Isaías
33 Ndáʼviní yóʼó ta̱ sándiʼi-xa̱ʼa̱, ta̱ kúma̱níka ndiʼi-xa̱ʼa̱,
yóʼó ta̱ sándaʼvi, ta̱ kúma̱níka sandáʼvina.
Tá ná ndiʼi sandíʼi-xa̱ʼún, saá ndiʼi-xa̱ʼún.
Tá ná ndiʼi sandáʼviún, saá sandáʼvina yóʼó.
2 Jehová, na̱ʼa̱ ña̱ va̱ʼa-iniún xíʼinndi̱.
Yóʼó kúú ta̱ ndáa-inindi̱.
Ndiʼi xi̱ta̱a̱n* chindeétáʼún xíʼinndi̱,
sakǎku ndi̱ʼi̱ tá ná kixi tu̱ndóʼo nu̱úndi̱.
3 Na̱ ñuu xínuna tá xíniso̱ʼona ña̱ ndeéní níʼi.
Tá ndáku̱ndichiún xa̱a̱ síín síín xínu na̱ ñuu ku̱a̱ʼa̱nna.
4 Iin ndakutú na̱ yiví ndakiʼinna ña̱ʼa ña̱ kúúmiíún
nda̱a̱ táki̱ʼva kéʼé tí ti̱ka náʼnu tá xáxirí ña̱ʼa.
5 Ndukáʼnu Jehová,
saáchi chí nu̱ú súkun íyora.
Nina ña̱ nda̱kú keʼéra chí Sion.
6 Ta̱yóʼo kúú ta̱ va̱ʼaní chíndeétáʼan xíʼún
ta ña̱ ndáyáʼvi va̱ʼaka kúú ña̱yóʼo: ña̱ sakǎkura yóʼó, ña̱ taxira ña̱ ndíchi ndaʼún,
ña̱ taxira kunda̱a̱-iniún ta saátu ña̱ ixato̱ʼún Jehová.
7 Koto. Na̱ ta̱a na̱ ndakúní-ini, ndáʼyi̱na chí calle;
na̱ ku̱a̱ʼa̱n xíʼin tu̱ʼun va̱ʼa, ndeéní kúsuchí-inina ta xákuna.
8 Kǒo na̱ xíka nu̱ú yichi̱;
ta ni kǒo na̱ ku̱a̱ʼa̱n yichi̱ kúi̱i̱n.
Ta̱yóʼo* kǒo níxindiku̱nra trato ña̱ ki̱ndoora keʼéra;
ku̱ndasíra xi̱nira ñuu;
va̱ása ndíʼi̱-inira xa̱ʼa̱ nda̱a̱ ni iin na̱ yiví.
9 Ñuʼú yóʼo nda̱a̱ táki̱ʼva íyo ña̱ kúsuchí-ini saá íyoña ta va̱xi yíchi̱ña.
Ku̱kaʼan nu̱ú Líbano; ndi̱ʼi-xa̱ʼa̱ña.
Yoso̱ ña̱ Sarón ndu̱uña nda̱a̱ táki̱ʼva íyo ñuʼú yi̱chí,
yu̱ku̱ ña̱ íyo chí Basán ta saátu chí Carmelo kóyoña.
10 “Vitin ndakundichii̱, káchi Jehová,
vitin ndukáʼnui̱;
vitin ndasakáʼnui̱ miíi̱.
11 Ndóʼó na̱ ndi̱va̱ʼa-ini, va̱ása ndáyáʼvi ña̱ kúni̱ndó keʼéndó ni ña̱ xa̱a̱ kéʼéndó, ña̱yóʼo íyoña nda̱a̱ táki̱ʼva íyo yita* yi̱chí xíʼin tú iñú.
Ña̱ va̱ása va̱ʼa ndákanixi̱níndó kaʼmiña ndóʼó nda̱a̱ táki̱ʼva kéʼé ñuʼu̱.
12 Ta na̱ ñuu koona nda̱a̱ táki̱ʼva íyo ya̱a̱ ña̱ kíndo̱o tá xáʼmina kaka.
Kaʼmina ndóʼó nda̱a̱ táki̱ʼva xáʼmina tú iñú tú xa̱a̱ ni̱ta̱ʼnda̱.
13 Ndóʼó na̱ íyo xíká kuniso̱ʼondó ndáaña keʼíi̱.
Ta ndóʼó na̱ ndóo yatin kotondó ndee̱ ña̱ kúúmiíi̱.
14 Na̱ kíʼvi ku̱a̱chi chí yuku̱ Sion, yíʼvinína;
na̱ ku̱a̱ʼa̱n contra Ndióxi̱, kísina xa̱ʼa̱ ña̱ yíʼvinína:
‘¿Á kivi kundooyó nu̱ú ndeéní xíxi̱ ñuʼu̱?
¿Á kivi kundooyó nu̱ú va̱ása ndáʼva̱ ñuʼu̱?’.
15 Na̱ kéʼé ña̱ va̱ʼa ndiʼi tiempo,
na̱ kǒo káʼa̱n ña̱ vatá,*
na̱ kǒo sándaʼvi,
na̱ kǒo kíʼin xu̱ʼún ña̱ chindeétáʼanna xíʼin inkana,
na̱ kǒo xíín kuniso̱ʼo na̱ káʼa̱n kaʼní inkana
ta kǒo xíínna kotona ña̱ va̱ása va̱ʼa,
16 na̱yóʼo kúú na̱ koo nu̱ú súkun;
ta ti̱xin yu̱u̱ káʼnu koo sávina.
Koo ña̱ kuxuna
ta nda̱a̱ ni iin ki̱vi̱ va̱ása kuma̱ní ti̱kui̱í nu̱úna”.
17 Kunindó iin rey ta̱ va̱ʼaní náʼa̱;
kunindó iin ñuʼú ña̱ ndíkaa̱ xíká.
18 Ndakanixi̱níndó xa̱ʼa̱ ña̱ i̱yoní yóʼo:
“¿Ndáa míí ku̱a̱ʼa̱n ta̱ secretario?
¿Ndáa míí ku̱a̱ʼa̱n ta̱ xi̱kata xu̱ʼún ña̱ impuesto?
¿Ndáa míí ku̱a̱ʼa̱n ta̱ xi̱ndakaʼvi veʼe ña̱ súkun?”.
19 Va̱ása kunikandó na̱ ñuu na̱ kǒo íxato̱ʼó,
iin ñuu ña̱ káʼa̱n iin tu̱ʼun ña̱ yo̱ʼvi̱ní* kunda̱a̱-inindó xíʼin,
na̱ va̱ása kúnda̱a̱-inindó xíʼin chi kǒo kívi ka̱ʼa̱n va̱ʼana.
20 Kotondó yuku̱ Sion, ñuu nu̱ú kéʼéyó vikó.
Nda̱a̱ táki̱ʼva íyo iin lugar ña̱ táxi̱nní íyo saá koo ñuu Jerusalén nu̱úndó,
nda̱a̱ táki̱ʼva íyo iin veʼe loʼo ña̱ va̱ása sakánda̱na saá kooña.
Ta ka̱a ña̱ ndíta nu̱ú ñuʼú ña̱ tíin veʼe yóʼo va̱ása tuʼunnaña
ta ni va̱ása ta̱ʼnda̱ yoʼo̱ ña̱ núʼniña.
21 Ta Jehová Ndióxi̱ ta̱ káʼnuní
koora nda̱a̱ táki̱ʼva íyo iin ñuʼú nu̱ú íyoní yu̱ta, nu̱ú íyo yu̱ta tá ndíka̱ní,
nu̱ú va̱ása ya̱ʼa barco tú xíka nu̱ú ku̱a̱chi
ni nda̱a̱ ni iin barco tú náʼnuní.
22 Saáchi Jehová kúú ta̱ ndátiin ku̱a̱chi xíʼinyó,
Jehová kúú ta̱ táxi ley ndaʼa̱yó,
Jehová kúú ta̱ xáʼndachíñu nu̱úyó;
ta̱yóʼo kúú ta̱ sakǎku miíyó.
23 Yoʼo̱ ña̱ xíniñúʼu na̱ sáa̱-ini xíni ndóʼó tayaña;
ta ni va̱ása kuchiñuña tiinña yitu̱n tú níndichi ini tú barco,
ni va̱ása kuchiñuña tiinña ti̱ko̱to̱ ña̱ xíniñúʼu tú barco ña̱ va̱ʼa xíkanú.
Ki̱vi̱ saá ndataʼvína ku̱a̱ʼání ña̱ʼa ña̱ nda̱kiʼinna;
ta nda̱a̱ na̱ va̱ása kívi kaka, ndakiʼinna ku̱a̱ʼání ña̱ʼa.
24 Ta nda̱a̱ ni iin na̱ yiví va̱ása ka̱ʼa̱nna ña̱yóʼo: “Ndeé ndóʼi̱”.
Ndióxi̱ ixakáʼnu-inira xa̱ʼa̱ na̱ yiví na̱ kundoo nu̱ú ñuʼú yóʼo.