Isaías
55 Ndiʼi ndóʼó na̱ yíchi̱.* Naʼandó xa̱ʼa̱ ti̱kui̱í.
Ndóʼó na̱ kǒo xu̱ʼún, naʼandó satándó* ta kuxundó.
Naʼandó, satándó vino xíʼin leche, ta va̱ása chaʼvindó xa̱ʼa̱rá ta va̱ása koo ya̱ʼvirá.
2 ¿Nda̱chun sátándó ña̱ʼa ña̱ va̱ása kíndaa so̱ko inindó?
¿Nda̱chun sísikíndó ndiʼi xu̱ʼúnndó* xíʼin ña̱ʼa ña̱ va̱ása xáa̱-inindó* xíʼin?
Viíní kuniso̱ʼondó yi̱ʼi̱ ta kuxundó ña̱ʼa ña̱ va̱ʼa,
tasaá kusi̱í-inindó kuxundó mií ña̱ va̱ʼaka.
3 Kuniso̱ʼondó ta kixindó nu̱úi̱.
Kuniso̱ʼondó tasaá kutakundó,
tasaá keʼíi̱ iin trato ña̱ va̱ása ndiʼi-xa̱ʼa̱ xíʼinndó
ta na̱ʼi̱ ña̱ ndixaní kúʼvi̱-inii̱* xínii̱ ndóʼó nda̱a̱ táki̱ʼva ni̱ka̱ʼi̱n xíʼin ta̱ David, ta xi̱nuva ña̱yóʼo.
4 Koto. Iin testigo nda̱sai̱ ta̱yóʼo nu̱ú na̱ ñuu,
ta̱yóʼo kúú ta̱ kuniʼi yichi̱ nu̱ú na̱ ñuu ta kaʼndachíñura nu̱úna.
5 Koto. Kanaún iin na̱ ñuu na̱ va̱ása xíni̱ún,
ta iin na̱ ñuu na̱ va̱ása xíni̱ yóʼó, kununa kixina nu̱ún
xa̱ʼa̱ Jehová Ndióxi̱ún, Ndióxi̱ na̱ ñuu Israel, Ndióxi̱ ta̱ yi̱i̱,
saáchi ta̱kán taxira ña̱ nduliviún.
6 Nandukúndó Jehová vitin ña̱ kivi ndani̱ʼíndóra.
Kanandóra vitin ña̱ íyo yatinra.
7 Ta̱a ta̱ ndi̱va̱ʼa-ini ná sandákoora ña̱ va̱ása va̱ʼa kéʼéra
ta ta̱a ta̱ kéʼé ña̱ va̱ása va̱ʼa ná sandákoora ña̱ va̱ása va̱ʼa ndákanixi̱níra;
ná ndikóra nu̱ú Jehová ta ta̱yóʼo kundáʼvi-inira kunirara,
ná ndikóra nu̱ú Ndióxi̱yó ta ta̱yóʼo ixakáʼnu-inira xa̱ʼa̱ ku̱a̱chira.
8 “Saáchi ña̱ ndákanixi̱níi̱ va̱ása kítáʼanña xíʼin ña̱ ndákanixi̱ní ndóʼó,
su̱ví nda̱a̱ táki̱ʼva kéʼé ndóʼó saá kéʼé yi̱ʼi̱”, káchi Jehová.
9 “Saáchi nda̱a̱ táki̱ʼva súkunní kíndo̱o ndiví nu̱ú ñuʼú
saá súkunní yichíi̱ nu̱ú yichi̱ ndóʼó,
ta saátu íyo ña̱ ndákanixi̱níi̱ nu̱ú ña̱ ndákanixi̱ní ndóʼó.
10 Saáchi nda̱a̱ táki̱ʼva kóyo nieve xíʼin sa̱vi̱ chí ndiví
ta va̱ása ndíkórá nda̱a̱ tá sándaxi* ndiʼirá nu̱ú ñuʼú,
táxirá ña̱ ná koo ña̱ʼa nu̱úña ta sándu̱tará ña̱ʼa nu̱úña,
táxirá si̱ʼva̱ ndaʼa̱ ta̱ chíʼi ta táxirá ña̱ kuxu na̱ yiví,
11 saá koo tu̱ʼun ña̱ káʼi̱n.
Va̱ása ndikóña nu̱úi̱ tá va̱ása níxi̱nuña;
keʼévaña ña̱ kúnii̱ ta saxínuña ndiʼi ña̱ chi̱ndaʼíi̱ña keʼéña.
12 Saáchi kusi̱íní-inindó keendó,
ta va̱ása kanitáʼanna xíʼinndó tá ná ndikóndó.
Yuku̱ xíʼin xi̱kí kusi̱í-iniña nu̱úndó ta nda̱ʼyi̱ kóʼóña* xa̱ʼa̱ ña̱ kúsi̱íní-iniña,
ta ndiʼi yitu̱n tú íyo chí yuku̱ kanindaʼa̱nú.
13 Nu̱úka ña̱ kuaʼnu tú iñú, tú enebro kuaʼnu.
Nu̱úka ña̱ kana tú iñú, tú mirto kana.
Ta xa̱ʼa̱ ña̱yóʼo kunda̱a̱-inina xa̱ʼa̱ Jehová,
ta ña̱yóʼo kooña iin señal ndiʼi tiempo ta va̱ása ndiʼi-xa̱ʼa̱ña”.