba umulimo wa kuwizya ku ncito, ku sukulu nanti ku ncende vye zinji? Uzye muweni inzila zimwi zino tungalanjizizyamo ukuti twakunda nkaninye awanawitu na wankazi? Wa eluda, uzye mukuvwambisya ukucema ing’onzi zya kwe Yehova mukuyikundila? Nga cakuti mwayipitulukamo icete, mungazana ukuti kuli mumwi muno musicita icete. Lelo nga cawa wowo, mutazipizile ukuyivwa uwuwi, muzipizile vye ukuzifyamo. ‘E Leza wawa ni nkumbu,’ swinya alimyavwa ukuzifyamo. (1 Pet. 2:3) Umutumwa Peter watuwomelezizye ukuti: ‘E Yehova alimala ukumisambilizya. Alimisimpisya swinya alimiwomya, muwe nu lufula lweneco.’—1 Pet. 5:10.

17. Avyani vino vilifumamo nga cakuti twatwalilila ukuwa ni cisinka nu kuleka Yehova awatusambilizya?

¹⁷ Pakutalika e Peter walolanga ngati atafisilepo ukuwa ponga ne Yesu. (Luk. 5:8) Lelo pano e Yehova ne Yesu wamwavwizye, wizile awombesya ukutwalilila ukuwa amusambilizi wa kwe Klistu uwa cisinka. Na cino cafumilemo acakuti, e Yehova wizile amupa ulongo “ulwakwinjila muwufumu wamuyayaya uwa Mfumu yitu swinya e Katula e Yesu Klistu.” (2 Pet. 1:11) Ukwasowa nu kuvwilika, e Peter wapocelezile icawila icizima nkaninye. Na mwemwenye nga cakuti mwatwalilila ukuwa ni cisinka ngati we Peter nu kuleka Yehova awamisambilizya, muliwa nu wumi wamuyayaya ku nkolelo. Swinya ‘mulipocelela cino mwasuwila, ikomolwa nanti ipusucilo lya myezo yinu.’—1 Pet. 1:9.