Isaías
41 “Ndóʼó na̱ ndóo chí isla, va̱ása ka̱ʼa̱nndó ta kuniso̱ʼondó ña̱ ka̱ʼi̱n;
ndiʼi ndóʼó na̱ ñuu ndakiʼin tukundó ndee̱ndó.
Kuyatinndó ta ka̱ʼa̱nndó.
Ndakutáʼanndó ta kixindó nu̱úi̱ ña̱ va̱ʼa ndatii̱n ku̱a̱chi xíʼinndó.
2 ¿Ndáana ka̱na iin ta̱a ta ki̱tara va̱xira nda̱a̱ nu̱ú kíta ñu̱ʼu,*
ta ki̱xaa̱ra nda̱a̱ nu̱ú íyoi̱* ña̱ va̱ʼa keʼéra ña̱ nda̱kú,
ta ndataxii̱ na̱ ñuu ndaʼa̱ra ta kaʼndachíñura nu̱ú na̱ rey?
¿Ndáana sándiʼi-xa̱ʼa̱ na̱yóʼo xíʼin espada ta ndúuna nda̱a̱ táki̱ʼva íyo yáká,*
ta ndáana táxín na̱yóʼo xíʼin kuxu̱n* ta xa̱a̱ síín síín nu̱ú ku̱a̱ʼa̱nna nda̱a̱ táki̱ʼva ku̱a̱ʼa̱n yita* yi̱chí xíʼin ta̱chí?
3 Ta̱yóʼo ndíku̱nra sa̱tána ta kǒo ña̱ sási nu̱úra
ta ku̱a̱ʼa̱nra yichi̱ nu̱ú ta̱ʼán ku̱ʼu̱nra.
4 ¿Ndáana ke̱ʼé ña̱yóʼo ta nani tá xa̱ʼa̱ ki̱xáʼana kánana ndiʼi na̱ ñuu?
Yi̱ʼi̱ Jehová, yi̱ʼi̱ kúú ta̱ nu̱ú;
ta va̱ása nasa̱mai̱ nu̱ú na̱ kaku chí nu̱únínu”.
5 Na̱ ndóo nu̱ú isla xi̱ninara ta ki̱xáʼana yíʼvina.
Na̱ ndóo nda̱a̱ nu̱ú xíká, ki̱xáʼana kísina xa̱ʼa̱ ña̱ yíʼvina.
Ndákutáʼanna ta ku̱a̱ʼa̱nna.
6 Iin tá iinna chíndeétáʼanna xíʼin na̱ kítáʼan xíʼinna
ta káʼa̱nna xíʼin ñanitáʼanna: “Ndakú koún”.
7 Ta̱ xíni̱ kachíñu chíkaa̱ra ndee̱ xíʼin ta̱ kéʼé ña̱ʼa xíʼin ka̱a,
ta ta̱ sándakaa̱ ka̱a, chíkaa̱ra ndee̱ xíʼin ta̱ íxava̱ʼa ña̱ʼa ña̱ ka̱a xíʼin martillo,
káʼa̱nra ña̱yóʼo xa̱ʼa̱ ka̱a ña̱ chi̱tiinna: “Va̱ʼava ki̱ndooña”.
Tándi̱ʼi, xíʼin clavo chíti̱inna ndióxi̱ ña̱ i̱xava̱ʼana ña̱ va̱ʼa kǒo ndakavaña.
8 “Soo yóʼó Israel, ta̱ káchíñu nu̱úi̱ kúún,
yóʼó ta̱ Jacob kúú ta̱ nda̱kaxii̱n,
yóʼó kúú ta̱ ke̱e ti̱xin veʼe migoi̱ ta̱ Abrahán,
9 yóʼó kúú ta̱ ni̱xa̱ʼi̱n xa̱ʼa̱ nda̱a̱ nu̱ú xíká,
yóʼó kúú ta̱ ka̱nai̱ nda̱a̱ nu̱ú káni̱ní.
Ni̱ka̱ʼi̱n xíʼún: ‘Yóʼó kúú ta̱ káchíñu nu̱úi̱;
yóʼó kúú ta̱ nda̱kaxii̱n ta va̱ása kúndasíi̱ yóʼó.
10 Va̱ása yi̱ʼvíún chi íyoi̱ xíʼún.
Va̱ása kundi̱ʼi-iniún chi yi̱ʼi̱ kúú Ndióxi̱ún.
Yi̱ʼi̱ taxi ndee̱ ndaʼún. Yi̱ʼi̱ chindeétáʼan xíʼún.
Xíʼin ndaʼa̱ kúaʼi̱ ña̱ kéʼíi̱ ña̱ nda̱kú tii̱n yóʼó’.
11 Koto, ndiʼi na̱ sáa̱ xíʼún kukaʼan nu̱úna.
Ta na̱ kánitáʼan xíʼún, ndiʼi-xa̱ʼa̱na ta kǒokana koo.
12 Nandukún na̱ kánitáʼan xíʼún soo va̱ása ndani̱ʼúnna.
Na̱ ta̱a na̱ kánitáʼan xíʼún, va̱ása kundayáʼvina,
chi koona nda̱a̱ táki̱ʼva íyo ña̱ʼa ña̱ kǒo íyo.
13 Saáchi yi̱ʼi̱ Jehová Ndióxi̱ún, tíi̱n ndaʼa̱ kúaʼún;
yi̱ʼi̱ kúú ta̱ káʼa̱n ña̱yóʼo xíʼún: ‘Va̱ása yi̱ʼvíún. Yi̱ʼi̱ kúú ta̱ chindeétáʼan xíʼún’.
14 Va̱ása yi̱ʼvíún Jacob, ta̱ íyo táki̱ʼva íyo iin ti̱kuxí* loʼo,
yi̱ʼi̱ chindeétáʼan xíʼin ndóʼó na̱ ñuu Israel”, káchi Jehová, ta̱ nda̱satá ndóʼó, Ndióxi̱ na̱ ñuu Israel, Ndióxi̱ ta̱ yi̱i̱.
15 “Nda̱a̱ táki̱ʼva íyo iin yitu̱n tú sákuachina trigo, saá nda̱sai̱ yóʼó,
nda̱sai̱ yóʼó iin yitu̱n xa̱á, tú sákuachina trigo tú xi̱ín* yuʼú.
Ku̱a̱ñi̱ún* yuku̱ ta sakúachi válíúnña,
ya̱a̱ ndasaún xi̱kí.
16 Ndaniʼúnna ta ku̱ʼu̱nna xíʼin ta̱chí;
xa̱a̱ síín síín ku̱ʼu̱nna xíʼin ta̱chí ña̱ ndeéní káni.
Yóʼó kusi̱í-iniún xa̱ʼa̱ Jehová,
va̱ása kukaʼan nu̱ún ka̱ʼún xa̱ʼa̱ Ndióxi̱ na̱ ñuu Israel, Ndióxi̱ ta̱ yi̱i̱”.
17 “Na̱ xóʼvi̱* ta saátu na̱ nda̱ʼví, nándukúna ti̱kui̱í soo kǒorá íyo.
Nda̱yichi̱ nu̱ú yáa̱na* xa̱ʼa̱ ña̱ yíchi̱na.*
Yi̱ʼi̱ Jehová chindeétáʼan xíʼinna, yi̱ʼi̱ ta̱ kúú Ndióxi̱ na̱ ñuu Israel va̱ása sandákoondaʼíi̱na.
18 Taxii̱ ná kana yu̱ta xi̱kí nu̱ú kǒo yitu̱n íyo,
ta kana ti̱kui̱í nu̱ú yoso̱.
Ndasai̱ nu̱ú ñuʼú yi̱chí iin nu̱ú kuñuʼu ti̱kui̱í, nu̱ú kooní tu̱yo̱ó,*
ta nu̱ú ñuʼú yi̱chí kana ku̱a̱ʼání ti̱kui̱í.
19 Nu̱ú ñuʼú yi̱chí ndachiʼii̱ tú cedro, tú acacia, tú mirto xíʼin tu̱xá.
Nu̱ú yoso̱ yi̱chí ndachiʼii̱ tú enebro, tú fresno ta saátu tú ciprés,
20 ña̱ va̱ʼa ná kuni ndiʼi na̱ yiví ña̱yóʼo ta ná kunda̱a̱-inina,
ná kuniso̱ʼona ta ná kuxini̱na ña̱ mií Jehová kúú ta̱ ke̱ʼé ña̱yóʼo xíʼin ndaʼa̱ra
ta Ndióxi̱ na̱ ñuu Israel, Ndióxi̱ ta̱ yi̱i̱ kúú ta̱ i̱xava̱ʼaña”.
21 “Ka̱ʼa̱nndó xa̱ʼa̱ ña̱ ndóʼondó”, káchi Jehová.
“Na̱ʼa̱ndó prueba ña̱ va̱xi xíʼinndó”, káchi ta̱ kúú rey ta̱ Jacob.
22 “Na̱ʼa̱ndó prueba ta ka̱ʼa̱nndó xíʼinndi̱ xa̱ʼa̱ ña̱ʼa ña̱ kuu.
Ka̱ʼa̱nndó xíʼinndi̱ xa̱ʼa̱ ña̱ʼa ña̱ ku̱u xi̱naʼá,
ña̱ va̱ʼa ná ndakanixi̱níndi̱ xa̱ʼa̱ña ta kunda̱a̱-inindi̱ ndáaña kuu.
Á ka̱ʼa̱ntundó xíʼinndi̱ xa̱ʼa̱ ña̱ʼa ña̱ kuu.
23 Ka̱ʼa̱nndó xíʼinndi̱ xa̱ʼa̱ ña̱ kuu chí nu̱únínu,
ña̱ va̱ʼa kunda̱a̱-inindi̱ ña̱ kúúndó ndióxi̱.
Keʼéndó iin ña̱ʼa ni kúúña ña̱ va̱ʼa á ña̱ va̱ása va̱ʼa,
ña̱ va̱ʼa ná ndakanda̱-inindi̱* tá ná kunindi̱ña.
24 Kotondó. Ndóʼó íyondó nda̱a̱ táki̱ʼva íyo iin ña̱ʼa ña̱ kǒo íyo
ta ni va̱ása ndáyáʼvi ña̱ xa̱a̱ kéʼéndó.
Ta nda̱a̱ ndáaka na̱ ná ndasakáʼnu ndóʼó, va̱ása kundayáʼvina.
25 Taxii̱ ná ndeta* iin ta̱a nda̱a̱ chí norte ta kixira,
iin ta̱ ndeta nda̱a̱ chí nu̱ú kíta ñu̱ʼu ta ka̱ʼa̱nra ki̱víi̱.
Ta̱yóʼo ku̱a̱ñi̱ra na̱ chíñu nda̱a̱ táki̱ʼva xáñi̱na nda̱ʼyi̱,
nda̱a̱ táki̱ʼva kéʼé ta̱ íxava̱ʼa ña̱ʼa xíʼin nda̱ʼyi̱ tá xáñi̱ra nda̱ʼyi̱.
26 ¿Ndáana ni̱ka̱ʼa̱n xa̱ʼa̱ ña̱yóʼo nda̱a̱ tá xa̱ʼa̱ ña̱ va̱ʼa kunda̱a̱-iniyó xa̱ʼa̱ña?
¿Á ndáana ni̱ka̱ʼa̱n xa̱ʼa̱ña nda̱a̱ tá tiempo xi̱naʼá ña̱ va̱ʼa kachiyó ‘Ña̱ ndixava kúú ña̱ káʼa̱nna’?
Ta ña̱ nda̱a̱ kúúvaña chi kǒo na̱ níka̱ʼa̱n xa̱ʼa̱ña.
Kǒo na̱ níxiniso̱ʼo ndóʼó ña̱ ka̱ʼa̱nndó xa̱ʼa̱ña”.
27 Yi̱ʼi̱ kúú ta̱ nu̱ú ni̱ka̱ʼa̱n xíʼin yuku̱ Sion “Kotondó, ña̱yóʼo kúú ña̱ kuu”,
ta chindaʼíi̱ iin ta̱ ku̱ʼu̱n chí Jerusalén xíʼin tu̱ʼun va̱ʼa.
28 Xi̱tokai̱ ta kǒo nda̱a̱ ni iinna,
kǒo nda̱a̱ ni iin na̱ kivi taxi consejo níxi̱yo xíʼinna.
Ni̱nda̱ka̱tu̱ʼunkai̱ soo kǒo na̱ níndakuiin.
29 Koto. Ndiʼi na̱yóʼo va̱ása ndáyáʼvina.
Ni kǒo ndáyáʼvi ña̱ kéʼéna.
Ña̱ʼa ña̱ ka̱a ña̱ ndásakáʼnuna,
nda̱a̱ táki̱ʼva íyo ta̱chíva saá íyoña, su̱ví ña̱ táku kúúña.