Primero ña̱ Samuel

16 Tá ni̱ya̱ʼa tiempo, Jehová ni̱ka̱ʼa̱nra xíʼin ta̱ Samuel: “¿Nda̱saaka tiempo kusuchí-iniún xa̱ʼa̱ ta̱ Saúl? ¿Á va̱ása kúnda̱a̱-iniún ña̱ va̱ása kúni̱kai̱ ña̱ ná koora rey nu̱ú na̱ ñuu Israel? Sakutú ndiki̱ xíʼin aceite, ta kúáʼan. Kúni̱i̱ ná ku̱ʼún kotoún ta̱ Jesé ta̱ betlemita, saáchi yi̱ʼi̱ nda̱kaxii̱n iin se̱ʼera ña̱ koora rey”. 2 Soo ta̱ Samuel ka̱chira: “¿Ndáa ki̱ʼva ku̱ʼi̱n? Tá ná kunda̱a̱-ini ta̱ Saúl xa̱ʼa̱ ña̱yóʼo, kaʼníra yi̱ʼi̱”. Soo Jehová ni̱ka̱ʼa̱nra xíʼinra: “Ná ku̱ʼu̱n iin si̱ndi̱ki̱ loʼo xíʼún ta kachiún: ‘Va̱xii̱ ña̱ so̱kói̱ iin kití nu̱ú* Jehová’. 3 Ka̱ʼa̱n xíʼin ta̱ Jesé ná ku̱ʼu̱nra xíʼún tá ná so̱kóún ña̱ʼa nu̱úi̱, tasaá ka̱ʼi̱n xíʼún ndáaña keʼún. Xíniñúʼu ndaka̱xiún ta̱ na̱ʼi̱ nu̱ún”.

4 Ta̱ Samuel ke̱ʼéra ña̱ ni̱ka̱ʼa̱n Jehová xíʼinra. Tá xi̱ni na̱ níʼi yichi̱ nu̱ú na̱ ñuu* Belén ni̱xa̱a̱ra, ndeéní ni̱yi̱ʼvína ta ni̱nda̱ka̱tu̱ʼunnara: “¿Á ta̱ va̱xi va̱ʼa kúún?”. 5 Ta ta̱kán nda̱kuiinra: “Ta̱ va̱xi va̱ʼava kúi̱. Va̱xii̱ so̱kói̱ iin kití nu̱ú Jehová. Ixatu̱ʼvandó miíndó, ta kixindó tá ná so̱kói̱ kití”. Tasaá, tá i̱xatu̱ʼvara ta̱ Jesé ta saátu na̱ se̱ʼera, sa̱ndákutáʼanrana nu̱ú so̱kóra kití nu̱ú Ndióxi̱. 6 Tá ni̱xa̱a̱na, ta̱ Samuel xi̱nira ta̱ Eliab ta nda̱kanixi̱níra: “Sana ta̱yóʼo kúúva ta̱ nda̱kaxin Jehová”. 7 Soo Jehová ni̱ka̱ʼa̱nra xíʼin ta̱ Samuel: “Va̱ása kotoún ki̱ʼva ña̱ náʼa̱ra ni ña̱ súkunníra, saáchi su̱ví ta̱yóʼo kúú ta̱ níndaka̱xii̱n. Ndióxi̱ va̱ása xítora iin ña̱ʼa nda̱a̱ táki̱ʼva xíto na̱ yivíña. Na̱ yiví kíʼinna kuenta xíʼin ña̱ xíto kuitína, soo Jehová xítora ña̱ ndíkaa̱ níma̱na”. 8 Tasaá ka̱na ta̱ Jesé ta̱ Abinadab ta ki̱xaa̱ra nu̱ú ta̱ Samuel, soo ta̱yóʼo ka̱chira: “Saátu va̱ása níndaka̱xin Jehová ta̱yóʼo”. 9 Tasaá, ta̱ Jesé ka̱nara ta̱ Samá,* soo ta̱ Samuel ka̱chira: “Saátu va̱ása níndaka̱xin Jehová ta̱yóʼo”. 10 Saá ke̱ʼé ta̱ Jesé xíʼin u̱xa̱ saá na̱ se̱ʼera, na̱yóʼo ku̱yatinna nu̱ú ta̱ Samuel, soo ta̱ Samuel ni̱ka̱ʼa̱nra xíʼin ta̱ Jesé: “Va̱ása níndaka̱xin Jehová nda̱a̱ ni iin na̱yóʼo”.

11 Tándi̱ʼi, ta̱ Samuel ni̱nda̱ka̱tu̱ʼunra ta̱ Jesé: “¿Á na̱yóʼo kúú ndiʼi na̱ se̱ʼún?”. Ta ta̱yóʼo nda̱kuiinra: “Kúma̱ní ta̱ loʼoka. Ndikachiva ndáara”. Ta̱ Samuel ni̱ka̱ʼa̱nra xíʼin ta̱ Jesé: “Ka̱ʼa̱n xíʼinna ná ku̱ʼu̱nna kananara, saáchi nda̱a̱ tá ná kixaa̱ra saá kuxuyó”. 12 Ña̱kán chi̱ndaʼára na̱ ku̱a̱ʼa̱n nandukú ta̱ loʼo yóʼo, tasaá ki̱xaa̱ra xíʼinna. Liviní nduchúnu̱ú ta̱ loʼo yóʼo, ta liviní xi̱naʼa̱ra. Tasaá ni̱ka̱ʼa̱n Jehová: “Ndakundichi saáchi ta̱yóʼo kúú ta̱ nda̱kaxii̱n koo rey”. 13 Ña̱kán, ta̱ Samuel ki̱ʼinra ndiki̱ nu̱ú ñúʼu aceite ta sa̱káarará xi̱ní ta̱ David nu̱ú ndiʼi na̱ ñanira. Nani ki̱vi̱ kán Jehová ta̱xira ndee̱ra ndaʼa̱ ta̱ David. Tándi̱ʼi, ta̱ Samuel nda̱kiʼinra ku̱a̱ʼa̱nra chí Ramá.

14 Soo ta̱ Saúl va̱ása níxikuumiíkara espíritu Jehová, ta Jehová ta̱xira ña̱ ná kundi̱ʼiní-ini ta̱ Saúl xíʼin ña̱ va̱ása va̱ʼa ndákanixi̱níra. 15 Ta na̱ káchíñu nu̱ú ta̱ Saúl ni̱ka̱ʼa̱nna xíʼinra: “Ndióxi̱ ta̱xira ña̱ ná sandíʼi̱ní ña̱ ndákanixi̱níún yóʼó. 16 Táta, ixaún ña̱ ma̱ní, ka̱ʼa̱n xíʼin na̱ káchíñu nu̱ún ña̱ ná nandukúna iin ta̱a ta̱ xíni̱va̱ʼa sákaʼa arpa. Tá ná taxi Ndióxi̱ ña̱ kundi̱ʼiní-iniún xíʼin ña̱ va̱ása va̱ʼa ndákanixi̱níún, ta̱yóʼo sakáʼara arpa nu̱ún ta nda̱a̱ va̱ʼa kuniún”. 17 Ña̱kán ta̱ Saúl ni̱ka̱ʼa̱nra xíʼin na̱ káchíñu nu̱úra: “Va̱ʼava, ixandó ña̱ ma̱ní kúáʼanndó nandukúndó iin ta̱a ta̱ xíniva̱ʼa sakáʼa ta ná kixira xíʼinndó”.

18 Iin ta̱ chíndeétáʼan xíʼinra ni̱ka̱ʼa̱nra xíʼinra: “Xi̱nii̱ iin ta̱ loʼo se̱ʼe ta̱ Jesé ta̱ betlemita ta̱ va̱ʼaní sákaʼa, ta xíni̱níra kanitáʼanra ta va̱ása yíʼvira. Ta saátu va̱ʼaní káʼa̱nra ta va̱ʼaní náʼa̱ra, ta Jehová íyora xíʼinra”. 19 Xa̱ʼa̱ ña̱kán, ta̱ Saúl chi̱ndaʼára na̱ ku̱a̱ʼa̱n ka̱ʼa̱n ña̱yóʼo xíʼin ta̱ Jesé: “Kúni̱i̱ ña̱ ná kixi se̱ʼún ta̱ David nu̱úi̱, ta̱ ndáa ndikachi”.* 20 Ta̱ Jesé chi̱ndósora si̱ta̱váʼa, ñii̱* nu̱ú ñúʼu vino ta saátu iin ti̱xúʼú* loʼo sa̱tá iin burro, ña̱ va̱ʼa ku̱ʼu̱nña xíʼin ta̱ David ta taxiraña ndaʼa̱ ta̱ Saúl. 21 Ta̱ David nda̱kiʼinra ku̱a̱ʼa̱nra nu̱ú íyo ta̱ Saúl, ta ki̱xáʼara káchíñura nu̱úra. Ta̱ Saúl ni̱xa̱a̱ra ni̱kuʼvi̱ní-inira xi̱nira ta̱ David, ta ta̱yóʼo ni̱xa̱a̱ra ku̱ura ta̱ níʼi escudora. 22 Ta ta̱ Saúl chi̱ndaʼára na̱ ku̱a̱ʼa̱n ka̱ʼa̱n ña̱yóʼo xíʼin ta̱ Jesé: “Ixaún ña̱ ma̱ní, taxi ná kindo̱o ta̱ David kachíñura nu̱úi̱, saáchi kúsi̱íní-inii̱ xíʼin ña̱ kéʼéra”. 23 Ña̱kán, tá xi̱taxi Ndióxi̱ ña̱ ná kundi̱ʼi-ini ta̱ Saúl xíʼin ña̱ xi̱ndakanixi̱níra, ta̱ David xi̱nandukúra arpa ta xi̱sakáʼara yaa nu̱úra. Ta ña̱yóʼo xi̱sandíkoña-ini ta̱ Saúl ta va̱ʼaní xi̱kunira, ta va̱ása níxindi̱ʼi̱ka-inira.