Vino Yehova Watulaya Vilicitika

1. Acani cino calenzile e Abrahamu atwalilile ukusuwila ukuti walinji nu kukwata umwana?

E YEHOVA walayile e Abrahamu ukuti imyiko yonsi yalinji nu kupaalwa pa mulandu na weliwe. (Inta. 15:5; 22:18) E Abrahamu wamanyile ukuti wo-o uwulayo walinji nu kuficiliswa pa mulandu wakuti wasuwizile sana e Yehova. Lelo nanti ciwe wo-o, wizile akumanisya imyaka 100 ne umuci nawe wafisizye imyaka 90, ukwasowa ukuti wakwatepo umwana. (Inta. 21:1-7) Nomba e Baibolo yikati: ‘Abrahamu walindililanga cingatenga atalinji nicakusuwilila, alyakuti awe we yisi wa myiko mivule, ndivino cavwanzilwe.’ (Roma. 4:18) Swinya vino wasuwilanga vizile avicitika. Wizile akwata umwana e Isaki wino walindililanga pa myaka imivule. Acani cino calenzile e Abrahamu asuwile ukuti e Yehova walinji nu kuficilisya vino wamulayile?

2. Acani cino calenzile e Abrahamu asinincizye ukuti e Yehova walinji nu kuficilisya vino wamulayile?

² Pa mulandu wakuti e Abrahamu walinji na wuciwuza uwuwome ne Yehova, calenzile asinincizizye “nukusuwila numwezo wonsi kuno Leza alifisya” vino wamulayile. (Roma. 4:21) E Yehova nawe walolanga e Abrahamu ukuti weciwuza wakwe swinya amulungamane pa mulandu na lyonye isuwilo lino wakweti. (Jemu. 2:23) Iwaliko lya Waroma 4:18 likalanjizya ukuti e Abrahamu walinji ni suwilo swinya wavwambisyanga ukuti vino wamulayile vize vicitike. Lekani tusambilile pe vino Paulo walanzile mu cipandwa 5 ica Waroma pakulindilila ukuti vimwi vize vicitike.

3. Avyani vino Paulo walondolozile pa kulindilila?

³ E Paulo walondolozile umulandu wuno wungalenga tusuwile ukuti ‘Ukulindilila kusisonzya insoni.’ (Roma. 5:5) Walanzile na pe vino vingatwavwa ukutwalilila ukulindilila ukuti vino tukakwenecela vilicitika. Pano tukusambilila pe vino Paulo walanzile pa Waroma 5:1-5, mwakwelenganya pe vino vyamiciticilapo. Ukucita wo-o, kwandi kumyavwe ukusinincizya ukuti vino mukalindilila vilicitika swinya isuwilo linu mwe ya-a amalayo lyandi lyaya likuwomelako. Cinji aca kuti mwandi mulole na vino mungacita pa kuti mutwalilile ukuliwomya. Lekani tulande pe vimwi ivicindame vino tukalindilila, vino Paulo walanzilepo ukuti visisonzya insoni.

IVICINDAME VINO TUKALINDILILA

4. Avyani vino vyalandwapo pa Waroma 5:​1, 2?

⁴ Wazyani Waroma 5:​1, 2. Ya-a mazwi ayano e Paulo walembezile awina Klistu wa mwi wungwe lya mu Roma. Wa-a wanawitu na wankazi wasambilizile pe Yehova ne Yesu, walinji ni suwilo swinya walinji awina Klistu. ‘Muno alisuwilo, Leza wawalolanga ukuti walungamana,’swinya wawapasile nu muzimu wakwe uwutele. Na cino cafumilemo aca kuti, watalisile ukulindilila ivizima vino vyalinji nu kucitika ku nkolelo.

5. Avyani vino Yehova walaya awapakwe?

⁵ E Paulo walembezile awapakwe mu Efese pa vizima vino Yehova wawalayile. Pe vyo-o palinji nu “wupyani wakwe uwa kucindamikwa mu watele.” (Efes. 1:18) E Paulo wanenile na wina Kolose pe kuno walinji nu kuya mukupocela vino Yehova wawalayile. Watili “Mukalolela chino mwasengulilwa ichete mwiyulu.” (Kolo. 1:​4, 5) Fwandi awapakwe wawalaya, ukuzyulupucila kwi yulu nu wumi wa muyayaya kuno waliya mukuteka ponga ne Yesu Klistu.—1 Tes. 4:​13-17; Ukuwu. 20:6.

6. Avyani vino umwanawitu wumwi umupakwe walanzile pi suwilo lyawo?

⁶ Awapakwe wacindamika nkaninye wo-o uwulayo. Mu 1991, umwanawitu Frederick Franz umupakwe wino wawombela e Yehova ni cisinka pa myaka imivule, walanzile ukufuma pansi ya mwezo ukuti: “Twasuwila ukuti vino Yehova watulaya vilicitika. Swensinye wenga na wenga swewa 144,000 tulipocelela icilambu. Co-o icilambu cilizipa nkaninye ukucila na pe vino tukakwelenganya . . . Tucili twacindamika nkaninye wo-o uwulayo . . . Pano tukulindilila ukuti wize wuficiliswe apano tukaya tukuwukundilako. Tulitwalilila ukulindilila asa mulandu ni myaka ukuvula yino yingapitapo nanti yino yilipitapo. Pe yo-o impindi nkakwelenganya sana pe wo-o uwulayo ukucila na pe vino calinji ku nsizi.”

7-8. Alisuwilo ci lino wakapepa wa kwe Yehova awavule mwe ya-a manda wawa nalyo? (Waroma 8:​20, 21)

⁷ Wakapepa wa kwe Yehova awavule mwe ya-a manda, wawa ni suwilo ilipusaneko na lino awapakwe wakwata. Ku cakulolelako, ndi wulyanye vino calinji kwe Abrahamu, nawonye wakakwenecela ukwiza mukuwa nu wumi wa muyayaya munsi pano Uwufumu wa kwe Leza wuliwateka. (Hebe. 11:​8-10, 13) E Paulo walanzilepo vimwi ivizima vino vilicitika pe vino Yehova wawalaya. (Wazyani Waroma 8:​20, 21.) Uzye pano mwasambilizile vye pa malayo ya kwe Yehova, avyani vino mwavwambisyanga ukuti vize vicitike? Uzye mungalanga mwavwambisyanga ukuti wanda wumwi mwize muyizane vye mwe wapwililike swinya mutakulwisyanyapo nu kucita uluwembu? Nanti uzye mungalanga mwivwile icete pano mwasambilizile vye ukuti awakundikwe winu walizyulupuka mu Paradaise? Ukwasowa nu kuvwilika, kufwile kwawa ivivule vino mukavwambisya ukuti vize vicitike pe vino Yehova watulaya

⁸ Nampo nga twawa nu longo lwakuya kwi yulu nanti ukwikala monye munsi, swensinye twawa ni milandu yino yikalenga twasecelela. Swinya yonye imilandu yingalenga tutwalilile ukusuwila ukuti vino Yehova watulaya vilificiliswa. Lekani tulandeko pe vimwi vino Paulo walanzilepo, vyo vyakuma vino Yehova watulaya. Ukucita wo-o, kwandi kutwavwe ukusinincizya ukuti vino Yehova watulaya mpakanye vilicitika.

VINO MUNGACITA PAKUTWALILILA UKUWA NI SUWILO

9-10. Ndi vino Paulo walanzile, avyani vino swe wina Klistu tuzipizile twakwenecela? (Waroma 5:3) (Lolani ni vikope.)

⁹ Wazyani Waroma 5:3. Pano wakutucuzya isuwilo lya kuti Yehova alificilisya vino watulaya likawomelako. Mpindi zimwi nga mwivwa vye ya-a amazwi cingamizungusya. Lelo icisinka aca kuti, awina Klistu wonsinye wazipizile ukwenecela ukuwacuzya. Lekani tulandeko pe Paulo. Walembezile awina Tesalonika ukuti: “Pano twacilinji tuli swensi, twawanenile lyankani kuno tulila tule tuyimbe . . nawuzyenye avino chalinji.” (1 Tes. 3:4) Ne awina Korinte nawo wawalembezile ukuti: “Tukasi tuwamanyisye ivyantazi zino zyatuponezile . . . Twavinzilwe nkaninye nukung’wamilwa.”—2 Kor. 1:8; 11:​23-27.

¹⁰ Awina Klistu mwe ya-a amanda wazipizile wakwenecela ukuti mpindi zimwi wandi wawacuzya mu nzila impusane pusane. (2 Tim. 3:12) Uzye namwemwe wakamicuzya pa mulandu wakuti mwasuwila mwe Yesu swinya mukamukonka? Uzye mpindi zimwi walupwa ni viwuza wakamiseka nu kumicuzya nkaninye? Nanti uzye wino waminjizya incito na wano mukawomba nawo wakamicuzya pa mulandu wa kuti mwe wacisinka? (Hebe. 13:18) Uzye wakamicuzya kuwa mu wuteko pa mulandu wakuwizizya wanji pe vino mwazumilamo? Asa mulandu ni nzila iyili yonsinye yino wangawomvya pa kutucuzya, e Paulo watunenile ukuti tuzipizile twasecelela. Amulandu ci?

11. Amulandu ci wuno tuzipizile ukuyipekanya ukusipicizya intazi?

¹¹ Tuzipizile twasecelela pano tukupita muntazi amuno mukucita wo-o mukafuma cimwi icizima nkaninye. Pa Waroma 5:4 pakati, “nga tukuponela muntazi apano tukasambilila ukusimpisya” [ukusipicizya]. Swe wina Klistu swensinye walitucuzyapo. Fwandi tuzipizile ukuyipekanya ukusipicizya intazi izili zyonsinye zino tungiza tupitemo. Tulipocelela icilambu nga cakuti tukusipicizya nu kutwalilila ukuwombela Yehova ni cisinka. Tusilonda ukuwa ngati awantu wano Yesu welenganyangapo pano walandanga pa mbeyu zino zyaponezile pa mawe mu mulumbe. Awantu wano wawa ngati azyo-o imbeyu, pakutalika wakasecelela nga wivwavye ilyasi lizima. Lelo nga cakuti “amatamyo nu wuyimvi vyakatuka” wakanenuka. (Mat. 13:​5, 6, 20, 21) Kweni ukusipicizya pano tukupita muntazi na pano wakutucuzya kutapepuka. Lelo nga cakuti twasipizizya swinya twatwalilila nu kuwombela Yehova, mukakwiza mukufuma ivizima . Avizima ci vyovyonye vino vikafumamo?

12. Avizima ci vino tukazanamo nga twasipicizya intazi?

¹² E Jemusi umusambi wa kwe Yesu, walanzilepo pa vizima vimwi vino vikafuma mu kusipicizya intazi. Watili: ‘Lekani ukusipicizya kumalizye umulimo wuno kwawa nawo, alyakuti muwe mwewayane nanti kosowelwa cimwi.’ (Jemu. 1:​2-4) Amazwi yano Jemusi walanzile yakalanjizya ukuti ukusipicizya kwacindama nkaninye. Amunzila ci? Amuno kungamyavwa ukuwa ni miwele imizima ndi vino, ukutekanya, ukuwa ni suwilo nu kweyamila pe Yehova. Lelo nanti ciwe wo-o, kwawa navinjinye ivizima vino vyawa mu kusipicizya.

13-14. Avyani vino vikacitika nga cakuti twasipicizya, swinya ukucita wo-o kukalenga atusuwila cani? (Waroma 5:4)

¹³ Wazyani Waroma 5:4. E Paulo walanzile ukuti ukusipicizya ‘akuno kukasechelesya Leza.’ Fwandi nga mukusipicizya intazi lyo mukusecelesya e Yehova. Co-o citakusula mukuti akasecelela pa mulandu wantazi zino mukapitamo, lelo apa mulandu wakulola vino mukatwalilila ukuwa ni cisinka pano mukusipicizya. Ukwivwicisya co-o icisinka kukatuwomelezya nkaninye. Amuno tukamanya ukuti tukasecelesya Yehova.—Amalu. 5:12.

¹⁴ Nga mukwizuka, e Abrahamu wapisile muntazi izivule. Lelo wasipicizizye nu kutwalilila ukuwa ni cisinka. Cinji aca kuti, e Yehova wamulolanga ukuti amulungamane swinya we ciwuza wakwe. (Inta. 15:6; Roma. 4:​13, 22) Nasweswenye wonye avino cingawa. E Yehova asisecelela pa mulandu ni milimo yino tukawomba nanti kuno twawa pano tukumuwombela. Lelo akasecelela pe vyo tukatwalilila ukuwa ni cisinka asa mulandu ni ntazi zino tukupitamo. Swinya swensinye tungasipicizya asa mulandu ni cimo, amaka nanti vino vikatuciticila mu wumi. Uzye kuli intazi yino mukusipicizya nu kutwalilila ukuwa ni cisinka kwe Yehova? Nga kuno yili, lyo muzipizile ukumanya ukuti e Yehova akusecelela nkaninye pe vino mukucita. Nga cakuti twamanya ukuti tukusecelesya e Yehova, tukasuwila ukuti alitulambula pe vino tukatwalilila ukuwa ni cisinka kwe weliwe.

TWALILILANI UKULINDILILA

15. Amazwi ci yano e Paulo wakonkinyepo ukulanda, swinya amulandu ci wuno yangatuzungusizya?

¹⁵ E Yehova akasecelela nga twatwalilila ukuwa ni cisinka kwe weliwe swinya tukusipicizya ni ntazi. Lolani vino Paulo wakonkinyepo ukulanda. Watili: ‘Ukusipicizya kukaleta ukulindilila, nako ukulindilila kusisonzya insoni.’ (Roma. 5:4, 5) Mpindi zimwi ya-a amazwi yangatuzungusya. Amulandu ci? Amuno amazwi yano umutumwa Paulo walanzile pa Waroma 5:​2, yakalanjizya ukuti awina Klistu mu Roma wasuwizile ukuti e Yehova alificilisya vino wawalayile, akuli ukuti “uwukankala wakwe.” Nomba ‘nga cakuti awina Klistu mu Roma wamanyile swinya wasuwizile nu kuti e Yehova alificilisya vino wawalayile, lyo amulandu ci wuno e Paulo wakonkinyepo akulemba amazwi yano yalandanga pa cintu icili conganye?’

16. Uzye isuwilo linu lyalinji wuli pano mwasambilizilevye pa malayo ya kwe Yehova? (Lolani ni vikope.)

¹⁶ Tungivwicisya muno Paulo wasuzile nga twamanya ukuti isuwilo lizipizile ukuwakulilako. Uzye mukakwizuka vino calinji pano mwasambilizilevye pa malayo ya kwe Yehova? Ukwasowa nu kuvwilika, mufwile mwivwile icete nkaninye pa wulayo wakuti tuliyikala mu paradaise monye munsi. Lelo mufwile mwavwilikanga nga cakuti vilicitika. Nomba pe yo-o impindi pano mwiza mwamanya e Yehova icete cete na malayo yakwe aya mu Baibolo, mwiza mwasinincizya ukuti molimonye vilicitika.

17. Avyani vino tukatwalilila ukucita na pa nsizi yakuyipa nu kubatizya?

¹⁷ Na pano mwayipilenye nu kubatizwa, isuwilo linu lyatwalilizile ukuwomelako pano mwayanga mukusambilila ivintu ivivule nu kuwa wasongo mu vya kwe Leza. (Hebe. 5:13–6:1) Pe yo-o impindi cawa ngati vyo vyawa pa Waroma 5:2-4 vyacitika kwe mwemwe. Mwapitapo muntazi izivule, lelo mwasipicizya swinya e Yehova akasecelela pe vino mwacisile. Pa mulandu wakuti mwamanya kuno Yehova wamikunda swinya akasecelela pe vino mukacita, mwawa ni milandu imicindame yino yalenga musinincizye ukuti alificilisya vino wamilaya. Isuwilo linu mu malayo ya kwe Yehova, lyawomelako ukucila vino lyalinji pakutalika. Mwiza mwayisinincizizya mwe weneco ukuti vyonsinye vino Yehova watulaya vilicitika. Ica kuti lyalenga mupiluke mwemwe vyonsinye vino mukacita mu wumi winu, ponga ngati avino mukalola walupwa, vino mukapingula pa vintu na vino mukawomvya impindi yinu.

18. Avyani vino Yehova wamyavwa ukumanya?

¹⁸ Umutumwa Paulo walanzileko pa cintu na cinji icicindame cino mwiza mwamanya pansizi yakuwa mwe ciwuza wa kwe Yehova. E Yehova wamyavwa ukumanya ukuti vino mukalindilila vilificiliswa. Acani cino cingalenga musinincizye ukuti vilificiliswa? E Paulo wanenile awina Klistu amazwi yakuti: ‘Ukulindilila kusisonzya insoni; amuno ulukundo lwa kwe Leza lwitilwa nu Muzimu wutele mu myezo yitu monsi, umuzimu wutele wuno wapwa kwakwe sweswe.’ (Roma. 5:5) Fwandi kwawa umulandu wuno walenga musuwile ukuti vino mukalindilila vilicitika.

19. Avyani vino mungasuwila pa malayo ya kwe Yehova?

¹⁹ Mwakwelenganya sana pe vino Yehova walayile e Abrahamu, vino wasecelelanga pe vino wacitanga na vino wamulolanga ukuti we ciwuza wakwe. Vino Abrahamu wenecelanga vizile avicitika. E Baibolo yikati: “Abrahamu walindililanga numwezo munda, achaleka ayiza apochelela chino Leza wamulayilizizye.” (Hebe. 6:15; 11:​9, 18; Roma. 4:​20-22) Pa mulandu wakusuwila ukuti vino walindililanga vilicitika, atasonzilwe insoni. Namwemwenye mungasuwila ukuti nga mwatwalilila vye ukuwa ni cisinka, mulipocelela vino Yehova watulaya. Kwawa imilandu imivule yino yizipizile ukulenga mwasecelela. Amuno vino mukalindilila vilicitika swinya mutalisonzwa insoni. (Roma. 12:12) E Paulo walemvile ukuti: ‘Si e Leza wino akaleka twalindilila nisuwilo, awizuzye mwensi ni chimwemwe chonsi nu mutende ukuti muwamusuwila, alyakuti ukulolela [ukulindilila] kwinu kulandalile kuwakula nukukula muno amaka ya muzimu wutele.’—Roma. 15:13.