2. Avyani vino vikacitika mu nsi ukufuma mu 1914 swinya awantu wawa wuli?

Awasambi wa kwe Yesu walondanga ukumanya pano Uwufumu walinji nu kutalika ukuteka, na pano amanda yakulecelezya yalinji nukutalika. Wamukolowozizye ukuti: “Tunene pano vyonsi vyoo vilipona, swinya utunene nachino chilipona kukutulanjizya impindi yakwiza kwako nimpindi yansilo yankulonye yoo?” (Mateyu 24:3) Pa kuwasuka, e Yesu walandizile lya nkani ivintu vino vyalinji nu kucitika nga wawa Amfumu mu Wufumu wa kwe Leza. Pe vimwi vino walanzilepo palinji, inkondo, inzala ni vinzumanzi. (Wazya Mateyu 24:7.) E Baibolo yalandizile lya nkani na vino awantu waliwa “mu manda yakupelelechezya” cino calinji nu kulenga yawe ‘ampindi zya wuyimvi.’ (2 Timoti 3:1-5) Vyo-o vyonsinye vizile avitalika ukuloleka nkaninye mu mwaka wa 1914.

3. Amulandu ci wuno ivintu vyawipila umusango wo-o ukufuma pano Uwufumu wa kwe Leza watalicila ukuteka?

Walile e Yesu wawa vye Amfumu mu Wufumu wa kwe Leza, patazimvile walwile inkondo ne Satana ni viwa vyakwe. E Satana wamucimvizye. Baibolo yikatunena ukuti e Satana “wasumvilwe munsi apali ponga nawangeli wakwe.” (Ukuwumbulika 12:9, 10, 12) E Satana ali ni cipyu nkaninye amuno amanyile ukuti wandi ayononwe. Wo-o awuli umulandu wuno iviwipe vivulizile munsi. Amuno awino akulenga ukuti vyacitika. Lelo nombanye Uwufumu wa kwe Leza wandi wize wuvifumyepo vyonsinye.