ISAMBILILO 55
Uwakwavwa Iwungwe Muno Wawa
Insi yonsinye imintapendwa ya wantu wakawombela Yehova ni nsansa mu mawungwe muno wawa. Wakakwivwa icete nkaninye pa wutunguluzi wuno wakapocelela, swinya wakakwavwa iwungwe mu nzila imvule. Uzye avino ukayivwa nawenye pi wungwe muno wawa?
1. Amwinye mumwi muno ungawomvezyamo amaka ni mpindi yako pakwavwa iwungwe?
Kwawa vino swensinye tungacita mwi wungwe. Ku cakulolelako, nga ca kuti mwi wungwe linu mwawa awakote nanti wano wakalwalilila, ungawavwilizyako ukuya mukulongana. Asa coco conga, ungawatwalilako ivyakulya nanti vinji vino wakulonda. Nanti ungawazifizyako mu ng’anda. (Wazya Jemusi 1:27.) Cinji acakuti tungavwilizyako ukuyanya nu kuzifyako Ing’anda ya Wufumu. Pasi nanti wenganye wino akatupaticizya ukucita vyo-o. Ukukunda e Yehova na wanawitu akuno kukalenga tuti “Ne wa-a Ntuma! Nandi mpite!”—Ayizeya 6:8.
Wano wabatizwa wangavwa iwungwe mu nzila imvule. Awanawitu wano wakafikapo ukulingana navino vikalondekwa mu Mawaliko, wangawomba uwutumikila nanti wueluda pa kwavwilizyako iwungwe. Awanawitu na wankazi wangawomba wupainiya pa kutunjilila umulimo wakuwizya. Wa Nte wanji wangakwavwilizyako ukuzenga ivikulwa vyakupepelapo Yehova nanti ukuya mukuwombela ku mawungwe yanji kuno kukulondwa awawomvi na wanji.
2. Tungawomvya wuli indalama na vinji vino twawa na vyo pakwavwa iwungwe?
Tungacindika Yehova nga tukumupa “ivyakufima vimwi muvizima vyonsi,” vyo twawa navyo. (Imilumbe 3:9) Tukalola ukuti alongo nkaninye ukusangulako indalama ni vyuuma vino twawa na vyo pakwavwa iwungwe na pakutunjilila umulimo wakuwizya wuno wukuwombwa insi yonsinye. (Wazya 2 Wakorinte 9:7.) Imisangulo yitu wakayiwomvya na mukwavwilizyako wano waponezilwe na masanso. Awavule wakasolapo ukupawula “indalama zimwi” pakuti wasangulako. (Wazya 1 Wakorinte 16:2.) Tungasangulako ukuwomvya utumbokosi tuno tukawa mu vifulo vyakupepelapo Yehova nanti ukuwomvya intaneti pa donate.jw.org. E Yehova watupa ulongo lwakulanjizya vino twamukunda ukupitila mwe vino tukasola ukuwomvya ivyuuma vino twawa navyo.
SAMBILILA IVICILE PA-A
Lola inzila zinji muno ungavwilamo iwungwe.
3. Tungawomvya ivyuuma vitu
E Yehova ne Yesu wakunda wonsinyene wano wakapa ni nsansa. Ku cakulolelako, e Yesu wasalifizye nkaninye umwanaci umufwilwe wino wapile vino walinji navyo kwe Yehova asamulandu nu kuti wakweti tutici. Wazyani Luka 21:1-4, nu kulanzyanya ya-a mawuzyo:
Uzye tuzipizile ukusangula indalama imvule pa kusecelesya e Yehova?
Uzye e Yehova ne Yesu wakayivwa wuli nga cakuti twasangulako mu kuyikundila vilyanye vino tukweti?
Pakuti umanye vino imisangulo yitu yikawomba, tambani e VIDYO, nu kulanzyanya lyo-o iwuzyo.
Uzye imisangulo yitu wakayiwomvya wuli pakwavwilizyako amawungwe insi yonsinye?
4. Naswenye tungavwilizyako
Mu mpindi zya mu Baibolo, awantu wa kwe Yehova wawombesyanga nkaninye pakuti wavwilizyeko ukuzifya pano wapepelanga Yehova. Watapelelanga vye pa kusangula indalama, lelo kwawanga na vinjinye vino wacitanga. Wazyani 2 Imilandu 34:9-11, nu kulanzyanya lyo-o iwuzyo:
Acani cino umwina Israeli wensinye wacitanga pakusakamala ing’anda ya kwe Yehova nanti icifulo cakumupepelapo?
Pakuti mulole vino Inte zya kwe Yehova wakakonka co-o icakulolelako ca wantu wa mu Baibolo, tambani e VIDYO, nu kulanzyanya ya-a mawuzyo.
Amulandu ci wino cacindamila ukusunjila Ing’anda yitu iya Wufumu iya wusaka nukuzifya vino vikononeka?
Avyani vino ungacita pakwavwilizyako?
5. Awanawitu wangawombesya ukufikapo ukuwombako imilimo na yinji mwi wungwe
Amawaliko yakawomelezya awina Klistu awonsi ukuwomba pano pangapelela amaka yawo ukufikapo pakuti wakwavwa iwungwe. Pakulola icakulolelako, tambani e VIDYO, nu kulanzyanya lyo-o iwuzyo.
Ukulingana ne vidyo avyani vino e Ryan wacisile pakwavwa sana iwungwe?
E Baibolo yikalondolola vino vikalondekwa pakuti umwanawitu afikepo pa wutumikila nanti pa wueluda. Wazyani 1 Timoti 3:1-13, nu kulanzyanya ya-a mawuzyo:
Avyani vino vikalondekwa ku mwanawitu wino akulonda ukuwa amutumikila nanti eluda?
Uzye indupwa zyawo zizipizile ukuwa wuli?—Lola vesi 4 ne 11.
Avizima ci vino awa mwi wungwe wakazanamo nga cakuti awanawitu wakuwombesya ukufika pe vyo-o vino vikalondekwa mu Mawaliko?
WAMWI WAKATI: “Uzye Inte zya kwe Yehova zikafumya kwinye zyonsinye zyo-o indalama zino wakawomvya?”
Ungasuka wuli?
IVISINKA VIKULU
E Yehova akasalifya nkaninye pe vino tukawombesya ukuwomvya amaka yitu, impindi ni vyuuma pakwavwa iwungwe.
Avyani Vino Wasambilila?
Tungawomvya wuli impindi na maka yitu pakwavwa iwungwe?
Tungawomvya wuli ivyuuma vitu pakwavwa iwungwe?
Amuvyani vino ukulonda ukwavwilamo iwungwe?
MANYILAPO NA VINJI
Lola umulandu wuno e Yehova asinenela awantu wakwe ya-a amanda ukuti wamupa icikumi.
“Avyani Vino Baibolo Yikalanda pa Kupa ici Kumi?” (Icipande ca pa webusayiti)
E Baibolo yalanda ukuti awonsi awabatizwe awano wangawombako imilimo yimwi mwiwungwe. Nga awanaci awabatizwe weni wangawombako yoyo imilimo?
“Amaka ya Kutungulula Yano Waeluda Wakwata mwi Wungwe” (Ulupungu lwa kwe Malonda, February 2021)
Lola wa-a awanawitu awasipe wano wakayipelesya ukusenda amabuku nu kuyatwala ku wina Klistu wawuye.
Lola vino sweswe twapusanako nu tuwungwe tunji utwa macalici, pe kuno tukafumya indalama zino tukawomvya mu mulimo witu.
“Akwinye Kuno wa Nte Wakafumya Indalama Zino Wakawomvya mu Mulimo Wawo?” (Icipande ca pa webusayiti)