ISAMBILILO 11

Ukukanatalalila pa Kulanda

Waroma 12:11

IVISINKA VYA KWIZUKA: Pa kuti iwumba livwambisye ukwivwa, mwakampuka pa kulanda.

Yivwicisyani vino mukupekanya. Yelenganyani sana pa mulandu wuno ivyewo vino mukuya mukulanda vicindamizile. Vivwicisyani pa kuti mwize mwalanda ukufuma pa nsi ya mwezo.
Yelenganyani pi wumba. Mwakwelenganya sana pe vino ivyewo vyo muliya mukuwazya nanti ukulanda vingavwa wanji, na pa nzila yino mungavilandilamo pa kuti viwafike pa mwezo.
Mutatalalila pa kulanda. Mwacincila pa kulanda. Mwaleka vino mukuyivwa mu mwezo vyalolecela mwe vino mukuwomvya icete umuwili na vino mukuloleka pa minso.

Mwawomvya icete umuwili pa kuti citaloleka ngati aciwelezyo. Mwawomvya umuwili pano cayana, asa kuwomvya vye ciwomvye womvye. Mutatalalila pa kulanda nga mwafika pa cisinka cikulu cino mukulonda ukuti awantu wivwe nu kucitapo cimwi. Swinya mutazipizile ukukampuka ukufuma pa ntalicilo yi lyasi mpaka ku nsilo ica kuti ni wumba alitendwa.