Números

14 Tasaá, ndiʼi na̱ ñuu ki̱xáʼana ndeéní ndáʼyi̱na ta xákuna, ta iníí ñuú xa̱kuna. 2 Ta ndiʼi na̱ israelita ki̱xáʼana káʼa̱nkúáchina* xa̱ʼa̱ ta̱ Moisés xíʼin ta̱ Aarón. Ta ndiʼi na̱ ñuu ki̱xáʼana káʼa̱nna contra na̱yóʼo ta xi̱kachina: “Va̱ʼaníkava tá níxi̱ʼi̱yó chí Egipto, va̱ʼaníkava tá níxi̱ʼi̱yó chí nu̱ú ñuʼú yi̱chí. 3 ¿Nda̱chun ki̱xaa̱yó nu̱ú ñuʼú yóʼo i̱xaa Jehová? ¿Á ki̱xaa̱yó yóʼo ña̱ va̱ʼa kaʼnína miíyó xíʼin espada? Na̱yóʼo ndakiʼinna ñá síʼiyó ta saátu se̱ʼeyó ku̱ʼu̱n xíʼinna. Va̱ʼaka ná ndikóyó chí ñuu Egipto”. 4 Ta ña̱yóʼo xi̱kaʼa̱nna xíʼin táʼanna: “Ná ndaka̱xinyó iin ta̱ kuniʼi yichi̱ nu̱úyó ta ná ndikóyó chí Egipto”.

5 Tasaá, ta̱ Moisés xíʼin ta̱ Aarón xi̱kuxítína nda̱a̱ nu̱ú ñuʼú, ta ndiʼi na̱ israelita na̱ nda̱kutáʼan kán xi̱nina ña̱yóʼo. 6 Ta̱ Josué se̱ʼe ta̱ Nun xíʼin ta̱ Caleb se̱ʼe ta̱ Jefuné, na̱ ni̱xa̱ʼa̱n xíʼin na̱ xi̱tona̱ní* ñuʼú, nda̱tána ti̱ko̱to̱na 7 ta ni̱ka̱ʼa̱nna xíʼin ndiʼi na̱ ñuu Israel: “Ñuʼú ña̱ ni̱xa̱ʼa̱nndi̱ xi̱tona̱níndi̱, va̱ʼanívaña. 8 Tá kúsi̱í-ini Jehová xíʼin ña̱ kéʼéyó, chindeétáʼanvara xíʼinyó ña̱ xa̱a̱yó nu̱ú ñuʼú kán ta ndataxivaraña ndaʼa̱yó, iin ñuʼú nu̱ú íyoní leche ta saátu ñu̱ñú kúúña. 9 Soo va̱ása ku̱ʼu̱nndó contra Jehová ta ni va̱ása yi̱ʼvíndó kunindó na̱ yiví na̱ íyo nu̱ú ñuʼú kán, saáchi su̱ví ña̱ʼaví kúúna nu̱úyó.* Kǒo na̱ chindeétáʼan xíʼinna, ta Jehová íyora xíʼinyó. Ña̱kán va̱ása yi̱ʼvíndó kunindóna”.

10 Soo ndiʼi na̱ ñuu xi̱kuni̱na kuunna yu̱u̱na. Soo ki̱ta ndee̱ Jehová chí sa̱tá tabernáculo ta ndiʼi na̱ ñuu Israel xi̱ni ña̱yóʼo.

11 Tasaá, Jehová ni̱ka̱ʼa̱nra xíʼin ta̱ Moisés: “Xa̱a̱ ku̱a̱ʼání milagro kéʼíi̱ xíni na̱ ñuu yóʼo. Ña̱kán, ¿nda̱a̱ amaví kixáʼana ixato̱ʼóna yi̱ʼi̱? Ta saátu, ¿nda̱a̱ amaví kixáʼana kandíxana yi̱ʼi̱? 12 Kuniñúʼi̱ kue̱ʼe̱ ña̱ ndeéní ña̱ va̱ʼa taxii̱ castigo ndaʼa̱na tasaá sandíʼi-xa̱ʼíi̱na, ta taxii̱ ña̱ koún iin ñuu ña̱ káʼnuní ta ndakúka xa̱ún koún nu̱ú na̱yóʼo”.

13 Soo ta̱ Moisés ni̱ka̱ʼa̱nra xíʼin Jehová: “Tá ná keʼún ña̱yóʼo, na̱ ñuu Egipto nu̱ú ta̱váún na̱ ñuu yóʼo xíʼin ndeún, kuniso̱ʼona xa̱ʼa̱ña 14 ta ka̱ʼa̱nna xíʼin na̱ ndóo ñuu yóʼo xa̱ʼa̱ña. Chi na̱yóʼo xa̱a̱ kúnda̱a̱-inina ña̱ yóʼó Jehová íyoún xíʼinna ta xíninu̱úna yóʼó. Yóʼó kúú Jehová ta vi̱kóún íyoña xíʼinna, ta xíʼin vi̱kó yóʼo níʼún yichi̱ nu̱úna tá káʼñu* ta xíʼin ñuʼu̱ níʼún yichi̱ nu̱úna tá ñuú. 15 Tá iin kama ná kaʼníún na̱ ñuu yóʼo, na̱ ñuu na̱ xi̱niso̱ʼo xa̱ʼún ka̱ʼa̱nna ña̱yóʼo: 16 ‘Va̱ása níkuchiñu Jehová ku̱ʼu̱nra xíʼin na̱ ñuu yóʼo nu̱ú ñuʼú ña̱ ni̱ka̱ʼa̱nra taxira ndaʼa̱na, ña̱kán xa̱ʼnírana nu̱ú ñuʼú yi̱chí’. 17 Ña̱kán, ixaún ña̱ ma̱ní Jehová, na̱ʼa̱ ña̱ kúúmiíníún ndee̱ nda̱a̱ táki̱ʼva xa̱a̱ ki̱ndoún tá ni̱ka̱ʼún ña̱yóʼo: 18 ‘Jehová ta̱ kúeení-ini,* ta̱ ndixaní kúʼvi̱-ini* xíni inkana, íxakáʼnu-inira xa̱ʼa̱ inkana tá kéʼéna ña̱ va̱ása va̱ʼa ta saátu tá íxaso̱ʼona nu̱úra, soo táxira castigo ndaʼa̱ na̱ kúúmií ku̱a̱chi ta na̱ ku̱a̱kiʼvi ku̱a̱chi nu̱úra taxira castigo ndaʼa̱ se̱ʼena, se̱ʼeñánina xíʼin se̱ʼexíkúána’.* 19 Ixaún ña̱ ma̱ní, xa̱ʼa̱ ña̱ ndixaní kúʼvi̱-iniún xíniún ndi̱ʼi̱, káʼnuní koo iniún xa̱ʼa̱ na̱ ñuu yóʼo, nda̱a̱ táki̱ʼva xa̱a̱ i̱xakáʼnu-iniún xa̱ʼa̱na tá xi̱ndoona chí ñuu Egipto iinsaá nda̱a̱ vitin”.

20 Tasaá Jehová ni̱ka̱ʼa̱nra: “Ixakáʼnuva-inii̱ xa̱ʼa̱na nda̱a̱ táki̱ʼva ni̱ka̱ʼún xíʼi̱n. 21 Nda̱a̱ ndáaka ña̱ ná kuu, chínaʼíi̱* xa̱ʼa̱ miíi̱ ña̱ ndiʼi na̱ ndóo nu̱ú ñuʼú kunda̱a̱-inina xa̱ʼa̱ ndee̱ ña̱ kúúmií Jehová. 22 Ndiʼi na̱ ta̱a na̱ xi̱ni ndeíi̱ xíʼin milagro ña̱ ke̱ʼíi̱ chí Egipto ta saátu chí nu̱ú ñuʼú yi̱chí na̱ xa̱a̱ xítondosó yi̱ʼi̱ 10 yichi̱ ta va̱ása xíniso̱ʼona ña̱ káʼi̱n, nda̱a̱ ni iin na̱yóʼo 23 va̱ása kunina ñuʼú ña̱ ni̱ka̱ʼi̱n taxii̱ ndaʼa̱ na̱ yivána. Ndiʼi na̱ va̱ása íxato̱ʼó yi̱ʼi̱, va̱ása kunina ñuʼú kán. 24 Soo ta̱ Caleb ta̱ káchíñu nu̱úi̱, síínva íyo ña̱ kéʼéra chi ndákundeéra ndíku̱nra yi̱ʼi̱ xíʼin ndiʼi níma̱ra. Ña̱kán chindeétáʼi̱n xíʼinra ña̱ xa̱a̱ra nu̱ú ñuʼú ña̱ ni̱xa̱ʼa̱nra xi̱tora, ta na̱ se̱ʼera kúú na̱ ndakiʼin ña̱yóʼo. 25 Xa̱ʼa̱ ña̱ ndóo na̱ amalequita xíʼin na̱ cananeo chí yoso̱, taa̱n ndikóndó chí nu̱ú ñuʼú yi̱chí ta ku̱ʼu̱nndó yichi̱ ña̱ ku̱a̱ʼa̱n chí mar Rojo”.

26 Tándi̱ʼi, Jehová ni̱ka̱ʼa̱nra ña̱yóʼo xíʼin ta̱ Moisés ta saátu xíʼin ta̱ Aarón: 27 “¿Nda̱a̱ ama sandákoo na̱ ñuu na̱ ndi̱va̱ʼaní-ini yóʼo ña̱ ka̱ʼa̱nkúáchina xa̱ʼíi̱? Xíniso̱ʼovai̱ ña̱ káʼa̱n na̱ israelita xa̱ʼíi̱. 28 Ña̱yóʼo ka̱ʼún xíʼinna: ‘Chínaʼíi̱ xa̱ʼa̱ miíi̱ ña̱ nda̱a̱ táki̱ʼva íyo ña̱ xi̱niso̱ʼi̱ ni̱ka̱ʼa̱nndó saá keʼíi̱ xíʼinndó, káchi Jehová. 29 Nu̱ú ñuʼú yi̱chí yóʼo kuvi ndiʼi ndóʼó, kuvi ndiʼi ndóʼó na̱ kúúmií 20 á ku̱a̱ʼáka ku̱i̱ya̱, na̱ xa̱a̱ nda̱kaʼyi̱ ki̱vi̱, ndiʼi ndóʼó na̱ ni̱ka̱ʼa̱nkúáchi xa̱ʼíi̱ kuvivandó. 30 Nda̱a̱ ni iin ndóʼó va̱ása ki̱ʼvi nu̱ú ñuʼú ña̱ ni̱ka̱ʼi̱n taxii̱ ndaʼa̱ndó ña̱ koondó nu̱úña, iinlá ta̱ Caleb se̱ʼe ta̱ Jefuné xíʼin ta̱ Josué se̱ʼe ta̱ Nun kúú na̱ ki̱ʼvi nu̱úña.

31 ’”Ta na̱ se̱ʼendó na̱ ni̱ka̱ʼa̱nndó ndakiʼinna ku̱ʼu̱n xíʼinna, na̱yóʼo kúú na̱ ku̱ʼi̱n xíʼin nu̱ú ñuʼú ña̱ va̱ása níxiinndó ndakiʼinndó, ta na̱yóʼo kúú na̱ kuniña. 32 Soo ndóʼó kuvindó nu̱ú ñuʼú yi̱chí yóʼo. 33 Ta na̱ se̱ʼendó, 40 ku̱i̱ya̱ kúú ña̱ kundaana kití chí nu̱ú ñuʼú yi̱chí, ta na̱yóʼo kúú na̱ chaʼvi xa̱ʼa̱ ña̱ va̱ása nda̱kú níxi̱yo inindó xíʼi̱n, nda̱a̱ ná kuvi ndiʼi ndóʼó chí nu̱ú ñuʼú yi̱chí. 34 Ni̱xa̱ʼa̱nndó xi̱tona̱níndó ñuu Canaán 40 ki̱vi̱, ña̱kán 40 ku̱i̱ya̱ kúú ña̱ xíniñúʼu chaʼvindó xa̱ʼa̱ ku̱a̱chindó, iin ki̱vi̱ kooña iin ku̱i̱ya̱. Tasaá kunda̱a̱-inindó ndáaña ndóʼo na̱ íyo contra xíʼi̱n.

35 ’”Yi̱ʼi̱ Jehová kúú ta̱ káʼa̱n ña̱yóʼo: Ña̱yóʼo kúú ña̱ keʼíi̱ xíʼin na̱ ñuu na̱ ndi̱va̱ʼa-ini yóʼo, na̱ nda̱kutáʼan ña̱ koona contra xíʼi̱n, nu̱ú ñuʼú yi̱chí yóʼo ndiʼi-xa̱ʼa̱na ta yóʼo kuvivana. 36 Ta na̱ ta̱a na̱ chi̱ndaʼá ta̱ Moisés ña̱ ku̱ʼu̱nna kotona̱nína ñuʼú Canaán, na̱ ki̱xáʼa káʼa̱n ña̱ va̱ása va̱ʼa xa̱ʼa̱ ñuʼú kán, ta xa̱ʼa̱ ña̱kán na̱ ñuu ki̱xáʼana káʼa̱nkúáchina xa̱ʼa̱ ta̱ Moisés, 37 na̱ ta̱a yóʼo ndakiʼinna castigo ta kuvina nu̱ú Jehová, saáchi ni̱ka̱ʼa̱nna ña̱ va̱ása va̱ʼa xa̱ʼa̱ ñuʼú kán. 38 Soo ta̱ Josué se̱ʼe ta̱ Nun xíʼin ta̱ Caleb se̱ʼe ta̱ Jefuné na̱ ni̱xa̱ʼa̱n xi̱tona̱ní ñuʼú Canaán, va̱ása kuvina’”.

39 Tá ni̱ka̱ʼa̱n ta̱ Moisés ña̱yóʼo xíʼin na̱ israelita, ku̱suchíní-inina. 40 Ña̱kán xi̱ta̱a̱nní* nda̱koona ta xi̱kuni̱na ndaana nda̱a̱ xi̱ní yuku̱, ta ka̱china: “Yóʼo ki̱xaa̱ndi̱, ta xa̱a̱ íyo tu̱ʼvandi̱ ña̱ ku̱ʼu̱nndi̱ nu̱ú ni̱ka̱ʼa̱n Jehová, saáchi ni̱ki̱ʼvindi̱ ku̱a̱chi nu̱úra”. 41 Soo ta̱ Moisés ni̱ka̱ʼa̱nra: “¿Nda̱chun va̱ása kándíxandó ña̱ ni̱ka̱ʼa̱n Jehová? Va̱ása va̱ʼa kana ña̱ kúni̱ndó keʼéndó. 42 Va̱ása ku̱ʼu̱nndó saáchi kǒo Jehová íyo xíʼinndó, ta na̱ sáa̱-ini xíni ndóʼó sandíʼi-xa̱ʼa̱na ndóʼó. 43 Saáchi na̱ amalequita xíʼin na̱ cananeo xa̱a̱ íyo tu̱ʼvana ña̱ kanitáʼanna xíʼinndó ta kaʼnína ndóʼó xíʼin espada. Xa̱ʼa̱ ña̱ kǒo ndíku̱nkandó Jehová, kǒoka Jehová íyo xíʼinndó”.

44 Soo ni saá, va̱ása níkandíxana ta nda̱avana xi̱ní yuku̱ kán, soo arca ña̱ trato tú kúú kuenta Jehová ki̱ndoonú nu̱ú ndóo na̱ ñuu ta kán ki̱ndootu ta̱ Moisés. 45 Tasaá na̱ amalequita xíʼin na̱ cananeo na̱ xi̱ndoo yuku̱ kán nu̱una ta ki̱xáʼana kánitáʼanna xíʼinna, ta ta̱xínnana ku̱a̱ʼa̱nna nda̱a̱ Hormá.