Isaías
60 “Yóʼó ñá ñaʼá, ndakundichi ta ndaye̱ʼún, saáchi xa̱a̱ ki̱xáʼa ndáye̱ʼún.
Ta ndáye̱ʼe̱ ndee̱ Jehová sa̱táún.
2 Koto. Kunaa nu̱ú ñuʼú
ta ndakasi vi̱kó ndáá nu̱ú na̱ ñuu;
soo sa̱tá yóʼó ndaye̱ʼe̱ Jehová,
ta kunina ña̱ káʼnu ña̱ kúúmiíra.
3 Na̱ ñuu kixina nu̱ún xa̱ʼa̱ ña̱ ndáye̱ʼún,
ta na̱ chíñu kixina nu̱ún xa̱ʼa̱ ña̱ yéʼe̱ní ñuʼún.
4 Ndaniʼi nu̱ún ta iníí kotoún.
Sa̱ndátakana ndiʼina ta va̱xina nu̱ún.
Nda̱a̱ nu̱ú xíká va̱xi na̱ se̱ʼún ta númindaana se̱ʼe-síʼún va̱xina.
5 Tiempo saá kuniún ña̱yóʼo ta kusi̱íní-iniún,
kandita ni̱nu níma̱ún ta kusi̱íní-iniún,
saáchi ndiʼi ña̱ ku̱i̱ká ña̱ íyo ini tá mar, xa̱a̱ña nu̱ún;
ta ndiʼi ña̱ ku̱i̱ká ña̱ kúúmií na̱ ñuu, kixiña nu̱ún.
6 Ku̱a̱ʼání camello koo nu̱ú ñuʼún,
camello yúta̱* tí kee chí Madián xíʼin Efá.
Ta ndasakáʼnuna Jehová nu̱ú ndiʼina.
7 Ndataka ndiʼi ndikachi* sa̱na̱ na̱ Quedar ña̱ va̱ʼa xa̱a̱rí koorí kuentaún.
Ta xa̱a̱na xíʼin ndikachi che̱e sa̱na̱ na̱ Nebayot nu̱ún.
Xa̱a̱rí nu̱ú altar ña̱ kúú kuentai̱ ta ndakiʼinvai̱rí,
ta ndasalivii̱ veʼi̱ ña̱ káʼnuní.
8 ¿Ndáana kúú na̱ va̱xi nda̱a̱ táki̱ʼva va̱xi vi̱kó?
¿Ndáana kúú na̱ ndáchí nda̱a̱ táki̱ʼva ndáchí paloma ku̱a̱ʼa̱nrí chi̱ʼyo̱rí?
9 Saáchi ndiʼi na̱ ndóo nu̱ú isla kundaa-inina yi̱ʼi̱;
barco tú Tarsis* ku̱a̱ʼa̱nnú chí nu̱ú,
ku̱a̱ʼa̱nnú ndakiʼinnú se̱ʼún na̱ xíkání ndóo,
ta plata ña̱ kúúmiína xíʼin oro ña̱ kúúmiína, kixiña xíʼinna,
ña̱ va̱ʼa ndukáʼnu ki̱vi̱ Jehová Ndióxi̱ún, Ndióxi̱ na̱ ñuu Israel, Ndióxi̱ ta̱ yi̱i̱,
saáchi ta̱kán taxira ña̱ ndukáʼnún.*
10 Na̱ ke̱e inka ñuu kúú na̱ ixava̱ʼa nama̱ ñuún,
ta na̱ xáʼndachíñu nu̱úna kachíñuna nu̱ún;
saáchi tá ni̱sa̱a̱níi̱, ka̱nii̱ yóʼó,
soo xa̱ʼa̱ ña̱ va̱ʼaní-inii̱, kundáʼvi-inii̱ kunii̱ yóʼó.
11 Ndiʼi tiempo kununá yéʼé ñuún;
va̱ása ndasiña tá káʼñu* ni tá ñuú,
ña̱ va̱ʼa kixina xíʼin ña̱ ku̱i̱ká ña̱ kúúmií na̱ ñuu nu̱ún,
ta chí nu̱ú kunúu na̱ xáʼndachíñu kixina.
12 Saáchi ndiʼi ñuu ta saátu ndiʼi na̱ chíñu na̱ ná va̱ása kachíñu nu̱ún, ndiʼi-xa̱ʼa̱na,
ndiʼi-xa̱ʼa̱ va̱ʼa ndiʼi ñuu.
13 Ndakiʼún yitu̱n tú va̱ʼaní tú íyo chí Líbano,
ndakiʼún tú enebro, tú fresno xíʼin tú ciprés
ña̱ va̱ʼa ndulivi temploi̱ ña̱ yi̱i̱;
ndasalivii̱ nu̱ú kundichi xa̱ʼíi̱.
14 Se̱ʼe na̱ i̱xandi̱va̱ʼa xíʼún kixina ta kuxítína nu̱ún;
ndiʼi na̱ va̱ása ní ixato̱ʼó yóʼó, kixina ta kuxítína nu̱ún,
ta ka̱ʼa̱nna xa̱ʼún ña̱ kúún ñuu Jehová,
ñuu Sion ña̱ kúú kuenta Ndióxi̱ ta̱ yi̱i̱, Ndióxi̱ na̱ ñuu Israel.
15 Nu̱úka ña̱ sandákoona yóʼó ta kundasína kunina yóʼó, ta nu̱úka ña̱ va̱ása ya̱ʼana nu̱ún,
yi̱ʼi̱ taxii̱ ña̱ ná kusi̱íní-inina xíʼún ndiʼi tiempo,
ta ndiʼi na̱ se̱ʼún na̱ kaku chí nu̱únínu, kusi̱íní-inina xa̱ʼún.
16 Koʼún leche na̱ ñuu,
na̱ xáʼndachíñu kúú na̱ sachíchín yóʼó;
tasaá kunda̱a̱-iniún ña̱ yi̱ʼi̱ Jehová kúú ta̱ sa̱kǎku yóʼó,
yi̱ʼi̱ kúú Ndióxi̱ ta̱ Jacob, Ndióxi̱ ta̱ yi̱i̱, ta̱ nda̱satá yóʼó.
17 Nu̱úka ña̱ kixi cobre xíʼi̱n, oro kúú ña̱ kixi xíʼi̱n,
nu̱úka ña̱ kixi hierro xíʼi̱n, plata kúú ña̱ kixi xíʼi̱n,
nu̱úka ña̱ kixi yitu̱n xíʼi̱n, cobre kúú ña̱ kixi xíʼi̱n,
nu̱úka ña̱ kixi yu̱u̱ xíʼi̱n, hierro kúú ña̱ kixi xíʼi̱n;
ndaka̱xii̱n na̱ kuniʼi yichi̱ nu̱ún ta chindeétáʼanna xíʼún ña̱ va̱ása kundi̱ʼi-iniún
ta saátu nina ña̱ nda̱kú keʼé na̱ taxi chiñu ndaʼún.
18 Va̱ása kuniso̱ʼokaún ña̱ íyo ku̱a̱chi ñuún
ta ni va̱ása kuniso̱ʼokaún ña̱ sándiʼi-xa̱ʼa̱na ñuu ña̱ íyo nu̱ú ñuʼún.
Ndi’i na̱ ndóo chí ini nama̱ ñuún, ka̱kuna
ta ndiʼi na̱ ndóo chí ini yéʼún ndasakáʼnuna Ndióxi̱.
19 Su̱ví ñu̱ʼu* kúú ña̱ kutuu̱n nu̱ún tá káʼñu
ta ni su̱ví yo̱o̱ kúú tí sandáye̱ʼe̱ nu̱ún.
Saáchi Jehová koora nda̱a̱ táki̱ʼva íyo iin ñuʼu̱ ña̱ túu̱n nu̱ún ndiʼi tiempo,
Ndióxi̱ sandáye̱ʼe̱ra nu̱ún ta ndasalivira yóʼó.
20 Va̱ása ki̱ʼvika ñu̱ʼu nu̱ún,
ni va̱ása kunaaka yo̱o̱;
saáchi Jehová koora nda̱a̱ táki̱ʼva íyo iin ñuʼu̱ ña̱ túu̱n nu̱ún ndiʼi tiempo
ta va̱ása kusuchíka-iniún.
21 Ta ndiʼi na̱ ñuún nda̱kúní koo ña̱ keʼéna;
na̱yóʼo kúú na̱ kundoo nu̱ú ñuʼú yóʼo ndiʼi tiempo.
Na̱yóʼo kúú na̱ ni̱ndu̱ta̱ tá chi̱ʼii̱,
na̱yóʼo kúú na̱ i̱xava̱ʼii̱ ña̱ va̱ʼa ndukáʼnui̱.
22 Na̱ loʼoní, xa̱a̱na koona mil,
ta na̱ va̱ása ndáyáʼvi, xa̱a̱na koona iin ñuu ña̱ ndakúní.
Yi̱ʼi̱ Jehová kúú ta̱ keʼé ndiʼi ña̱yóʼo ta kama saxínui̱ña”.