Isaías
44 ”Vitin, kuniso̱ʼo yóʼó ta̱ Jacob, ta̱ káchíñu nu̱úi̱,
saátu ndóʼó na̱ ñuu Israel, na̱ nda̱kaxii̱n.
2 Ña̱yóʼo kúú ña̱ káʼa̱n Jehová,
ta̱ i̱xava̱ʼa yóʼó,
ta̱ chíndeétáʼan xíʼún nani tá ka̱kún:
‘Va̱ása yi̱ʼvíún Jacob ta̱ káchíñu nu̱úi̱,
ni yóʼó Jesurún,* ta̱ nda̱kaxii̱n.
3 Saáchi taxii̱ ná koo ti̱kui̱í nu̱ú ñuʼú yi̱chí,
taxii̱ ná koo yu̱ta nu̱ú ñuʼú yi̱chí.
Taxii̱ espíritui̱ ndaʼa̱ na̱ se̱ʼún na̱ kaku chí nu̱únínu
ta taxii̱ ña̱ va̱ʼa ndaʼa̱ na̱ se̱ʼún na̱ kaku chí nu̱únínu.
4 Ku̱a̱ʼákaví koona nda̱a̱ táki̱ʼva ku̱a̱ʼá kúú ku̱ʼu̱ kúii̱,
nda̱a̱ táki̱ʼva íyo tú álamo yuʼú yu̱ta saá koona.
5 Iinna ka̱ʼa̱nna: “Kuenta Jehová kúi̱”.
Inkana chinúuna ki̱vi̱na ña̱ kunanína Jacob,
ta inkana kaʼyina ña̱yóʼo ndaʼa̱na: “Kuenta Jehová kúi̱”.
Ta ndakunanína Israel’.
6 Ña̱yóʼo kúú ña̱ káʼa̱n Jehová
ta̱ xáʼndachíñu nu̱ú na̱ ñuu Israel ta̱ nda̱satá* ndóʼó,
Jehová ta̱ xáʼndachíñu nu̱ú na̱ ángel:
‘Yi̱ʼi̱ kúú ta̱ nu̱ú ta kúútui̱ ta̱ so̱ndíʼi.
Iinlá yi̱ʼi̱ kúú Ndióxi̱ ta kǒo inkakana nu̱úi̱.
7 ¿Ndáana íyo nda̱a̱ táki̱ʼva íyo yi̱ʼi̱?
Ná ka̱ʼa̱nna ta ná na̱ʼa̱naña nu̱úi̱.
Ná ka̱ʼa̱nna xa̱ʼa̱ ña̱ʼa ña̱ ku̱nu̱mí kuu
ta saátu ña̱ kuu chí nu̱únínuka,
nda̱a̱ táki̱ʼva ke̱ʼíi̱ nani tá chi̱ndúʼi̱ xa̱ʼa̱ ñuu ña̱ ni̱xi̱yo tiempo xi̱naʼá.
8 Va̱ása yi̱ʼvíndó;
va̱ása taxindó ña̱ kasi ña̱ yíʼvindó nu̱úndó;
¿Á su̱ví xa̱a̱ ya̱chi̱ví ni̱ka̱ʼi̱nña xíʼin iin tá iinndó?
¿Á ta̱ʼánva ka̱ʼi̱nña xíʼinndó?
Ndóʼó kúúndó testigoi̱.
¿Á íyo inka Ndióxi̱ ta̱ íyo táki̱ʼva íyo yi̱ʼi̱?
Yi̱ʼi̱ íyoi̱ nda̱a̱ táki̱ʼva íyo iin yu̱u̱ káʼnu, ta va̱ása xínii̱ xa̱ʼa̱ inka na̱ íyo táki̱ʼva íyo yi̱ʼi̱’”.
9 Ndiʼi na̱ íxava̱ʼa ña̱ʼa ña̱ ndásakáʼnuna, ni loʼo va̱ása ndáyáʼvina,
ta ña̱ʼa ña̱ ndáyáʼviní nu̱úna va̱ása kundayáʼviña.
Va̱ása kívi kooña testigo chi va̱ása xítoña ta ni kǒo kúnda̱a̱-iniña;
ña̱kán kúú ña̱ kukaʼan nu̱ú na̱ íxava̱ʼaña.
10 ¿Ndáana ndákanixi̱ní ña̱ keʼéna iin ndióxi̱
á iin ña̱ʼa ña̱ ka̱a ña̱ ndasakáʼnuna ña̱ kǒo ndáyáʼvi?
11 Kotondó. Ndiʼi na̱ kítáʼan xíʼinna kukaʼan nu̱úna.
Na̱ yiví kuitíva kúú na̱ xíni̱ní ixava̱ʼa ña̱yóʼo.
Ná ndakutáʼan ndiʼina ta táxi̱n ná koona.
Yi̱ʼvínína ta ndiʼina kukaʼan nu̱ú.
12 Ta̱ káchíñu xíʼin ka̱a xíniñúʼura ndaʼáchíñura ña̱ kéʼéra iin ña̱ʼa ña̱ ka̱a ta nu̱ú ñuʼu̱ sása̱a̱ra ña̱yóʼo.
Xíʼin martillo kánira sa̱táña ña̱ va̱ʼa ixava̱ʼaraña;
xíʼin ndee̱ ndaʼa̱ra íxava̱ʼaraña.
Tándi̱ʼi, kúni̱ra kuxura chi ndíʼi ndee̱ra;
va̱ása xíʼira ti̱kui̱í ta kúnaara.
13 Ta̱ túxú yitu̱n chínúura yoʼo̱ sa̱tánú ña̱ va̱ʼa tavára ki̱ʼvanú ta xíʼin color kúaʼa káʼyira sa̱tánú.
Ta xíʼin cincel túxúranú ku̱a̱ʼa̱nra, ta xíniñúʼura iin compás ña̱ va̱ʼa kaʼyira sa̱tánú.
Kéʼéra ña̱ náʼa̱ nda̱a̱ táki̱ʼva náʼa̱ iin ta̱a ta̱ liviní,
ña̱ va̱ʼa kanindichinaña ini iin veʼe.
14 Íyo iin ta̱ kúúmií chiñu ña̱ xáʼndara tú cedro.
Ndáka̱xinra iin tú yitu̱n, iin tú roble,
ndáaranú nda̱a̱ xáʼnunú ta ndúndakúnú nu̱ú inkaka yitu̱n tú íyo chí yuku̱.
Chíʼira iin tú laurel, ta sa̱vi̱ sákuaʼnu túyóʼo.
15 Tasaá iin ta̱a xíniñúʼura titu̱n túyóʼo ña̱ ndakaʼmira ñuʼu̱.
Loʼonú xíniñúʼura ña̱ va̱ʼa ndasaa̱ra;
ndákaʼmira ñuʼu̱ ta távira si̱ta̱váʼa.
Ta saátu kéʼéra iin ndióxi̱ xíʼinnú ta ndásakáʼnuraña.
Xíniñúʼura titu̱n yóʼo ña̱ íxava̱ʼara ña̱ʼa ña̱ ndasakáʼnura, ta xíkuxítíra nu̱úña.
16 Xáʼmira inka táʼví titu̱n yóʼo;
ta xíʼin titu̱n yóʼo távira ku̱ñu xíxira nda̱a̱ xáa̱-inira.*
Ta saátu ndásaa̱ra ta káchira:
“Va̱ʼaníva kúnii̱. Ndása̱íi̱ tá xítoi̱ ñuʼu̱”.
17 Soo xíʼin titu̱n tú kíndo̱o kéʼéra iin ndióxi̱, iin ña̱ʼa ña̱ ndasakáʼnura.
Kúxítíra nu̱úña ta ndásakáʼnuraña.
Ta káʼa̱nra ña̱yóʼo xíʼinña:
“Sakǎku yi̱ʼi̱ saáchi yóʼó kúú ndióxi̱i̱”.
18 Na̱yóʼo va̱ása xíni̱na ta va̱ása kúnda̱a̱-inina xa̱ʼa̱ nda̱a̱ ni iin ña̱ʼa,
saáchi ña̱ ndási kúú nduchúnu̱úna ta va̱ása kívi kotona,
ta va̱ása ndákanixi̱nína, ña̱kán kǒo kúnda̱a̱-inina.
19 Nda̱a̱ ni iinna va̱ása ndákani-inina xa̱ʼa̱ ña̱yóʼo,
ni kǒo xíni̱na ta ni kǒo kúnda̱a̱-inina ña̱ va̱ʼa ka̱ʼa̱nna ña̱yóʼo:
“Iin táʼví titu̱n yóʼo xa̱ʼmii̱ nu̱ú ñuʼu̱,
nu̱ú titu̱n yóʼo ta̱vii̱ si̱ta̱váʼa xíʼin ku̱ñu ña̱ kuxui̱.
¿Á xíniñúʼu kuniñúʼi̱ iinka táʼví túyóʼo ña̱ keʼíi̱ iin ña̱ʼa ña̱ kininí?
¿Á xíniñúʼu ndasakáʼnui̱ titu̱n tú yitu̱n yóʼo?”
20 Nda̱a̱ táki̱ʼva íyo na̱ xíxi ya̱a̱ saá íyona.
Níma̱na sa̱ndáʼviña miína.
Va̱ása kívi sakǎkuna miína, ta ni va̱ása ndákanixi̱nína xa̱ʼa̱ ña̱yóʼo:
“¿Á su̱ví iin ña̱ vatá* kúú ña̱ ndíkaa̱ ndaʼa̱ kúaʼi̱?”.
21 “Ndakaʼán xa̱ʼa̱ ña̱yóʼo Jacob saátu yóʼó Israel.
Saáchi ta̱ káchíñu nu̱úi̱ kúún.
Yi̱ʼi̱ kúú ta̱ i̱xava̱ʼa yóʼó, ta yóʼó kúú ta̱ káchíñu nu̱úi̱.
Va̱ása nandóso-inii̱ xa̱ʼún Israel.
22 Ndakatai̱ ku̱a̱chiún
ta ndakasii̱ nu̱ú ku̱a̱chiún xíʼin iin vi̱kó.
Ndikó nu̱úi̱, chi yi̱ʼi̱ kúú ta̱ ndasatá yóʼó.
23 Ná nda̱ʼyi̱ kóʼó* ndiví xa̱ʼa̱ ña̱ kúsi̱í-iniña,
saáchi xa̱a̱ ke̱ʼé Jehová ña̱ ni̱ka̱ʼa̱nra keʼéra.
Ná nda̱ʼyi̱ kóʼó ñuʼú.
Ná nda̱ʼyi̱ kóʼó yuku̱ súkun xa̱ʼa̱ ña̱ kúsi̱í-iniña,
ta saátu ná nda̱ʼyi̱ kóʼó yuku̱ xíʼin ndiʼi yitu̱n.
Saáchi xa̱a̱ nda̱satá Jehová ta̱ Jacob
ta náʼa̱ra ña̱ káʼnu kúúmiíra xa̱ʼa̱ ña̱ sa̱kǎkura na̱ ñuu Israel”.
24 Ña̱yóʼo kúú ña̱ káʼa̱n Jehová ta̱ nda̱satá yóʼó,
ta̱ i̱xava̱ʼa yóʼó tá ndíkaa̱kaún ti̱xin siʼún:
“Yi̱ʼi̱ kúú Jehová ta̱ ke̱ʼé ndiʼi ña̱ʼa.
Iinlá miíi̱ kúú ta̱ sa̱ndákaa̱ ndiví,
ta i̱xava̱ʼi̱ ñuʼú.
¿Ndáana chi̱ndeétáʼan xíʼi̱n tá ke̱ʼíi̱ ña̱yóʼo?
25 Yi̱ʼi̱ va̱ása táxii̱ xi̱nu ña̱ káʼa̱n na̱ profeta vatá,
yi̱ʼi̱ kúú ta̱ táxi ná kukíʼví na̱ ndáku,*
ta̱ sáká xi̱ní na̱ ndíchi
ta ña̱ xíni̱ na̱yóʼo ndásai̱ña nda̱a̱ táki̱ʼva íyo ña̱ xíni̱ na̱ kíʼví;
26 yi̱ʼi̱ kúú ta̱ táxi ná xi̱nu ña̱ káʼa̱n na̱ káchíñu nu̱úi̱
ta táxii̱ ná xi̱nu ña̱ káʼa̱n na̱ chíndaʼíi̱ xíʼin tu̱ʼun,
káʼi̱n ña̱yóʼo xa̱ʼa̱ ñuu Jerusalén ‘Kundoovana nu̱úña’,
ta káʼi̱n ña̱yóʼo xa̱ʼa̱ ñuu ña̱ íyo chí Judá ‘Ndaʼavaña,
ta ndasaviíi̱ ndiʼi ña̱ ndi̱ʼi-xa̱ʼa̱’;
27 yi̱ʼi̱ kúú ta̱ káʼa̱n ña̱yóʼo xíʼin ti̱kui̱í tá ñúʼu nda̱a̱ nu̱ú kúnú ‘Ndokondó.
Sayíchi̱i̱ ndiʼi yu̱tandó’;
28 yi̱ʼi̱ kúú ta̱ káʼa̱n ña̱yóʼo xa̱ʼa̱ ta̱ Ciro ‘Ta̱yóʼo kúú ta̱ ndáa ndikachi sa̱na̱i̱
ta saxínu ndiʼira ña̱ kúni̱i̱’,
ta káʼi̱n ña̱yóʼo xa̱ʼa̱ ñuu Jerusalén ‘Ndaʼavaña’,
ta káʼi̱n ña̱yóʼo xa̱ʼa̱ templo ‘Chindúʼúvana xa̱ʼún’”.