Isaías
35 Kusi̱íní-inina nu̱ú ñuʼú yi̱chí, kusi̱íní-inina nu̱ú yoso̱ yi̱chí,
kusi̱íní-ini yoso̱ yi̱chí ta xaaña nda̱a̱ táki̱ʼva xáa azafrán.
2 Mií ña̱ ndixa ndaxaa ñuʼú yi̱chí;
kusi̱íní-iniña ta nda̱ʼyi̱ kóʼóña* xa̱ʼa̱ ña̱ kúsi̱íní-iniña.
Ka̱ʼa̱nna xa̱ʼa̱ña ña̱ liviníña nda̱a̱ táki̱ʼva livi Líbano,
nda̱a̱ táki̱ʼva livi yuku̱ Carmelo xíʼin yoso̱ Sarón.
Kunina ndee̱ ña̱ kúúmií Jehová, ña̱ káʼnu ña̱ kúúmií Ndióxi̱yó.
3 Ndasandakúndó ndaʼa̱na ña̱ ku̱vitá
ta ndasandakúndó koʼndona* ña̱ kísi.
4 Ña̱yóʼo ka̱ʼa̱nndó xíʼin na̱ ndíʼi̱ní-ini:
“Ndakú koo inindó. Va̱ása yi̱ʼvíndó.
Kotondó. Ndióxi̱ndó kixira ndatiinra ku̱a̱chi.
Ndióxi̱ kixira taxira castigo.
Ta̱yóʼo kixira ta sakǎkura ndóʼó”.
5 Tiempo saá ndakoto na̱ kúáa*
ta kuniso̱ʼo na̱ kǒo kívi kuniso̱ʼo.
6 Tiempo saá, na̱ va̱ása kívi kaka ndavana nda̱a̱ táki̱ʼva ndáva tí yusu
ta na̱ kǒo kívi ka̱ʼa̱n, nda̱ʼyi̱ kóʼóna xa̱ʼa̱ ña̱ kúsi̱íní-inina.
Saáchi kana ti̱kui̱í nu̱ú ñuʼú yi̱chí
ta koo yu̱ta nu̱ú yoso̱ yi̱chí.
7 Nu̱ú ñuʼú ña̱ ni̱yi̱chi̱ xíʼin kaʼní, ndaku̱ʼun ti̱kui̱í ta koo tu̱yo̱ó,*
ta ñuʼú ña̱ ni̱yi̱chi̱, kana ti̱kui̱í nu̱úña.
8 Ta kán koo iin yichi̱,
iin yichi̱ ña̱ kunaní Yichi̱ ña̱ yi̱i̱.
Va̱ása kaka na̱ yaku̱a̱* nu̱úña.
Ta na̱ xa̱a̱ xíka nu̱ú yichi̱ yóʼo kúú na̱ kivi kaka nu̱úña;
ta nda̱a̱ ni iin na̱ kíʼví va̱ása ki̱ʼvina nu̱úña.
9 Va̱ása koo ndikaʼa* nu̱úña
ta ni va̱ása kuyatin kití yukú nu̱úña.
Va̱ása kuninarí kakarí kán;
nda̱saa na̱ nda̱satá* kuitína kúú na̱ kivi kaka nu̱úña.
10 Na̱ sa̱kǎku Jehová ndikóna, ta tá ná ndikóna chí Sion nda̱ʼyi̱ kóʼóna xa̱ʼa̱ ña̱ kúsi̱í-inina.
Ndiʼi tiempo kusi̱í-inina, ta nda̱a̱ táki̱ʼva koo iin corona ña̱ kunúu xi̱nína saá kooña.
Kusi̱íní-inina; ta va̱ása kusuchíka-inina ta ni va̱ása kuakukana.