ISAMBILILO 37
Vino Baibolo Yikalanda pa Ncito ni Ndalama
Uzye ukatela usakamikwapo pe vino wandi uzane indalama nanti kuno wandi uzane incito? Kweni citapepuka ukuyisakamala pampindi yonganye nu kupepa e Yehova ndi vino akalonda. Lelo icizima aca kuti e Baibolo yalanda vino vingatwavwa.
1. Avyani vino e Baibolo yalanda pa ncito?
E Leza akalonda twakwivwa icete pano tukuwomba incito. E Baibolo ikati “ichizima chino umuntu angachita . . . akuyitopwa vino wapinkintinchila.” (Ekawizya 2:24) E Yehova akawombesya nkaninye. Nga tukumukolanya, akasecelela swinya nasweswenye tukawa ni cimwemwe.
Incito yacindama. Lelo tutazipizile ukuleka ayino yiwe pankolelo ukucila na pakupepa Yehova. (Yohani 6:27) Watulaya ukuti nga twawika umulimo wakwe pa nkolelo, aliwatupa vyonsinye vino tukalonda.
2. Uzye tuzipizile twalola wuli indalama?
Nanti aca kuti e Baibolo ikatunena ukuti “indalama zingakusunga,” ikatusoka nu kuti asa zino zingalenga tuwe ni nsansa. (Ekawizya 7:12) Acino ikatuwomelezya ukuti tutazipizile twakunda indalama, lelo ‘twatima na vino tuli navyo.’ (Wazya Waheberi 13:5.) Nga tukuteka umwezo kwe vino tukweti, tutaliwavwambisya ukuwa ni vivule. Co-o cikalenga tutati twawa ni nkongole. (Imilumbe 22:7) Cinji aca kuti tusiteya na magemu ya kusitikapo. Tusitalika na mabizinesi yano yakalenga umuntu akwate zuwa indalama ukwasowa nu kutwincilapo.
3. Uzye tugawomvya wuli indalama ku kwavwa wanji?
E Yehova we Leza wino akapa. Swinya tukamukolanya nga tuli “ninkumbu ukupa wanji.” (1 Timoti 6:18) Tungalanjizya ukuti tutayikunda nga tukuwomvya indalama ku kutunjilila iwungwe nu kwavwa wanji, maka maka awanawitu na wankazi. E Yehova akawikako amano kwe vino vikalenga tuwapa, asa pe vino twapa. Nga tukupa nu mwezo witu wonsinye, tuliwa ni nsansa swinya tuliwamusecelesya.—Wazya Imilimo 20:35.
SAMBILILA IVICILE PA-A
Lola ivizima vino vikafumamo mukulola incito munzila inzima nu kuteka umwezo kwe vino tukweti.
4. Mwacindika e Yehova mwe vino mukawomba incito yinu
Wuciwuza witu ne Yehova wuzipizile ukukuma vino tukalola incito. Tambani e VIDYO, nu kulanzyanya lyo-o iwuzyo.
Mwe vidyo yino tewatamba, avyani vino tewakunda sana pa miwele ye Jason na vino akacita nga ali pa ncito?
Avyani vino wacisile pa kuti incito yitamusendela nkani impindi?
Wazyani Wakolose 3:23, 24, nu kulanzyanya lyo-o iwuzyo:
Amulandu ci wuno vino tukalola incito vyacindamila?
Incito yacindama. Lelo tutazipizile ukuyicindamika sana ukucila na pakupepa Yehova
5. Ivintu vikatuzipizila nga tukuteka umwezo kwe vino tukweti
Awavule wakalonda ukuwa ni ndalama imvule. Lelo vino Baibolo ikalanda vyapusanako. Wazyani 1 Timoti 6:6-8, nu kulanzyanya lyo-o iwuzyo:
Avyani vino Baibolo ikatuwomelezya ukucita?
Nanti tusi ni vivulenye tungawa ni nsansa. Tambani e VIDYO, nu kulanzyanya lyo-o iwuzyo.
Avyani vino vikalenga zyo-o indupwa ukuwa ni nsansa asa mulandu nu kuti zitawa ni ndalama imvule?
E Yesu walanzile pa viwipe vino vikafumamo nga cakuti umuntu ali ni ndalama imvule nomba akuvwambilapo na zinji. Wazyani Luka 12:15-21, nu kulanzyanya lyo-o iwuzyo:
Acani cino wasambililako ku cilanjililo cino Yesu walanzile?—Lola e vesi 15.
Wazyani nu kulinganya Imilumbe 10:22 ne 1 Timoti 6:10. Apano mulanzyanye ya-a amawuzyo:
Acani cino ukulola ukuti acino cacindamisya pa kuwa ciwuza wa kwe Yehova, na pa kuwa ni ndalama imvule? Amulandu ci?
Antazi ci zino zyawa mukuvwambisya indalama imvule?
6. Yehova aliwatupa vino tukalonda
Nga cakuti cikutusyupa ukuzana indalama ni ncito, apano tungamanya nga twasuwila mwe Yehova nanti awe. Tambani e VIDYO pakuti mulole vino tungacita nga twawa na zyo-o intazi, nu kulanzyanya ya-a amawuzyo.
Ukulingana ne vidyo, antazi ci zino umwanawitu wapisilemo?
Wazicimvizye wuli?
Wazyani Mateyu 6:25-34, nu kulanzyanya lyo-o iwuzyo:
Avyani vino Yehova walaya ukuti aliwacitila wano wakamukolezya mu wumi wawo?
WAMWI WAKATI: “Ntange nkwanisye ukuzanwa mu kulongana cila sabata. Amuno nzipizile ukuwombesya ukusakamala ulupwa lwane.”
Aliwaliko ci lino likakwavwa ukumanya ukuti ukupepa Yehova akuno kuzipizile ukuwa pa nkolelo mwe vyonsinye?
IVISINKA VIKULU
Incito ni ndalama vyacindama, lelo vitazipizile ukutufumya mukuwombela Yehova.
Avyani Vino Wasambilila?
Avyani vino vingakwavwa ukukanawika sana amano ku ncito?
Awuzima ci wuno wawa mu kutiima na vino tukweti?
Ungalanjizya wuli ukuti wasuwila vino Yehova walaya ukuti aliwapa awantu wakwe vino wakalonda?
MANYILAPO NA VINJI
Lola nga Baibolo ikati indalama zyawipa.
“Uzye Indalama Amusisi wa Luwembu?” (Icipande ca pa webusayiti)
Sambilila vino tungawomvya indalama mukusecelesya Leza.
“Uzye e Baibolo Ikati Wuli Pakupa?” (Icipande ca pa webusayiti)
Uzye ukuteya injuka kwawa icetenye?
“Vino Baibolo Ikalanda pa Kuteya Injuka” (Loleni!, March 2015)
Lola cino calenzile umonsi wumwi ukuleka uwung’o nu kuteya injuka.
“Nakunzile Nkaninye Ulwizyo lwa Kucimvyanya pa Kavwalo” (Ulupungu lwa kwa Kalinda, November 1, 2011)