ISAMBILILO 01
Uzye e Baibolo Ingakwavwa Wuli mu Wumi Wako?
Mupipi nu wili wensinyene akalonda ukumanya umulandu wuno tukayimbila wo-o, na vino uwumi witu wuliwa ku nkolelo. Swinya tukasakamala pe vino vingatwavwa ukuzana indalama zya kuyisakamalilamo, na vino vingatwavwa ukuwa ni nsansa mu lupwa. Awavule wazana ukuti e Baibolo isiwavwa vye ukuzana ivyasuko ku mawuzyo yano wakalondesya ukumanya, lelo mwawa nukupanda amano kuno kukawavwa nkaninye mu wumi. Nga wewe? Uzye ukulola ukuti e Baibolo ingavwa awantu?
1. Amawuzyo ci yamwi yano Baibolo ikakwasuka?
E Baibolo ikakwasuka amawuzyo amavule ndi vino: Uzye uwumi watalisile wuli? Acani cino twawela mu nsi? Amulandu ci wuno tukayimbila? Acani cino cikacitika umuntu ndi wafwa? Nga cakuti umuntu uwili wensinye akalonda umutende, lyo amulandu ci wuno munsi mwawela inkondo? Uzye insi yiliwa wuli ku nkolelo? Citawipa ukuwuzya ya-a amawuzyo swinya e Baibolo ikatunena ivyasuko vino tungasuwila.
2. Uzye e Baibolo ingatwavwa wuli pa kuti twawa ni nsansa mu wumi?
Ikatupanda amano amazima. Ku cakulolelako, ikasambilizya awa mu lupwa pe vino wangawa ni nsansa. Ikatunena na vino tungacita nga tusakamisilwe. Ikatusambilizya na vino tungacita pa kuti twakunda incito yino tukawomba. Pano tukuya tukusambilila, ulimanyilako na vinji vino Baibolo ikalanda pe ya-a amalyasi na pe vinji. Uliyisinincizizya wemweneco ukuti “amawaliko yonsinye [vyonsinye vino vyawa mwe Baibolo] . . . ayakutwavwa.”—2 Timoti 3:16.
Lyo-o ibuku litapyanizile pe Baibolo. Lelo liwezileko mukukwavwa ukuyisinincizizya wemweneco vino vyawa mwe Baibolo. Acino tukukuwomelezya ukuti uwawazya amawaliko yonsinye yano ukuzana mwenemo nu kuyalinganya kwe vino ukusambilila.
SAMBILILA IVICILE PA-A
Lola vino Baibolo yavwa awantu, na vino ungacita pa kuti uwakwivwa icete pano ukuwazya, nu mulandu wuno cicindamizile ukuti wanji wakwavwe ukuyivwicisya.
3. Baibolo ingatutungulula
E Baibolo yawa ngati we toci wino akatukozezya kuno tukuya. Ingatwavwa ukupingulapo icete nu kutwavwa ukumanya vino vilicitika ku nkolelo.
Wazyani Amalumbo 119:105, nu kulanzyanya ya-a amawuzyo:
Uzye wino walemvile Amalumbo walolanga wuli e Baibolo?
Nga wewe ukayilola wuli?
4. Ingasuka amawuzyo yano twawa nayo
E Baibolo yavwizye umwanaci wumwi ukuzana ivyasuko ku mawuzyo yano yamusakamisile pa myaka imivule. Tambani e VIDYO, nu kulanzyanya ya-a amawuzyo.
Amawuzyo ci yano we-e umwanaci wakweti?
Uzye ukusambilila Baibolo kwamwavwizye wuli?
E Baibolo ikatuwomelezya ukuwuzya amawuzyo. Wazyani Mateyu 7:7, nu kulanzyanya ya-a amawuzyo:
Amawuzyo ci yano wawa nayo yano e Baibolo ingamyavwa ukuzana ivyasuko?
5. Ungakwivwa icete ukuwazya Baibolo
Awavule wakakwivwa icete ukuwazya Baibolo swinya wakazana ivizima. Tambani e VIDYO, nu kulanzyanya ya-a amawuzyo.
Uzye wa-a awacitici wayivwanga wuli pa kuwazya?
Acani calenga wakunde ukuwazya Baibolo nanti aca kuti watakunda ivya kuwazya?
E Baibolo ikatunena ukuti ingatupa uwutunguluzi wuno wungatusansamusya nu kutupa isuwilo. Wazyani Waroma 15:4, nu kulanzyanya lyo-o iwuzyo:
Uzye wo-o uwulayo uwa kuti e Baibolo ingakusansamusya nu kukupa isuwilo walenga utalike ukuyivwa wuli?
6. Wanji wangatwavwa ukwivwicisya Baibolo
Ukusanzya pa kuyiwazizya Baibolo pa lwawo, awavule wazana ukuti nga cakuti kuli uwakuwavwa apano wakakwivwicisya sana vino wakuwazya. Wazyani Imilimo 8:26-31, nu kulanzyanya lyo-o iwuzyo:
Acani cino cingatwavwa ukwivwicisya Baibolo? Lolani amavesi 30 ne 31.
Umonsi umwina Ethiopia walondekanga uwa kumwavwa ukwivwicisya Baibolo. Na pe yonye impindi awavule wazana ukuti wakakwivwisya e Baibolo nga kuli uwa kuwavwa.
WAMWI WAKATI: “Ukusambilila Baibolo akuyisumbila vye impindi.”
Nga wewe ukakwelenganyapo wuli? Swinya amulandu ci?
IVISINKA VIKULU
Mwe Baibolo mwawa ukupanda amano kuno kukatwavwa mu wumi, ikakwasuka amawuzyo amavule yano tukalondesya ukumanya, swinya yikatusansamusya nu kutupa isuwilo.
Avyani Vino Wasambilila?
Akupanda mano ci kuno tungazana mwe Baibolo?
Amawuzyo ci yamwi yano e Baibolo ikakwasuka?
Avyani vino ungakunda ukusambilila mwe Baibolo?
MANYILAPO NA VINJI
Vino Baibolo ikalanda vikatwavwa na pe yonye impindi.
“Vino Vyawa mwe Baibolo—Vikatwavwa Nkaninye” (Ulupungu lwa kwa Kalinda Na. 1 2018)
Lola vino e Baibolo yavwizye umonsi wumwi ukutalika ukuyilola ukuti wacindama, na vino yamwavwa ukuwa ni nsansa.
Lola ukupanda amano kwa mu Baibolo kuno kungavwa awa mu lupwa.
Lola vino Baibolo ikalanda pa vya wufi vino awavule wamanya pe wino akateka insi.
Amulandu ci Wuno Muzipizile Ukusambilila Baibolo?—Yonsinye(3:14)