Isaías
40 “Sandíkondó, sandíkondó-ini na̱ ñui̱”, káchi Ndióxi̱ndó.
2 “Ka̱ʼa̱nndó tu̱ʼun ña̱ sandíko-ini na̱ ñuu Jerusalén,
ka̱ʼa̱nndó xíʼinna ña̱ va̱ása keʼékana chiñu ña̱ xíniñúʼu keʼéna,
chi xa̱a̱ cha̱ʼvina xa̱ʼa̱ ku̱a̱china.
Xa̱a̱ nda̱kiʼinna ndiʼi castigo ña̱ xi̱niñúʼu taxi Jehová ndaʼa̱na xa̱ʼa̱ ku̱a̱chi ña̱ ni̱ki̱ʼvina”.
3 Íyo iin na̱ ndeéní káʼa̱n chí nu̱ú ñuʼú yi̱chí:
“Ndasaviíndó yichi̱ Jehová.
Nu̱ú ñuʼú yi̱chí keʼéndó iin yichi̱ nda̱kú xa̱ʼa̱ Ndióxi̱yó.
4 Ná ndunda̱a̱ ndiʼi yoso̱
ta saátu ná ndunda̱a̱ ndiʼi yuku̱ xíʼin xi̱kí.
Xíniñúʼu ndunda̱a̱ ñuʼú nu̱ú íyoní xi̱kí
ta ñuʼú nu̱ú íyoní koʼndo, ná ndunda̱a̱ña.
5 Ndiʼina kunina ndee̱ ña̱ kúúmií Jehová,
saáchi mií Jehová kúú ta̱ ni̱ka̱ʼa̱nña”.
6 Kuniso̱ʼo. Íyo iin na̱ káʼa̱n ña̱yóʼo: “Ka̱ʼa̱n ña̱yóʼo”.
Ta inkana ndáka̱tu̱ʼunna: “¿Ndáaña ka̱ʼi̱n?”.
“Ndiʼi na̱ yiví íyona nda̱a̱ táki̱ʼva íyo ku̱ʼu̱,
ta ña̱ nda̱kú íyo inina, íyoña nda̱a̱ táki̱ʼva íyo yita ña̱ íyo chí yuku̱.
Táki̱ʼva íyo ku̱ʼu̱ kúi̱ saá íyo na̱ yiví.
8 Ku̱ʼu̱ kúi̱ yíchi̱ña,
yita yíchi̱ña,
soo tu̱ʼun Ndióxi̱yó kooña ndiʼi tiempo”.
9 Yóʼó ñá ñaʼá ñá va̱xi xíʼin tu̱ʼun va̱ʼa nu̱ú na̱ ñuu Sion,
kúandaa iin yuku̱ súkun.
Yóʼó ñá ñaʼá ñá va̱xi xíʼin tu̱ʼun va̱ʼa nu̱ú na̱ ñuu Jerusalén;
ndeé va̱ʼa ka̱ʼún.
Va̱ása yi̱ʼvíún, ndeé va̱ʼa ka̱ʼún.
Ña̱yóʼo ka̱ʼún xíʼin na̱ ñuu Judá: “Yóʼo íyo Ndióxi̱ndó”.
10 Koto. Táta káʼnu Jehová va̱xira xíʼin ndee̱ra,
ta xíʼin ndaʼa̱ra kaʼndachíñura.
Koto. Níʼira ña̱ va̱ʼa ña̱ taxira ndaʼa̱ndó,
ta saátu níʼira ña̱ chaʼvira ndóʼó.
11 Kundaara ndikachi* sa̱na̱ra nda̱a̱ táki̱ʼva kéʼé iin ta̱ ndáa ndikachi.
Xíʼin ndaʼa̱ra ndakayara ndikachi válí,
ta kunumindaararí ku̱ʼu̱nrí xíʼinra.
Ta yi̱i̱kaví kuniʼira yichi̱ nu̱ú ndikachi tí sáchichín se̱ʼerí.
12 ¿Á kivi kuñuʼu ndiʼi ti̱kui̱í tá íyo ini mar ini ndaʼa̱ na̱ yiví
ta á íyo na̱ kivi tavá ki̱ʼva ndiví xíʼin ndaʼa̱na?*
¿Ndáana xa̱a̱ kúchiñu ndákaya ndiʼi yáká* ña̱ íyo nu̱ú ñuʼú ini iin ta̱ʼya̱* loʼo?
¿Ndáana xa̱a̱ ka̱ta ndiʼi yuku̱ xíʼin ndiʼi xi̱kí nu̱ú ña̱ʼa ña̱ xíniñúʼuna tá kátana?
13 ¿Á íyo na̱ kivi kunda̱a̱-ini xíʼin espíritu ña̱ kúúmií Jehová,
á ndáana kivi taxi consejo ndaʼa̱ra ta sanáʼa̱nara?
14 ¿Ndáana ni̱nda̱ka̱tu̱ʼunra ña̱ va̱ʼa kunda̱a̱-inira xa̱ʼa̱ iin ña̱ʼa,
ta ndáana sánáʼa̱-ñaʼá ndáaña kúú yichi̱ ña̱ nda̱kú?
¿Á ndáana sánáʼa̱-ñaʼá ta táxina yichi̱ nu̱úra ña̱ kunda̱a̱-inira xa̱ʼa̱ ña̱ʼa?
15 Na̱ ñuu íyona nda̱a̱ táki̱ʼva íyo iin gota ti̱kui̱í tá ndíkaa̱ kaʼa̱ iin cubeta;
táki̱ʼva íyo yáká ña̱ ka̱a nu̱ú ña̱ʼa ña̱ xíniñúʼuna kátana ña̱ʼa saá íyona nu̱úra.
Koto. Ta̱yóʼo ndániʼira isla nda̱a̱ táki̱ʼva íyo yáká.
16 Yitu̱n tú íyo chí Líbano, va̱ása naninú ña̱ koko* iin ñuʼu̱,
ta kití yukú tí íyo yóʼo, va̱ása nanirí ña̱ so̱kónarí nu̱ú* Ndióxi̱ ta kaʼminarí.*
17 Nda̱a̱ táki̱ʼva íyo ña̱ʼa ña̱ kǒo íyo, saá íyo ndiʼi na̱ ñuu nu̱úra;
nu̱ú ta̱kán kǒovína íyo ta ni va̱ása ndáyáʼvina.
18 ¿Ndáana kúú na̱ kivi sakítáʼanndó xíʼin Ndióxi̱?
¿Ndáa ña̱ʼa kivi chitáʼandóra xíʼin?
19 Iin ta̱ xíni̱ní kachíñu kéʼéra iin ndióxi̱ ña̱ ka̱a,
ta ta̱ kéʼé ña̱ʼa ña̱ ka̱a chíkaa̱ra oro sa̱táña
ta saátu kéʼéra cadena ña̱ plata.
20 Ndáka̱xinra iin yitu̱n tú so̱kóra,
iin yitu̱n tú va̱ása táʼyi̱.
Ta nándukúra iin ta̱ xíni̱ní kachíñu
ña̱ va̱ʼa keʼéra iin ña̱ʼa ña̱ ndásakáʼnuna ta va̱ása ndakavaña.
21 ¿Á va̱ása xíni̱vandó xa̱ʼa̱ ña̱yóʼo?
¿Á ta̱ʼán kuniso̱ʼondó xa̱ʼa̱ña?
¿Á ta̱ʼán natúʼunna xíʼinndó xa̱ʼa̱ ña̱yóʼo nda̱a̱ tá xa̱ʼa̱?
¿Á ta̱ʼán kunda̱a̱-inindó xíʼinña nda̱a̱ tá xi̱ku̱ndúʼu ñuʼú yóʼo?
22 Íyo iin ta̱ nínduʼu chí sa̱tá ñuʼú yóʼo ta ña̱ ti̱ku̱i̱ta̱* kúúña,
ta na̱ ndóo nu̱úña náʼa̱na nda̱a̱ táki̱ʼva náʼa̱ ti̱ka.
Ta sándakaa̱ra ndiví nda̱a̱ táki̱ʼva kéʼéra xíʼin iin tela ña̱ yásínní,
sándakaa̱raña nda̱a̱ táki̱ʼva íyo iin veʼe loʼo nu̱ú kundoona.
23 Sándiʼi-xa̱ʼa̱ra na̱ chíñu náʼnu
ta na̱ xáʼndachíñu nu̱ú ñuʼú yóʼo va̱ása ndáyáʼvina nu̱úra.
24 Tá ndátaánnana nda̱a̱ táki̱ʼva ndátaánna planta,
tá chíʼinana nda̱a̱ táki̱ʼva chíʼina planta,
tá kíxáʼa kána ti̱oʼona* nu̱ú ñuʼú,
tá ná kani ta̱chí, yi̱chi̱vana
ta ku̱ʼu̱nna xíʼin ta̱chí nda̱a̱ táki̱ʼva kéʼéña xíʼin yita yi̱chí.
25 “¿Ndáana kivi sakítáʼanndó xíʼi̱n? ¿Ndáana íyo nda̱a̱ táki̱ʼva íyo yi̱ʼi̱?”, káchi Ndióxi̱ ta̱ yi̱i̱.
26 “Ndaniʼindó nu̱úndó chí ndiví ta kotondó.
¿Ndáana i̱xava̱ʼa ndiʼi ña̱ʼa yóʼo?
Ta̱ tává ndiʼi ña̱yóʼo kúúra, ta káʼvira iin tá iinña;
ta íyo ki̱vi̱ iin tá iinña nu̱úra.
Va̱ása kúma̱ní nda̱a̱ ni iin ña̱yóʼo,
saáchi ku̱a̱ʼání ndee̱ kúúmiíra ta ndákanda̱ní-iniyó* xíʼinña.
27 ¿Nda̱chun káʼún ña̱yóʼo Jacob ta nda̱chun káʼún ña̱yóʼo Israel?
‘Va̱ása xíto Jehová ña̱ ndóʼi̱,
ta va̱ása ndátiinra ku̱a̱chi xa̱ʼíi̱’.
28 ¿Á va̱ása xíni̱vaún xa̱ʼa̱ ña̱yóʼo? ¿Á ta̱ʼán kuniso̱ʼún xa̱ʼa̱ña?
Jehová ta̱ i̱xava̱ʼa ndiʼi ña̱ íyo nu̱ú ñuʼú
kúúra Ndióxi̱ ndiʼi tiempo.
Va̱ása ndíʼi ndee̱ra ta ni va̱ása kúnaara.
Ndíchiníra ta nda̱a̱ ni iinna kǒo kúnda̱a̱-ini xíʼin ña̱ xíni̱níra.
29 Ndásandakúra na̱ ku̱naa
ta táxira ndee̱ ndaʼa̱ na̱ ku̱vitá.
30 Nda̱a̱ na̱ va̱lí kúnaana ta kúvitána,
káchiʼina* ta ndákavana,
31 soo na̱ ndáa-ini Jehová, ndakiʼinna ndee̱.
Ndachína nda̱a̱ táki̱ʼva ndáchí tí ta̱sú.*
Kununa ta va̱ása kunaana;
kakana ta va̱ása kunaana”.