Nehemías

2 Tá yo̱o̱ nisán* ña̱ ku̱i̱ya̱ 20 ña̱ xáʼndachíñu ta̱ Artajerjes, saá ta̱xina vino koʼora. Ta yi̱ʼi̱ ki̱ʼii̱nrá ta ta̱íi̱nrá ña̱ koʼora nda̱a̱ táki̱ʼva xi̱keʼíi̱ ndiʼi yichi̱. Soo nda̱a̱ ni iin yichi̱ ta̱ʼán na̱ʼi̱ ña̱ kúsuchí-inii̱ nu̱úra. 2 Xa̱ʼa̱ ña̱kán ta̱ rey ni̱ka̱ʼa̱nra xíʼi̱n: “Xítoi̱ ña̱ nda̱kava-iniún, ¿ndáaña ndóʼún? Su̱ví tá ndeéndóʼoví kúún, xa̱ʼa̱ ña̱kán sana ta̱ kúsuchí-iniva kúún”. Ta tá ni̱ka̱ʼa̱nra ña̱yóʼo, ndeéní ni̱yi̱ʼvíi̱.

3 Tasaá ni̱ka̱ʼi̱n xíʼin ta̱ rey: “Ku̱a̱ʼání ku̱i̱ya̱ ná kutakún táta rey. Kúsuchíníva-inii̱ saáchi ñuu nu̱ú ni̱ndu̱xu̱n na̱ táʼi̱n na̱ xi̱ndoo xi̱naʼá ndi̱ʼi-xa̱ʼa̱ ndiʼiña ta ni̱xi̱xi̱ ndiʼi yéʼéña”. 4 Ta̱ rey ni̱nda̱ka̱tu̱ʼunra yi̱ʼi̱: “¿Ndáaña kúni̱ún keʼún?”. Ndi̱ku̱n saá ni̱ka̱ʼi̱n xíʼin Ndióxi̱ ta̱ íyo chí ndiví. 5 Tasaá nda̱kuii̱n yuʼúra: “Tá va̱ʼa túviún táta rey ta tá kíndo̱o-iniún xíʼin ña̱ kéʼíi̱, chindaʼá yi̱ʼi̱ chí ñuu Judá nu̱ú ni̱ndu̱xu̱n na̱ táʼi̱n na̱ xi̱ndoo xi̱naʼá ña̱ va̱ʼa ná sandáʼi̱ña”. 6 Ta̱ rey íyora síi̱n ñá reina tá ni̱nda̱ka̱tu̱ʼunra yi̱ʼi̱: “¿Nda̱saa tiempo ku̱ʼún ta ama ndikóún?”. Xa̱ʼa̱ ña̱kán ki̱ndoova-ini ta̱ rey ña̱ chindaʼára yi̱ʼi̱ ku̱ʼi̱n, ta yi̱ʼi̱ ni̱ka̱ʼi̱n xíʼinra nda̱saa tiempo kúú ña̱ ku̱ʼi̱n.

7 Tándi̱ʼi, ni̱ka̱ʼi̱n xíʼin ta̱ rey: “Tá va̱ʼa túviún táta rey, ná taxina carta ndaʼíi̱ ña̱ ku̱ʼu̱n ndaʼa̱ na̱ xáʼndachíñu chí táʼví oeste tá yu̱ta Éufrates* ña̱ va̱ʼa ná taxina ya̱ʼi̱ nda̱a̱ xa̱i̱ chí Judá. 8 Ta saátu ná taxina iin carta ndaʼíi̱ ña̱ ku̱ʼu̱n ndaʼa̱ ta̱ Asaf, ta̱ ndáa yuku̱ nu̱ú íyo yitu̱n tú kúú kuenta miíún táta rey. Ña̱ va̱ʼa ná kaʼndana yitu̱n taxina ndaʼíi̱ ña̱ va̱ʼa koonú viga, tú kuniñúʼuna xíʼin Veʼe ña̱ kútu̱ní ndási ña̱ íyo yatin yéʼé templo, tú kuniñúʼuna xíʼin nama̱ ñuu kán ta saátu xíʼin veʼe nu̱ú koi̱”. Ta ta̱ rey ta̱xivara ndiʼi carta yóʼo ndaʼíi̱, saáchi Ndióxi̱ ta̱ va̱ʼaní-ini ni̱xi̱yora xíʼi̱n.

9 Tá ni̱ya̱ʼa tiempo, ni̱xa̱i̱ nu̱ú ndóo na̱ xáʼndachíñu chí táʼví oeste tá yu̱ta Éufrates, ta ta̱xii̱ carta ta̱ rey ndaʼa̱na. Ta saátu ta̱xi ta̱ rey ña̱ ná ku̱ʼu̱n na̱ níʼi yichi̱ nu̱ú na̱ soldado xíʼi̱n ta saátu na̱ yósó* kuáyi̱. 10 Tá ku̱ndaa̱-ini ta̱ Sanbalat ta̱ horonita xa̱ʼa̱ ña̱yóʼo xíʼin ta̱ Tobías ta̱ ammonita ta̱ xi̱kuumií iin chiñu ña̱ ndáyáʼvi, ni̱sa̱a̱nína xa̱ʼa̱ ña̱ ki̱xaa̱ iin na̱ chindeétáʼan xíʼin na̱ ñuu Israel.

11 Tándi̱ʼi saá ni̱xa̱i̱ ñuu Jerusalén. Tá ni̱ya̱ʼa u̱ni̱ ki̱vi̱, 12 nda̱koi̱ tá ñuú xíʼin sava na̱ ta̱a, ta va̱ása níka̱ʼi̱n xíʼin nda̱a̱ ni iinna xa̱ʼa̱ ña̱ chi̱kaa̱ Ndióxi̱ inii̱ keʼíi̱ xa̱ʼa̱ ñuu Jerusalén. Ta iinlá kití tí yósói̱ kúú tí ni̱xa̱ʼa̱n xíʼi̱n. 13 Xa̱ʼa̱ ña̱kán, tá ñuú ki̱tai̱ chí Yéʼé ña̱ xítondaa chí yoso̱, ni̱ya̱ʼi̱ chí nu̱ú kána ti̱kui̱í ña̱ naní Ko̱o̱ tí káʼnu ta ni̱xa̱i̱ nda̱a̱ Yéʼé nu̱ú xi̱ndoo koʼndo ya̱a̱. Ta xi̱nii̱ ña̱ ndi̱ʼi-xa̱ʼa̱ ndiʼi nama̱ ñuu Jerusalén ta ni̱xi̱xi̱ ndiʼi yéʼéña. 14 Tándi̱ʼi ni̱xa̱ʼi̱n nda̱a̱ chí nu̱ú íyo Yéʼé nu̱ú kána ti̱kui̱í ta saátu nda̱a̱ nu̱ú ni̱xi̱yo Tanque ta̱ Rey, soo va̱ása nínani ya̱ʼa kití tí yósói̱ ku̱a̱ʼi̱n. 15 Soo ni xa̱a̱ ñuú kúúña nda̱kundeévai̱ ni̱xa̱ʼi̱n chí yoso̱ kán ña̱ va̱ʼa kotoi̱ nama̱. Tándi̱ʼi, ndi̱kóko̱oi̱ chí Yéʼé ña̱ xítondaa chí yoso̱ ña̱ va̱ʼa ndikói̱.

16 Soo na̱ kúúmií chiñu ña̱ ndáyáʼvi nu̱ú na̱ ñuu kǒo níkunda̱a̱-inina ndáa míí ni̱xa̱ʼi̱n ta ndáaña ke̱ʼíi̱. Saáchi ta̱ʼán ka̱ʼi̱n nda̱a̱ ni iin ña̱ʼa xíʼin na̱ judío, ni xíʼin na̱ su̱tu̱, ni inkaka na̱ ta̱a na̱ ndáyáʼvi, ni na̱ kúúmií chiñu ña̱ ndáyáʼvi ni xíʼin inkaka na̱ káchíñu. 17 Tándi̱ʼi saá ni̱ka̱ʼi̱n xíʼinna: “Xa̱a̱ kúnda̱a̱ va̱ʼava inindó xa̱ʼa̱ tu̱ndóʼo ña̱ kúúmiíyó, ña̱ ndi̱ʼi-xa̱ʼa̱ ndiʼi ñuu Jerusalén ta ni̱xi̱xi̱ ndiʼi yéʼéña. Ña̱kán ná sandáʼayó nama̱ ña̱ ñuu Jerusalén ña̱ va̱ʼa ná kǒo kusi̱kindaakana miíyó”. 18 Tándi̱ʼi, ni̱ka̱ʼi̱n xíʼinna ndáa ki̱ʼva chi̱ndeétáʼan Ndióxi̱ ta̱ va̱ʼaní-ini xíʼi̱n ta na̱túʼi̱n xíʼinna xa̱ʼa̱ ña̱ ni̱ka̱ʼa̱n ta̱ rey. Tá xi̱niso̱ʼona ña̱yóʼo, ka̱china: “Ná kixáʼayó sandáʼayóña”. Tasaá chi̱kaa̱na ndee̱ xíʼin táʼanna ña̱ va̱ʼa keʼéna chiñu yóʼo.

19 Soo tá ku̱ndaa̱-ini ta̱ Sanbalat ta̱ horonita xa̱ʼa̱ ña̱yóʼo, saátu ta̱ Tobías ta̱ ammonita ta̱ xi̱kuumií iin chiñu ña̱ ndáyáʼvi xíʼin ta̱ Guésem ta̱ árabe, ki̱xáʼana xáku̱ndaana ndi̱ʼi̱ ta kúsi̱kindaana ndi̱ʼi̱ ta xi̱kachina: “¿Ndáaña kéʼéndó? ¿Á kúni̱vandó nduundó contra xíʼin ta̱ rey?”. 20 Soo yi̱ʼi̱ ni̱ka̱ʼi̱n xíʼinna: “Ndióxi̱ ta̱ íyo chí ndiví kúú ta̱ chindeétáʼan xíʼinndi̱ ña̱ vií kana ña̱ keʼéndi̱. Ta ndi̱ʼi̱ na̱ káchíñu nu̱úra, sandáʼavandi̱ nama̱ yóʼo. Ndóʼó kǒo nda̱a̱ ni iin ña̱ʼa kúúmiíndó ñuu Jerusalén, kǒo nda̱yí* kúúmiíndó ña̱ ka̱ʼa̱n ku̱a̱chindó xa̱ʼa̱ nda̱a̱ ni iin ña̱ʼa ta kǒo nda̱a̱ ni iin ña̱ʼa níkeʼéndó ñuu Jerusalén ña̱ va̱ʼa ndakaʼánna xa̱ʼa̱ndó”.