Isaías
25 Jehová, yóʼó kúú Ndióxii̱.
Ndásakáʼnui̱ yóʼó ta ndásakáʼnui̱ ki̱vi̱ún,
saáchi kéʼún ña̱ʼa ña̱ ndákanda̱ní-inii̱* xíʼin,
ña̱ʼa ña̱ chi̱kaa̱-iniún keʼún nani tiempo xi̱naʼá,
sa̱xínún ña̱ ni̱ka̱ʼún ta ni̱na̱ʼún ña̱ kivi kundaa-inii̱ yóʼó.
2 Saáchi sa̱ndíʼi-xa̱ʼún ñuu ta ndáa yu̱u̱va ki̱ndoo,
xa̱ni ndiʼún iin ñuu ña̱ kútu̱ní ndási.
Ñuu na̱ inka ñuu, va̱ása kútu̱kaña;
ta nda̱a̱ ni iin ki̱vi̱ va̱ása ndaʼaña.
3 Xa̱ʼa̱ ña̱kán iin ñuu ña̱ ndakúní, ndasakáʼnuña yóʼó;
ñuu ña̱ ndi̱va̱ʼa-ini, yi̱ʼvíña kuniña yóʼó.
4 Nda̱a̱ táki̱ʼva íyo ña̱ ndákasi sa̱tá iin ñuu,
saá íyoún nu̱ú na̱ nda̱ʼví ta saátu na̱ ndíʼi̱ní-ini,
iin nu̱ú kivi koo sávína tá ndeéní kúun sa̱vi̱,
iin ku̱nda̱ti̱* tá ndeéní niʼní.
Ña̱ kéʼé na̱ ndi̱va̱ʼa-ini, íyoña nda̱a̱ táki̱ʼva íyo iin ta̱chí ña̱ ndeéní káni sa̱tá iin nama̱,
5 nda̱a̱ táki̱ʼva kéʼé kaʼní sa̱tá iin ñuʼú yi̱chí,
sáya̱ún yuʼú na̱ sáa̱-ini xíni yóʼó.
Nda̱a̱ táki̱ʼva yáa̱ kaʼní xíʼin ku̱nda̱ti̱ iin vi̱kó,
saá ndíʼi yaa na̱ ndi̱va̱ʼa-ini.
6 Nu̱ú yuku̱ yóʼo, Jehová ta̱ xáʼndachíñu nu̱ú na̱ ángel,
keʼéra ña̱ ya̱si̱nní kuxu ndiʼi na̱ ñuu
taxira vino tá va̱ʼaní koʼona,
taxira ku̱ñu mií ña̱ va̱ʼaka kuxuna,
taxira mií vino tá va̱ʼaka koʼona, tá ni̱xi̱xin.
7 Nu̱ú yuku̱ yóʼo sandíʼi-xa̱ʼa̱ra ti̱ko̱to̱ ña̱ ndátiví* ndiʼi ñuu,
xíʼin ti̱ko̱to̱ ña̱ ndákasi ndiʼi na̱ ñuu.
8 Ta̱yóʼo sandíʼi-xa̱ʼa̱ va̱ʼara ña̱ xíʼi̱ na̱ yiví,
ta táta káʼnu Jehová ndaya̱kúnra ti̱kui̱í nu̱ú ndiʼi na̱ yiví.
Nu̱ú iníísaá ñuʼú sakútaʼara ña̱ sákukaʼan nu̱ú na̱ ñuura,
saáchi mií Jehová kúú ta̱ ni̱ka̱ʼa̱nña.
9 Ki̱vi̱ saá ka̱ʼa̱nna ña̱yóʼo:
“Kotondó. Ta̱yóʼo kúú Ndióxi̱yó.
Ta̱yóʼo kúú ta̱ kándíxayó,
ta ta̱yóʼo kúú ta̱ sakǎku miíyó.
Ta̱yóʼo kúú Jehová.
Ta̱yóʼo kúú ta̱ ndáa-iniyó.
Ná kusi̱í-iniyó xa̱ʼa̱ ña̱ sakǎkura miíyó”.
10 Saáchi ndaʼa̱ Jehová ña̱ kúúmiíní ndee̱ kúú ña̱ kundaa yuku̱ yóʼo,
ta ku̱a̱ñi̱ndosóra* ñuu Moab nu̱ú íyoña
nda̱a̱ táki̱ʼva xáñi̱ndosóna xe̱ʼe̱* nu̱ú ndóo si̱ʼví, saá keʼéra xíʼinña.
11 Ta̱yóʼo sakáa̱ra ndaʼa̱ra ta kanirana,
nda̱a̱ táki̱ʼva kéʼé iin na̱ xíni̱ kunúu nu̱ú ti̱kui̱í* ña̱ va̱ʼaní kánda̱ ndaʼa̱na kánuuna nu̱úrá,
saá keʼéra xíʼin ndaʼa̱ra tá ná sandíʼi-xa̱ʼa̱rana chi ni̱nuní kúnina.
12 Ta sandíʼi-xa̱ʼa̱ra ñuu ña̱ kútu̱ní ndási, ña̱ kúúmií nama̱ ña̱ súkunní,
sakánaraña nu̱ú ñuʼú nu̱ú íyo yáká.*