Segundo ña̱ Samuel

17 Ta̱ Ahitofel ni̱ka̱ʼa̱nra xíʼin ta̱ Absalón: “Ixaún ña̱ ma̱ní, taxi ná ndakaxii̱n 12,000 na̱ ta̱a ta ná ku̱ʼu̱nndi̱ sa̱tá ta̱ David ñuú vitin. 2 Iin kama kitai̱ nu̱úra tá xa̱a̱ ku̱naara ta kǒoka ndee̱ra, ta yi̱ʼvíníra xa̱ʼa̱ ña̱yóʼo. Tasaá ndiʼi na̱ yiví na̱ kítáʼan xíʼinra kununa ta mií kuití ta̱ rey kaʼníi̱. 3 Tasaá ndakiʼii̱n ndiʼi na̱ yiví kixi xíʼi̱n nu̱ún. Soo ni nda̱a̱ ndáaka ña̱ ná kundoʼo ta̱a ta̱ nándukún, kiviva ndikó ndiʼi na̱ yiví tasaá ndiʼi na̱ ñuu viíní ndaku̱ndoona”. 4 Ta ta̱ Absalón xíʼin ndiʼi na̱ níʼi yichi̱ nu̱ú na̱ ñuu* Israel ki̱ndoova-inina xíʼin ña̱ ni̱ka̱ʼa̱nra.

5 Soo ta̱ Absalón ni̱ka̱ʼa̱nra: “Ixandó ña̱ ma̱ní, kanatundó ta̱ Husái ta̱ arkita ta ná kuniso̱ʼoyó ndáaña kúú ña̱ ka̱ʼa̱ntu ta̱yóʼo”. 6 Tasaá ni̱xa̱a̱ ta̱ Husái nu̱ú ta̱ Absalón, ta ta̱ Absalón ka̱chira xíʼinra: “Ña̱yóʼo kúú consejo ña̱ ta̱xi ta̱ Ahitofel. ¿Á xíniñúʼu kundiku̱nndi̱ consejo ña̱ ta̱xira? Tá va̱ása kundiku̱nndi̱ña, ka̱ʼa̱n xíʼinndi̱ ndáaña keʼéndi̱”. 7 Ta̱ Husái ni̱ka̱ʼa̱nra xíʼin ta̱ Absalón: “Consejo ña̱ ta̱xi ta̱ Ahitofel vitin, va̱ása va̱ʼa íyoña”.

8 Ta̱ Husái ka̱chikara: “Xíni̱va̱ʼavaún ña̱ ndakúní yiváún ta saátu na̱ ta̱a na̱ kítáʼan xíʼinra. Ta na̱yóʼo ndíʼi̱ní-inina nda̱a̱ táki̱ʼva kéʼé tí oso síʼi tí nda̱ñúʼu se̱ʼe válí chí yuku̱. Ta xa̱ʼa̱ ña̱ xíni̱ yiváún kakara nu̱ú ku̱a̱chi, va̱ása ku̱su̱nvíra chí nu̱ú ndóo ndiʼi na̱ yiví. 9 Sana vitin ndíkaa̱se̱ʼéra ini iin kavá* á inkaka nu̱ú ndíkaa̱se̱ʼéra. Ta tá siʼnakara ná kita kanitáʼan xíʼinyó, na̱ ná kuniso̱ʼo xa̱ʼa̱ ña̱yóʼo kachina: ‘Na̱ yiví na̱ xi̱chindeétáʼan xíʼin ta̱ Absalón ni̱xi̱ʼi̱vana’. 10 Ta nda̱a̱ na̱ ta̱a na̱ ndakúní-ini nda̱a̱ táki̱ʼva ndakú-ini iin ndikaʼa* yi̱ʼvínína. Saáchi ndiʼi na̱ ñuu Israel kúnda̱a̱-inina ña̱ ndakúní yiváún ta na̱ ta̱a na̱ kítáʼan xíʼinra va̱ása yíʼvina. 11 Ña̱yóʼo kúú consejo ña̱ táxii̱ ndaʼún: ná ndakutáʼan ndiʼi na̱ ta̱a na̱ ñuu Israel, na̱ ndóo chí Dan iinsaá nda̱a̱ Beer-Seba. Ta ku̱a̱ʼání ná koo na̱yóʼo nda̱a̱ táki̱ʼva ku̱a̱ʼání yu̱ti íyo yuʼú tá mar, ta yóʼó kúú ta̱ kuniʼi yichi̱ nu̱úna ña̱ ku̱ʼu̱nna nu̱ú ku̱a̱chi. 12 Kanitáʼanyó xíʼinra nda̱a̱ ndáaka nu̱ú ndíkaa̱ra ta ku̱a̱ʼání kooyó xa̱a̱yó kanitáʼanyó xíʼinra nda̱a̱ táki̱ʼva kóyo yúyú nu̱ú ñuʼú. Nda̱a̱ ni iinna va̱ása ka̱ku, ni miíra ni na̱ ta̱a na̱ kítáʼan xíʼinra. 13 Ta tá ná koose̱ʼéra* iin ñuu, ku̱ʼu̱nyó xíʼin ndiʼi na̱ ñuu Israel ta sandíʼi-xa̱ʼa̱yó ñuu kán ta nda̱a̱ ni iin yu̱u̱ loʼo va̱ása kindo̱oka, ta kañuuyóña* ku̱ʼu̱n xíʼinyó nda̱a̱ yu̱ta”.

14 Tasaá, ta̱ Absalón xíʼin ndiʼi na̱ ta̱a ñuu Israel ka̱china: “Va̱ʼaníka consejo ta̱ Husái ta̱ arkita nu̱ú consejo ña̱ ta̱xi ta̱ Ahitofel”. Saáchi mií Jehová kúú ta̱ xi̱kuni̱ ña̱ ná va̱ása kundiku̱nna consejo ña̱ ta̱xi ta̱ Ahitofel, ni va̱ʼava ni̱xi̱yoña nu̱úna. Tasaá kúú ña̱ taxi Jehová tu̱ndóʼo ndaʼa̱ ta̱ Absalón.

15 Tá ni̱ya̱ʼa loʼo, ta̱ Husái ni̱ka̱ʼa̱nra ña̱yóʼo xíʼin ta̱ su̱tu̱ Sadoc xíʼin ta̱ Abiatar: “Ña̱yóʼo kúú consejo ña̱ ta̱xi ta̱ Ahitofel ndaʼa̱ ta̱ Absalón ta saátu na̱ níʼi yichi̱ nu̱ú na̱ ñuu* Israel. Soo ña̱yóʼo kúú consejo ña̱ ta̱xi yi̱ʼi̱ ndaʼa̱ra. 16 Ña̱kán kama chindaʼándó na̱ ku̱ʼu̱n natúʼun ña̱yóʼo xíʼin ta̱ David: ‘Ñuú vitin va̱ása kindo̱okaún chí nu̱ú ñuʼú yi̱chí. Xíniñúʼu ya̱ʼún yu̱ta. Chi tá ná va̱ása keʼún ña̱yóʼo táta rey, miíún ta saátu ndiʼi na̱ yiví na̱ kítáʼan xíʼún kuvivandó’”.

17 Xa̱ʼa̱ ña̱kán, chi̱ndaʼána iin ñá káchíñu nu̱úna ña̱ ku̱a̱ʼa̱nñá natúʼunñá xa̱ʼa̱ ndiʼi ña̱yóʼo xíʼin ta̱ Jonatán ta saátu xíʼin ta̱ Ahimáaz, saáchi na̱yóʼo xi̱ndoona chí En-Roguel. Ta ke̱ʼéna ña̱yóʼo saáchi va̱ása níxikuni̱na ña̱ kuninana tá ná ki̱ʼvina chí ñuu, ta na̱yóʼo kúú na̱ ni̱xa̱ʼa̱n na̱túʼun xa̱ʼa̱ ndiʼi ña̱yóʼo xíʼin ta̱ rey David. 18 Soo iin ta̱ loʼo xi̱nirana, ta na̱túʼunra xa̱ʼa̱ ña̱yóʼo xíʼin ta̱ Absalón. Xa̱ʼa̱ ña̱kán, ndi̱ku̱n xi̱nu u̱vi̱ saána ta ni̱xa̱a̱na chí Bahurim veʼe iin ta̱a ta̱ íyo iin pozo yéʼé. Ta xi̱koose̱ʼéna ini pozo yóʼo, 19 ta ñá síʼi ta̱ ta̱a yóʼo nda̱kasiñá yuʼú pozo yóʼo xíʼin iin ti̱ko̱to̱ ta chi̱ndósoñá trigo ña̱ cha̱chi válí nu̱úña. Ta nda̱a̱ ni iinna va̱ása níkiʼinna kuenta ña̱ ñúʼuna kán. 20 Na̱ káchíñu nu̱ú ta̱ Absalón ni̱xa̱a̱na veʼe ñá ñaʼá kán ta ni̱nda̱ka̱tu̱ʼunnañá: “¿Nda̱a̱ míí ku̱a̱ʼa̱n ta̱ Ahimáaz xíʼin ta̱ Jonatán?”. Ta ñáyóʼo nda̱kuiinñá: “Ni̱ya̱ʼavana veʼi̱, soo xa̱a̱ ku̱a̱ʼa̱nna chí nu̱ú ndíkaa̱ yu̱ta”. Na̱ ta̱a yóʼo na̱ndukúnínana, soo va̱ása níndani̱ʼínana ña̱kán nda̱ndikóna chí Jerusalén.

21 Tá xa̱a̱ ku̱a̱ʼa̱n na̱ ta̱a yóʼo, saá ke̱ena ini pozo ta ku̱a̱ʼa̱nna natúʼunna xíʼin ta̱ rey David, ka̱china: “Ku̱a̱ʼání ña̱ ni̱ka̱ʼa̱n ta̱ Ahitofel contrandó. Xa̱ʼa̱ ña̱kán ndi̱ku̱n ya̱ʼandó yu̱ta”. 22 Ta ndi̱ku̱n saá, ta̱ David xíʼin ndiʼi na̱ yiví na̱ kítáʼan xíʼinra ni̱ya̱ʼana yu̱ta Jordán. Tá xa̱a̱ ni̱tu̱vi, ndiʼina xa̱a̱ ni̱ya̱ʼavana yu̱ta Jordán.

23 Tá xi̱ni ta̱ Ahitofel ña̱ va̱ása níxi̱ndiku̱nna consejo ña̱ ta̱xira, nda̱chinúura tayi̱ sa̱tá burro sa̱na̱ra ta na̱kosorarí* ta ku̱a̱ʼa̱nra veʼera chí ñuura. Tándi̱ʼi ni̱ka̱ʼa̱nra xíʼin na̱ veʼera ndáaña keʼéna, ka̱tikaara miíra* ta ni̱xi̱ʼi̱ra. Tasaá sa̱ndúxu̱nnara nu̱ú ni̱ndu̱xu̱n na̱ táʼanra na̱ xi̱ndoo xi̱naʼá.

24 Ta nani tá kúu ndiʼi ña̱yóʼo, ta̱ David ku̱a̱ʼa̱nra chí Mahanaim, ta ta̱ Absalón ni̱ya̱ʼara yu̱ta Jordán xíʼin ndiʼi na̱ ta̱a na̱ ñuu Israel na̱ kítáʼan xíʼinra. 25 Ta̱ Absalón nda̱kaxinra ta̱ Amasá ña̱ kuniʼira yichi̱ nu̱ú na̱ soldado na̱ xi̱niʼi ta̱ Joab yichi̱ nu̱ú. Ta̱ Amasá xi̱kuura se̱ʼe iin ta̱a ta̱ naní Itrá ta̱ israelita, ta̱ ni̱ki̱si̱ xíʼin ñá Abigaíl se̱ʼe ta̱ Nahás, ta ñáyóʼo xi̱kuuñá ku̱ʼvi ñá Zeruyá siʼí ta̱ Joab. 26 Ta̱ Absalón xíʼin na̱ ta̱a na̱ kítáʼan xíʼinra ni̱xa̱a̱na xi̱kundoona nu̱ú ñuʼú ña̱ íyo chí Galaad.

27 Tá ni̱xa̱a̱ ta̱ David chí Mahanaim, ta̱ Sobí se̱ʼe ta̱ Nahás ta̱ ñuu Rabá ña̱ kúú kuenta na̱ ammonita, xíʼin ta̱ Makir se̱ʼe ta̱ Amiel ta̱ ñuu Lo-Debar ta saátu xíʼin ta̱ Barzilái ta̱ galaadita ta̱ ñuu Roguelim, 28 ndi̱ku̱n ki̱xaa̱na xíʼin xi̱to, nu̱ú kuñuʼu ña̱ʼa, ki̱si ñuʼú, trigo, cebada, harina, trigo ña̱ ya̱tan, haba, lenteja, inkaka si̱ʼva̱ ña̱ ya̱tan, 29 ñu̱ñú, mantequilla, ndikachi* xíʼin queso. Ndiʼi ña̱yóʼo ki̱xaa̱ña xíʼinna nu̱ú ta̱ David ta saátu na̱ yiví na̱ kítáʼan xíʼinra ña̱ va̱ʼa kuxunaña, saáchi xi̱kachina: “Na̱ yiví yóʼo kúni̱ kuxuna, yíchi̱na* ta ku̱naanína xa̱ʼa̱ ña̱ ndóona nu̱ú ñuʼú yi̱chí”.