E Baibolo ikalanda sana pa Wufumu wa kwe Leza. E Yehova aliwomvya wonye Uwufumu pa kulenga yo-o insi ukuwa e Paradaise. Uzye Uwufumu acani? Twamanya wuli ukuti watalika ukuteka? Avyani vino wawomba? Swinya avyani vino wulicita kunkolelo? Lyo-o isambililo na yano yakonsilepo yawili yaliyasuka ya-a amawuzyo.

1. Uzye Uwufumu wa kwe Leza acani, swinya Imfumu mwe wonye Uwufumu weweni?

Uwufumu awuteko wuno wapangwa ne Yehova. E Yesu Klistu awili Imfumu mwe wo-o Uwufumu swinya akatecela kwi yulu. (Mateyu 4:17; Yohani 18:36) E Baibolo yikalanda ukuti : “aliwa Amfumu . . . uwufumu wakwe wutalisila nawanda!” (Luka 1:32, 33) Pa mulandu wakuti e Yesu, Amfumu mu Wufumu wa kwe Leza, aliwateka awantu wonsinye munsi.

2. Awaweni wano waliwateka ne Yesu?

E Yesu ataliwateka wenga. Baibolo ikati “awa misango yonsi, na wa ndimi zyonsi, na wantu wonsi ni myiko yonsi. Wawacita azyamfumu.” (Ukuwumbulika 5:9, 10) Nomba we wanga wano waliwateka ne Klistu? Ukufumililavye pano e Yesu wizizile mu nsi, imintapendwa ya wina Klistu wakawa awasambi wakwe. Lelo awali vye 144,000 awano waliya mukuteka ne Yesu kwi yulu. (Wazya Ukuwumbulika 14:1-4.) Ne wano wasyala waliwatekwa na wo-o Uwufumu.—Amalumbo 37:29.

3. Uzye Uwufumu wa kwe Leza walusya wuli amawuteko ya wantu?

Nanti acakuti wakateka wakakwelezya na maka ukucita ivizima, watawa na maka yakucita consinye cino wakulonda. Wo-o vino wakalecelana ukuteka, cila muntu akayiwela na melenganyo yakwe ayakucita vino akulonda. Lelo e Kateka mu Wufumu wa kwe Leza e Yesu, pasi uwili wensinye wino alimupyana. E Leza wimika “Uwufumu wuno wutalitela wononeke.” (Daniel 2:44) E Yesu aliwateka insi yonsinye, swinya ataliwamwamila mbali. Wawa nu lukundo, icikuku, nu mulinganya. Yonye imiwele ayino alisambilizya na wantu ukuwa nayo. Ica kuti nawonye waliwalanjizya ulukundo, icikuku nu mulinganya kwe wanji.—Wazya Ayizeya 11:9.

4. Uwuteko wa kwe Leza awuno wuliwateka insi yonsinye

E Yesu wawa na maka ya kuteka ukucila izya mfumu zyonsinye zino zyatekapo. Wazyani Mateyu 28:18, nu kulanzyanya ya-a amawuzyo:

• Awupusano ci wuno wawa pa maka ya kuteka yano Yesu wawa nayo na ya wantu?

Amawuteko ya wantu yasitwalilila. Yakapiluka liwili liwili, swinya cila muntu asiteka insi yonsinye, lelo akateka vye icipya cimwi. Ngu Wufumu wa kwe Leza weni ciliwa wuli? Wazyani Daniel 7:14, nu kulanzyanya ya-a amawuzyo:

• Amulandu ci wuno cazipila wo-o vino Uwufumu wa kwe Leza “wutalitela wononeke”?

• Amulandu ci wuno cazipila wo-o vino wuliteka insi yonsinye?

5. Amawuteko ya wantu yazipizile ukufumapo

Amulandu ci wuno Uwufumu wa kwe Leza wuzipizile ukufumyapo ama wuteko ya wantu? Tambani e VIDYO, nu kulanzyanya lyo-o iwuzyo.

VIDYO: Uzye Uwufumu wa kwe Leza Acani?—Akaputulwa (1:41)

• Avyani vino vyafumamo mukutekwa na wantu?

Wazyani Ekawizya 8:9, nu kulanzyanya lyo-o iwuzyo:

• Uzye ukulola ukuti Uwufumu wa kwe Leza wuzipizile ukufumyapo amawuteko ya wantu? Amulandu ci?

6. Uwufumu wa kwe Leza wawa na wakateka wano wamanya vino tukayivwa

Pa mulandu wakuti e Yesu walinjipo amuntu, “Angatwivwila inkumbu mu wutonte witu.” (Waheberi 4:15) E Yehova wasonta awonsi na wanaci awali 144,000 ukufuma “mumyiko yonsi awandimi zyonsi awantu wansi zyonsi na wamiwili imilekane lekane,” ukuti wize wateka ne Yesu.—Ukuwumbulika 5:9.

• Uzye wivwa wuli ukumanya ukuti e Yesu na wano aliwateka nawo walinji awantu? Amulandu ci?

7. Uwufumu wa kwe Leza wawa na masundo yano yalusya aya wantu

Amawuteko yakawika amasundo yano yangalenga ivintu ukuzipila awatekwa nu kuwacinjilila. Nu Wufumu wa kwe Leza nye wawa na masundo yano awatekwa wazipizile ukukonka. Wazyani 1 Wakorinte 6:9-11, nu kulanzyanya ya-a amawuzyo:

• Uzye ukulola ukuti insi yingawa wuli nga cakuti wensinye akukonka amasundo ya kwe Leza?a

• Uzye ukulola ukuti e Yehova wawa ni nsambu zya kunena awatekwa wa Wufumu wakwe ukukonka ya-a amasundo? Amulandu ci?

• Avyani vino vikalanjizya ukuti na walyanye wano wasikonka ya-a amasundo wangapiluka?—Lolani vesi 11.

IVISINKA VIKULU

Uwufumu wa kwe Leza awuteko wa kwi yulu wuno wuliwateka insi yonsinye.

Avyani Vino Wasambilila?

• Awaweni wano waliwateka mu Wufumu wa kwe Leza?

• Uzye Uwufumu wa kwe Leza walusya wuli amawuteko ya wantu?

• Avyani vino Yehova akakwenecela awatekwa wa Wufumu wakwe ukucita?

MANYILAPO NA VINJI

Lola vino Yesu wasambilizizye pa cifulo kuno kwawa Uwufumu wa kwe Leza.

“Uzye Uwufumu wa kwe Leza Wawa mu Mwezo Wako?” (Icipande ca pa webusayiti)

Amulandu ci wuno Inte zya kwe Yehova wakasolelapo ukuwa awacisinka ku Wufumu wa kwe Leza ukulusya ku mitecele ya wantu?

Wayipa ku Wufumu wa kwe Leza (1:43)

Lola vino Baibolo ikalondolola pe wa 144,000 wano Yehova akasola ukuti wize wateka ne Yesu.

“Awaweni Wano Wakaya kwi Yulu?” (Icipande ca pa webusayiti)

Acani cino calenzile umwanaci wumwi wino wanyefilwe mu cifungo ukuzumila ukuti e Leza awino angafumyapovye ulufyengo munsi?

“Vino Nazanile Ivyasuko kwe Vino Vingafumyapo Ulufyengo” (Loleni!, November 2011)

E Yesu wasambilizizye ukuti awasambi wakwe watazipizile ukuwa awa “mu nsi.” (Yohani 15:19) Mukukanayisanzya mu vikanza vya nsi mwasanzyamo ukukanawa kuluwali ululi lonsinye ulwa mapolitiki nanti ukulwako inkondo. Ukulandavye icisinka asa lyonsi pano ukucita wo-o kwapepuka. Wamwi wangatuseka nukutuseka pe vyo twasolapo ukucita. Nomba acani cino cingatwavwa ukukanayisanzya mu vikanza vya nsi nu kutwalilila ukuwa awa cisinka kwe Yehova?

1. Uzye awina Klistu wakalola wuli uwuteko?

Awina Klistu wakacindika uwuteko. Tukakwivwila vino Yesu watunenile ukuti “ivintu vino a vyakwe Kesari, panji Kesari,” tukacita wo-o ukupitila mukutontela amasundo yansi, ndi vino yano yakatunena ukulipila imisonko. (Marko 12:17) E Baibolo ikasambilizya ukuti cino calenga amawuteko yatwalilile ukuteka amuno e Yehova wayazumilizya. (Waroma 13:1) Fwandi twamanya ukuti amawuteko ya wantu yatakwata amaka ukucila pe Leza. Acino tukalindilila Uwufumu wakwe ukuti wize wufumyepo intazi zyonsinye zino zyawa munsi.

2. Tungalanjizya wuli ukuti tusiyisanzya mu vikanza vya nsi?

Tukakolanya e Yesu wino atayisanzizye mu vikanzya vya nsi. Ku cakuloleko, pano awantu waweni icizungusyo conga cino wacisile wakasi wamuwike pa wufumu, lelo wakanile. (Yohani 6:15) Pa nsizi wizile alanda cino wakanizile watili, “Uwufumu wane wusi awa munsi yoo.” (Yohani 18:36) Swe wasambi wa kwe Yesu, tusiyisanzya mu vikanza vya nsi. Ku cakulolelako, tusilwako inkondo. (Wazya Mika 4:3.) Tukacindika vino vikakwimililako insi, ndi vino wafulagi. Lelo nanti ciwe wo-o tusivipa umucinzi wuno tufwile ukupa Leza. (1 Yohani 5:21) Tusitunjilila akawungwe kamwi akamapolitiki nanti uwili wensinye wino akwimilila. Mwe vyonsinye vyo-o na mwe vinji, tukalanjizya ukuti swe wacisinka ku wuteko wa kwe Leza.

SAMBILILA IVICILE PA-A

3. Awina Klistu wacisinka wasiyisanzya mu vikanza vya insi

E Yesu na wasambi wakwe watusila icakulolelako. Wazyani Waroma 13:1, 5-7; 1 Peter 2:13, 14. Apano, tambani VIDYO, nu kulanzyanya ya-a amawuzyo.

VIDYO: Awina Klistu Wacisinka Wasiyisanzya mu Vikanza vya Nsi—Uluwali 1 (4:28)

• Amulandu ci wuno tuzipizile twatontela amawuteko?

• Amwinye mumwi muno tungalanjizizyamo ukuti tukutontela uwuteko?

Nga kwawa inkondo, wamwi wangalanjizya ngati watawa mu vikanza vya nsi. Lelo wakalanga wakutunjilila insi zino zikulwisyanya. Uzye cikasula mwinye ukukanawa ku luwali lwa nsi? Wazyani Yohani 17:16. Apano, tambani e VIDYO nu kulanzyanya ya-a amawuzyo.

VIDYO: Awina Klistu wa Cisinka Wasiyisanzya mu Vikanza vya nsi—Uluwali 2 (3:11)

• Uzye cikasula mwinye ukukanawa uluwali lwa nsi?

Uzye ungacita wuli nga cakuti uwuteko wakunena ukucita vimwi vino vyapusana ni sundo lya kwe Leza? Wazyani Imilimo 5:28, 29. Apano, tambani VIDYO nu kulanzyanya lyo-o iwuzyo.

VIDYO: Awina Klistu wa Cisinka Wasiyisanzya mu Vikanza Vyansi—Uluwali 3 (1:18)

• Nga cakuti isundo lya wantu lyapusana ni sundo lya kwe Leza, alisundo lya kwe weni lino tuzipizile ukusolapo ukwivwila?

• Amwinye mumwi muno awina Klistu wangakana ukutontela uwuteko?

4. Utazipizile ukuyisanzya mu vikanza vya nsi mwe vino ukakwelenganya nu kucita

Wazyani 1 Yohani 5:21. Apano, tambani VIDYO nu kulanzyanya ya-a amawuzyo.

VIDYO: Umulandu Wuno Awina Klistu Wacisinka Wazipizile Ukuwela Awasipe—Pa Kukanayisanzya mu Vikanza Vyansi (2:49)

• Ukulingana ne vidyo, amulandu ci wuno e Ayenge wapingulizile ukukanayisanzya mu kawungwe ka vikanza vya nsi, nanti ukukana ukuzevyako vino awa munsi wakazevya ukuwikako nu ku salyuta kwe flagi?

• Uzye ungati vino wapinguzilepo vyalinji icetenye?

Ampindi ci zinji pano cingatuwomela ukukanayisanzya mu vikanza vya nsi? Tambani VIDYO, nu kulanzyanya ya-a amawuzyo.

VIDYO: Vino Twasambilizile mu Lupungu lwa kwe Malonda—Twalililani Ukukanayisanzya mu Vikanza Vyansi (5:16)

• Uzye tungalanjizya wuli ukuti tusiyisanzya mu vikanza vya nsi pano tukutamba ulwizyo lumwi muno insi impusane pusane zikucimvyanya?

• Tungacita wuli pakuti tutayisanzya mu vikanza vya nsi nanti acakuti vino wano wawa mu vikanza vya nsi wapingulapo vingatuzipila nanti ukutuwipila?

• Amulandu ci wuno ukwivwa sana amalyasi pa mulawasa yano yakalanda pa mapolitiki nanti ukuzanwa sana na wantu wano wakunda ivya mapolitiki kungalenga cituwomele ukukanawa uluwali lwa nsi?

IVISINKA VIKULU

Amwinye mumwi muno awina Klistu wazipizile ukuwombesya nkaninye pakukanawa uluwali lwa nsi mwe vyo wakakwelenganya nukucita?

Avyani Vino Wasambilila?

• Avyani vino awa muwuteko wakatwenecela ukucita?

• Amulandu ci wuno tusiyisanzizyako mu vikanza vya nsi?

• Amwinye mumwi muno cingatuwomela ukukanayisanzya mu vikanza vya nsi?

MANYILAPO NA VINJI

Amuvyani mumwi muno tuzipizile ukupilukako pakuti tutati twayisanzya mu vikanza vya nsi?

E Yehova Atatulecelezyapo (3:14)

Uzye indupwa zingacita wuli pakuyipekanizizya lyankani ku melezyo yano yangalenga wize wayisanzye mu vikanza vya nsi?

Ukukanayisanzya mu Vikanza vya nsi Pano Muli pa Cintu Wavule (4:25)

Amulandu ci wuno tungalandila ukuti ukutunjilila insi asa kuno kungalenga umuntu ukucindama sana?

“Kwe Leza Vyonsinye Vingacitwa” (5:19)

Lola vino ungacita pakukanawa uwa munsi yo-o pano ukusolapo incito yakutalika ukuwomba.

“Wila Muntu Wazipila Ukuyisendela Icisendo Cakwe Umwenecho” (Ulupungu lwa kwa Kalinda, March 15, 2006)