Isaías
66 Ña̱yóʼo kúú ña̱ káʼa̱n Jehová:
“Chí ndiví kúú nu̱ú íyoi̱ xáʼndachíñui̱ ta ñuʼú kúú tayi̱ nu̱ú ndákindee̱ xa̱ʼíi̱.
Tá saá, ¿ndáa míí kivi keʼéndó iin veʼe xa̱ʼíi̱?
¿Ndáa míí kúú nu̱ú ndakindei̱?”.
2 “Ndaʼíi̱ kúú ña̱ ke̱ʼé ndiʼi ña̱ʼa yóʼo
tasaá ni̱xa̱a̱ña xi̱kooña”, káchi Jehová.
“Ña̱kán, na̱yóʼo kúú na̱ kotoi̱:
na̱ vitá-ini, na̱ kúsuchíní-ini ta saátu na̱ íxato̱ʼóní tu̱ʼi̱n.
3 Na̱ xáʼní iin si̱ndi̱ki̱ íyona nda̱a̱ táki̱ʼva íyo na̱ xáʼní iin na̱ yiví.
Na̱ sóko̱* iin ndikachi* íyona nda̱a̱ táki̱ʼva íyo na̱ xáʼnu̱ su̱kún iin ti̱na.*
Na̱ sóko̱ iin ña̱ʼa... íyona nda̱a̱ táki̱ʼva íyo na̱ sóko̱ ni̱i̱ kini̱.
Na̱ chíʼmá ña̱ʼa ña̱ olíbano* íyona nda̱a̱ táki̱ʼva íyo na̱ táxi bendición ndaʼa̱ ndióxi̱ vatá.
Ndíku̱nna yichi̱ miína
ta kúsi̱í-inina xíʼin ña̱ kini.
4 Ña̱kán ndukúi̱ ki̱ʼva ña̱ taxii̱ castigo ndaʼa̱na,
ta ña̱ʼa ña̱ yíʼvinína kúú ña̱ chindaʼíi̱ nu̱úna.
Saáchi tá ka̱nai̱na, kǒo nda̱a̱ ni iinna níndakuiin;
tá ni̱ka̱ʼi̱n, kǒo nda̱a̱ ni iin na̱ níxiniso̱ʼo.
Ke̱ʼékavana ña̱ va̱ása va̱ʼa nu̱úi̱
ta nda̱kaxinna keʼéna ña̱ kǒo kútói̱”.
5 Ndóʼó na̱ íxato̱ʼóní tu̱ʼun Jehová, kuniso̱ʼondó ña̱ káʼa̱nra:
“Na̱ ñanindó na̱ sáa̱-ini xíni ndóʼó, na̱ kǒo xíín kutáʼan xíʼinndó xa̱ʼa̱ ki̱víi̱, ni̱ka̱ʼa̱nna: ‘Ná ndukáʼnu Jehová’.
6 Ndeéní níʼi chí ñuu, ta ndeéní níʼitu chí templo.
Níʼi, saáchi Jehová kúú ta̱ táxi castigo ña̱ xíniñúʼu ndakiʼin na̱ sáa̱-ini xíni miíra.
7 Tá kúma̱níka xi̱nu ki̱vi̱ ña̱ kaku se̱ʼeñá, ka̱ku se̱ʼeñá.
Tá kúma̱níka kaʼnda se̱ʼeñá, sa̱kákuñá iin ta̱ loʼo.
8 ¿Á xa̱a̱ xi̱niso̱ʼondó ña̱ ku̱u ña̱yóʼo?
¿Á xa̱a̱ xi̱nindó táʼan ña̱yóʼo?
¿Á kivi kaku iin ñuu káʼnu iin kuití ki̱vi̱?
¿Á kivi kaku iin ñuu iin kuití yichi̱?
Soo tá ndi̱ku̱n ki̱xáʼa xáʼnda se̱ʼe ñuu Sion, ndi̱ku̱n ka̱ku se̱ʼeña.
9 “¿Á taxii̱ ña̱ kaʼnda kuití se̱ʼeña ta va̱ása kaku ña̱ loʼo se̱ʼeña?”, káchi Jehová.
“¿Á taxii̱ ña̱ kuni̱ kuití se̱ʼeña kakuña ta va̱ása kaku ña̱ loʼo yóʼo?”, káchi Ndióxi̱ún.
10 Kusi̱íní-inindó xíʼin Jerusalén, ndiʼi ndóʼó na̱ kúʼvi̱-ini xíniña, kusi̱í-inindó xíʼinña.
Ndiʼi ndóʼó na̱ kúsuchí-ini xa̱ʼa̱ña, kusi̱í-inindó xíʼinña,
11 saáchi sachíchínña ndóʼó, xa̱a̱-inindó* ta sandíkoña-inindó;
chichínndó nda̱a̱ xa̱a̱-inindó ta kusi̱í-inindó xa̱ʼa̱ ña̱ ndu̱káʼnuña.
12 Saáchi ña̱yóʼo kúú ña̱ káʼa̱n Jehová:
“Taxii̱ ña̱ va̱ása kundi̱ʼi-iniña ta ña̱yóʼo kooña nda̱a̱ táki̱ʼva íyo iin yu̱ta,
ndukáʼnu ña̱yóʼo xíʼin ña̱ ku̱i̱ká ña̱ kúúmií na̱ inka ñuu, ta ña̱yóʼo kooña nda̱a̱ táki̱ʼva íyo yu̱ta tá kée.
Sachíchínña ndóʼó ta kunumindaaña ndóʼó,
chinúuña ndóʼó nu̱ú si̱ʼinña ta sakúikóña* ndóʼó.
13 Nda̱a̱ táki̱ʼva sándi̱ko iin ñaʼá ini se̱ʼeñá,
saá sandíkoi̱-inindó;
tasaá ndi̱ko-inindó xa̱ʼa̱ Jerusalén.
14 Ndóʼó kunindó ña̱yóʼo ta kusi̱íní-inindó,
va̱ʼaní kunaʼa̱ lekeún nda̱a̱ táki̱ʼva va̱ʼaní náʼa̱ ku̱ʼu̱ kúii̱.
Jehová taxira ña̱ ná kunda̱a̱-ini na̱ káchíñu nu̱úra xa̱ʼa̱ ndee̱ra,
soo sa̱a̱níra xíʼin na̱ sáa̱-ini xíni miíra”.
15 “Saáchi, Jehová kixira nda̱a̱ táki̱ʼva va̱xi ñuʼu̱,
saáchi carretara íyonú nda̱a̱ táki̱ʼva íyo sa̱vi̱ táchí
ta xa̱ʼa̱ ña̱ sáa̱níra taxira castigo ndaʼa̱na,
kuniñúʼura ñuʼu̱ xíxi̱ ña̱ taxira castigo ndaʼana.
16 Saáchi kuniñúʼu Jehová ñuʼu̱ ña̱ ndatiinra ku̱a̱chi xíʼinna,
kuniñúʼura espada ña̱ ndatiinra ku̱a̱chi xíʼin ndiʼi na̱ yiví;
ta ku̱a̱ʼánína kuvi ndaʼa̱ Jehová.
17 ”Na̱ íxatu̱ʼva mií ta ndásandiina* miína ña̱ va̱ʼa ki̱ʼvina nu̱ú jardín* ta ndíku̱nna ku̱a̱ʼa̱nna sa̱tá na̱ íyo chí ma̱ʼñú, na̱ xíxi ku̱ñu kini̱, na̱ xíxi ña̱ʼa ña̱ yaku̱a̱ ta saátu ti̱ín, inkáchi ndiʼi-xa̱ʼa̱ ndiʼina, káchi Jehová. 18 Xa̱ʼa̱ ña̱ xíni̱i̱ ndáaña kéʼéna ta saátu ndáaña ndákanixi̱nína, kixii̱ ta sandátakai̱ ndiʼi na̱ yiví na̱ ndóo ndiʼi ñuu, na̱ káʼa̱n nda̱a̱ ndáaka tu̱ʼun, kixina ta kunina ña̱ íyoní ndeíi̱”.
19 “Keʼíi̱ iin ña̱ʼa ña̱ ndáyáʼviní ta na̱ ná kunu ku̱ʼu̱n chindaʼíi̱na nu̱ú na̱ ñuu na̱ ta̱ʼán kuniso̱ʼo xa̱ʼíi̱, na̱ ta̱ʼán kuni ña̱ íyoní ndeíi̱, ku̱ʼu̱nna nu̱ú na̱ xíniñúʼu kuxu̱n* na̱ ndóo chí Tarsis, Pul xíʼin Lud, ku̱ʼu̱nna chí Tubal, chí Javán ta saátu isla ña̱ xíkání kíndo̱o; ta ka̱ʼa̱nna xíʼin na̱ inka ñuu ña̱ íyoní ndeíi̱. 20 Na̱yóʼo kuniʼina ndiʼi na̱ táʼanndó na̱ ndóo inka ñuu, ta taxinana ndaʼa̱ yi̱ʼi̱ Jehová; kixina xíʼinna nu̱ú yuku̱i̱ ña̱ yi̱i̱, ña̱ kúú Jerusalén, kixina xíʼin kuáyi̱, xíʼin carreta tú núna sa̱tá ta saátu tú ndási sa̱tá, kixina xíʼin mula ta saátu xíʼin tí camello tí ndeéní xínu, káchi Jehová, ta ña̱yóʼo kooña nda̱a̱ táki̱ʼva kéʼé na̱ yiví na̱ ñuu Israel tá va̱xina veʼe yi̱ʼi̱ Jehová ña̱ taxina ña̱ʼa ña̱ ñúʼu ini ki̱si ña̱ ndii ndaʼíi̱”.
21 “Saátu ndaka̱xii̱n savana ña̱ koona su̱tu̱ ta saátu ña̱ koona levita”, káchi Jehová.
22 “Saáchi nda̱a̱ táki̱ʼva va̱ása ndiʼi-xa̱ʼa̱ ndiví xa̱á xíʼin ñuʼú xa̱á nu̱úi̱, saá va̱ása ndiʼi-xa̱ʼa̱ se̱ʼendó na̱ kaku chí nu̱únínu ta ni va̱ása ndiʼi-xa̱ʼa̱ ki̱vi̱ndó”, káchi Jehová.
23 “Ndiʼi yichi̱ ña̱ ná kita yo̱o̱ xa̱á ta saátu ndiʼi sábado
ndiʼina kixina ta kuxítína nu̱úi̱”, káchi Jehová.
24 “Keena ta kotona ndiʼi na̱ ta̱a na̱ ni̱xi̱ʼi̱, na̱ i̱xaso̱ʼo nu̱úi̱;
saáchi ti̱kuxí tí xáxi ku̱ñu na̱yóʼo, va̱ása kuvirí
ta ñuʼu̱ ña̱ xáʼmi na̱yóʼo va̱ása nda̱ʼva̱ña,
ta ndiʼi na̱ yiví kukini-inina kunina na̱yóʼo”.