Isaías
48 Kuniso̱ʼondó ña̱yóʼo, ndóʼó na̱ veʼe ta̱ Jacob,
ndóʼó na̱ káʼa̱n ña̱ naníndó Israel,
ndóʼó na̱ ke̱e ti̱xin na̱ veʼe ta̱ Judá,
ndóʼó na̱ chínaʼá* xa̱ʼa̱ ki̱vi̱ Jehová,
ndóʼó na̱ ndásakáʼnu Ndióxi̱ na̱ ñuu Israel,
kéʼéndó ña̱yóʼo soo su̱ví xíʼin ndinuʼu-inindó kéʼéndóña
ta ni va̱ása kéʼéndó ña̱ nda̱kú.
2 Saáchi na̱kán káʼa̱nna ña̱ nanína nda̱a̱ táki̱ʼva naní ñuu ña̱ yi̱i̱
ta ndúkúna ña̱ chindeétáʼan Ndióxi̱ na̱ ñuu Israel xíʼinna,
ta̱ naní Jehová ta̱ xáʼndachíñu nu̱ú na̱ ángel.
3 “Xi̱naʼáví ni̱ka̱ʼi̱n xíʼinndó xa̱ʼa̱ ña̱ kuu.
Miíi̱ kúú ta̱ ni̱ka̱ʼa̱nña
ta na̱túʼi̱n xa̱ʼa̱ña xíʼinndó.
Iin kama kuití ke̱ʼíi̱ña ta ni̱xi̱nuvaña.
4 Xa̱ʼa̱ ña̱ kúnda̱a̱-inii̱ ña̱ so̱ʼoníún
tu̱chu su̱kún íyoña nda̱a̱ táki̱ʼva íyo ka̱a,
ta ta̱ʼya̱ún* íyoña nda̱a̱ táki̱ʼva íyo cobre,
5 ña̱kán xi̱naʼáví ni̱ka̱ʼi̱nña xíʼún.
Tá kúma̱níka kuuña, na̱túʼi̱n xa̱ʼa̱ña xíʼún,
tasaá va̱ása ka̱ʼún ña̱yóʼo: ‘Ña̱ ndásakáʼnui̱ kúú ña̱ ke̱ʼé ña̱yóʼo;
ña̱ʼa ña̱ ndásakáʼnui̱ xíʼin ndióxi̱ ña̱ ku̱vaʼa xíʼin ka̱a kúú ña̱ ni̱ka̱ʼa̱n ná kuu ña̱yóʼo’.
6 Xa̱a̱ xi̱niso̱ʼún xa̱ʼa̱ ndiʼi ña̱yóʼo ta xi̱niúnña.
¿Á va̱ása natúʼún xa̱ʼa̱ña?
Vitin natúʼi̱n xa̱ʼa̱ ña̱ʼa xa̱á xíʼún,
ña̱ ni̱xi̱yo se̱ʼé, ña̱ va̱ása níxi̱kunda̱a̱-iniún xa̱ʼa̱.
7 Vitin kúú ña̱ xa̱a̱ kéʼíi̱ña, ta su̱ví ña̱ níkeʼíi̱ tiempo xi̱naʼá kúúña;
nda̱a̱ vitinví xíniso̱ʼún xa̱ʼa̱ ña̱yóʼo,
ña̱kán va̱ása ka̱ʼún: ‘Xa̱a̱ xíni̱vai̱ xa̱ʼa̱ña’.
8 Va̱ása, ta̱ʼán kuniso̱ʼovíún xa̱ʼa̱ ña̱yóʼo, ni va̱ása níxi̱kunda̱a̱-iniún xa̱ʼa̱ña,
ta xi̱naʼá va̱ása níxi̱kuni̱ún kuniso̱ʼúnña.
Saáchi kúnda̱a̱-inii̱ ña̱ sándaʼviún na̱ ñui̱,
ta nani tá ka̱kuvíún kíʼviún ku̱a̱chi.
9 Xa̱ʼa̱ ki̱víi̱, kundeé-inii̱ ta va̱ása sa̱a̱kai̱;
ta ña̱ va̱ʼa ndukáʼnui̱, va̱ása sa̱íi̱
ta va̱ása sandíʼi-xa̱ʼíi̱ yóʼó.
10 Ta̱xii̱ ña̱ ná xo̱ʼvi̱ún* ña̱ va̱ʼa ndasandii̱* yóʼó,
nda̱a̱ táki̱ʼva kéʼéna xíʼin iin ka̱a tá sándutanaña ini iin horno* saá ke̱ʼíi̱ xíʼún.
11 Xa̱ʼa̱ miíi̱ kúú ña̱ keʼíi̱ ña̱yóʼo,
saáchi, ¿á taxii̱ ña̱ ná kǒo ixato̱ʼóna yi̱ʼi̱?
Va̱ása taxii̱ ña̱ ixato̱ʼóna inkana nu̱úi̱.
12 Kuniso̱ʼo Jacob, saátu yóʼó Israel, ta̱ ka̱nai̱.
Va̱ása nása̱mai̱. Yi̱ʼi̱ kúú ta̱ nu̱ú ta kúútui̱ ta̱ so̱ndíʼi.
13 Ndaʼa̱ miíi̱ kúú ña̱ chi̱ndúʼú xa̱ʼa̱ ñuʼú yóʼo,
xíʼin ndaʼa̱ kúaʼi̱ sa̱ndákai̱ ndiví.
Tá kánai̱na, ndiʼina va̱xina nu̱úi̱.
14 Ndataka ndiʼindó ta kuniso̱ʼondó.
¿Á íyo na̱ ñúʼu xíʼin na̱kán na̱ ni̱ka̱ʼa̱n xa̱ʼa̱ ña̱yóʼo?
Ta̱ ni̱kuʼvi̱-ini Jehová xi̱nira
kúú ta̱ saxínu ña̱ kúni̱ra keʼéra xíʼin na̱ ñuu Babilonia,
ndaʼa̱ra ña̱ kúúmiíní ndee̱ kaniña na̱ caldeo.
15 Miíi̱ kúú ta̱ ni̱ka̱ʼa̱nña ta ka̱nai̱ra.
Ki̱xaa̱ra xíʼi̱n ta kuchiñuvara saxínuraña.
16 Kuyatinndó nu̱úi̱ ta kuniso̱ʼondó ña̱yóʼo.
Nani tá xa̱ʼa̱ví, kǒo ña̱ níchise̱ʼíi̱ xa̱ʼa̱.
Ni̱xi̱yovai̱ tá ku̱uña”.
Ta vitin, táta káʼnu Jehová chi̱ndaʼára yi̱ʼi̱ ta ta̱xira espíritura ndaʼíi̱.
17 Ña̱yóʼo kúú ña̱ káʼa̱n Jehová, ta̱ nda̱satá yóʼó, Ndióxi̱ ta̱ yi̱i̱, Ndióxi̱ na̱ ñuu Israel:
“Yi̱ʼi̱ Jehová kúú Ndióxi̱ún,
ta̱ sánáʼa̱ yóʼó xa̱ʼa̱ ña̱ va̱ʼa miíún,
ta̱ níʼi yichi̱ nu̱ún ña̱ va̱ʼa kunda̱a̱-iniún ndáa yichi̱ kúú ña̱ xíniñúʼu ku̱ʼún.
18 Tá ná kuniso̱ʼún ta keʼún chiñu ña̱ xáʼndai̱ nu̱ún.
Saá va̱ása kundi̱ʼi-iniún ta ña̱yóʼo xa̱a̱ña kooña nda̱a̱ táki̱ʼva íyo iin yu̱ta,
ta keʼún ña̱ nda̱kú ta ña̱yóʼo kooña nda̱a̱ táki̱ʼva íyo ti̱kui̱í tá ndáku̱i̱ta nu̱ú mar.
19 Na̱ se̱ʼún xa̱a̱na koona nda̱a̱ táki̱ʼva íyo yu̱ti.
Nda̱a̱ táki̱ʼva ku̱a̱ʼání kúú yu̱ti ña̱ íyo yuʼú tá mar, saá ku̱a̱ʼání koo na̱ se̱ʼún.
Va̱ása ndiʼi-xa̱ʼa̱ ki̱vi̱ na̱yóʼo nu̱úi̱ ta ni va̱ása ku̱taʼaña nu̱úi̱”.
20 Keendó ñuu Babilonia.
Kunundó nu̱ú na̱ caldeo.
Ndeé va̱ʼa ka̱ʼa̱nndó ña̱yóʼo xa̱ʼa̱ ña̱ kúsi̱í-inindó. Natúʼunndó xa̱ʼa̱ña.
Nda̱a̱ nu̱ú xíká natúʼunndó xa̱ʼa̱ña.
Ña̱yóʼo ka̱ʼa̱nndó: “Jehová nda̱satára ta̱ Jacob, ta̱ káchíñu nu̱úra.
21 Na̱yóʼo va̱ása níyi̱chi̱na ti̱kui̱í* tá ni̱xa̱ʼa̱nra xíʼinna nu̱ú ñuʼú yi̱chí.
Ti̱xin yu̱u̱ ta̱vára ti̱kui̱í tá xi̱niñúʼuna;
ta̱ʼvíra iin yu̱u̱ ta ta̱vára ku̱a̱ʼání ti̱kui̱í”.
22 “Nda̱a̱ ni iin yichi̱ va̱ása kusi̱í-ini na̱ ndi̱va̱ʼa-ini”, káchi Jehová.