Isaías

65 “Na̱ va̱ása níxi̱ndaka̱tu̱ʼun xa̱ʼíi̱, ta̱xii̱ ña̱ ná nandukúna yi̱ʼi̱;

na̱ va̱ása níxi̱nandukú yi̱ʼi̱, ta̱xii̱ ña̱ ná ndani̱ʼína yi̱ʼi̱.

 2 Iníí ki̱vi̱ tánii ndaʼíi̱ nu̱ú iin ñuu ña̱ so̱ʼoní,

nu̱ú na̱ xíka nu̱ú yichi̱ ña̱ va̱ása va̱ʼa,

na̱ kéʼé ña̱ ndákanixi̱ní miína,

 3 iin ñuu na̱ káʼa̱n-ndi̱va̱ʼa xa̱ʼíi̱, ta nu̱úi̱ kéʼéna ña̱yóʼo,

saáchi chí jardín sóko̱na* ña̱ʼa, ta xáʼmina ña̱ sóko̱na sa̱tá ndo̱ʼo.

 4 Xíku̱ndoona nu̱ú ndúxu̱n na̱ yiví

ta nu̱ú se̱ʼé kísi̱na,

xíxina ku̱ñu kini̱,

ta ini ko̱ʼo̱na ñúʼu nduta̱ ña̱ʼa ña̱ kini.*

 5 Káchina: ‘Ña̱a̱ kindo̱ún; va̱ása kuyatiún nu̱úi̱,

saáchi yi̱i̱kava yi̱ʼi̱ nu̱ú yóʼó’.*

 6 Kotondó. Xa̱a̱ ni̱ka̱ʼyi̱ ña̱yóʼo nu̱úi̱;

va̱ása koo táxii̱n,

taxivai̱ castigo ndaʼa̱na,

taxivai̱ ndiʼi castigo ña̱ xíniñúʼu ndakiʼinna,

 7 xa̱ʼa̱ ña̱ va̱ása va̱ʼa ke̱ʼéna ta saátu xa̱ʼa̱ ña̱ va̱ása va̱ʼa ke̱ʼé na̱ táʼanna na̱ xi̱ndoo xi̱naʼá”, káchi Jehová.

“Xa̱ʼa̱ ña̱ xa̱ʼmina ña̱ʼa ta ni̱so̱kónaña chí yuku̱

ta saátu xa̱ʼa̱ ña̱ kǒo ní ixato̱ʼóna yi̱ʼi̱ chí xi̱kí,

siʼna taxii̱ castigo ña̱ xíniñúʼu ndakiʼinna xa̱ʼa̱ ña̱ ke̱ʼéna”.

“Nda̱a̱ táki̱ʼva kéʼé iin na̱ yiví tá xínina ña̱ kivi kana vino xa̱á xíʼin iin ndaʼa̱ loʼo tú uva

ta káchina ‘Va̱ása sandíʼi-xa̱ʼúnrí chi íyova tí va̱ʼa’,

saá keʼíi̱ xíʼin na̱ káchíñu nu̱úi̱;

va̱ása sandíʼi-xa̱ʼíi̱ ndiʼina.

 9 Taxii̱ ña̱ ná koo se̱ʼe ta̱ Jacob,

ta chí Judá, kana iin ta̱ ndakiʼin yuku̱i̱;

na̱ ndaka̱xii̱n kúú na̱ ndakiʼin ñuʼú kán,

ta na̱ káchíñu nu̱úi̱ kúú na̱ kundoo kán.

10 Ta nu̱ú na̱ ñui̱ na̱ ná nandukú yi̱ʼi̱,

ñuʼú ña̱ Sarón xa̱a̱ña nduuña iin ñuʼú nu̱ú kivi kixáʼan* ndikachi* sa̱na̱na,

ta yoso̱ ña̱ Acor, kooña nu̱ú kivi ndakindee̱ si̱ndi̱ki̱ sa̱na̱na.

11 Soo ndóʼóva kúú na̱ sándakoo Jehová,

na̱ nándóso-ini xa̱ʼa̱ yuku̱i̱ ña̱ yi̱i̱,

na̱ íxatu̱ʼva iin mesa xa̱ʼa̱ ndióxi̱ ña̱ táxi suerte

na̱ sákutú copa xíʼin vino tá nda̱saka̱ xa̱ʼa̱ ndióxi̱ ña̱ káʼa̱n xa̱ʼa̱ ña̱ kuu chí nu̱únínu.

12 Xa̱ʼa̱ ña̱kán taxii̱ ná kaʼnína ndóʼó xíʼin espada,

ta ndiʼi ndóʼó, kuxítíndó ña̱ kaʼnína ndóʼó,

saáchi ka̱nai̱ ndóʼó, soo va̱ása níndakuiinndó,

ni̱ka̱ʼi̱n, soo va̱ása níxiniso̱ʼondó;

ke̱ʼékandó ña̱ va̱ása va̱ʼa nu̱úi̱,

ta nda̱kaxinndó keʼéndó ña̱ kǒo kútói̱”.

14 Kotondó. Na̱ káchíñu nu̱úi̱ nda̱ʼyi̱ kóʼóna* xa̱ʼa̱ ña̱ kúsi̱í-inina ta saátu xa̱ʼa̱ ña̱ va̱ʼaní kúnina,

soo ndóʼó nda̱ʼyi̱ kóʼóndó xa̱ʼa̱ ña̱ xóʼvi̱ní-inindó

ta kuakundó xa̱ʼa̱ ña̱ kúsuchíní-inindó.

15 Tá xa̱a̱ ná ku̱ʼu̱nndó, na̱ ndaka̱xii̱n, kuniñúʼuna ki̱vi̱ndó ña̱ sakúisochiʼñana* inkana,

ta táta káʼnu Jehová sandíʼi-xa̱ʼa̱ra iin tá iinndó,

soo síínva chinaníra na̱ kachíñu nu̱úra;

16 ña̱kán, ndiʼi na̱ kúni̱ ndakiʼin iin bendición nu̱ú ñuʼú,

Ndióxi̱ ta̱ nda̱a̱ kúú ta̱ taxiña ndaʼa̱na,

ta ndiʼi na̱ ná chinaʼá* xa̱ʼa̱ iin ña̱ʼa nu̱ú ñuʼú yóʼo,

chinaʼána xa̱ʼa̱ Ndióxi̱ ta̱ nda̱a̱.

Saáchi nandóso-inina xa̱ʼa̱ ña̱ xi̱sandíʼi̱-inina tá ya̱chi̱;

ta va̱ása kotokai̱ ña̱yóʼo.

17 Saáchi kotondó, keʼíi̱ iin ndiví xa̱á xíʼin iin ñuʼú xa̱á;

ta va̱ása ndakaʼánkandó xa̱ʼa̱ ña̱ ku̱u xi̱naʼá

ta ni va̱ása ndakanika-inindó xa̱ʼa̱ ña̱ ndo̱ʼondó.

Saáchi kotondó, keʼíi̱ Jerusalén ña̱ va̱ʼa kusi̱í-inindó xíʼinña

ta kusi̱íní-inindó xa̱ʼa̱ ña̱ keʼíi̱ xa̱ʼa̱ ñuundó.

19 Kusi̱íní-inii̱ xa̱ʼa̱ Jerusalén ta kusi̱íní-inii̱ xa̱ʼa̱ na̱ ñui̱;

va̱ása kuniso̱ʼokana ña̱ kuakuna ta ni va̱ása kuniso̱ʼona ña̱ nda̱ʼyi̱ kóʼóna xa̱ʼa̱ ña̱ ndíʼi̱ní-inina”.

20 “Kán, va̱ása kooka na̱ lée válí na̱ kutaku loʼo kuití ki̱vi̱,

na̱ xa̱a̱ chée kutakuna nda̱a̱ ná xi̱nu va̱ʼana ku̱i̱ya̱na.

Saáchi tá ná kuvi iin na̱ kúúmií cien ku̱i̱ya̱, na̱ loʼova koo na̱yóʼo nu̱úna,

ni cien ku̱i̱ya̱ ná kuumií na̱ ná ki̱ʼvi ku̱a̱chi, ndakiʼinvana chiʼña.

21 Ixava̱ʼana veʼe ta miína kundoo iniña;

chiʼina tú uva ta miína kaxí ku̱i̱ʼinú.

22 Va̱ása ixava̱ʼana veʼe ta inkana kundoo iniña.

Va̱ása chiʼina uva ta inkana kaxírí.

Nda̱a̱ táki̱ʼva ku̱a̱ʼání ku̱i̱ya̱ íyo iin yitu̱n, saá ku̱a̱ʼání ku̱i̱ya̱ kutaku na̱ ñui̱,

kusi̱íní-ini na̱ nda̱kaxii̱n tá ná keʼéna chiñuna.

23 Tá ndeéní ná kachíñuna, kundayáʼviva ña̱yóʼo,

va̱ása xo̱ʼvi̱ví se̱ʼena tá ná kakuna,

saáchi kúúna iin ñuu na̱ táxi Jehová bendición ndaʼa̱,

miína xíʼin na̱ se̱ʼena.

24 Ni tá kúma̱níka ka̱ʼa̱nna xíʼi̱n, ndakuiinvai̱ yuʼúna;

tá káʼa̱nkana xíʼi̱n, kuniso̱ʼovai̱na.

25 Tí lobo xíʼin tí ndikachi loʼo, inkáchi kutáʼanrí kixáʼanrí,

yita* kixáʼan tí ndikaʼa* nda̱a̱ táki̱ʼva kéʼé tí si̱ndi̱ki̱,

ta yáká* kaxí tí ko̱o̱.